প্রেরিত 4
4
মহা অাতৈংবাংগ্রি হ্রিইগা পিতরনা যোহন
1পিতরনা যোহন যাখা লুঃউরোনা চাঃগা প্রলিরিলি, য়াং আখিংমা পুরোহিতরো, ওয়িপাসানা ক্যংমা আগ্রি য়ুংসিনা সদ্দুঃকীরো য়াংসুউরোবাদুঃ লাঃগেলিরি। 2য়াংসুউরো কংগং পাঃছা লুক্কেলিইরি, আক্রংগা পিতরনা যোহন লুঃউরোগু সুওয়েং সাং পিঃগেলিরি অর যীশু আতুওয়ংগা নিংরো আঃসিরো প্রেংরো হ্রাং থাফুচা আক্রংআরাগু প্রঃ পেকেলিইরি। 3য়াংসুউরো পিতরনা যোহনগু তিঃগেলিরি, ছুগি য়াংখা মুওয়েং ফ্রব্যা কিজু মুঃলাং তরক থংমা থাঃগেলিরি। 4য়জংছুগি যাসুরো পিতর চাঃগাগো নাথৈংগেলিরি, য়াংসুউরো আতুওয়ংমা আম্যা লুঃউ ক্যুংগেলিরি; য়িগি য়াংখা ক্যুংসু লুঃউম্যারো আম্যা ফৈরো আঃনৈ আম্যা ঙাথংহ্লক ফ্রলিরি।
5মুঃলাংনক যিহুদীরোমা আগ্রি পুরোহিরো, ওয়াগ্রিরোনা ডেংমা ছাঃরারো তাঃসাংদৈংমা যিরুশালেংমা চুঃক্কেলিরি। 6য়াংদেমা মহা ফুংগ্রি হাননলি হিকলিরি। অর হিকলিইরিচা কাঈয়াফা, যোহন, আলেকসান্দরনা মহা ফুংগ্রিমা ঈংসারোনা আম্যু আম্যু লুঃউরো হিকলিরি। 7য়াংসুউরো পিতরনা যোহনগো আঃলিমা রেঃচিরো মিংগেলিরি, “নাংরো যা আঃনা দিঃচা মুহুকি যাসু নাঃমিনা দিঃ আলুকরোগু লুক্কেতিলি?”
8য়াংখা পিতর সেংস্যাংস ওয়িঞেং প্রিজুংলো য়াংসুউরোগু প্রলিরি, “আগ্রি ফুংগ্রিরোনা ওয়াগ্রিরো, 9আঃকি তয়্ক্কু কিজু প্রুরিলো গাঃনি কুবাংরো য়াংচাগো য়ুউরো আঃমিং লুক্কেচাগা, য়াং লুকচা যা পুয়েং আকং ফ্ররিলি। 10য়জংছুগি কুবাংরোনা হিকচা আলুং ঈস্রায়েলীরো দিঃ চাঃগাগো নাঃথংরো থাঃগে, নাসরতগা থুউ যীশু খ্রীট, যাসুগো কুবাংরো থুউ খেঃকেলিরি অর থাওরা ফুরা আঃসিগা আহ্রাং লুকলিইরি, য়াং আঃনা দিঃ লুঃউচা আব্রিচুং কেইংমালো কুবাংরো হ্রিইগা রেঃরো হিরি। 11সেংস্যাংস কেইং চাউ চাঃগা আতৈং যীশু খ্রিটচা, ‘য়াং ক্যক লুং, যাচাগো ওক ইং লুকচা মিস্রিরো প্রফুছুগি কুবাংরো মুসুংব্রি বৈকেলিরি; ছুগি য়াংচারা কংগং আম্যা আলুগ্রিই ক্যক লুং ফ্রলালিরি।’ 12আপ্রইকা রুওয়েলৈঅং অর তয়ক্কালি মাঃরানৈং। আক্রংগা কাবা লুংমা অর দিঃ পুয়েং তয়কলি মিহিকব্যা, যাসু নাঃমিনা ঙারো আপ্রইকা রুওয়েলৈঅং।”
