প্রেরিত 3
3
আঃহ্লুঃউ খেংসা খিঃগি কং লাঃখ্রাং
1তারাক সুং নারিমা ছুউক তংখিংখা পিতরনা যোহন ওয়িপাসা ক্যংদুঃ লাঃগেলিরি। 2লুঃউরো তারাক মুক্যুয়েং তয়ক লুঃউগো থেংয়ুউলাঃরো ওয়িপাসানা ক্যংমা আহ্লা নাঃমিনা লেংখাওয়ামা থাঃগেতি। য়াংসুউ মুয়িরিকাবাং আঃকি হিকলিরি। যাসুরো ওয়িপাসানা ক্যংদুঃ লাঃগেতি, য়াংসুউরোগা আহ্লুউ খেংজিফু কিজু য়াংসুউগো য়াংদে থাগেতি। 3পিতরনা যোহনগো ওয়িপাসানা ক্যংদুঃ ওয়ংচাগো ম্রাংরো, য়াংসুউ য়াংসুউরোগু আহ্লুউ তংলিরি। 4পিতরনা যোহন য়াংসুউদুঃ চঃচ ক্রিগেলিরি। য়াং নক পিতর প্রলিরি, “ঙারোদুঃ ক্রি।” 5য়াংখা থুউ লুঃউচা য়াংসুউরোগা আহ্লুউ রাঃফু থাংরো য়াংসুউরোদুঃ ক্রিলিরি।
6য়াংখা পিতর প্রলিরি, “ঙামা রুঈ মুঈ তুখুউলি মিহি। ছুগি ঙামা যা হিরিলি নাক্কু পিরি। নাসারতকা যীশু খ্রীট্ নাঃমিনা থাঃরো রেঃ অর লাঃ।” 7নক্কা য়াংসুউ থুউ লুঃউ ঞাফাকক আলাক্কু কৈরো থুউলিরি অর য়াংখা খ্যাং খ্যাং য়াংসুউ আখ্রিনা আঃছচা কেগেং ফ্রলিরি। 8য়াংসুউ খুংরো রেঃলিরি অর লাঃলিইরি। নক্কা য়াংসুউ ওসারো ওসারো, খুংরো খুংরো অর থাওরা ফুরাগো খিমুওয়েংরো য়াংসুউরোনা আঃতু ওয়িপাসানা ক্যংদুঃঃ লাঃলিইরি। 9-10লুঃউরো য়াংসুউগো সাওয়াচাগো ম্রাংরো অর থাওরা ফুরাগো খিমুওয়েংচাগো ম্রাংরো সিঃগেলিরিচাগা, দিঃচা থুউ লুঃউ তয়কতৈংব্যা, যাসু ওয়েপাসানা ক্যং আহ্লা নাঃমিনা লেংখাওয়ামা থৈরো আহ্লুউ খেংচা। য়াংসুউমা যা ফৈলালিরি, য়াংচাগো ম্রাংরো লুঃউরো কংগং এংঅগেলিরি।
পিতরচা ওয়িপাসানা ক্যংমা
11ছুগি য়াং আহ্লুউ খেংসাচা পিতরনা যোহন নক্কা মাপ্রুলিব্যা। লুঃউরো পিতরমা য়াং আলুকমা এংঅফুয়ি ফৈরো য়াংসুউবাদুঃ ব্রি লাঃগেলিরি। 12শলোমন নাঃমিনা প্রঃ হিকচা আঃরামা য়াংসুউরো হিকলিরি। দিঃচাগো ম্রাংরো পিতর লুঃউরোগু প্রলিরি, “ঈস্রায়েরো, দিঃ চাগো ম্রাংরো যাফু এংঅগেতিলি? ঙারো কুঃদৈং আঃনা দিঃচা মুহুকি থাওরা ফুরাগো রুসিই তাঃরা গুংধনা দিঃ লুঃউগো লাঃনৈফু আঃগু পিইলিরি আতুওয়াকনা যাফুলি কুবাংরো ঙারোদুঃঃ ক্রি নিংগেতিলি? 13অব্রাহাম, ঈসহাকনা যাকোবমা থাওরা ফুরা প্রফুছুগি ঙারো আচৈংমা থাওরা ফুরা দিঃ আলুং আতুওয়ংকা নিংরো কুঃ ক্যুং যীশু গুংধ আঃগু ফু্ওঅং প্রালিইরি। কুবাংরোগা যীশুগো সেঃ বৈফু আতুওয়ক তিঃ পিগেলিরি। পীলাত য়াংসুউগো রুওয়েফু ক্রিলিরি, য়িগিলি কুবাংরো পীলাত হ্রিঃগা য়াংসুউগো লাক মাখেংগেলি। 14কুবাংরো থুউ সেংস্যাংসনা গিঃধি হিরি লুঃউগো লাক মাখেংরো তয়ক লুঃউ সেঃসাগো রুওয়ে পিইফু আতুওয়ক প্রগেলিরি। 