Marika 9
9
1Sa kaya talega vei ira ko koya, “Au sa kaya vakaidina vei kemudou, Sa tu eke eso, era na sega sara ni mate, era na raica mada na matanitu ni Kalou ni sa yaco vakaukauwa mai.”
Sa Matalia nai Rairai kei Jisu
(Maciu 17.1-13; Luke 9.28-36)
2 #
2Pita 1.17,18 Sa bogi ono, sa qai kauti Pita, kei Jemesa, kei Joni, ko Jisu, a sa kauti iratou vakatikitiki ki na dua na ulunivanua cecere, ko iratou vakai iratou ga; a sa matalia na yagona e matadratou. 3A sa lumilumisa mai na nona i sulu, sa vulavula sara me vaka na uca-vulavula; sa sega na dausava-i-sulu e vuravura e vakavulavulataka rawa me vakakina. 4A sa rairai vei iratou ko Ilaijia kei Mosese, ka rau sa veivosaki kei Jisu. 5A sa vosa ko Pita, ka kaya vei Jisu, “Vakavuvuli, sa vinaka na nodatou tiko eke. Ia me keitou tara mada na vale vakacevaceva e tolu, e dua me nomuni, ka dua me nei Mosese, ka dua me nei Ilaijia.” 6Ni sa sega ni kila na ka me kaya, ni ratou sa rere vakalevu. 7#Maciu 3.17; Mari 1.11; Luke 3.22A sa dua na o sa vakarurugi iratou, ka sa dua na vosa sa lako mai na o, sa kaya, “Oqo na noqu Gone ni toko, dou rogoci koya.” 8A ratou sa veiraiyaki vakasauri, a sa sega ni dua tale eratou sa kunea, ko Jisu duaduaga.
9Ia ni ratou sa lako sobu tiko mai na ulunivanua, sa vakarota ko koya vei iratou me ratou kakua ni tukuna vua e dua na ka eratou a raica, ka malua me tucake tale mai na mate na Luve ni Tamata. 10A ratou sa vunia na vosa ko ya me tu ga vei iratou, a ratou sa veitarogi, se cava beka na tucake tale mai na mate.
11 #
Mala 4.5; Maciu 11.14 A ratou sa tarogi koya, ka kaya, “A cava era kaya tiko ko ira na vunivola ni sa dodonu me lako mada mai eliu ko Ilaijia?” 12A sa vosa ko koya, ka kaya vei iratou, “Sa lako mada dina mai ko Ilaijia, me vukica na ka kece me vinaka tale; ia ka vakaevei na ka sa volai kina na Luve ni Tamata, ni sa dodonu me vosota ko koya na ka e vuqa, ka me vakalialiai? 13Ia ka'u sa kaya vei kemudou ni sa tadu dina mai ko Ilaijia, ka ra sa kitaka vua na ka kecega era sa vinakata, me vaka na ka sa volai e na vukuna.”
Sa Vakabula e Dua na Gonetagane Curumi Tevoro ko Jisu
(Maciu 17.14-21; Luke 9.37-43)
14Ia ni sa yaco ko koya vei iratou na tisaipeli, sa raica era sa lewe vuqa sara sa voliti iratou, kei na vunivola eso era sa veileti kei iratou. 15Ia ko ira kece na lewe vuqa, ni ra sa raici koya, era sa kurabui sara, a ra sa cici mai ka veikidavaki kaya. 16A sa tarogi ira na vunivola ko koya, “A cava dou veileti kina kei iratou?” 17Ka dua vei ira na lewe vuqa sa vosa, ka kaya, “Vakavuvuli, au sa kauta mai vei kemuni na luvequ-tagane, sa curumi koya e dua na yalo galu. 18Ia e na gauna kecega sa tauva kina, sa viritaki koya sobu, ka sa qai busebuse kasivi ko koya, ka vakasequruquru bati, ka ciba yani. Ia ka'u a vosa vei iratou na nomu tisaipeli me ratou vakaseva tani, ka ratou sa sega ni rawata.” 19Sa qai vosa ko koya, ka kaya, “Ai tabatamata sega ni vakabauta! A cava na kena dede me'u tiko kei kemudou? A cava na kena dede me'u vosoti kemudou? Kauti koya mai vei au.” 20A ra sa kauta mai vei koya. Ia ni sa raici koya ko koya, sa bitabitalaka sara na yalo, a sa bale ki na soso ko koya, ka vakatatoqitoqi ka tuburaki vuso. 21A sa taroga na tamana ko Jisu, “Sa vakaevei na kena dede ni sa tauvi koya na ka oqo?” A sa kaya, “Ni se gone lailai sara. 22Sa dau biuti koya vakavuqa ki na bukawaqa, ki wai talega, me vakamatea; ia kevaka ko ni sa rawata e dua na ka, mo ni lomani keirau mai, ka vukei keirau.” 23Sa qai kaya vua ko Jisu, “ ‘Kevaka ko sa rawata’!—Sa rawa na ka kecega vua sa vakabauta.” 24Sa qai tabalaka vakasauri na domona na tama ni gone, ka kaya e na mata tagitagi, “Kemuni na Turaga, au sa vakabauta; ni qai vukea na noqu tawa-vakabauta!” 25Ia ni sa raica ko Jisu era sa cici vata mai na lewe vuqa, sa vunauca na yalo velavela, ka kaya vua, “O iko na yalo ni galu kei na didivara, au sa vakarota vei iko, mo lako tani mai vua, ka mo kakua ni curuma tale!” 26A sa qoqolou, ka bitabitalaka vakalevu, a sa qai lako tani, a sa vaka e dua sa mate ko koya, ka ra sa kaya kina e lewe vuqa, “Sa mate ko koya.” 27A sa taura na ligana ko Jisu, ka vakaduria cake, ka sa qai tucake mai. 28Ia ni sa curu ki vale ko koya, sa tarogi koya lo ko ira na nona tisaipeli, “E na vuku ni cava keitou sa sega ni vakasevi koya tani rawa kina?” 29A sa kaya vei ira ko koya, “O ira vakaoqo era sa sega ni vakasevi tani wale, sa rawa ga e na daumasu kei na lolo.”
