Marika 5
5
Sa Vakabula ko Jisu na Tamata Curumi Tevoro
(Maciu 8.28-34; Luke 8.26-39)
1A ra sa yaco ki tai kadua, ki na nodra vanua na kai Katara. 2Ia ni sa sobu mai waqa ko koya, sa sota sara kaya e dua na tamata mai na veibulubulu, sa curumi koya e dua na yalo velavela. 3A sa dautiko e na veibulubulu ko koya. A sa sega e dua na tamata sa vesuka rawa, sa sega mada ga e na sinucodo; 4ni sa vesu vakavuqa e nai vesu kei na sinucodo, ia sa musulaka tani ga na sinucodo, ka sa drutilaka nai vesu. A sa sega e dua sa vakamanoataka rawa. 5A sa tiko vakadua, e na bogi kei na siga, e na veiulunivanua, kei na veibulubulu, a sa dauqoqolou, ka dautava na yagona e na veivatu. 6Ia ni sa raici Jisu ni sa vakayawa tu, sa cici yani ka cuva vua, 7a sa kaci e na domo levu, ka kaya, “A cava vei kedaru, i Jisu na Luve ni Kalou Cecere Sara? Au sa kerea vakabibi vei kemuni e na yaca ni Kalou, mo ni kakua ni vakararawataki au.” 8Ni sa kaya oti vua ko koya, “Ko iko na yalo velavela, mo lako tani vua na tamata!” 9Sa tarogi koya talega, “Ko cei na yacamu?” A sa vosa ko koya, ka kaya, “A yacaqu ko Vavakoso, ni keimami sa lewe vuqa.” 10A sa vakamasuti koya vakalevu ko koya, me kakua ni vakatalai ira tani mai na vanua ko ya. 11A sa dua mai kea na qele-ni-vuaka levu sa kana voli e baba ni ulunivanua. 12A ra sa masuti koya ko ira kecega na tevoro, ka kaya, “Vakatalai keimami kivei ira na vuaka, me keimami curumi ira.” 13A sa vakatara ko Jisu. A ra sa qai lako tani na yalo velavela, ka curumi ira na vuaka; a ra sa cici sara na qele ni vuaka e na baba ki na wasawasa, era sa rua beka na udolu, ka ra sa luvu kina. 14Ia ko ira sa vakani ira na vuaka era sa dro, ka laki tukuna e na koro kei na veiyasana ki vanua. A ra sa lako yani me ra raica na ka sa caka. 15A ra sa yaco vei Jisu, ka raici koya ka curuma ko ira na tevoro, ko koya ka tu vua nai vavakoso, ni sa qai tiko, ka vakaisulu, ka yalomatua; a ra sa rere. 16Ia ko ira era raica, era sa tukuna vei ira na ka sa yaco vua ka curumi koya ko ira na tevoro, vei ira talega na vuaka. 17A ra sa vakamasuti koya me lako tani e nodra vanua.
18Ia ni sa vodo ki waqa ko koya, sa masuti koya ko koya ka curuma eliu ko ira na tevoro me mai tiko kaya. 19A sa sega ni vinakata ko Jisu, ka sa kaya ga vua, “Mo lako ki na nomudou, vei ira na wekamu, ka tukuna vei ira na levu ni veika sa cakava vei iko na Turaga, ka ni sa lomani iko.” 20A sa lako ka sa tukuna voli mai Tikapoli na kena levu ni veika sa cakava vua ko Jisu, ka ra sa kurabui kecega.
Na Luve i Jairo kei na Yalewa Turudrabalavu
(Maciu 9.18-26; Luke 8.40-56)
21Ia ni sa lesu tale ko Jisu e na waqa ki tai kadua, era sa lewe vuqa sara sa soqoni vata vei koya; a sa tiko e matasawa ko koya. 22Ka raica, sa lako mai e dua na turaga ni valenilotu, ko Jairo na yacana. Ia ni sa raici koya, sa cuva sobu ki na yavana, 23a sa vakamasuta vakalevu, ka kaya, “Na luvequ-yalewa lailai sa voleka sara ni mate. Mo ni lako mai mo ni tabaki koya e na ligamuni, me vakabulai kina; ena qai bula ko koya.” 24A sa lako vata kaya ko koya.
