Marika 10
10
Nai Vakavuvuli i Jisu me Baleta na Veibiu
(Maciu 19.1-12; Luke 16.18)
1A sa cavu tu mai kea ko koya, ka lako ki na yasayasa vaka-Jutia mai na tai kadua ni Joritani, ka ra sa lewe vuqa sa soqoni vata tale vua. A sa vakavulici ira tale ko koya, me vaka na nona i valavala.
2A sa lako mai vei koya ko ira na Farisi, ka taroga, “E tara vua na tagane me biuta na watina, se segai?” Ka ni ra sa vakatovolei koya. 3A sa vosa ko koya, ka kaya vei ira, “A cava sa vakarota vei kemudou ko Mosese?” 4#Vrua 24.1-4; Maciu 5.31A ra sa kaya, “Sa vosota ga ko Mosese me vola nai vola ni veibiu, ka qai biuta tani.” 5Sa qai vosa ko Jisu, ka kaya vei ira, “E na vuku ni nomudou lomakaukauwa sa vola vei kemudou ko koya na vunau oqori. 6#Vteki 1.27; 5.2Ia e nai vakatekivu ni ka sa buli, sa buli rau na Kalou me dua na tagane ka dua na yalewa. 7#Vteki 2.24E na vuku ni ka oqo ena biuti tamana kei tinana na tagane, ka kabita na watina, 8ia koi rau erau na lewe dua. Erau sa sega ni lewe rua tiko, erau lewe dua ga. 9Ia na ka sa vauca vata na Kalou, me kakua ni tawasea na tamata.”
10Ia mai vale era tarogi koya tale na nona tisaipeli e na ka ko ya. 11#Maciu 5.32; 1Kori 7.10,11A sa kaya vei ira ko koya, “O koya yadua sa biuta na watina, ka laki veiwatini kei na dua tale, sa veibutakoci. 12Ia kevaka sa biuta na watina na yalewa, ka laki veiwatini kei na dua tale, sa veibutakoci.”
Sa Vakalougatataki Ira na Gone Lalai ko Jisu
(Maciu 19.13-15; Luke 18.15-17)
13A ra sa kauta mai vua eso na gone lalai me tarai ira ko koya, ka sa vunauci ira era a kauta mai ko ira na tisaipeli. 14Ia ni sa raica ko Jisu, sa cudru sara, a sa kaya vei ira, “Dou laivi ira na gone lalai me ra lako mai vei au, ka mo dou kakua ni tarovi ira, ni sa vakataki ira na lewe ni matanitu ni Kalou. 15#Maciu 18.3Au sa kaya vakaidina vei kemudou, O koya ena sega ni vakabauta na matanitu ni Kalou me vaka na gone lailai, ena sega sara ni curu kina.” 16A sa keveti ira, ka tabaki ira e na ligana, ka vosavakalougatataki ira.
Na Tamata Vutuniyau
(Maciu 19.16-30; Luke 18.18-30)
17Ia ni sa lako yani ko koya e gaunisala, sa cici mai e dua, ka tekiduru vua, ka tarogi koya, “Vakavuvuli vinaka, a cava me'u kitaka me'u rawata kina na bula tawa mudu?” 18A sa kaya vua ko Jisu, “O sa vakatokai au me'u vinaka e na vuku ni cava? Sa sega e dua tale e vinaka, na Kalou duaduaga. 19#Lako 20.12-16; Vrua 5.16-20Ko sa kila na vunau: ‘Mo kakua ni ia na veibutakoci; Mo kakua ni laba; Mo kakua ni butako; Mo kakua ni veibeitaki vakailasu; Mo kakua ni kovekove; Mo vakarokoroko vei rau na tamamu kei na tinamu.’ ” 20Sa qai vosa ko koya, ka kaya vua, “Vakavuvuli, a ka kecega oqo ka'u sa vakabauta ni ka'u a gone ka yacova na siga oqo.” 21A sa vakaraici koya ko Jisu, a sa lomana, a sa kaya vua, “E dua na ka sa sega vei iko: mo lako, mo volitaka na ka kecega sa tu vei iko, ka solia vei ira sa dravudravua, ko na qai vakaiyau mai lomalagi; ka mo lako mai, ka muri au.” 22A sa vakaveveku mata e na vuku ni vosa ko ya, a sa lako tani a sa rarawa na lomana, ni sa levu na nona i yau.
23A sa veiraiyaki ko Jisu, a sa kaya vei ira na nona tisaipeli, “E dredre sara vei ira sa vutuniyau me curu ki na matanitu ni Kalou!” 24A ra sa kidacala ko ira na tisaipeli e na nona vosa. Sa qai vosa tale ko Jisu, ka kaya vei ira, “Ragone, e dredre sara vei ira era sa vakararavi ki nai yau me curu ki na matanitu ni Kalou! 25Sa rawarawa me curuma na mata ni cula na kameli, ka dredre vua na tamata vutuniyau me curu ki na matanitu ni Kalou.” 26A ra sa kidacala vakalevu sara, ka kaya vua, “Ko cei ena qai vakabulai rawa?” 27A sa vakaraici ira ko Jisu, ka kaya, “Sa dredre sara vei ira na tamata, ia ka sega ga vua na Kalou; ni sa rawarawa vua na Kalou na ka kecega.”