Sa Tukuna Tale ko Jisu na Nona Mate
(Maciu 17.22-23; Luke 9.43-45)
30A ra sa lako tani mai keri, ka lako voli e Kalili; a sa sega ni vinakata ko koya me dua na tamata me kila. 31Ni sa vakavulici ira na nona tisaipeli ko koya, ka kaya vei ira, “Sa voleka na nona soli yani na Luve ni Tamata ki na ligadra na tamata, ka ra na vakamatea; ia ni sa vakamatei, ena qai tucake tale mai e nai katolu ni siga.” 32A ra sa sega ni kila nai balebale ni vosa ko ya, a ra sa rere ni tarogi koya.
Ko Cei e Liu Duadua?
(Maciu 18.1-5; Luke 9.46-48)
33Era sa qai yaco ki Kapenaumi; ia ni sa curu ki vale sa tarogi ira, “A cava dou sa veileti kina e na gaunisala?” 34#Luke 22.24A ra sa vagagalu ga, ni ra a veileti vakai ira e na gaunisala, se ko cei sa levu cake vei ira. 35#Maciu 20.26-27; 23.11; Mari 10.43-44; Luke 22.26A sa tiko sobu ko koya, ka kacivi ira na lewe tinikarua, ka kaya vei ira, “Kevaka e dua sa vinakata me liu, ia me na kenai murimuri sara, ka me dauveiqaravi ni tamata kecega.” 36A sa qai kauta e dua na gone lailai, ka vakatura e na kedra maliwa; ia ni sa keveta, sa kaya vei ira, 37#Maciu 10.40; Luke 10.16; Joni 13.20“O koya yadua ena ciqoma e dua na gone lailai vakaoqo e na vuku ni yacaqu, sa ciqomi au; ia ko koya yadua sa ciqomi au, sa sega ni ciqomi au walega, sa ciqomi koya talega sa talai au mai.”
O Koya sa Sega ni Veisaqasaqa kei Keda sa To Vata kei Keda
(Luke 9.49-50)
38Sa qai vosa vua ko Joni, ka kaya, “Vakavuvuli, keitou a raica e dua sa vakaseva tani na tevoro eso e na yacamuni, ia ka sega ni muri keda ko koya; ka keitou sa tarova, ni sa sega ni muri keda.” 39A sa kaya ko Jisu, “Kakua ni tarova, ni sa sega e dua sa cakava e dua na cakacaka-mana e na yacaqu, me qai vosacataki au rawa. 40#Maciu 12.30; Luke 11.23Ni sa noda i to ko koya sa sega ni noda meca. 41#Maciu 10.42Ia ko koya yadua ena solia vei kemudou e dua na bilo wai mo dou gunuva, ni dou sai tokani i Karisito, au sa kaya vakaidina vei kemudou, ena sega ni yali vei koya na kenai sau.
Na Veiveretaki ki nai Valavala Ca
(Maciu 18.6-9; Luke 17.1-2)
42 “Ia ko koya yadua ena vakacala e dua vei ira na lalai oqo era sa vakabauti au, sa vinaka cake vua kevaka sa vakarubeci e domona e dua na vatu-i-qaqi, ka qai biu ki loma ni wasaliwa. 43#Maciu 5.30Ia kevaka sa vakacalai iko na ligamu, muduka tani. Sa vinaka vei iko mo curu ki na bula ka liga dua, ka ca me rua na ligamu ka mo lako ki Eli, ki na bukawaqa e sega ni bokoci rawa. 44[Sa sega ni mate kina na nodra baca, a sa sega ni bokoci kina na bukawaqa.] 45Ia kevaka sa vakacalai iko na yavamu, muduka tani. Sa vinaka vei iko mo curu ki na bula ka yava dua, ka ca me rua na yavamu ka mo biu ki Eli, ki na bukawaqa e sega ni bokoci rawa. 46[Sa sega ni mate kina na nodra baca, a sa sega ni bokoci kina na bukawaqa.] 47#Maciu 5.29Ia kevaka sa vakacalai iko na matamu, vecuka tani. Sa vinaka vei iko mo curu ki na matanitu ni Kalou ka dua bauga na matamu, ka ca me rua na matamu ka mo biu ki Eli sa waqa kina na buka, 48#Aisea 66.24‘ni sa sega ni mate kina na nodra baca, a sa sega ni bokoci kina na bukawaqa.’
49 “Ni na vakamasimataki ko koya yadua e na bukawaqa, ka na vakamasimataki nai madrali kece e na masima. 50#Maciu 5.13; Luke 14.34,35A ka vinaka na masima, ia kevaka sa takali mai na masima na kena tuituina, ena vakatuituinataki tale e na cava? Me tu ga e na lomamudou na masima, dou veilomani talega vakai kemudou.”
Currently Selected:
Marika 9: FRV21
Highlight
Share
Copy
Want to have your highlights saved across all your devices? Sign up or sign in
