প্রেরিত 2
2
তিবিরো সেংস্যাংস ওয়িঞেংগো রাখ্রাং
1য়াং লৈগারাক নক আখক ঙাছি ফুখিং রাকমা তিবিরো তাঃরা তৈংমা আচুক ক্যাগেলিরি। 2য়াংখা বুরুন খুনৈ প্যাংরো আগাসিগা লিঃ লাঃচা আসেংঞ্যং তুখু আসেং লাঃলিইরি অর য়াংসুউরো যা ঈংমা হিকলিরিলি, য়াং ঈংমা আসেংচা খ্যুংলিইরি। 3তিবিরো ম্রাংগেলিরি, মিং স্যাঅং থেথেং প্রি লাঃখারি অর য়াংচা য়াংসুউরো আলুংসুউ আপমা ক্যালিরি। 4য়াংচানা য়াংসুউরো আলুংসুউ সেংস্যাংস ওয়েঞেংগো রাঃগেলিরি অর য়াং ওয়িংঞেংচা যাসুগো যা পুয়েং চাঃগা গুংধ আঃ পিইলিরিলি, য়াং পুয়েং য়াংসুউরো আক্রা আক্রা আঃমুনা চাঃগা প্রগেলিরি।
5য়াং আখিংমা কাবাঃ আঃরে আঃরে আঃরাগা থাওরা ফুরা কুগুয়িসা যিহূদীরো যিরুশালেংমা লাঃরো নিংগেতি। 6য়াংসুউরো থুঃউঃ আসেংগো ক্রাগেলিরি অর আম্যা লুঃউঃউউ য়াংমা লাঃরো চুক্কেলিরি। কুঃ আঃম্যুগো তিবিরো খুঃনাংগা ক্রারো য়াংসুউরো এংঅফুয়ি ফৈকেরিব্যা। 7য়াংসুউরো কংগং এংঅফুয়ি ফৈরো প্রগেলিরি, “দিঃ চাঃগা প্রচা লুঃউরো, আলুংসুউ গালীলিগা লুঃউরো মহুকলঃ? 8য়জংরা ছুগি, যা পুয়েং ফৈরো ঙারো আলুংসুউ কুঃ মিঃখাং আম্যুগো, য়াংসুউরোগা ক্রারিলি? 9পার্থীয়, মাদীয়, এমলীয় লুঃউ অর মেসোপতেমিয়ামা নিংগেসা লুঃউরো, যিহূদীয়ানা কাপ্পাদকিয়া, পন্তনা কাঃবা তুদিয়া প্রিনিগা, 10ফরুগিয়ানা পাম্ফুলিয়া, মিশরনা কুরীণী নেংগা লিবিয়া লৈংখুক আঃরাগা লুঃউরো, রোম ম্রুগা যা যিহূদীরোনা যিহূদী ভাষাগো ক্যুংসো যিহূদী মহুরোলি লাঃগেতি। 11ক্রীট তং ম্রুমা লুঃউরোনা আররীয়েরো আলুংসুউগা ঙুরো কুঃ ভাষা চাঃগানা থাওরা ফুরাঈ আল্যেংদারা আকং লুঃউ চাঃগাগো য়াংসুউরো প্ররো ক্রারি।”
12য়াংসুউরো এংঅফুয়িনা প্রফুমাঃরা ফৈরো তয়্ক্কু তয়ক মিংগেলিরি, “দিঃ আদিপি যাঃলি?”
13অর আক্রা তিবিরো আরিঃ আঃসুয়েং প্রুকরো প্রগেলিইরি, “য়াংসুউরো আরাক সকরো য়ক্কেরি।”
লুঃউরো বামা পিতর প্রচা চাঃগা
14য়াংখা পিতর থুউ তিছি তয়ক তিবিনা আতু রেঃরো আঃনা অঃরো য়াং লুঃউরোগু প্রলিরি, যিহূদী লুঃউরো অর যাসুরো যিরুশালেনমা নিংগেতি, কুবাংরো সিকরো থাঃগে অর চিঃ খ্যারো ঙা চাঃগা নাতংগে। 15কুবাংরো তুওয়কতিচা দিঃসুরো আরাক য়ক্কেতি, ছুগি মুহু, আক্রংগা আগুগা চঃজগা কুঃ নারিসি। 16দিঃচা থুউ প্রাসানা ঞ্যংব্যা যা চাঃগাগো ঋষি যোয়েল প্রলিরিচাগা, থাওরা ফুরা প্ররি,
17‘আছুং রাকমা আলুংসুউ আপমা ঙা ঙামা ওয়িইঞেংগো সুওয়েং পিইফু। য়াংখা নাংরো সাঃ সিঃমিংরো ঋষিঞ্যং থাওরা ফোরা মাং চাঃগাগো প্রগেমি, নাংরোমা আঃপ্যুরো ম্রাংথাংমি, নাংরোমা ওয়াগ্রিইরো ঈংমাক মাক্কেমি। 18প্রফুছুগি, য়াং আখিংমা ঙামা ক্যুংসি ক্যুংমারো আপমা ঙা ঙাক ওয়িঞেংগো সুওয়েং পিফু। য়াংখা য়াংসুউরো ঋষিঞ্যং থাওরা ফুরা মাং চাঃগাগো প্রগেমি। 19ঙা আঃকাসি গংখাংমা এংঅফুয়ি এংঅফুয়ি প্রাসানা প্রাফু, অর অক্কা কাবামা জেঃ জেঃ লাকখানা প্রাফু, প্রফুছুগি সুয়িঃ, মিং অর কংগং আম্যা মুঃখু প্রাফু। 20আস্যাংমা য়াং আকংনা গুংধ প্রিজুংফু রাক লেফু রিঃগা নিংচা মঃমৈ ফ্রঃলাফু অর লাঃচা সুয়িঞ্যং ফ্রফু। 21রওয়েফু আতুওয়ক খ্যাংসুমুছু আস্যাংগো তাঃগি য়াংসুউ রুওয়েমি।’
