Marika 6
6
Sega ni Vinakati ko Jisu mai Nasareci
(Maciu 13.53-58; Luke 4.16-30)
1Sa qai lako tani mai keri ko koya, ka lako ki na nona vanua; a sa muri koya ko ira na nona tisaipeli.
2Ia ni sa yaco na Siga ni Vakacecegu, sa vakatekivu ko koya me vakatavuvuli e na valenilotu, ka ra sa kurabui e lewe vuqa sa rogoca, ka kaya, “Sa rawata mai vei ko koya oqo na veika oqo? Se na vuku cava oqo sa soli vua, me sa caka kina e na ligana na veika-mana vakaoqo? 3Sa sega li ni matai ko koya oqo, a luve i Meri, kei na tuakai Jemesa, kei Josese, kei Juta, kei Saimoni? Kei na ganena, eratou sa sega li ni tiko vata kei keda?” A ra sa tarabe e na vukuna. 4#Joni 4.44A sa kaya vei ira ko Jisu, “Sa vakarokorokotaki na parofita e na vanua tani, e na nona vanua dina ga e segai, se vei ira na kai nona, se e na nona vale.” 5A sa sega ni cakava rawa mai kea e dua na cakacaka mana, sa tabaki ira walega e na ligana e lewe vica sa tauvi-mate, ka vakabula. 6A sa kurabui ko koya e na vuku ni nodra sega ni vakabauta.
Sa Talai Iratou na Tisaipeli e Tinikarua ko Jisu
(Maciu 10.5-15; Luke 9.1-6)
A sa lako voli ki na veikoro lalai, ka vakatavuvuli. 7A sa kacivi ira mai na lewe tinikarua ko koya, ka vakatekivu me talai ira me ra lako yarua; a sa solia vei ira na kaukauwa me ra rawai ira na yalo velavela. 8A sa vakarota vei ira me ra kakua ni kauta e dua na ka e na gaunisala, ai titoko walega; me kakua na taga ni vaqa, se na madrai, se nai lavo e na taga; 9ia me ra vakaivava ga ka me ra kakua ni kauta e rua nai sulu. 10A sa kaya vei ira ko koya, “Ni dou sa curu ki na dua na vale e na dua na yasana, dou tiko ga kina ka yacova na nomudou lako tani mai na tikina ko ya. 11#Caka 13.51#Luke 10.4-11Ia ko ira kecega sa sega ni vakacegui kemudou, se rogoci kemudou, ni dou sa lako tani e na yasana ko ya, dou kureitaka laivi na kuvu-ni-soso mai na yavamudou, mei vakatakilakila vei ira. Au sa kaya vakaidina vei kemudou, Ena ca vakalailai ko Sotoma kei Komora e na siga ni lewa, ena ca vakalevu na koro ko ya.” 12A ra sa lako yani, ka dauvunau me veivutuni na tamata. 13#Jeme 5.14A sa lewe vuqa na tevoro era sa vakaseva tani; a ra sa lewe vuqa sa tauvi-mate era sa walia e na waiwai, ka vakabula.
Na Mate i Joni na Dauveipapitaisotaki
(Maciu 14.1-12; Luke 9.7-9)
14 #
Maciu 16.14; Mari 8.28; Luke 9.19 Ni sa rogoca ko Eroti na tui ni sa kuruvaki na yacana, a sa kaya, “Sa tucake tale mai na mate ko Joni na dauveipapitaisotaki. O koya ga sa cakava kina ko koya na kaukauwa mana oqo.” 15Era sa kaya eso tale, “Oqo ko Ilaijia.” A ra sa kaya eso tale, “Sa dua na parofita, se sa vaka e dua vei ira na parofita.” 16Ia ni sa rogoca ko Eroti, sa kaya, “Ko Joni ga oqo, ko koya ka'u a tamusuka na uluna, sa tucake tale mai na mate ko koya.”
