লূক 4
4
ফোরাঃ যীশুগো আপ্রইৈমা খ্যাফোল্হো ক্রোজাখ্রাং
(মথি ৪:১-১১; মার্ক ১:১২,১৩)
1-2যীশুচা সেংস্যাংস ওয়িইঞেং আব্রিচুং ফ্রইরো, য়দেং খ্যংগা লাঃলিইরি। সেংস্যাংস ওয়িইঞেং ছংরো, যীশুচা রাক লিছিপেলুং সিলিপ্রাংমা ক্যাংলিইরি। য়াং আখিংমা মেংনেচা যীশুগো লঃফা প্রারো আপ্রইমা খ্যাফু ক্রেংলিইরি। য়াং রাক লিছিচা যীশু তুখুউলি মাঃচা মাসকলি। য়াংচা কিজু, দিঃ রাক রুওয়েংব্রিনক যীশুচা আচাআ মুওয়েলিরি।
3য়াংখা মেংনেচা যীশুগো প্রলিইরি, “নাংরা থাওরা ফুরা ঈ সাঃআ ছুগিরা, দিঃ ক্যককো ভংমু ফ্রঃ ছুলঃ।”
4যীশুচা মেংনেকো প্রলিইরি, “সেংস্যাংস কেইং চাউমা রুইরো হিকরি, ‘লুঃউচা ভংমুং তুখু চাঃলো মাহ্রাংনৈং।’”
5-6য়াংনক মেইংনেঃচা যীশুগো আম্রাং তং তদংদুঃ য়ুউ লাঃখারি। অর খ্যাং খ্যাং কাবামা হিচা আলুং মাংনেইংগো প্রারো প্রলিরি, “দিঃচারো আস্যাং অর দিঃচারোগো প্রিকলি প্রিকপ্রাক লুকরো ঙা নাককো পিইফু। আক্রংগা দিঃচারো ঙাগো পিইরো হিকচা। ঙা যাসুগো ছেন্দা হিকরিলি, ঙা য়াংসুউগো ঙা ছেংদা আলৈই পিনৈংরি। 7আগো নাং ঙাগো হ্রিখোলো ফোরাঃসখাং ছোলো কুগ্রুয়িরিছুগি ম্রাংচা আকুং নাক উচা পৈচি ফ্রৈমি।”
8যীশু য়াংসুউগো আফ্রি পিইলিইরি, “সেংস্যাংস কেইং চাউমা রুইরো হিকরি, ‘নাং নাক ফোরাস্যাংগোরা রুসিফিই, নাক ফোরাস্যাংগোরা সাসাক পুজ্ লুকফি।’”
9য়াংখা মেংনেচা যীশুগো যিরুশালেংদুঃ য়ুউলাখারি অর ওয়িইপাসানা ক্যং আথাকমা রেচিইরো যীশুগো প্রলিইরি, নাংরা থাওরা ফোরা ঈ সাঃ ফ্রইতিছুগি, দিঃগা খুং ছাং। 10আক্রংগা সেংস্যাংস কেইং চাউমা রুইরো হিকরি,
য়াংসুউচা য়াংসুউ তেমেংদরোগো, নাক আক্রংলিলাগো য়ুউরো আঃনা পিইলিইমি
যাস্যালিছুগি, য়াংসুউরো নাককো কিয়িছিলিইমি।
11য়াংসুউরো নাককো আলাকনা তিঃথালিইমি
যাস্যালিছুগি নাক আখ্রিইমা ক্যকলুং তঃরো মানারাঅং।
12যীশু য়াংসুউগো প্রলিইরি, “সেংস্যাংস কেইং চাউমা প্ররি, ‘নাং নাকমা থাওরা ফোরাগো মিচেংগি।’”
13আম্যুও ম্যুও লঃফারোগো প্রাব্রিনক মেইংনেঃচা তছং আতুওয়ক যীশুবাগা লাঃখারি।
নাসরতগা আস্যাং যীশু অওয়াদা
(মথি ৪:১২-১৭; মার্ক ১:১৪,১৫)
14য়াংনক যীশুচা সেংস্যাংস ওয়িঞেং আঃ প্রিজুংলো, গালীল প্রিনিদুঃ প্রেংরো লাঃখারি। যীশু তাঃরাচা য়াং হেঃতেবে হিকচা আঃরামা ক্যঞালিইরি। 15য়াংদেমা আখ্রা আখ্রা রিফুংচেরেমা যীশুচা সুয়েংসাং পিফু য়াংলিরি। য়াংখা আলুংসুউ যীশুগো ম্যাকন্হা পিগেলিরি।
16য়াংনক যীশু নাসরতদুঃ লাঃলিইরি। নাসরতমা যীশু ক্রিলিরি। যীশুচা কোঃ আস্যাতৈং প্যাংরো আঃনা রাকমা রিফুংচেরেদুঃ লাঃলিইরি। য়াংনক কেইংগো ফেফু আতুওয়ক থাঃলো রেলিরি।