22ঈস্রায়ে লুঃউরো, দিঃ চাঃগাগো নাথংগে। নাসারতগা যীশু আতুওয়ংগা নিংরো থাওরা ফুরাচা কুবাংরো আতুওয়ংমা আকংনা এংঅফুয়ি আলুক লুকরো কুবাংরোমা তাং প্রালিরিচাগা, য়াংসুউ যীশুগো রওয়েলৈতি, অর দিঃ চাঃগাগোগা কুবাংরো সিকগেতি। 23থাওরা ফুরা মাং যাসু হ্রিঃগাকাবাং আলুংচা সিকরি। য়াংসুউ হ্রিইগাকাবাং আস্যাখ্যারো হিলিচাগা, যীশুগো কুবাংরো আঃলাকমা এফু। 24ছুগি থাওরা ফুরা মাংচা সিঃমাং দুঃখাওয়াগা খ্যুওয়েরো, আঃরাং লুঃউরো তাংলিরি। আক্রংগা সিঃমাংচা য়াংসুউগো তিঃ থালৈঅং আঃ মিহি। 25দায়ূদ য়াংসুউ আক্রং আরাগো প্রলিরি,
‘ঙা ম্যাকচি খ্যাংখামুছু আস্যাংদুঃ হিরি;
য়াংসুউ ঙা ঞাফাক্কা হিকরি লুঃউ, ঙা তদৈং আম্রিচি নিংফু।
26য়াংচা কিজু ঙা চিইচা অপ্য প্রিরো,
ঙা স্যাচা অপ্য চাঃগা প্ররি,
ঙা কেইংথালি রাঃফুগো ম্হেরো হ্রাং নিফু।
27যা স্যালি ছুগি নাং ঙাগো সিঃরি আঃরামা খ্যারো মাঃথামু।
নাক্কু রোঃসিসা কেইংথাগো কুঃবাং মাপ্যাকচিমু।
28লঃগা লেংমা কুঃবাং ঙাগো প্রলিচাগা;
কুবাংবামা নিংগি হিফু আব্রিচুং অপ্য।’
29ঞি-আকুরো, ঙা দিঃ চাঃগাগো কংগং আম্হেং প্রঞ্যংচাঃগা, মাং জৈং ফাখাং দায়ূদ সিঃ লাঃখাব্যা। য়াংসুউগো সুঃত সাংবলৈপ্যা অর য়াংসুউ সাংখ্যুংচা আঃগুলি দিঃমা হিরিসি। 30য়াংসুউ তয়ক ঋষি হিকলিরি অর য়াংসুউ সিকলিইরিচাগা, থাওরা ফোরা দিঃ চাঃগাগো কিং প্রুকরো গাঃধি খেলিরিচাগা, য়াংসুউ মাং নেংমা য়াংসুউ আচৈং আথিগা তয়্ক্কু থৈজিফু। 31হ্রিদুঃযা ফ্রফুলি য়াংচাগো দায়ূদ ম্রাংলিরি কিজু আঃসিগা মশীয়া প্রেংরো হ্রাংথাফু আক্রংআরাগু প্রলিচাগা, সিঃরামা মশীয়াগো খ্যারো মাঃথা অর য়াংসুউ কেইংথাগুলি মাপ্রাকচি। 32থাওরা ফুরাচা য়াং যীশুগো আহ্রাং লুঃউরো থুঃউলিরি অর ঙারো আলুঃউংসু সাকসি ফৈতি। 33থাওরা ফুরা ঞাফাক্কা থৈংফু আল্যেংদারা ম্যাহ্না য়াংসুউগো পিইলিরি অর গিঃধি লুঃউচা সেংস্যাংস ওয়িঞেংচা য়াংসুউ ফাখাং থাওরা ফুরাবাগা রালিরি; অর আগু কুবাংরো যা ম্রাংগেতি অর ক্রাগেতি য়াংচারো যীশুরা পিইলিরি। 34-35দায়ূদ কুঃদৈং থাওরা ফুরাফুংদুঃ মাঃলালি, য়িগিলি য়াংসুউ প্রলিরি;
‘থাওরা ফুরাচা ঙু আস্যাংগো প্রলিরি,
মনক তৈঅং ঙা নাক রেংসুরোগু নাক ফাওয়া অক্কা মাঃথালি
য়াল্যেক রকঅং নাং ঙা ঞাফাক্কা থৈং।’
36“য়াজংকিজু ঈস্রায়েল লুঃউ আলুংসুউ দিঃ চাঃগাগো কংগং আম্হেংলুঃউ মেঃফুচাগা, যাসুগো কুবাংরো থুউ খেকেরি, থাওরা ফুরাচা য়াং যীশুগো আস্যাংনা মশীয়া দিঃ নৈখু আঃরাগো পিইলিরি।”
37দিঃ চাঃগাগো ক্রারো লুঃউরো কংগং চিই নাঃগেরি। য়াংসুউরো পিতরনা আক্রা তেমেংদরোগু মিংগেলিরি, “ঞিং- আঃকুরো, ঙারো যা লুফুলি?”