13পিতরনা যোহন রিঃগো ম্রাংরো অর য়াংসুউরো চাঃবি মাঃতেচানা লুকরোচাঃসা লুঃউ সিকরো য়াং গংখ্যুকরো এংঅগেলিরি, অর য়াংসুউরো যীশুনা আঃতু হিকলিরি, য়াংচাগোলি সিঃগেলিরি। 14যা লুঃউচা আকং ফ্রলিরি য়াংসুউগো পিতরনা যোহন নেংমা রেঃরো হিঃচাগো ম্রাংরো য়াংসুউরোগু অর ছেংগ্যাংফাক চাঃগা প্রফু তুখুউলি মাঃরালিব্যা। 15য়াংচা কিজু য়াংসুউরো মহা আতৈংবাংগ্রিগা য়াংসুউরোগু প্রাংদুঃ লাঃফু আঃনা পিইলিরি। য়াংনক য়াংসুউরো আলুংসুউ তুজুতিঃ লুকরো আঃতৈংবাং লুক্কেলিইরি। 16য়াংসুউরো প্রগেলিরি, “দিঃ লুঃউরোগু য়ুউরো ঙারো যা লুকফুলি? যাসুরো যিরুশালেংমা নিংরি য়াংসুউরো আলুংসুউ সিকচাগা, দিঃ লুঃরো প্রজারা তুখু এংঅফুয়ি আলুক লুক্কেরি, অর য়াংচাগো ঙারো লাক মাখেংলি মাপ্যানৈ। 17য়িগিলি লুঃউরোবামা দিঃ চাঃগাচা অর আম্যা মাঃকিরাঅং আতুওয়ক দিঃ লুঃউরোগু আক্রক থিঃরাফু। আক্রংগা য়াংসুউরো তয়ক্কুলি যীশু আক্রংলিলাগু য়ুউরো অর তুখুউলি চাঃগা মাঃপ্ররাঅং।”
18য়াং নক য়াংসুউরো প্রেংরো পিতরনা যোহনগো আঃথিদুঃ খঃগেলিরি অর আঃনা পিইগেলিরিচাগা, য়াংসুউরো যীশু আক্রংলিলাগো য়ুউরো তুখুউলি চাঃগা মঃপ্রগি অর সুয়েং সাং মিপিগি। 19আপ্রইিমা পিতরনা যোহন প্রলিরি, “কুবাংরো আঃনাগো কৈংফুলঃ, মহুক্কি থাওরা ফুরা আঃনাগো কৈংফুলঃ? থাওরা ফুরা ম্যাকচিমা যাচা ম্হেংরিলি, কুবাংরো তাঃরা চৈরো ক্রিগে। 20ঙারো যা ম্রাংরিলি অর ক্রালিরিলি, য়াংচাগো মপ্রব্রিগা মানিংনৈ।”
21য়াংখা য়াংসুউরো পিতরনা যোহনগো অরলি আম্যা আক্রক থিঃরো রুওয়েলৈকেতি। লুঃউরোগু ক্রকরো য়াংসুউরো যা ডেং পিফুলি য়াংচা আতৈংবাং মলুকনৈলিগে আক্রংগা যা ফ্রলাঃলিরি য়াংচাগো য়ুউরো আলুংসুউ থাওরা ফুরাগো খিংম্যুংগেলিরি। 22যা লুকচা এংঅফুয়ি ফ্ররো আকং ফ্রলিরি, য়াংসুউ আঃসাকচা লিঃছিগ্যা হিকলিরি।
ক্যুসারো ছুঃউকউতংখ্রাং
23য়াংচাগা রুওয়েরো পিতরনা যোহন য়াংসুউরো কুঃরো আতুওয়ং লুঃউরোদুঃ লাঃগেলিরি অর আগ্রি ফুংগ্রিরোনা ওয়াগ্রিরো য়াংসুউরোগু যা যা প্রগেলিরি, য়াংচা আলুংচা য়াংসুউরোগু প্রপ্রাগেলিরি। 24দিঃ চাঃগাগো ক্রারো য়াংসুউরো আলুংসুউ তিঃজিতৈং লুকরো থাওরা ফুরাবামা ছুউক তংরো প্রগেলিরি, অ আস্যাং, কুঃবাং গংখাং ব্রাং, কাবা লুঃউং, সমুদ্রা অর য়াংদেমা যামুছু হিকচা আলুংগো লুকলিইরি। 25কুঃবাং সেংস্যাংস ওয়েঞেং আতুওয়ংগা নিংরো কুবাংমা ক্যুয়েং, ঙারোমা আচৈ দায়ূদ খুনাংগা প্রলিরি,
‘যাফু কাবামা লুঃউরো থুউদুরং-দুরং ফ্রক্কেতিলি?
