Maciu 18
18
Ko Cei e Levu Duadua
(Marika 9.33-37; Luke 9.46-48)
1 #
Luke 22.24
E na gauna ko ya sa lako mai vei Jisu ko ira na tisaipeli, ka taroga, “Ko cei sa levu cake e na matanitu vakalomalagi?” 2A sa kaciva mai e dua na gone lailai ko Jisu, ka vakatura e na kedra maliwa, 3#Mari 10.15; Luke 18.17ka sa kaya, “Au sa kaya vakaidina vei kemudou, Kevaka dou sa sega ni saumaki mai, ka yaco me vaka na gone lalai, dou na sega sara ni curu ki na matanitu vakalomalagi. 4Ia ko koya sa vakayalomalumalumutaki koya me vaka na gone lailai oqo, ko koya ga sa levu cake e na matanitu vakalomalagi. 5Ia ko koya yadua sa vinakata e dua na gone lailai vakaoqo e na vuku ni yacaqu, sa vinakati au.
Na Veitemaki ki nai Valavala Ca
(Marika 9.42-48; Luke 17.1-2)
6 “Ia ko koya sa vakacala e dua vei ira na lalai oqo era sa vakabauti au, sa vinaka vua kevaka ka vakarubeci e domona e dua na vatu-i-qaqi levu, ka vakadromutaki e na wasaliwa titobu. 7Sa ca ko vuravura e na vuku ni veivakacalai! Ni sa dredre me sega ni yaco mai na veivakacalai, ia sa ca vua na tamata sa vakayacora na veivakacalai!
8 #
Maciu 5.30
“Ia kevaka sa vakacalai iko na ligamu se na yavamu, muduka tani, ka biuta tani vei iko. Sa vinaka vei iko mo curu ki na bula ka yava dua se liga dua, a sa ca me rua na ligamu se rua na yavamu ka mo biu ki na bukawaqa sa sega ni mudu. 9#Maciu 5.29Ia kevaka sa vakacalai iko na matamu, vecuka tani, ka biuta tani vei iko. Sa vinaka vei iko mo curu ki na bula ka dua ga na matamu, ka sa ca me rua na matamu ka mo biu ki Eli sa waqa kina na buka.
Na Vosa Vakatautauvata ni Sipi a Yali
(Luke 15.3-7)
10 #
Luke 19.10
“Lewai kemudou vinaka mo dou kakua ni beca e dua vei ira na lalai oqo. Ni'u sa kaya vei kemudou, A nodra agilosi mai lomalagi era sa raica tikoga na mata i Tamaqu sa tiko mai lomalagi. 11Ni sa lako mai na Luve ni Tamata me vakabulai koya sa yali. 12Dou lewa vakaevei? Kevaka e dua na tamata sa dua na drau na nona sipi, a sa yali e dua, ena sega beka ni biuta laivi tu na ciwasagavulu ka ciwa, ka lako ki na veiulunivanua me vakasaqarai koya ka yali? 13Ia kevaka sa kunea, au sa kaya vakaidina vei kemudou, ena reki vakalevu e na vuku ni sipi oqo, ka vakalailai ga e na vuku ni ciwasagavulu ka ciwa sa sega ni yali. 14Sa vaka talega oqo na Tamamudou sa tiko mai lomalagi, ni sa sega ni vinakata me yali e dua vei ira na lalai oqo.
