Maciu 17
17
Sa Matalia na Yago i Jisu
(Marika 9.2-13; Luke 9.28-36)
1Sa bogi ono sa qai kauti Pita kei Jemesa, kei Joni na tacina, ko Jisu, a sa kauti iratou vakatikitiki ki na dua na ulunivanua cecere. 2A sa matalia na yagona e matadratou, a sa serau na matana me vaka na mata-ni-siga, ka sa vulavula mai na nona i sulu me vaka na rarama. 3Ka raica, sa sikavotu vei iratou ko Mosese kei Ilaijia, a ratou sa veivosaki kaya. 4Sa qai vosa ko Pita, ka kaya vei Jisu, “Na Turaga, sa vinaka na nodatou tiko eke. Kevaka ko ni sa vinakata, me keitou tara eke e tolu na vale-vakacevaceva, e dua me nomuni, ka dua me nei Mosese, ka dua me nei Ilaijia.” 5#Vteki 22.2; Vrua 18.15; Same 2.7; Aisea 42.1; Maciu 3.17; 12.18; Mari 1.11; Luke 3.22Ni sa vosa tiko ko koya, raica, sa dua na o lumilumisa sa vakarurugi iratou ka raica, sa rogo e dua na vosa mai na o, sa kaya, “Oqo na noqu Gone ni toko, au sa dauvinakata vakalevu; dou vakarogoci koya.” 6Ia ni ratou sa rogoca na tisaipeli, eratou sa cuva vakatoboicu, ka ra sa rere vakalevu. 7A sa lako mai ko Jisu ka tarai iratou, ka kaya, “Tucake, ka kakua ni rere.” 8Ia ni ratou sa ta cake, eratou sa sega ni raica e dua tale, ko Jisu duaduaga.
9Ia ni ratou sa lako sobu tiko mai na ulunivanua, sa vakarota vei iratou ko Jisu, ka kaya, “Kakua ni tukuna vua e dua na veika sa rairai, ka malua me tucake tale mai na mate na Luve ni Tamata.” 10#Mala 4.5A sa tarogi koya ko iratou na nona tisaipeli, ka kaya, “A cava era kaya kina na vunivola ni sa dodonu me liu mada mai ko Ilaijia?” 11A sa vosa ko Jisu, ka kaya vei iratou, “Sa lako dina mada mai ko Ilaijia, me vukica na ka kece me vinaka tale. 12#Maciu 11.14Ia ka'u sa kaya vei kemudou, Sa tale eke ko Ilaijia, a ra sa sega ni kilai koya, a ra sa kitaka vua na ka kecega era sa vinakata. Era na vakararawataka vaka talega kina na Luve ni Tamata.” 13Eratou sa qai kila na tisaipeli ni sa vosataki Joni na dauveipapitaisotaki vei iratou ko koya.
Sa Vakabula e Dua na Gonetagane Curumi Tevoro ko Jisu
(Marika 9.14-29; Luke 9.37-43a)
14Ia ni ratou sa yaco vei ira na lewe vuqa, sa lako mai vua e dua na tamata, ka tekiduru vua, ka kaya, 15“Kemuni na Turaga, ni lomani koya na luvequ-tagane, ni sa tauvi koya na lialia, a sa rarawa vakalevu, sa bale vakavuqa ki na bukawaqa, ka vakavuqa ki na wai. 16Ia ka'u a kauta vei iratou na nomuni tisaipeli, a ratou sa sega ni vakabulai koya rawa.” 17Sa qai vosa ko Jisu, ka kaya, “Ai tabatamata sega ni vakabauta ka yalo vakatani. A cava na kena dede me'u tiko kei kemudou? A cava na kena dede me'u vosoti kemudou? Kauti koya mai vei au ki ke.” 18Sa qai vunauca na tevoro ko Jisu, ka sa lako tani mai vua, ka sa bula na gone e na tiki-ni-siga ko ya. 19Era sa qai lako vakatikitiki mai na tisaipeli vei Jisu, a ra kaya, “E na vuku ni cava keitou sa sega ni vakasevi koya tani rawa kina?” 20#Maciu 21.21; Mari 11.23; 1Kori 13.2A sa kaya vei ira ko Jisu, “E na vuku ni sa lailai na nomudou vakabauta. Ni'u sa kaya vakaidina vei kemudou, Kevaka e tu vei kemudou na vakabauta e vaka na sore ni musita, dou na kaya ki na ulunivanua oqo, ‘Lako tani ki kea,’ ka na lako tani. A sa sega na ka ena dredre vei kemudou. 21Ia ko ira sa vakaoqo era sa sega ni vakasevi tani wale, e na daumasu ga kei na daulolo.”
Sa Tukuna Tale na ka e Baleta na Nona Mate ko Jisu
(Marika 9.30-32; Luke 9.43b-45)
22Ia ni ra sa lako voli e Kalili, sa kaya vei ira ko Jisu, “Ena soli yani na Luve ni Tamata ki na ligadra na tamata, 23ka ra na vakamatei koya, ka na vakaturi cake tale mai ko koya e nai katolu ni siga.” A sa rarawa vakalevu na lomadra.
Na Saumi i Vakacavacava ni Valenisoro
24 #
Lako 30.13; 38.26 Ia ni ra sa tadu ki Kapenaumi, sa lako mai vei Pita ko ira sa kumuna vata na soli ki na vale ni Kalou ka kaya, “Sa sega li ni ia na soli ki na vale ni Kalou na nomudou i vakavuvuli?” 25Sa kaya ko koya, “Sa solia.” Ia ni sa curu ki vale, sa vosa taumada vua ko Jisu, ka kaya, “A cava ko nanuma, Saimoni? Era sa taroga vei cei nai vakacavacava se na soli ko ira na tui e vuravura? Mai vei ira na luvedra, se mai vei ira ga na tani?” 26Ni sa kaya vua ko Pita, “Mai vei ira ga na tani,” a sa kaya vua ko Jisu, “Sa qai galala kina na gone. 27Ia me da kakua ni vakacalai ira, mo lako ki matasawa, ka viritaka na siwa, ka taura na ika ena yavi mada mai; ia ni ko sa dolava na gusuna, ko na kunea kina e dua nai lavo. Oqori mo kauta, ka solia vei ira me nodaru i tavi.”
Currently Selected:
Maciu 17: FRV21
Highlight
Share
Copy
Want to have your highlights saved across all your devices? Sign up or sign in