যাফু লুঃউরো মুহুক মাঙেংব্রি আথুউঙাং লুক্কেতিলি?
26আস্যাংনা য়াংসুউ মশীহগো ছেংগ্যাংফাক লুঃউরো কাবামা মাংরো তুজুতৈং রেঃক্কেতি,
অর থিংক্যংসারো খুঃরো ছুয়িঞোয়ি লুক্কেতি।’
27“কুবাংমা সেংস্যাংস ক্যুয়েং যীশু, যাসুগো কুঃবাং মশীহ ছুরো আঃরা পিইলিরি, মাং হেরোদনা পন্তীয় পীলাত দিঃ ম্রুমা য়াংসুউগো ছেংগ্যাংফাক লুঃউরো যিহুদী মুহুরোনা ঈস্রায়েলীনা আম্হেং পংগেরি। 28কুঃবাং ছেন্দা অর আঃনা হ্রিইগাকাবাং যা প্রাসানা ফ্রফু য়াংথালিরি, য়াংসুউরো য়াংচারা লুক্কেলিইরি। 29অর অঃগু, অঃ আস্যাং, য়াংসুউরো যা পুয়েং ঙারোগু আক্রক থিঃরি কুঃবাং ম্রাংবারি। কুঃবাং ক্যুয়েংসিরোগু আঃ পিফুচাগা, য়াংসুউরো কংগং রিঃনা কুবাংগু য়ুউরো সুওয়েং সাং পিনৈঅং। 30কুঃবাং অাঃলাক হ্লেং পিবা, যাফুলিছুগি কুঃবাং সেংস্যাংস ক্যুং যীশু নাঃমিনা য়াংসুউরো লুঃউরোগু কেইংমাজিনৈঅং, অর এংঅফুয়ি আঃলুঃউনা লাকখানা অলুক লুকনৈংঅং।”
31যা আঃরামা য়াংসুউরো পংরো ক্যাগেরি, ছুঃউক তংব্রিনক য়াং আঃরাচা লুঃউরো তাকলিরি। অর য়াংসুউরো আলুংসুউ সেংস্যাংস ওয়েঞেংনা প্রিজুংলু, রিঃনা থাওরা ফুরা অওয়াদাগু সুওয়েং সাং পিইগেলিইরি।
ক্যুংসারো যা লুক্কেতি
32খ্রীট্গো ক্যুংসারো আলুংসুউ চিই ঞোয়েংনা তুখুতৈং হিকগেলিইরি। তুজুং তুখুকু য়াংসুউরো কুঃচা ছুরো আঃফু মাঃখেং, প্রফুছুগি আলুংচা কুঃ লুদৈং সুংগেলিরি। 33তামেংদরো মহা আঃনা সাকসি পিইগেলিচাগা, আস্যাং যীশু আসিইগা আহ্রাং ফ্রঃরো থাঃলিরি, অর য়াংসুউরো আলুংসুউ আপমা থাওরা ফুরাঈ কংগং আখ্যা সাঃনা হিকলিরি। 34-35য়াংসুউরো আতুওয়ংমা তুখুউলি মিঃহিংচা মিঃহিংলি আক্রংগা যাসুরোমা হিং, য়াঃ হিকলিরি, য়াংসুউরো য়াংচাগু রংরো টেংগা পয়স্যা য়ুউরো তেমেংদরো খ্রারাংমা থাঃগেতি। নক্কা যাসুমা যা পুয়েং লুকরিলি য়াং পুয়েং য়াংসুউগো পিঃগ্গেতি।
36যোষেফ নাঃমিনা লেবি আচৈংগা তয়ক হিকলিরি। সাঈপ্রাস তংলুংমা য়াংসুউরো ঈং হিকলিরি। য়াংসুউগো তেমেংদরো বার্ণবা প্রফুছুগি চিঃ ঞোয়েং আঃ পিইসা ছুরো খঃগেতি। 37য়াংসুউমা আঃরা তুগুওয়ক হিকলিরি, য়াংসুউ য়াংচাগো রংরো টেংগা পয়স্যাগো য়ুউরো তেমেংদরো খাহ্রাংমা থাঃলিরি।
Currently Selected:
প্রেরিত 4: BBSRMZ
Highlight
Share
Copy
Want to have your highlights saved across all your devices? Sign up or sign in
