Popular Bible Verses from Maciu 28

Share

O koya mo dou qai lako ka vakalotutaki ira me ra noqu tisaipeli e na veivanua kecega, ka papitaisotaki ira e na yaca ni Kalou na Tamana, kei na Luvena, kei na Yalo Tabu, ka vakavulici ira me ra vakabauta na ka kecega ka'u a vosa kina vei kemudou. Ka mo dou kila oqo, ni'u sa tiko vata kei kemudou e na veisiga kecega, ka yacova nai vakataotioti kei vuravura.”

A sa lako mai ko Jisu ka vosa vei ira, ka kaya, “Sa soli mai vei au na lewa kecega mai lomalagi kei vuravura.

A sa qai vosa na agilosi, ka kaya vei rau na yalewa, “Drau kakua ni rere; ni ka'u sa kila drau sa vakasaqarai Jisu, ko koya ka lauvako ki na kauveilatai. Sa sega eke ko koya, ni sa tucake tale, me vaka na nona vosa. Drau lako mai, mo drau raica na yasana ka koto kina na Turaga.

Sa qai kaya vei rau ko Jisu, “Drau kakua ni rere; drau laki tukuna ga vei ira na taciqu me ra lako ki Kalili, ka ra na raici au mai kea.”

Ia ni ra sa soqoni vata kei ira na qase, ka sa bosea, era sa qai solia vakalevu nai lavo vei ira na sotia, ka kaya vei ira, “Dou vaka, ‘Sa lako mai e na bogi ko ira na nona tisaipeli, ka butakoca na yagona, ni keimami a moce tu.’ Ia kevaka ena rogoca oqo na kovana, keitou na vakalomavinakataki koya, ka dou na galala mai kina.” A ra sa taura nai lavo, a ra sa kitaka me vaka era sa vakaroti kina. Sa dautukuni tikoga nai tukutuku oqo vei ira na Jiu ka yacova na siga edaidai.