Maciu 21
21
Sa Curu ko Jisu ki Jerusalemi
(Marika 11.1-11; Luke 19.28-40; Joni 12.12-19)
1Ia ni ra sa qai toro voleka ki Jerusalemi, ka yaco ki Pecifaki, ki na ulunivanua ni veiolive, sa tala e lewe rua na tisaipeli ko Jisu, 2ka kaya vei rau, “Drau lako ki na koro lailai sa donui kemudrau, ka drau na kunea sara e dua na asa sa noka tu, ka sa tu vata kaya na luvena. Drau sereka, ka kauta mai vei au. 3Ia kevaka e dua sa vosa kina vei kemudrau, drau kaya, ‘Erau sa yaga vua na Turaga’, ena qai solia sara kina ko koya.” 4A sa caka oqo, me vakayacori kina na vosa sa tukuna na parofita, ka kaya,
5 #
Saka 9.9
“Tukuna vua sa toka mai Saioni,
Raica, sa lako mai vei iko na nomu Tui,
sa yalomalumalumu, a sa vodoka e dua na asa,
kei na luve ni asa.”
6A rau sa lako na tisaipeli, ka kitaka me vaka ka vakarota vei rau ko Jisu, 7ka kauta mai na asa, kei na luvena, ka tevuka kina na nodrau i sulu, ka vakavodoki koya kina. 8A ra sa lewe vuqa sara sa tevuka na nodra i sulu e gaunisala, ka so tale era tamusuka eso na tabanikau, ka duibiuta e na gaunisala. 9#Same 118.25,26Ia ko ira na lewe vuqa sa liu, kei ira sa muri, era sa kaci, ka kaya,
“Osana vua na Luve i Tevita!
Sa kalougata ko koya sa lako mai e na yaca ni Turaga!
Osana ki cake sara!”
10Ia ni sa yaco ki Jerusalemi ko koya, sa yavala kecega na lewe ni koro, ka kaya, “O cei li oqo?” 11A ra sa kaya na lewe vuqa, “Oqo ko Jisu na parofita mai Nasareci e Kalili.”
Sa Vakasavasavataka na Valenisoro
(Marika 11.15-19; Luke 19.45-48; Joni 2.13-22)
12A sa curu ko Jisu ki na vale-ni-soro ni Kalou, ka vakasevi ira kecega era sa veivoli e na vale-ni-soro, sa vukica talega na nodra tepeli era sa veisau i lavo, kei na nodra i tikotiko era sa volitaki ruve. 13#Aisea 56.7; Jere 7.11A sa kaya vei ira, “Sa volai,
‘A noqu vale ena vakatokai me vale ni masu’;
ia dou sa cakava me nodra qara na daubutako.”
14A sa lako mai vua ki na vale-ni-soro eso na mataboko kei na lokiloki, ka sa vakabulai ira ko koya. 15Ia ni ra sa raica ko ira na bete levu kei ira na vunivola na veika e veivakurabuitaki sa cakava ko koya, kei ira na gone lalai era sa kaci e na vale-ni-soro, ka kaya, “Osana vua na Luve i Tevita,” era sa cudru sara, 16#Same 8.2ka kaya vua, “O sa rogoca na ka era vosataka ko ira oqo, se segai?” A sa kaya vei ira ko Jisu, “Io; dou sa sega beka ni wilika,
‘Mai na gusudra na gone lalai kei ira sa sucu tiko,
ko sa cakava me vinaka sara na vakarokoroko’?”
17A sa biuti ira yani ko koya, ka lako tani e na koro ki Pecani; a sa moce kina.
Sa Cudruva na Vuni Lolo ko Jisu
(Marika 11.12-14,20-24)
18Ia e na mataka ni sa lesu tale tiko ki na koro, sa viakana. 19A sa raica e dua na vuni lolo e na gaunisala, e sa lako kina, a sa sega ni kunea kina e dua na ka, a drauna walega, a sa kaya kina, “Mo kakua tale ni vua ka tawa mudu.” A sa malai sara vakasauri na vuni lolo.
20Ia ni ra sa raica na tisaipeli, era sa kurabui, ka kaya, “Sa vakaevei ni sa tei malai vakasauri na lolo?” 21#Maciu 17.20; 1Kori 13.2A sa vosa ko Jisu, ka kaya vei ira, “Au sa kaya vakaidina vei kemudou, kevaka e tu vei kemudou na vakabauta, ka sega ni vakatitiqa, dou na sega ni cakava walega na ka sa yaco ki na vuni lolo, ia kevaka dou na kaya talega ki na ulunivanua oqo, ‘Mo cavu laivi, ka mo biu ki na wasaliwa;’ ena yaco ga. 22Kei na ka kece sara ga dou na kerea e na masu, ni dou sa vakadinata, dou na rawata.”
