Maciu 28
28
Na Tucake Tale Mai na Mate
(Marika 16.1-10; Luke 24.1-12; Joni 20.1-10)
1Ia ni sa oti na Siga ni Vakacecegu, a sa kida nai matai ni siga ni macawa, sa qai lako mai ko Meri na yalewa ni Makitala kei na Meri kadua, me rau raica nai bulubulu. 2Ka raica, sa tavuki oti vakalevu na vanua; ni sa dua na agilosi ni Turaga sa lako sobu mai lomalagi, a sa lako mai ka vaqiqica tani na vatu, a sa tiko e delana. 3A sa vaka na liva na matana, a sa vulavula na nona i sulu me vaka na uca-vulavula. 4A ra sa sautaninini na sotia era sa vakatawa ni ra sa rerevaka, a ra sa yaco me vakataki ira sa mate.
5A sa qai vosa na agilosi, ka kaya vei rau na yalewa, “Drau kakua ni rere; ni ka'u sa kila drau sa vakasaqarai Jisu, ko koya ka lauvako ki na kauveilatai. 6Sa sega eke ko koya, ni sa tucake tale, me vaka na nona vosa. Drau lako mai, mo drau raica na yasana ka koto kina na Turaga. 7Ia drau lako kusarawa, ka tukuna vei ira na nona tisaipeli ‘ni sa tucake tale mai na mate ko koya, ka kila, sa liutaki kemudou ki Kalili; dou na raici koya kina.’ Raica, au sa tukuna vei kemudrau.” 8A rau sa lako kusarawa mai nai bulubulu ni rau sa rere ka reki vakalevu, a rau sa cici me tukuna vei ira na nona tisaipeli. 9Ka raica, sa tavaki rau ko Jisu, ka kaya, “Bula vinaka!” Erau sa qai toro vua ka taura na yavana, ka vakarokoroko vua. 10Sa qai kaya vei rau ko Jisu, “Drau kakua ni rere; drau laki tukuna ga vei ira na taciqu me ra lako ki Kalili, ka ra na raici au mai kea.”
Era mai Tukutuku na Yadra
11Ia ni rau sa lako yani, raica, eso vei ira nai vakatawa era sa lako ki na koro, a ra sa tukuna kivei ira na bete levu na ka kece sa qai yaco. 12Ia ni ra sa soqoni vata kei ira na qase, ka sa bosea, era sa qai solia vakalevu nai lavo vei ira na sotia, 13ka kaya vei ira, “Dou vaka, ‘Sa lako mai e na bogi ko ira na nona tisaipeli, ka butakoca na yagona, ni keimami a moce tu.’ 14Ia kevaka ena rogoca oqo na kovana, keitou na vakalomavinakataki koya, ka dou na galala mai kina.” 15A ra sa taura nai lavo, a ra sa kitaka me vaka era sa vakaroti kina. Sa dautukuni tikoga nai tukutuku oqo vei ira na Jiu ka yacova na siga edaidai.
Rairai Tale ko Jisu Vei Iratou na Nona Tisaipeli
(Marika 16.14-18; Luke 24.36-49; Joni 20.19-23; Cakacaka 1.6-8)
16 #
Maciu 26.32; Mari 14.28 A sa lako ki Kalili ko ira na tisaipeli na lewe tinikadua, ki na ulunivanua ka tukuna vei ira ko Jisu. 17Ia ni ra sa raici koya, era sa vakarokoroko vua; ia sa sega ni vakadinata ko ira eso. 18A sa lako mai ko Jisu ka vosa vei ira, ka kaya, “Sa soli mai vei au na lewa kecega mai lomalagi kei vuravura. 19#Caka 1.8O koya mo dou qai lako ka vakalotutaki ira me ra noqu tisaipeli e na veivanua kecega, ka papitaisotaki ira e na yaca ni Kalou na Tamana, kei na Luvena, kei na Yalo Tabu, 20ka vakavulici ira me ra vakabauta na ka kecega ka'u a vosa kina vei kemudou. Ka mo dou kila oqo, ni'u sa tiko vata kei kemudou e na veisiga kecega, ka yacova nai vakataotioti kei vuravura.”
Currently Selected:
Maciu 28: FRV21
Highlight
Share
Copy
Want to have your highlights saved across all your devices? Sign up or sign in
