YOELA 2
2
Asang: Ba Na Re Ta" Peim: Byid' Ra" Khyag' Phaung" jham
1Labo" re mad: ke' ge, Mao"So: gyang" lho" ra" bug gaung Ziun mae gye peim: mao" be; myhang" ke' ge,. Yuda byumyu" qe we"- gyaug: nin" ge, Asang: ba na wa jhao" li" na va".
2Airu wa mug: dab mung: cad' no, ba na ngad nae" no: sang: kyid we' mug: dab: ra" ba na ngad nae". Bam jham: dao khyo" mug: cad' nghoe' lo: ruru: khyag' phaung" jham phung: mo" zang du" joe" lo va"- airu" ru khonhae" re: majo, qu" ce: thao: ne, re: khonhae" dam: jo, nae" mangad:-
3Yao: bam wa myi: we' dakhyo: qhovo: gae jham alhab' re zo" pye' ako". Yao: bam: qhid' kheim: mae ai: mug: myid wa Edin khyae we' dakhyo: ngad: jo; ra". Ngadqere: yao: bam: nhaung thao" mae wa kyaug' ho: ra" din"pyad' yo boe" nhao co' ako". Yao: bam mae" pe" re: maloe, ngad: ra".
4Yao: bam wa myao: jham we' dau: ako". Yao: bam wa gye khe' myao: jham we' dakhyo: tao" ako".
5Bam nyaug jham: dao khyo" yao: bam byae: pag' lo" ko" ra" au: yao: bam wa gyekhe' myao: lhin" jham ru: myang: ako". Vohau: kyaug' yo myi: nga" ru we' dakhyo: pyab pyab ga: myang: ako". Yao: bam wa gye khe' nae" seim" na: ra" gyetab qi: dalam: we' dakhyo: jin: mung: du" na: ako".
6Yao: bam jhao" lo: re yaug khao: ngo" gyaug: din: ako". Myo,khung: khao: ngo" myo, shid no shid boe" byaug ako".
7Yao: bam wa gye khe' sulhe: jham we' dakhyo: khe' zin" ako". Vang jham mae gyezo: qe we' dakhyo: do, ye" ako". Yao: bam alhab' wa qhid' khyo din: din: za: du" ye: mung: khyo thaung" mavao ngad: ako".
8Yao: bam wa kyae" to" ra" khyo jham geim" geim" cad' vao ye: mung: yao: bam re pe" yang re: maqo" tam" ngad: ra".
9Yao: bam wa vomo" jham khyo khe' vao ye: mung: vang jham re lhoe" lai: lo" ako". Yham jham: adao khyo do, mung: khug' hab' qe we' dakhyo: bao: zo: kham: jham khyo" vao ye" ako".
10Yao: bam du" joe" lo: re myid gaung nan" mung: mug:gaung wa nin" na: ra" ba we' lho" wa cad' no, lo" mung: kyi jham re: mabao lo: ngad: ako".
11 Asang wa yao" nho: gyetab re amyin" hug' byid' ke' ra" yao" amyin" dao: gyo" ra" gyezo: qe wa gyai myo: mung: qam: qi" ako". Asang: nho: ba na wa khonho" gyaug din pho: ngad: ra" i? Ai mae" khag' qo" na: dang genae" i?
Nhag' Lam: Tha" Nae" Qhid' Mae" Khai: Ru
12 Asang wa- ngadqere: ana" jao" yao: gaigai: nhag' lam: tha" mung: zo: shaug' jao" ru we' ngug byid gyo" mung: kaug' ngug yang ngo jhao" tug' lo ge,.
13Naonhaung" kaug' ngug: rure nhag' lam: gyug' ra" khyo" qhu" byid: ge,. Naonhaung" nho: mai bau: lao" cad' ruyang za: mathae shi: ga: ta" na: ra". Naonhaung" nho: Mao"So Asang jhao" tug' lo ge,. Yao: wa nhag' mayao" ru we' nhag' khyag' ru byang" yaug ngad: ra" yao: wa nhag' lam: qhang: ru we' yao" dao:so: re jhaug' zaug: yaug ngad mung: qobo dae mabyid: lo: qobo khyad' byid: nae" khonhae" re: jin" jin" ngad: ra".
14Naonhaung" nho: Mao"So Asang wa nhag' lam: lai" re lai: mung:
naonhaung" re qhovo: qhoshi: myo: sho' shaman" byid: maba-
ailao" naonhaung" wa yao: re gaug zo we' sabyi qang: qo" qhaug' byid' li" genae".
15Ziun bam dao mae labo" mad: ke' ge,.
Zo: shaug' jao" nae" amyin" byid: mung: byu phaung ham nae" khai: ke' ge,.
16Byu jham re daga" za: zhang: to: ge,.
Gyang" lho" ra" phaung ham qhid' mae" yao: bam re nyhang" to: ge,.
Mao: zo: qe- zoshao qe we' nau" nin" qere khai: zhang" to: ge,.
Asag' shi" lo, xo' to: mo, lhao" re: yao: bam yao" qe, re to: co' mung: li" ca" ra".
17Phan we' Caung:pa" Yham vao khyo agyo: mae Asang re caung da" byid' ra" khinjaung qe wa ngug mung:
Asang we" ni" byumyu" qere nhag' khyag' yu la,-
gaje: byumyu" qeyang ngonhaung" re naonhaung" nho: Mao"So khai: mae i? ga: ta" mung:-
anghang: zang cejung" nae" akhang" dabyid:- ein: akyu" mho' ca" ra".
