Marika 8
8
Sa Vakani Ira na Va na Udolu ko Jisu
(Maciu 15.32-39)
1Ena gauna ko ya ni ra sa lewe vuqa sara, ka sega na kedra, sa kacivi ira mai na nona tisaipeli ko Jisu, ka kaya vei ira, 2“Au sa lomani ira na lewe vuqa, ni sa qai bogi tolu era sa tiko ga vei au, a sa sega na kedra; 3ia kevaka ka'u vakatalai ira tani ki na nodra veivale ka ra sega mada ni kana, era na malumalumu e gaunisala—ni sa so vei ira era sa lako vakayawa mai.” 4Sa qai kaya vua ko ira na nona tisaipeli, “Ena rawa mai vei na madrai me ra mamau kina ko ira e na vanua lala oqo?” 5A sa tarogi ira ko koya, “E vica nai buli madrai sa tu vei kemudou?” A ra sa kaya, “E vitu.” 6A sa kaya ko koya vei ira na lewe vuqa me ra tiko sobu e na qele; a sa taura nai buli madrai e vitu, ka vakavinavinaka, ka dovia, ka solia vei ira na tisaipeli me ra tauca e matadra; a ra sa tauca e matadra na lewe vuqa. 7E vica talega na ika lalai sa tu vei ira; a sa lotutaka ko koya, ka kaya me ra tauca e matadra. 8A ra sa kana, a ra sa mamau; a ra sa tomitomika na vo ni ka sa dovi, a sa vitu na sova sa sinai kina. 9Ia ko ira era sa kana era sa lewe va beka na udolu. A sa qai vakatalai ira yani ko koya. 10Ka sa vodoka sara na waqa ko koya kei ira vata kaya na nona tisaipeli, ka lako ki na yasayasa vaka-Talimanuca.
Era Vinakata na Farisi me Dua na Caka Mana
(Maciu 16.1-4)
11 #
Maciu 12.38; Luke 11.16 A ra sa lako mai ko ira na Farisi, ka vakatekivu me ra veileti kaya, a ra sa taroga vua e dua nai vakatakilakila mai lomalagi, era vakatovolei koya. 12#Maciu 12.39; Luke 11.29A sa vutugu sara ko koya e na vu ni yalona, ka kaya, “A cava era sa vakasaqara kina e dua nai vakatakilakila ko ira nai tabatamata oqo? Au sa kaya vakaidina vei kemudou, ena sega sara ni soli e dua nai vakatakilakila ki nai tabatamata oqo.” 13A sa biuti ira, ka vodoka tale na waqa, ka lako yani ki tai kadua.
Na Nodra Leveni na Farisi kei Eroti
(Maciu 16.5-12)
14Ia era sa guilecava me ra kauta na madrai, ka sa dua bauga nai buli ka sa tu vei ira e na waqa. 15#Luke 12.1A sa vakarota vei ira ko koya, ka kaya, “Raica—dou qarauni kemudou mai na nodra leveni na Farisi kei na leveni nei Eroti.” 16A ra sa qai veivosakitaka vakai ira, ka kaya, “E baleta beka ni sa sega vei keda na madrai.” 17Ia ni sa kila ko Jisu, sa kaya vei ira, “A cava dou sa veivosakitaka kina ni sa sega vei kemudou na madrai? Dou sa sega beka ni raica rawa se kila? E kaukauwa tiko beka na yalomudou? 18#Jere 5.21; Isi 12.2; Mari 4.12Dou sa vakamatana, ka sega beka ni rai rawa? Ka vakadaligana, ka sega beka ni rogoca rawa? Se dou sa sega beka ni nanuma? 19Ni'u sa dovia nai buli madrai e lima vei ira na lewe lima na udolu, e vica nai su sa sinai e na vo ni tikina dou a kumuna?” A ra sa kaya, “E tinikarua.” 20“Kei na vitu vei ira na lewe va na udolu, e vica na sova sa sinai e na vo ni tikina dou a kumuna?” A ra sa kaya, “E vitu.” 21A sa qai kaya vei ira ko koya, “E vakaevei, dou se sega tikoga ni kila rawa?”