17যীশু আলাকমা রিসিক যিশাইয় রুইচা কেইংগো পিগেলিইরি। আথংমা খ্যারোথাচা কেইংগো, ফ্রেংখা য়াং কেইংমা যীশুচা দিঃচাগো রুইরো রাঃরি,
18“ফুরাসাখাং ওয়িঞেংচা ঙা আঃপমা হিকরি,
আক্রংগা, ফুরারা ঙাগো দিঃআরামা সুওয়ংচা
যাফুলিছুগি, ঙা ছাংরিসারোবামা আকং তাঃরাগো ক্যঞাবেচি।
ফুরাসখাংচা ঙাগো, আখ্যয়েং ক্যারো হিসাবামা ক্যওয়েম্রক চাঃগা,
আকেইং লুঃউরোবামা, ম্রাংরাফু চাঃগাগো
প্রফুকিজু রুওয়েলৈতি।
যাসুউরো আঃপমা ঞ্যচিফ্রইতি,
ফুরাচা ঙাগো য়াংসুউরোগো ক্যুওয়েম্রক পিফু কিজু ঙাগো রুওয়েলৈতি।
19দিঃচাগো আপি ফুরাচা ঙাগো ক্যঞাফু রুওয়েলৈচাগা,
আগো ফুরাসখাং ঈ আখ্য ওয়াসানা প্রাফু আখিং ফ্রইব্যা।”
20য়াংনক যীশু প্রেংরো কেইংগো ফুংরো, য়ুংমা লূকসা আলাকমা পিঃরো থৈংলিরি। য়াং রিফুংমা হিচা লুঃউরো ম্যাকচিচা যীশুদুঃ ক্যাগেরি। 21য়াংখা যীশু লুঃউরোগো প্রলিরি, “সেংস্যাংস কেইং চাউমা দিঃ চাঃগাচা, গানি কুবাংরো নাথংরি খ্যাং খ্যাং আব্রিচুং ফ্রলিরি।”
22হিচা আলুংসুউ লুঃউচা যীশুগো ক্যঞাগেলিরি অর যীশু খুনাংগা আহ্লা আহ্লা চাঃগা ক্রারো এংঅগেলিরি। য়াংসুউরো প্রগেলিরি, “দিঃসু যোষেফ সাঃআ মুহুলঃ?”
23যীশু য়াংসুউরোগো প্রলিরি, “ঙা সিরি কুবাংরোচা, আগো সুংগেচা চাঃগাগো আম্হেং ঙাগো প্রগেমি, ‘ছিইসামা, কোগোকু কেইংমাজি।’ অরলি প্রগেমি, ‘কফরনাহূমা, যা অলুক লূকফু চাঃগা ঙারো ক্রাগেলিরি, য়াং অলুকরোগো আগো কোঃ ওয়ামালি লূকরো প্রামে।’”
24যীশুচা অরলি প্রলিইরি, “ঙা কুবাংরোগো আম্হেং প্ররি,খ্যাং রিসিগোছু কো ওয়ামা, লুঃরো মুরুসিইগে। 25দিঃ চাঃগাচা ম্হেংরি, এলিয় আখিংমা, যাখঅ সুংন্হঅখুওয়ে পেলুং মুও মুওরালি অর প্রিলুঃউং কংগং আঃচা ঙেসি-ঙেনা ফ্রইলিরি, য়াংখঅ ইস্রায়েল প্রিমা, কংগং আম্যা মাঃছামা হিকলিরি। 26য়জংছুগিলি, য়াংসুউরো তয়কতুলি, এলিয়গো মুরুওয়েলি। প্রফুছুগি সীদোন হেতেবেমা সারিফত রুওয়ামা মুছুমা মিঃমাদুঃরা রুওয়েলিরি। 27রিসি ইলীশায় আখিংমা ইস্রায়েল প্রিমা আম্যাগ্রি আনুংগে সানাসিঃ হিকলিরি, য়িগিলি য়াঙসুউরো তয়ককোলি আকং মাপ্যাংলি, প্রফুছুগি সিরিয়া প্রিমা নামান তয়ককোরা কেইংমাজিলিরি।”
28এ চগাঃগো ক্রাঃলো তরাঃচারাইমা হিরে লুঃউরোচা দঃসাঃ তাকায়লিরে। 29য়াংসুউরো থালো যীশুগো রুওয়া প্রাংদুঃ লঅ থুউহাগেতি, অর যীশুগো অকতু তুঃরো খ্যাফুকিজু, য়াঙসুরো রুওয়াবা নেংমা তং হিকলিরি, য়াঙ তং আম্রাংদুঃ যীশুগো য়ুউ লাঃখাগেতি। 30য়জংছুগি যীশুচা য়াং লুঃউরো আথিইগা থুওয়করো লাঃখালিইরি।
লুঃউ আপংরো কেইংমালিখ্রাং
(মথি ৮:১৪-১৭; মার্ক ১:২১-৩৯)