Na Wekamu sa Caka Cala
15 #
Luke 17.3
“Ia kevaka sai valavala ca vei iko na wekamu, lako ka vunauca ni drau sa tiko vakai kemudrau ga. Kevaka ena rogoci iko, ko sa qai rawai koya na wekamu. 16#Vrua 19.15Ia kevaka ena sega ni rogoca, me qai lewe dua se lewe rua tale mo kauta vata kei iko, me vakadinadinataki na vosa kecega e na gusu ni dautukutuku e le rua se le tolu. 17Ia kevaka e bese ni rogoci iratou, tukuna vei ira nai soqosoqo lotu. Ia kevaka e bese ko koya ni rogoci ira nai soqosoqo lotu, me qai vaka na tawa-lotu kei koya sa kumuna nai vakacavacava vei iko ko koya. 18#Maciu 16.19; Joni 20.23Au sa kaya vakaidina vei kemudou, A ka kecega dou na vauca e vuravura, ena vauci mai lomalagi, ia na ka kecega dou na sereka e vuravura, ena sereki mai lomalagi. 19Au sa kaya tale vei kemudou, Kevaka e lewe rua vei kemudou sa lomavata e vuravura, me kerea e dua na ka, ena vakayacora vei rau na Tamaqu sa tiko mai lomalagi. 20Ia e na tikina sa soqoni vata kina e lewe rua, se lewe tolu, e na yacaqu, au sa tiko kina e na kedratou maliwa.”
Na Veivosovosoti
21 #
Luke 17.3,4 Sa qai lako mai vua ko Pita, ka kaya, “Noqu Turaga, kevaka e valavala ca vei au e dua na wekaqu, me na vakavica na noqu vosoti koya? Me vakavitu?” 22#Vteki 4.24Sa kaya vua ko Jisu, “Au sa sega ni kaya vei iko, Me vakavitu walega, ia me vakavitusagavulu na vitu.
Na Vosa Vakatautauvata ni Dauveiqaravi Sega ni Dauveivosoti
23 “O koya ga oqo sa vakatauvatani kina na matanitu vakalomalagi kei na dua na tui, sa via tarogi ira na nona tamata. 24Ia ni sa vakatekivu ko koya me vakataroga, sa qai kau mai vua e dua, sa tini na udolu na nona taledi sa sega ni sauma. 25Ia ni sa sega vua na ka me sauma kina, sa kaya na nona turaga me volitaki ko koya, kei na watina, kei iratou na luvena, kei na ka kecega sa tu vua, me saumi kina. 26Sa qai cuva sobu na tamata, ka masuti koya, ka kaya, ‘Kemuni na Turaga, ni vosoti au mada ga, ka'u na sauma kecega vei kemuni.’ 27Sa qai yalovinaka mai na turaga ni tamata ko ya, ka sa sereka, ka biuta ga me kakua ni sauma. 28A sa lako ki tautuba na tamata ko ya, ka sa kunea e dua na nona i tokani, sa sega ni sauma vua e dua na drau na pene, a sa taura ka kidomoka, ka kaya, ‘Sauma mada vei au na nomu dinau.’ 29Sa qai cuva sobu na nona i tokani ki na yavana, a sa vakamasuta, ka kaya, ‘Mo vosoti au mada ga, ka'u na sauma kecega vei iko.’ 30A sa bese ko koya, ka sa lako ka biuta ki na valeniveivesu, me sauma mada na nona dinau. 31Ia ko ira na nona i tokani ni ra sa raica na ka sa caka, era sa rarawa vakalevu, ka ra sa laki tukuna vua na nodra turaga na ka kecega sa caka. 32Ia na nona turaga, ni sa kacivi koya mai, sa kaya vua, ‘Tamata ca, au a sereki iko mai na dinau levu oqori, ni ko sa masuti au. 33E sega beka ni kilikili kei iko mo yalovinaka vua na nomu i tokani, me vaka ka'u a yalovinaka vei iko?’ 34A sa cudru na nona turaga, a sa soli koya vei ira nai vakatawa ni valeniveivesu, me sauma kece mada na nona dinau. 35Ena kitaka vaka talega kina vei kemudou ko Tamaqu vakalomalagi, kevaka dou sa sega ni vosoti ira na wekamudou mai na vu ni yalomudou.”
Currently Selected:
Maciu 18: FRV21
Highlight
Share
Copy
Want to have your highlights saved across all your devices? Sign up or sign in