A ra sa lewe vuqa sara sa muri koya, ka drigita. 25A sa dua na yalewa, sa turudrabalavu ka yabaki tinikarua, 26a sa levu na ka sa vosota vei ira na vuniwai era le vuqa, a sa vakayalia kina na nona i yau kecega, a sa sega ni bula, ia sa levu cake tiko na nona mate, 27ni sa rogoca nai tukutuku kei Jisu, sa lako vata mai kei ira na lewe vuqa, ki dakuna, ka tara na nona i sulu. 28Ni sa kaya ko koya, “Kevaka ka'u na tara ga na nona i sulu, au na vakabulai.” 29A sa mudu vakasauri nai davedave ni nona dra; a sa kila e na yagona sa bula mai na mate ca ko ya. 30A sa kila sara ko Jisu e lomana ni sa lako tani vua na kaukauwa, a sa vuki e na maliwa ni lewe vuqa, ka kaya, “O cei sa tara na noqu i sulu?” 31A ra sa kaya vua ko ira na nona tisaipeli, “O ni sa raica era sa drigiti kemuni na lewe vuqa, ia ko ni sa taroga, ‘O cei sa tarai au?’ ” 32Sa qai rai voli yani ko koya, me kunei koya ka cakava na ka ko ya. 33A sa rere na yalewa, ka sautaninini, ni sa kila na ka sa caka vua, a sa lako mai ka cuva sobu e matana, ka tukuna kecega vua na kena dina. 34A sa kaya vua ko koya, “Na luvequ-yalewa, sa vakabulai iko na nomu vakabauta; mo lako e na vakacegu, ka mo bula mai na nomu mate ca.”
35Ni sa vosa tiko ko koya, sa lako mai eso mai na vale nei koya na turaga ni valenilotu, era kaya, “Sa mate na luvemu-yalewa, ko sa vakaoca tale nai Vakavuvuli e na vuku ni cava?” 36Ia ni sa rogoca ko Jisu na vosa era kaya, sa kaya sara vua na turaga ni valenilotu, “Kakua ni yalo lailai, vakadinata ga.” 37A sa sega ni laiva e dua me muri koya, ko iratou ga ko Pita, kei Jemesa, kei Joni na taci Jemesa. 38A sa yaco ko koya ki na vale ni turaga ni valenilotu, a sa raica na nodra tagiyaso, era sa tagi ka qoqolou vakalevu. 39Ia ni sa curu ko koya, sa kaya vei ira, “Dou sa tagiyaso ka tagi e na vuku ni cava? Sa sega ni ciba na goneyalewa, sa moce ga.” 40A ra sa dredrevaki koya. Ia ni sa vakatalai ira kece ki tautuba, sa kauti rau na tama ni goneyalewa kei na tinana, kei iratou sa tiko vata kaya, ka curu ki na tikina sa davo kina na goneyalewa. 41A sa taura na liga ni goneyalewa ko koya, ka kaya vua, “Talica kumi;” a kenai balebale, “Goneyalewa, au sa kaya vei iko, mo tucake mai.” 42A sa tucake sara na goneyalewa, ka lako voli; ni sa tinikarua na nona yabaki. A ra sa kurabui vakalevu sara. 43A sa vakarota matua vei ira ko koya me kakua ni kila na ka oqo e dua na tamata, ka sa kaya me soli vua na goneyalewa e dua na kena.
Currently Selected:
Marika 5: FRV21
Highlight
Share
Copy
Want to have your highlights saved across all your devices? Sign up or sign in