38আপ্রইিমা পিতর প্রলিরি, “কুবাংরো তয়ক মক্যঈং আপ্রইকা খুওয়ং রুওয়েফু কিজু আপ্রইকা চিই হ্লিগে অর যীশু খ্রীট নাঃমিনা রিঃখ্যু মাঙ্গালা য়ুউগে। কুবাংরোচা সেংস্যাংস ওয়িইঞেংগো আহ্লুউ রাঃগেমি। 39কুবাংরো কিজু, কুবাংরো সাঃ সিমিং কিজু অর যাসুউরো আওয়িইমা হিকরি, তখুওয়েংমা প্রফুছুগি ঙারো আস্যাং থাওরা ফুরা য়াংসুউ কুঃ লুঃউ ফ্রইফু কিজু যাসুউরোগু খঃফুলি, য়াংসুউরো আঃলুঃউসো কিজু দিঃ গাঃধি খেংলিইরি।”
40দিঃচাগাগো মুহুকপ্রি অরলি কংগং আম্যা চাঃগা প্ররো পিতর সাকসি পিরিরি। য়াংসুউ লুঃউরোগু দিঃ চাঃগা প্ররো নাঃলি জিফু ক্রিলিরি, “দিঃ খঃমা আচেংযা- আছাংখ্রাং মিহিরি লুঃউগা কুঃগু মাঃরো থাঃ।”
41যাউসুরো য়াংসুউ চাঃগাগো ক্যুংগেরি য়াংসুউরো রিখ্যুও মাঙ্গালা য়ুউগেরি। অর তিবিরো আফুয়িরোনা আঃতু য়াং রাকমা থাওরা ফুরাচা আঃয়ক সুংথংল্হক লুঃউগো সুওয়ংলিইরি।
খ্রীটগো ক্যুংসারো আঃলা-আঃসুওয়া
42য়াং লুঃউরো তেমেংদরোগা অওয়াদা নাথংগেতি, য়াংসুউরোনা আঃতু তুজুতৈং ফ্ররো আস্যাং আঃচাগো চাঃগেতি অর ছুঃউক তঙরো আঃখিং বৈকেতি। 43আলুঃউংসু আক্রক রুসিই তাঃরানা আব্রিচুং হিকগেলিইরি অর তেমেংদরো কংগং এংঅফুয়ি আলুকনা লাকখানা লুঃউ প্রাগেলিরি। 44খ্রীট্গো ক্যুংসা আলুংসুুউ তেঃরে তৈঙমা নিংগেতি অর তুখু মক্যুং কুঃ লুঃউদৈং সুংগেলিরি। 45য়াংসুউরো কুঃ আঃরা খ্যং রংরো, যাসুউ যা পুয়েং লুকরিলি, য়াংসুউগো য়াং পুয়েং পিগেলিরি। 46য়াংসুউরো তারাক মকুওয়েং ওয়িপানা ক্যংমা তখক তৈংমা আঃচু ক্যাগেতি অর আখ্রা আখ্রা ঈংমা আপ্রইনা চিঃ আকং থাঃরো চাঃগেতি সক্কেতি। 47য়াংসুউরো খ্যাংখামুছু থাওরা ফুরাগো খিমুওয়েগেতি অর আলুংসুউ য়াংসুউরোগু ম্যাকন্হা পিগেতি। যাসুরো আপ্রইকা রুওয়েকেতি, য়াংসুউরো আস্যাং খ্রীটগো ক্যুসা আফুয়িনা আঃতু তারাক মুকৈং য়াংসুউরোনা পংগেলিরি।
Currently Selected:
প্রেরিত 2: BBSRMZ
Highlight
Share
Copy
Want to have your highlights saved across all your devices? Sign up or sign in