17 #
Luke 3.19,20 Ni sa talaki eliu ko Eroti, ka tauri Joni, ka vesuka e na valeniveivesu, e na vuku i Erotiasa na wati Filipe na tacina; ni rau sa veiwatini kaya. 18Ni sa kaya vei Eroti ko Joni, “Sa sega ni tara mo drau veiwatini kei na wati tacimu.” 19A sa cati koya kina ko Erotiasa, a sa vinakata me vakamatea. Ia ka sa sega ni rawata, 20ni sa rerevaki Joni ko Eroti, ni sa kila sa tamata yalododonu ka yalosavasava ka sa vakarurugi koya. Ia ni sa rogoci koya, sa dau vakayavalata na lomana, ia sa vinakata ga me daurogoci koya. 21Ia sa qai yaco mai e dua na gauna, a siga ni sucu i Eroti, ka sa cakava ko koya na kedra magiti na turaga ni vanua, kei na turaga-ni-valu, kei ira na qase ni Kalili. 22Ni gauna sa curu yani kina na yalewa na luve i Erotiasa, ka meke, a sa vakalomavinakataki Eroti kei ira era sa kana vata kaya. Sa qai kaya na tui vua na goneyalewa, “Kerea vei au na ka ko sa vinakata, ka'u na solia vei iko.” 23A sa bubului vua, “A ka ko na kerea vei au, au na solia vei iko, kevaka ka'u na wasea rua kina na noqu matanitu.” 24A sa curu yani ko koya, ka tarogi tinana, “A cava me'u kerea?” A sa kaya ko koya, “Na ulu i Joni na dauveipapitaisotaki.” 25A sa curu kusarawa tale vua na tui ko koya, ka masuta, ka kaya, “Au sa vinakata mo ni solia mada mai vei au na ulu i Joni na dauveipapitaisotaki e na dua na dari.” 26A sa rarawa vakalevu sara na tui, ia e na vuku ni nona bubului kei na vukudra talega era sa tiko kaya, sa sega ni via bureitaka vua. 27A sa tala sara na tui e dua vei ira na sotia i vakatawa, a sa kaya me kau mai na uluna. A sa lako ka tamusuka na uluna e na valeniveivesu, 28ka kauta mai na uluna e na dua na dari, ka solia vua na goneyalewa. A sa solia na goneyalewa vei tinana. 29Ia ni ra sa rogoca ko iratou na nona tisaipeli, eratou sa lako mai ka kauta na yagona, ka buluta.
Sa Vakani Ira e Lewe Lima na Udolu ko Jisu
(Maciu 14.13-21; Luke 9.10-17; Joni 6.1-14)
30A ra sa soqoni vata vei Jisu ko ira nai apositolo, ka tukuna vua na ka kecega, a ka era sa cakava, kei na ka talega era sa vakavuvulitaka. 31A sa kaya vei ira ko koya, “Dou lako mai ka vakatikitiki ki na dua na vanua galala, ka mo dou vakacegu mada vakalailai.” Ni ra sa lewe vuqa era lako mai ka lako yani, a ra sa sega kina ni lalaga me ra kana. 32A ra sa vodoka na waqa, ka lako vakatikitiki tani ki na dua na vanua galala. 33Ia ko ira na lewe vuqa era sa raica ni ra sa lako yani, a ra sa lewe vuqa sa kilai ira, a ra sa cici e vanua mai na veikoro kece, ka siviti ira. 34#Tiko 27.17; 1Tui 22.17; 2Vei 18.16; Isi 34.5; Maciu 9.36A sa lako mai ko Jisu, ka raici ira era sa lewe vuqa sara, a sa lomani ira, ni ra sa vaka na sipi sa sega na nodra i vakatawa. A sa vakatekivu me vakatavulici ira e na ka e vuqa. 35Ia ni sa kala na siga, sa lako mai vei koya ko ira na nona tisaipeli, ka kaya, “Oqo e dua na vanua lala, ka sa kala na siga. 36Mo ni vakatalai ira yani me ra lako ki na veiyasana kei na veikoro lalai sa vakavolivoliti keda, me ra volia na kedra madrai, ni sa sega na ka vei ira me ra kania.” 