31য়াং নক যীশুচা গালীল প্রিনিমা কফরনাহূম ম্রুদুঃ লাঃলিইরি অর তাঃরারাকমা লুঃউরোগো সুয়েংসাং পিইলিইরি। 32য়াংসুউ সুয়েংসাং পিইচাগো লুঃউরোচা এংঅগেলিইরি আক্রংগা যীশুচা কুঃমা তাওয়েং হিরিন্হাক আতু চাঃগা প্রলিরি।
33য়াং তাঃরা চেরেমা, লুঃউ তয়ক হিকলিইরি, যাসুউগো নেএ কৈরো হিকলিইরি। য়াংসুউচা অঃরো প্রলিইরি, 34“অঃ নাজর রুওয়াগা যীশু, ঙারোনা কুঃবাং যা অলু হিরিলি? কুঃবাং ঙারোগো ছুংজিফু কিজু লাঃরিলঃ? ঙা সিরি কুঃবাং যাসুলি, কুঃবাং ফ্রইতিগা, থাওরা ফুরামা সেংস্যাংজ তয়ক।”
35যীশুচা য়াং মকং নেএকো হকরো প্রলিইরি, “তিতিকনিঃ, য়াংসুউগা থওয়করো লাঃলি।” য়াংখা, থুউ মকং নেএচা, আলুংসুউ আলিমা য়াং লুঃউগো ছংবলৈতি অর য়াংসুউগো তুখুউলি মকং মুলুকপ্রি, য়াংসুউগা থুওয়ক লাঃখারি।
36য়াংচাগো ম্রাংরো, আলুংসুউ এংঅরো, কুঃরো আতুওয়ংমা কুঃরো প্রগেলিরি, “দিঃচারো যা পুয়েং চাঃগালি’! তাওয়েংনা ক্ষেমতা য়ুউরো দিঃ লুঃউচা মকং নেঃরোগো আঃনা পিরি অর য়াং মকং নেঃরো থুঃওয়করো লাঃরি।” 37য়াং হেঃতেবে আঃরামা যীশু চাঃগাচা ক্যঞালিরি।
38য়াং নক যীশুচা তাঃরা চেঃরেকো বৈরো শিমোনরো ইংদুঃ লাঃখারি। শিমোন য়কখামাচা কংগং আনিং মকং হিকলিরি। য়াংসুউগো আকং লুকফু কিজু, যীশুগো আফিক থাঃগেলিরি। 39য়াংখা যীশু শিমোন য়কখামাবামা রেকরো, আফ্যাগো হকলিরি। য়জংছুখা, য়াংসুউ আফ্যাচা থুঃওয়ক লাঃখারি অর য়াংসুউচা খ্যাং খ্যাং থারো, য়াংসুউরোগো আঃচা আসক য়াংলিইরি।
40ঞাজা নিওয়ংখিংখা লুঃউরো অানা রঃগা ক্যারো হিচা লুঃউরোগো যীশুবাদুঃ য়ুলো লাইকায়তে। য়াং লুঃউঃউরোচা আম্যোঃ ম্যোঃ রগা ওয়েদনা খাইংলো হিকলিরি। যীশু রগাসে আকুংসুউরো কাইনথামা কো আলাতগো তাংলো অানা রঃগাগো ঙ্রিংখ্যাইংজিরে। 41লুঃউবংরো কাইনথাগাব নায়ছোঃ রোলেঃ থওয়ক লখারে। য়াং নায়ছোঃরো অ লো প্রঃরে, “কোদচাগা থাওরা ফোরাঃসখাং সাঃদ ফ্রইতি।” যীশু খ্রীট ল্হো য়াংসুউরো সিকরে। য়াং আতুওয়ক যীশুচা হকলো ছুংমালো য়াংসুউরো খোনাংগো পুওয়িই লৈতে।
42আরুং আখিংখা যীশু য়াং আঃরাগো বৈরো চিঃছিক আঃরা তেরেদুঃ লাঃখারি। লুঃউরোচা যীশুগো হ্রালো য়াংসুবাদুঃ লাঃখাগেতি অর যীশুচা য়াংসুউরোগো বৈরো মাঃলারাঅং আতুওয়ক যীশু য়াংসুউরোবামা থাঃফু ক্রেংগেলিইরি।
43য়াংখা যীশু য়াংসুউরোগো প্রলিইরি, “অরলি যে যে আঃরামা ঙা থাওরা ফোরা নেংঙেংদ আকং তাঃরাগো তাঃরা হঃরাফুসিই আক্রংগা দিঃ অলুক আতুওয়করা থাওরা ফোরা ঙাগো রুওয়েলৈচা।”
44য়াংনক যীশুচা যিহূদী প্রিমা আখ্রা আখ্রা রিফুংচেরেমা লাঃলো তাঃরা হঃপ্রালিইরি।
Currently Selected:
লূক 4: BBSRMZ
Highlight
Share
Copy
Want to have your highlights saved across all your devices? Sign up or sign in