Sa Vakabula e Dua na Mataboko mai Pecisaita ko Jisu
22A ra sa yaco ki Pecisaita. A ra sa kauta mai vei koya e dua na mataboko, a ra sa masuti koya me tara. 23A sa taura na liga ni mataboko ko koya, ka tubera ki nai bili ni koro; ia ni sa qai kasivita na matana ruarua, ka tabaka e na ligana, ka sa taroga, “O bau raica rawa e dua na ka se segai?” 24A sa rai cake, ka kaya, “Au sa raica na tamata, ia era vaka na vunikau, ka ra sa lako voli.” 25A sa tabaka tale na matana ko Jisu e na ligana; a sa dolava na matana, a sa qai vakabulai sara, a sa raica vakavinaka na ka kecega. 26A sa vakatalai koya ko Jisu ki na nona vale, ka kaya, “Kakua ni ko lako tale ki na koro.”
Na Ka e Tusanaka ko Pita me Baleti Jisu
(Maciu 16.13-20; Luke 9.18-21)
27A sa lako yani ko Jisu, kei ira na nona tisaipeli, ki na veikoro kei Sisaria-Filipai. A sa tarogi ira na nona tisaipeli e na gaunisala, ka kaya vei ira, “Era sa kaya na tamata se ko cei koi au?” 28#Mari 6.14,15; Luke 9.7,8A ra sa kaya, “Ko Joni na dauveipapitaisotaki; ia ka so, Ko Ilaijia; ia ka so tale, E dua vei ira na parofita.” 29#Joni 6.68,69A sa kaya vei ira, “Ia dou sa kaya se ko cei koi au?” Sa qai vosa ko Pita, ka kaya vua, “Koi kemuni na Karisito.” 30A sa vakaroti ira matua me ra kakua ni tukuni koya vua e dua.
Sa Tukuna Tale ko Jisu na Nona Vakararawataki kei na Nona Mate
(Maciu 16.21-28; Luke 9.22-27)
31A sa vakatekivu me vakavulici ira, ni sa kilikili kaya na Luve ni Tamata me vosota na ka e vuqa, me ra biuti koya talega ko ira na qase, kei ira na bete levu, kei ira na vunivola, ka me vakamatei, ka qai tucake-tale e nai katolu ni siga. 32A sa tukuna vakamacala na vosa ko ya ko koya. A sa kauti koya ko Pita, ka vakatekivu me vunauca. 33Ia ni sa vuki mai ko koya, ka vakaraici ira na nona tisaipeli, sa vunauci Pita, ka kaya, “Lako tani ki dakuqu, Setani; ni ko sa sega ni vakananuma na ka ni Kalou, na ka ga ni tamata.”
34 #
Maciu 10.38; Luke 14.27 Ia ni sa qai kacivi ira mai na lewe vuqa kei ira talega na nona tisaipeli, sa kaya vei ira, “O koya yadua sa via muri au, me kakua ni muria na lomana, me colata ga na nona kauveilatai, ka muri au. 35#Maciu 10.39; Luke 17.33; Joni 12.25Ia ko koya yadua sa via maroroya na nona bula, ena vakayalia; ia ko koya yadua ena vakayalia na nona bula e na vukuqu kei nai tukutuku-vinaka, ena maroroya. 36Ia ka cava na kena yaga vua na tamata, kevaka e rawati vuravura kece, ka vakayalia na yalona? 37Se cava ena solia na tamata mei sau ni yalona? 38Ia ko koya ena maduataki au kei na noqu vosa e nai tabatamata oqo e dauyalewa ka ca; ena maduataki koya na Luve ni Tamata, ni sa lako mai ko koya e nai ukuuku nei Tamana kei ira vata kaya na agilosi yalosavasava.”
Currently Selected:
Marika 8: FRV21
Highlight
Share
Copy
Want to have your highlights saved across all your devices? Sign up or sign in