Sa Tarogi Jisu Eso se Ko Cei sa Lesi Koya
(Marika 11.27-33; Luke 20.1-8)
23A sa curu ko koya ki na vale-ni-soro, ia ni sa vakavuvuli tiko, sa lako mai vua ko ira na bete levu kei ira na nodra qase na tamata, ka kaya, “Ko sa lesi mai vei mo cakava na veika oqo? Ia ko cei sa solia vei iko nai lesilesi oqo?” 24Sa qai vosa ko Jisu, ka kaya vei ira, “Au na tarogi kemudou talega e na dua na ka, kevaka dou na tukuna vei au, au na qai tukuna talega vei kemudou se ka'u sa lesi mai vei me'u cakava na veika oqo. 25Sa vu mai vei na papitaiso i Joni? Mai lomalagi, se mai na tamata?” A ra sa veivosakitaka vakai ira, ka kaya, “Kevaka eda kaya, ‘E vu mai lomalagi;’ ena qai kaya ko koya vei keda, ‘Ia dou a sega ni vakadinati koya e na vuku ni cava?’ 26Ia kevaka eda na kaya, ‘E vu mai na tamata;’ eda sa rerevaki ira na lewe vuqa, ni ra sa vakasama kecega sa parofita ko Joni.” 27A ra sa vosa vei Jisu, ka kaya, “Keitou sa sega ni kila.” Sa qai kaya vei ira ko koya, “Au na sega talega ni tukuna vei kemudou se ka'u sa lesi mai vei me'u cakava na veika oqo.”
Na Vosa Vakatautauvata me Baleti Rau na Veitacini
28 “Ia ka cava dou lewa? Sa dua na tamata sa lewe rua na luvena-tagane. A sa lako vua sa qase, ka kaya, ‘Na luvequ, laki cakacaka edaidai ki na noqu loga-ni-vaini.’ 29A sa vosa ko koya, ka kaya, ‘Au sa sega ni vinakata,’ ia sa qai veivutuni e muri ka lako. 30Sa qai lako vua sa gone, ka vosa vakakina. A sa vosa ko koya, ka kaya, ‘Au sa lako saka,’ ia ka sa sega ga ni lako. 31Ko cei vei rau sa muria na loma i tamana?” Era sa kaya vua, “O koya sa qase.” Sa kaya vei ira ko Jisu, “Au sa kaya vakaidina vei kemudou, O ira sa kumuna nai vakacavacava kei ira na dautagane, era sa curu eliu vei kemudou ki na matanitu ni Kalou. 32#Luke 3.12; 7.29-30Ni sa lako mai vei kemudou ko Joni e nai valavala ni yalododonu, ia dou sa sega ni vakadinata, Ia ko ira sa kumuna nai vakacavacava kei ira na dautagane, era sa vakadinata. Ia koi kemudou, ni dou sa raica, dou sa sega ni veivutuni e muri, mo dou vakadinata.”
Na Vosa Vakatautauvata Baleti Ira na Dauteitei Ca
(Marika 12.1-12; Luke 20.9-19)
33 #
Aisea 5.1,2 “Dou rogoca e dua tale na vosa vakatautauvata. Sa dua na tamata sa taukena e dua na vanua, sa tea e dua na loga-ni-vaini, a sa viribaita vakavolivolita, a sa kelia kina nai keli-waini, a sa tara na nodra vale nai vakatawa, a sa lisitaka vei ira eso nai vakatau-ni-were, a sa qai lako ki na vanua tani. 34Ia ni sa voleka mai na vula i matua, sa talai ira na nona tamata ko koya vei ira nai vakatau-ni-were, me ra kauta mai na vuana me nona i votavota. 35A ra sa tauri ira na nona tamata ko ira nai vakatau-ni-were, a ra sa yavita e dua, ka vakamatea e dua, ka vakavirika e dua. 36A sa tala eso tale na tamata, era lewe vuqa cake vei ira ka liu; a ra sa kitaka vakakina vei ira. 37Sa oti, sa qai tala na luvena kivei ira, ka kaya, ‘Era na vakarokorokotaka na luvequ.’ 38Ia ni ra sa raica na luvena ko ira nai vakatau-ni-were, era sa kaya vakai ira, ‘O koya oqo nai taukei e muri. Tou mai vakamatea, me da suguta na nona vanua me noda.’ 39A ra sa taura ka biliraka ki taudaku ni loga-ni-vaini, ka vakamatea. 40Ia ni sa lako mai na turaga ni loga-ni-vaini, a cava ena kitaka vei ira nai vakatau-ni-were oqo?” 41Era sa kaya vua, “Ena vakamatei ira vakararawa na tamata ca oqori, ka lisitaka na loga-ni-vaini kivei ira eso tale nai vakatau-ni-were, era na solia vua na vuana e na kena yabaki.”
42 #
Same 118.22,23 Sa kaya vei ira ko Jisu, “Dou a sega beka ni wilika e nai Vola Tabu,
‘Na vatu era sa cata ko ira na matai ni vale
sa yaco me kenai vakadei e na tutu ni vale;
oqo na cakacaka i Jiova,
ka sa ka e veivakurabuitaki e matada?’
43 O koya oqo ka'u sa kaya kina vei kemudou, Ena kau tani vei kemudou na matanitu ni Kalou, me soli vei ira na lewe-ni-vanua era na vuataka mai na vuana. 44Ia ko koya ena lutu ki na vatu oqo, ena dasila kina; ia ko koya ena lutuka, ena vurumemea me vaka na nuku.”
45Ia ni ra sa rogoca ko ira na bete levu kei ira na vunivola na nona vosa vakatautauvata, era sa kila sa vosataki ira ko koya. 46Ia ni ra sa via taura, era sa rerevaki ira na lewe vuqa, ni ra sa vakasama sa parofita ko koya.
Currently Selected:
Maciu 21: FRV21
Highlight
Share
Copy
Want to have your highlights saved across all your devices? Sign up or sign in