28Sa qai vakatekivu ko Pita me kaya vua, “Ni raica, keitou sa biuta na ka kece, ka muri kemuni.” 29Sa qai vosa ko Jisu, ka kaya, “Au sa kaya vakaidina vei kemudou, Sa sega e dua na tamata sa biuta na vale, se na veitacini, se na ganena, se na tamana, se na tinana, se na luvena, se na vanua, e na vukuqu, kei na vuku ni tukutuku-vinaka, 30me qai sega ni saumi, ena rawata yadrau e na bula oqo—na veivale, kei na veitacini, kei na ganena, kei na tinana, kei na luvena, kei na vanua, kei na veivakacacani talega—ia e na gauna mai muri na bula tawa mudu. 31#Maciu 20.16; Luke 13.30Ia era lewe vuqa sa liu era na muri; kei ira talega sa muri era na liu.”
Nai Katolu ni Gauna e Tukuna Kina ko Jisu na Nona Mate
(Maciu 20.17-19; Luke 18.31-34)
32A ratou sa lako ga e na salatu ni ratou sa lako ki Jerusalemi, ka sa liutaki ira ko Jisu. A ratou sa kidacala, kei ira sa muri voli era sa rere. A sa kauti iratou tale na le tinikarua, ka vakatekivu me tukuna vei iratou na ka ena yaco vua, 33ka kaya, “Raica, edatou sa lako cake ki Jerusalemi, ka na soli yani na Luve ni Tamata vei ira na bete levu, kei ira na vunivola, ka ra na lewai koya me mate; a ra na qai soli koya vei ira na kai matanitu tani. 34A ra na vakalialiai koya, ka vakanakuitataki koya, ka kasivita, ka vakamatea. Ena qai tucake tale mai na mate ko koya e nai katolu ni siga.”
Na Nodrau Kerekere ko Jemesa kei Joni
(Maciu 20.20-28)
35A sa lako mai vua ko Jemesa kei Joni, koi rau na luve i Sepete, ka kaya, “Vakavuvuli, keirau sa vinakata mo ni cakava vei keirau na ka keirau na kerea.” 36A sa kaya vei rau ko koya, “A cava drau sa vinakata me'u cakava vei kemudrau?” 37A rau sa kaya vua, “Ni solia vei keirau me keirau tiko e na nomuni ukuuku, e dua e na ligamuni matau, ka dua e na ligamuni mawi.” 38#Luke 12.50Ia sa qai kaya vei rau ko Jisu, “Drau sa sega ni kila na ka drau sa kerea. Drau sa rawata beka mo drau gunuva na bilo ka'u na gunuva, ka mo drau papitaisotaki e na papitaiso ka'u na papitaisotaki kina?” 39A rau sa kaya vua, “Keirau sa rawata.” Sa qai kaya vei rau ko Jisu, “Drau na gunuva dina na bilo ka'u na gunuva; drau na papitaisotaki talega e na papitaiso ka'u na papitaisotaki kina; 40ia me tiko e na ligaqu i matau kei na ligaqu i mawi sa sega ni noqu me'u solia vakailoa, vei ira ga sa vakarautaki me nodra.”
41Ia ni sa rogoca ko ira na lewe tini, era sa cudru sara vei Jemesa kei Joni. 42#Luke 22.25,26A sa kacivi ira mai ko Jisu, ka kaya vei ira, “Dou sa kila, ni ra sa lewai ira na veimatanitu ko ira era sa kainaki me nodra turaga; a sa veitalia vei ira ko ira na uasivi cake. 43#Maciu 23.11; Mari 9.35; Luke 22.26Ia sa sega ni vakakina vei kemudou; ia ena nomudou dauveiqaravi ga ko koya vei kemudou sa via uasivi cake, 44ka na nomudou bobula ko koya vei kemudou sa vinakata me turaga. 45Ni sa sega ni lako mai na Luve ni Tamata me qaravi, me dauveiqaravi ga, ka me solia na nona bula me kedrai voli e lewe vuqa.”
Sa Vakabulai Patemo na Mataboko ko Jisu
(Maciu 20.29-34; Luke 18.35-43)
46A ra sa yaco ki Jeriko. Ia ni ra sa lako tani e Jeriko ko koya kei ira na nona tisaipeli kei ira e lewe vuqa sara, sa tiko e na tutu-ni-sala me kerekere ko Patimeo na mataboko, na luve i Timeo. 47Ia ni sa rogoca ko koya ni sai Jisu na kai Nasareci, sa vakatekivu me kaci, ka kaya, “I Jisu, na Luve i Tevita, ni lomani au mai.” 48A ra sa lewe vuqa era vunauci koya me tiko lo, ia sa qai kaci vakalevu cake kina ko koya, “Na Luve i Tevita, ni lomani au mai!” 49Sa qai tu vakadua ko Jisu, ka sa kaya, “Dou kacivi mai.” A ra sa qai kaciva na tamata mataboko, ka ra sa kaya vua, “Mo vakacegu, tucake; sa kacivi iko ko koya.” 50A sa biuta na nona i tutuvi ko koya, ka tucake, ka lako vei Jisu. 51A sa vosa ko Jisu, ka kaya vua, “A cava ko sa vinakata me'u cakava vei iko?” A sa kaya vua na tamata mataboko, “Kemuni na Turaga, me'u rai rawa.” 52A sa kaya vua ko Jisu, “Mo lako ga; sa vakabulai iko na nomu vakabauta.” A sa rai rawa sara ko koya, ka sa muri Jisu e na gaunisala.
Currently Selected:
Marika 10: FRV21
Highlight
Share
Copy
Want to have your highlights saved across all your devices? Sign up or sign in
