Maciu 22
22
Na Vosa Vakatautauvata ni Magiti ni Vakawati
(Luke 14.15-24)
1A sa vosa tale ko Jisu, ka tukuna vei ira na vosa vakatautauvata, ka kaya, 2“Sa tautauvata na matanitu vakalomalagi kei na dua na tui, ko koya sa cakava na magiti ni vakawati ni luvena-tagane. 3A sa talai ira yani na nona tamata me ra lakovi ira ka sureti ki na kana magiti ni vakawati, ia era sa sega ni via lako mai. 4Sa qai tala tale ko koya eso tale na tamata, ka kaya, ‘Laki kaya vei ira era sureti: Raica, ka'u sa vakarautaka oti na noqu i vakasigalevu, sa vakamatei eso na noqu bulumakau, kei na noqu manumanu uro, ka sa vakarautaki oti tu na ka kecega. Dou lako mai ki na magiti ni vakawati.’ 5Ia era sa vakaweleweletaka, ka ra sa dui lako, e dua ki na nona were, ka dua ki na nona veivoli, 6ia ko ira na kena vo era sa tauri ira na nona tamata, ka vakacacana, ka vakamatea. 7Ni sa qai rogoca na tui, sa cudru ko koya. A sa talai ira na nona mataivalu, ka vakawabokotaki ira na daulaba ko ya ka vakama na nodra koro. 8Sa qai kaya ko koya vei ira na nona tamata, ‘Sa vakarautaki oti tu na magiti ni vakawati, ia era sa sega ni yaga kina ko ira ka sureti. 9O koya mo dou qai lako ki na veisalatu, ia ko ira kecega dou na kunea, dou sureti ira mai ki na magiti ni vakawati.’ 10Era sa qai lako yani ko ira na tamata oqori ki na veisalatu, ka vakasoqoni ira kecega era sa kunea, se ra ca se ra vinaka. A sa mai tiko me ra kania na magiti ni vakawati.
11 “Ni sa qai curu mai na tui me raici ira era sa tiko me ra kana, a sa raica kina e dua na tamata sa sega ni vakaisulu e nai sulu ni vakawati, 12a sa kaya vua, ‘Noqu i tau, e vakaevei ni ko sa curu mai ki ke ni sa sega vei iko nai sulu ni vakawati?’ A sa vagagalu ga ko koya. 13#Maciu 8.12; 25.30; Luke 13.28Sa qai kaya na tui vei ira na nona tamata, ‘Dou vesuka, na yavana kei na ligana, ka kauti koya tani, ka biuta ki na butobuto e tautuba; ena dautagi kina, ka vakasequruquru bati.’ 14Ni ra sa lewe vuqa era sa kacivi, ka lewe lailai era sa digitaki.”
Na Taro me Baleta na Saumi i Vakacavacava
(Marika 12.13-17; Luke 20.20-26)
15Sa ra qai lako ko ira na Farisi, a ra bose se ra na coriti koya vakaevei e na nona vosa. 16A ra sa talai ira na nodra tisaipeli vua, kei ira nai tokani i Eroti, me ra kaya, “Vakavuvuli, keitou sa kila ko sa dina, ka sa vakatavuvulitaka vakaidina nai valavala sa vinaka vua na Kalou, ia ko sa sega ni rerevaka e dua, ni ko sa sega ni doka na matadra na tamata. 17O koya mo qai tukuna vei keitou, A cava ko lewa? Sa tara me da soli-ka ni matanitu vei Sisa, se segai?” 18A sa kila na nodra yalo ca ko Jisu, ka kaya, “Dou sa dauveretaki au e na vuku ni cava, koi kemudou na dauveivakaisini? 19Vakatakila mai vei au nai lavo ni soli.” A ra sa kauta mai vua e dua na pene. 20A sa kaya vei ira ko koya, “A mata i cei oqo, kei na yaca i cei sa volai tu?” 21Era sa kaya vua, “A nei Sisa.” Sa qai kaya vei ira ko koya, “Mo dou qai solia vei Sisa na ka nei Sisa; vei koya talega na Kalou na ka sa nona na Kalou.” 22Ia ni ra sa rogoca, era sa kurabui; a ra sa laivi koya, ka lako yani.
