HOSEA 14
14
Israel Re Hosea Mho' Ra" Khyo
1Israel byu qe we"- naonhaung" Mao"So Asang jhao" dam: tug' lo ge,. Naonhaung" qobo wa naonhaung" re khyid au: thaung: mung: gyang: lang: nhao: ava". 2Asang jhao" dam: tug' lo mung: ce: akyu" mho' dao: wa yao: re qhaug' byid' ra" ngaui" xeim: ngad vashao:- ngonhaung" qobo jham alhab' re khyad' pye' byid: mung: ngonhaung" nho: akyu" mho' dao: re khae: yu byid: la,- aimung: ngonhaung" dao:so: to" ru we' dakhyo: nao re caung:khin" nae". 3Asuri wa ngonhaung" re khonhae" re: maqo" khyad' yu- gyekhe' myao: jham wa ngonhaung" re maqo" gug:gam byid:- ngonhaung" nho: solho jham re ngonhaung" nho: Mao"So ngad: ein: khonhae" re: madam: ta" lo nae". O" Asang we"- nao wa khag' jhao" maba: dam: tug' phaug' lo mo, re nhag' khyag' myid qhu" byid' ra".
Asang Wa Israel Re Kaoso' Asag' Byid' Nae" Dao:so: To" Ra" Khyo
4 Asang ta" ru wa-
Nga" byumyu" qere ngo jhao" dam: jhui" yu nae"-
ngo wa yao: bam re nga" nhag' lam: alhab' yang jhid'de; nae".
Yao: bam re ngo khonhae" re: nhag' mayo: lo nae".
5Ngo wa Israel byumyu" qhid' mae"
kyaug' ho: ra" mug:myid mae" mug: qid we' dakhyo: ngad li" nae".
Yao: bam wa bin: jham we' dakhyo: bu" yaung" li" genae".
Yao: bam wa Lebanon mae" sag' gae jham we' dakhyo:
agyi: tang za: cin" li" genae".
6Yao: bam wa asag' yaug: qi: mung: daui: na: li" genae".
Aimung: zhanlun gae jham we' dakhyo: yaung" li" genae".
Yao: bam wa Lebanon mae" shaug' gae jham ru:
ngham: sheim nae: li" genae".
7Yao: bam wa ngoyang gug:gam byid' ra" aqab khug mae dalhang dam: na: li" genae".
Yao: bam wa gaug zo maui: lam: qho: mung:
sabyi khyae we' dakhyo: ashi: zaui" li" genae".
Yao: bam wa Lebanon mae" sabyi qang: we' dakhyo: suhau: qi" li" genae".
8Israel byumyu" qe wa- solho jham we' pe" masin: lo: genae".
Aimung: ngo wa yao: bam: akyu" mho' dao: re phaug' tau: byid: mung: yao: bam re gun caung byid: nae".
Ngo wa khonhae" re: avho' nyug: ra" sag' gae we' dakhyo: yao: bam re ba sham qab byid: nae".
Ngo wa yao: bam: shaman" jeju alhab' nho: jhaung qham ngad:.
Dao: Pin"
9Pha,jhi" bo mo, wa cemae tung" to" rure ba: gyo" yu mung:- yao: bam: nhag' lam: khug mae xam" yu vageshao:- Asang: khyo jham wa jo: ra"- aimung: din: man: mo, wa aijham re cao" yang: daui: na: ako". Ngadqere: qobo jab qe kam" wa aijham re pe" xan: masun: geyang: khyid au: thaung: mung: gyang: lang" lo" ako".
Currently Selected:
HOSEA 14: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009