15যাসু আঃসাক পিনৈংরি, য়াংসুউগো কুবাংরো সেঃ বলৈকেতি, য়িগিলি থাওরা ফুরাচা আঃসিগা য়াংসুউগো আহ্রাং লুকরো থুউলিইরি; য়াংদে ঙুরো ফ্রতি সাকসি। 16দিঃ লুঃউ কুবাংরো ম্রাংচা, অর কুবাংরো সিকরি, যীশু আঃপমা ক্যুংরি কিজু, যীশু নাঃমি গুংধনা য়াংসুউ আঃ রাঃলিরি। যীশু আতুওয়ংগা নিংরো যা আঃক্যুং লাঃরি, য়াং আঃক্যুংরা কুবাংরো হ্রিঃগা য়াংসুউগো আব্রিচুং কেইংমাজিলু আকং লুকলিইরি।
17“আগু ঞিং-আকুরো, ঙা সিঃরি কুবাংরোমা গংখ্যুকরোঞ্যং কুবাংরোলি মিঃসিব্রি যীশুগো থুউ খেবলৈকেতি। 18ছুগি থাওরা ফুরাচা আয়াংকাবাং হিচা আলুং রিঃসিরো আতুওয়ংগা নিংরো প্রলিরিচাগা, য়াংসুউ মশীহচা দুঃখাওয়া খেংরাফু অর য়াং চাঃগা থাওরা ফুরাচা দিঃপুয়েং লুঃউরো আব্রিচুং ফ্রলিরি। 19য়াংচাকিজু কুবাংরো আপ্রইকা চিঃকো হ্লিরো থাওরা ফুরাদুঃ ফিইগে, যাফুলিছুগি কুবাংরো আপ্রইগো ছিনৈংঅং; 20দিঃপুয়েং ছুগি থাওরা ফুরাচা য়াং মশীহগো(যীশু), রুওয়েরো কুবাংরোগু কেগেং লুঃউরো তাংনৈঅং। কুবাংরো আতুওয়ক য়াংসুউগো আঃরা পিচা। 21থাওরা ফুরাচা আলুংচাগো আয়াংখা পুয়েং প্রেংরো য়ুলাফুচাগো, আয়াংকাবাং সেংস্যাংস রিসিঃরো আতুওয়ংগা নিংরো প্রঃ থাঃলিরি। থাওরা ফুরাচা মানৈরাক তৈঅং দিঃ চাঃগাচা মাব্রিচুংলি য়াল্যেকরাক তৈঅং যীশুচা থাওরা ফুরাফুংমা নিংরাফু।” 22মোশিচা প্রলিরি,
‘নাংরোমা আস্যাং থাওরা ফুরা নাংরোমা ঈস্রায়ে ঞিংরো আতুওয়ংগারা নাংরো কিজু ঙাঞ্যং তেঃথেং তয়ক রিঃসি ফ্রচিফু। য়াংসুউ চাঃগা আতৈং নাংরো নিংরাফু। 23যাসু য়াংসুউ চাঃগুগো নাঃমথংলি, য়াংসুউগো য়াংসুউরো লুঃউ আতুওয়ংগা নিংরো তাখ্যাংদৈংমা প্যয়কবলৈফু।’
24“দিঃচাগো মুহুকপ্রি শমূয়েরগা কাবাং চাঃরো রুওয়েংহাচা আলুং রিসিইরো, যামুছু প্রঃলালিচা, য়াংসুউরোলি দিঃ আখিং কাঃলা চাঃগাগো প্রঃ লালিরি। 25অর কুবাংরোগা য়াং রিঃসি আচৈং। কুবাংরো আচৈংরো কিজু থাওরা ফুরা যা আলুং লুকলিইরি, কুবাংরোগা য়াংচামা আঃফু রানৈসু। থাওরা ফুরাচা অব্রাহামগো দিঃ চাঃগা প্রঃরো য়াং আলুককো লুকলিইরি, ‘নাঙ আচৈং আতুওয়ংগা নিংরো কাবা আলুং আচৈংরোরো ছুউক রাঃফু।’ 26কুবাংরো আলুংসুউগো মকং লেংগা হ্লিরো ছুউক পিইফু আতুওয়করা থাওরা ফুরাচা য়াংসুউ ক্যুয়েং যীশুগো ম্হেরো পাথামা কুবাংরোদুঃ রুওয়েলৈতি।”
Currently Selected:
প্রেরিত 3: BBSRMZ
Highlight
Share
Copy
Want to have your highlights saved across all your devices? Sign up or sign in