Na Taro me Baleta na Tucake Tale Mai na Mate
(Marika 12.18-27; Luke 20.27-40)
23 #
Caka 23.8
E na siga ko ya era sa lako mai vei koya eso nai tokani i Setoki, ko ira era sa dau kaya ni na sega ni tucake tale na mate, a ra sa taroga, 24#Vrua 25.5ka kaya, “Vakavuvuli, sa kaya ko Mosese, ‘Kevaka sa mate e dua na tamata vakawati, ka sega na luvena, me rau qai veiwatini kei na nona yada na tuakana se na tacina, me vakaivakawa kina ko koya vua na tacina se tuakana.’ 25Ia ka tiko kei keitou na mataveitacini eratou lewe vitu. A sa vakawati ko koya sa qase, a sa mate, ka sega na luvena, a sa laiva vua na tacina na watina. 26A sa vaka talega kina nai karua, kei nai katolu, ka yaco ki nai kavitu. 27Sa qai mate e muri na yalewa. 28Ia ni na tucake tale na mate, ena wati cei vei iratou na lewe vitu ko koya? Ni ratou sa watina ko iratou kecega.”
29A sa vosa ko Jisu, ka kaya vei ira, “Dou sa sese, ni dou sa sega ni kila nai Vola Tabu, se na kaukauwa ni Kalou. 30Ni ra na tucake tale na mate, era na sega ni vakawati, se veimusumusukitaki me ra vakawati; era na vakataki ira ga na agilosi mai lomalagi. 31Ia e na vuku ni nodra tucake tale na mate, dou sa sega li ni wilika na ka sa vosataka vei kemudou na Kalou, ni sa kaya, 32#Lako 3.6‘Oi au na Kalou i Eparaama, kei na Kalou i Aisake, kei na Kalou i Jekope?’ A Kalou sa sega ni nodra Kalou era sa mate, sa nodra Kalou ga era sa bula tiko.” 33Ia ni ra sa rogoca na lewe vuqa, era sa kurabui e na nona i vakavuvuli.
Nai Vakaro Levu
(Marika 12.28-34; Luke 10.25-28)
34Ia ni ra sa rogoca na Farisi ni sa vagalui ira nai tokani i Setoki ko koya, era sa qai soqoni vata. 35A sa dua vei ira, e dua na vu-ni-vunau, sa tarogi koya, ni sa vakatovolea, ka kaya, 36“Vakavuvuli, a cava nai vakaro levu e na vunau?” 37#Vrua 6.5Sa kaya vua ko Jisu, “Mo lomani Jiova na nomu Kalou e na lomamu taucoko, kei na yalomu taucoko, kei na nomu nanuma kecega, 38Ai matai ni vunau oqo, ka levu duadua. 39#Vsoro 19.18A sa tautauvata na kenai karua: ‘Mo lomana na kai nomu me vaka ko sa lomani iko.’ 40#Luke 10.25-28Sa vu ni vunau taucoko kei ira na parofita na vunau e rua oqo.”
Na Taro me Baleta na Mesaia
(Marika 12.35-37; Luke 20.41-44)
41Ia ni ra sa soqoni vata tiko na Farisi, sa tarogi ira ko Jisu, 42ka kaya, “A cava dou lewa e na vuku i Karisito? A luve i cei ko koya?” Era sa kaya vua, “A luve i Tevita.” 43Sa kaya vei ira ko koya, “Sa vakaevei ni sa vakatokai koya me Turaga ko Tevita, ni sa vuna na Yalo Tabu, ka kaya,
44 #
Same 110.1
‘Sa kaya ko Jiova vua na noqu Turaga,
“Mo tiko e na ligaqu i matau,
ka me'u biuti ira mada na nomu meca mei tutu-ni-yavamu” ’?
45 Ia kevaka sa vakatokai koya ko Tevita me Turaga, sa qai luvena vakaevei?” 46A sa sega e dua sa kaya rawa vei koya e dua na vosa; a sa sega tale e dua e doudou me tarogi koya e na veisiga e muri.
Currently Selected:
Maciu 22: FRV21
Highlight
Share
Copy
Want to have your highlights saved across all your devices? Sign up or sign in