Mao"So Wa Mug: Myid Re Myid Xau Dam: Gai Nhao: Ru
18Ai: thao: ne, Asang wa yao" mug: myid re gaung yug myid ci" mung:
yao" byu qere nhag' khyag' yu: ra".
19Yao: wa yao: bam re- ana" ngo naonhaung" re gaug zo sabyi qang: we' zhanlun xau byid: mung: naonhaung" wa nhag' dag genae".
Gaje: byumyu" qe wa naonhaung" re maqu" jung" lo: genae".
20Ngo wa mug: am: shad' mae" li" ra" khyag' phaung" jham re yu: pye' mung: damyo" re din"pyad' yo khyo khe' tao" ke' nae".
Ginqhid' shae: ra" phung: re wa xo: tham: khyo khe' zaui: pye' byid: nae".
Thao mae" phung: re wa Mug:gaung: panglai: khyo khe' zaui: pye' nae".
Yao: bam: shid mao jham wa nae: ha" jo; li" nae".
Naonhaung" re yao: bam kad' ru alhab' ra" mathao mae ngo yang yao: bam re se' tam" pye' nae"- ga: tau" ra".
21Yothaung: din" jham we" dagyaug ge,.
Asang: yang naonhaung" qhid' mae" ab byid' ra" mathao mae ngaui bau: ngaui lho" na: bam ge,.
22Gug'nyhug' jham we" dagyaug ge,- mhin: gyo, jao: wa vahau: nyug: jo; ra" sag' gae jham wa yao: bam: ashi: zaui" ako".
Pho' ham" shi: we' sabyi shi: jham re: myo: sho' zaui" bam ra".
23Ziun mae" byumyu" qe we" ngaui bau: ge,-
naonhaung" qhid' mae" naonhaung" nho: Mao"So Asang kad' byid' ra" khyo mathao mae ngaui bau: ngaui lho" na ge,.
Yao: wa naonhaung" re la jham: mug: laug sho' qu: khyo" byid' ra".
Yao: wa qhid' phyao: mae" we' dakhyo: xaung: mug: we' zin vao kheim: mug: qu byid' ra".
24Gaug nao: jao: jham mae gaug zo byang" jo; li" nae".
sabyi qang: we' zhanlun xau byang" sheim nae" sabyi nao: jao: nhae mae" pyag' xam jham wa sabyi qang: we' zhanlun xau byang" sheim: jo; li" genae".
25Khyag' phaung" jham: yang naonhaung" qhovo: zo: jham re zo" pye' byid' ra" zin na jham: gu: mae naonhaung" mae" seim" byaug: ra" gu: re ngo dam: tug' byid: nae".
Naonhaung" re gye kad' nae" ce: gyephung: re nhao: ke' yaug wa ngo ngad:.
26Ana" wa naonhaung" zo: nae" magan: mago" qo" mung: gyi: gyi: qo" zo" na genaeva".
Naonhaung" qhid' mae" mug' pho: mau" jham re kad' ra" naonhaung" Mao"so Asang re naonhaung" caung:khin" byid' li" genae".
Nga" byumyu" qe wa qu" jung" pye' ru khonhae" re: madam: qhug' lo: genae".
27Ailao" Israel we"- ngo wa naonhaung" phaung gaung: mae na: jo; rure nga" Asang wa ni" nho: Mao"So ngad mung: gayaug mana lo" rure nao ba: li" nae".
Nga" byumyu" qe wa qu" jung" pye' ru khonhae" re: madam: qhug' lo: genae".
Asang: Ba Na
28Cethao: ne, mae wa nga" byo re yaug khao: ngo" dao mae nga" byo jaung" byid: nae".
Naonhaung" nho: yauggai zo: qe we' myiqe: zo: qe wa nga" mungdao: re lapa pa: li" genae".
Naonhaung" nho: mao: zo: qe wa yab mo, mo, genae".
Naonhaung" nho: ve, qae" qe wa qhu" lho re the' myao: li" genae".
29Ai: ayo, mae ngo wa nga" nho: daui nhao daui daui mo,
yauggai qe we' myiqe: qe alhab' mo; dao mae lhao" re: nga" byo jaung" byid: nae".
30Ai: ba na khyo re ta" peim" ra" khyo" mug:gaung mae we' myid gaung dao mae ngo qhu" byid: nae"
Asang: nho: gyai xo: ru we' gyaug: din pho: ba na majoe" shire sa: thug' nae"- myi: nga" nae"- myi:khug'' thaui: jham thug' nae".
31Qi" qhang ru we' gyaug: din pho: Asang: ba na majoe" li" shire ba mo" wa sham: no; byaug mung: lho" mo" wa sa: we' dakhyo: ne: lo" li" nae".
32Ngadqere: Asang jhao" bao" thaug' mho' yao mo, alhab' kam" wa khyad' yu: ru qhug' li" genae".
Asang ta" to" ru we' dakhyo: Yerusalem mae na mo, damyo" wa phao: loe; lo" li" genae". Amung: ngoyang khyin: to" ra" mo, alhab' wa mashid na: dang: li" genae"- ga: ta" ra".
Currently Selected:
YOELA 2: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009
