YOELA 1
1
1Ce wa Pethue nho: yauggai zo: Yoela re Asang: yang byid' ra" lau dao: ngad: ra".
Gaugzo Jham Qeim: Lo" Mung: Mang: Byu Qe Kaug' Ngug: Ra" Khyo
2Mao:zo:- zoqao" qe we"- tae" gyo: shige,. Yuda mae na mo, yaug khao: ngo" we"- tae" gyo" yu ge,. Naonhaung" qae: mae ngad ngad
naonhaung" qae: nho: phug' pho" qe: qae: mae ngad ngad ceru" ru khonhae" lhaung" boe" qu" ra" i?
3Ai: khyo re naonhaung" myid:zo: qere ta" shid' ge,. Yao: bam wa yao: bam: myid:zo: qere ta" kyo" li" genae"-
yao: bam: myid:zo: qere: cethao: ne, mae" myid:zo: qere dam: xo' ta" kyo" li" genae".
4Khyag' phaung" daphung: thao daphung: xo' yang: qhovo qhoshi: gae jham mae daphung" yang
zo" tang" co' rure daphung" yang zo" pye' ako".
5Yhid ya: qe we"- so" li" mung: ngug ge, sabyi qang: shaug' mo, we" gyi: ngug: ge,-
sabyi qhang: shaug' mo, asag' kad' yu nae" ra" sabyi shi jham wa zhe' se' pye' qhug' va".
6Khyag phaung" daphung: mo" zang wa ngonhaung" nho: mug: myid re li" ceim" ako".
Aijham wa qam: saung" bo mung: matho' nghe' losho' myo" ako". Yao: bam: zaui wa khangkhyi zaui we' dakhyo: tho' ako".
7Yao: bam wa ngonhaung" sabyi naui jham re phyo' qheim" pye' mung: ngonhaung" pho' ham" gae jham re zo" pye' avako".
Yao: bam sag' kaung jham phyu sho' sag' kaug' khyad' pye' ako".
8Byumyu" naonhaung" wa myiqe: nau" wa yao: re
lo,xo' yu nae" yauggai nau" shid mung: kaug' ngug: ru we' dakhyo: ngug ge,.
9Caung:pa" Yham mae xeim: ngaui" byid: nae" gaug zo re: majo, sabyi qang: re: majo,.
Asang re ngaui" byid: nae" xeim: maqo" gemung: khinjaung jham kaug' ngug: na: ako".
10Yothaung: jham wa akeim ngad: jo; ra" gaug zo jham phyo' qheim" pye' ru qhug' mung: myid gaung wa kaug' ngug: na: ra".
sabyi naui jham kyaug' byaug mung: zhanlun gae jham wa jhoe' lo" va".
11Yomyo: zo: mo, we"- kaug' ngug: na ge,. sabyi khyae kad' zo: mo, we"- ngug: na ge,-
pe"mung:ga"re jung: gaug yho" zhe' we' qhovo: qhoshi: alhab' wa phyo' qheim" pye' ru qhug' va".
12sabyi naui jham we' pho' ham" gae jham wa jhoe' byaug va". Khaung: shi: gae- laso' shi: gae- shi: gae alhab' wa jhoe' shid: lo" avako".
Byu qenho: ngaui bau: ngaui lho" khyo wa baui" byaug va".
13Phan mae caung da" byid' ra" khinjaung qe we" jid: mo" mai bau: ve, mung: kaug' ngug: na ge,.
Caung:pa" Yham khyo ye: mung: myi khyeim kaug' ngug: ge,. Naonhaung" nho: Mao"So re qhaug' ngaui" byid: nae" gaug zo we' sabyi qang: majo.
14Zo: shaug' jao" nae" amyin" khyo" byid: ge,- phaung ham nae" qhid' mae" khai: ke' ge,.
Naonhaung" nho: Asang Mao"So: Caung:pa" Yham khug khyo Yuda byumyu" alhab' we' au: she mo, re khai: zhang" ke' mung: yao: re mho' yao ge,.
15Ai bam wa- qam: so' qi" thao" ra" yaug: yang phyo' qheim" ra" ba na ngad: ra" Asang: nho: ba na jhao" li" na va".
Ai: ba na wa khoqhi" ra" gyaug: din ja: boe" lo nae" i?
16Ngonhaung" nho: qhovo: jham re- ngonhaung" nho: myo, khung: mae yao: phyo' qheim" pye' ako" mangad: i?
ngonhaung" nho: Mao"So Caung:pa" Yham mae ngaui bau: ngaui lho" khyo majo, lo: mangad: i?
17Qhovo: myug: shi: jham wa myid gaung mae kyaug' shid: lo" va". Jhi mae qaung" bai" to: nae" gaugzo majo,
aimung: gaug jhi keim jham wa qeim" lo" va".
18Nung: jham wa nhag' lam: thao" mung: myang: qin" ako".
pe"mung:ga"re yao: bam: qhid' mae" mhin" gyo, jao: majo, layang: ngad: ra". Yao kyaung" jham re: qug: khai: qhug' ako".
19 Asang we"- ngo wa nao jhao" hug' yao: ke' ra". Pe"mung:ga"re
mhin: gyo jao: jham we' sag' gae jham wa myi: yang nga" pye' ru we' dakhyo: kyaug' shid: lo" ako".
20Seyo: gug'nyhug' lae" jham lao" re: nao re hug' yao: na: ako".
Pe"mung:ga"re qid zo: gyaung: jham kin" ho: byaug yang: ngad: ra".
Currently Selected:
YOELA 1: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009