37A sa vosa ko koya, ka kaya vei ira, “Dou solia vei ira e dua na ka me ra kania.” Era sa qai kaya vua, “Me keitou laki volia beka na madrai e na pene e rua na drau, ka solia vei ira me ra kania?” 38A sa kaya vei ira ko koya, “E vica nai buli madrai sa tu vei kemudou? Dou laki raica.” Ia ni ra kila, era sa kaya, “E lima, ka rua na ika.” 39A sa kaya ko koya me ra tiko sobu kecega vakaivavakoso e na co drokadroka. 40A ra sa tiko sobu vakaiwasewase, sa yayadrau se yayalimasagavulu. 41Ia ni sa taura ko koya nai buli madrai e lima kei na ika e rua, sa ta cake ki lomalagi, ka lotutaka, ka dovia na veibuli madrai, ka solia vei ira na nona tisaipeli me ra tauca e matadra na tamata. A sa vota ko koya na ika e rua vei ira kecega. 42A ra sa kana kecega, ka ra sa mamau. 43A ra sa tomitomika vata na madrai sa vo, kei na ika talega, a sa tinikarua nai su sa sinai kina. 44Ia ko ira era sa kania na veibuli madrai era lewe lima beka na udolu na tagane.
Sa Lako e Dela ni Wai ko Jisu
(Maciu 14.22-23; Joni 6.15-21)
45Sa qai vakarota sara ko koya vei ira na nona tisaipeli me ra vodoka na waqa, ka me ra liu ki tai kadua ki Pecisaita, me sa vakatalai ira mada yani na lewe vuqa ko koya. 46Ia ni sa vakatalai iratou oti, sa lako ko koya ki na ulunivanua, me masu.
47Ia ni sa yakavi mai, sa tiko na waqa e loma ni wai, ka sa tiko duaduaga ko koya e vanua. 48A sa raici iratou ni ratou sa oca e na voce, ni sa saqati iratou tiko na cagi. Ia ni sa yaco mada nai kava ni wase ni bogi, sa qai lako vei iratou ko koya, sa lako voli e dela ni wai. A sa nanuma me lako siviti ratou. 49Ia ni ratou sa raica ni sa lako voli ko koya e dela ni wai, eratou sa nanuma sa dua na yalo, a ratou sa qoqolou; 50ni ratou sa raici koya kecega ka sa kidroa. A sa vosa sara vei iratou ko koya, ka kaya vei ira, “Dou vakacegu, sai au ga. Dou kakua ni rere.” 51A sa cabe vei iratou ki waqa, a sa ruru na cagi. A ratou sa kidacala vakalevu sara e lomadratou, ka kurabui, 52ni ratou sa sega ni vakasamataka na veibuli madrai, ni sa kaukauwa na lomadratou.
Sa Vakabulai Ira na Tauvimate mai Kenisareti ko Jisu
(Maciu 14.34-36)
53Ia ni ratou sa lako ki tai kadua, eratou sa yaco ki na nodra vanua na kai Kenisareti, a ratou sa udu ki matasawa. 54Ia ni ratou sa sobu mai waqa, era sa kilai koya sara, 55ka cici ki na veiyasana kece sa vakavolivolita, a ra sa vakatekivu me colati ira e nai mocemoce era sa tauvi-mate, ki na yasana era rogoca sa tiko kina ko koya. 56Ia na yasana kece sa lako kina ko koya, se na veikoro lalai, se na veikoro lelevu, se vanua, era sa vakotori ira sa tauvi-mate e na veisala, ka masuti koya me ra bau tara walega na tutu ni nona i sulu. Ia ko ira kecega sa tara, era sa vakabulai.
Currently Selected:
Marika 6: FRV21
Highlight
Share
Copy
Want to have your highlights saved across all your devices? Sign up or sign in
