Maciu 16
16
Na Vinakati ni Dua na Caka-Mana
(Marika 8.11-13; Luke 12.54-56)
1 #
Maciu 12.38; Luke 11.16 Sa qai lako mai ko ira na Farisi kei ira nai tokani i Setoki, me ra vakatovolei koya, a ra sa masuta me vakatakila vei ira e dua nai vakatakilakila mai lomalagi. 2A sa vosa ko koya, ka kaya vei ira, “Ni sa yakavi, dou sa kaya, ‘Ena siga vinaka, ni sa damudamu na lomalagi.’ 3Ia e na mataka, ‘Ena siga ca edaidai, ni sa damudamu ka loaloa na lomalagi.’ Oi kemudou na dauveivakaisini, dou sa kila rawa na mata ni lomalagi, ia dou sega beka ni kila rawa na veivakatakilakila ni gauna oqo? 4#Maciu 12.39; Luke 11.29Ai tabatamata ca ka dauyalewa sa dauvakasaqara e dua nai vakatakilakila, ka na sega ni soli kina e dua nai vakatakilakila, ai vakatakilakila ga i Jona na parofita.” A sa qai laivi ira ko koya, ka lako yani.
Na Nodra Leveni na Farisi kei na Setoki
(Marika 8.14-21)
5Ia ni sa tadu ko ira na nona tisaipeli ki tai kadua, era sa guilecava me kauta na madrai. 6#Luke 12.1Sa qai kaya vei ira ko Jisu, “Dou raica ka qarauni kemudou mai na nodra leveni na Farisi kei nai tokani i Setoki.” 7A ra sa veivosakitaka vakai ira, ka kaya, “Sa ka beka ni da sa sega ni kauta mai na madrai.” 8Ia ni sa kila ko Jisu, sa kaya vei ira, “Oi kemudou sa lailai na nomudou vakabauta, e na cava dou sa veinanuyaka kina e na lomamudou, ni dou sa sega ni kauta mai na madrai? 9#Maciu 14.17-21Dou sa sega beka ni kila rawa mai, se nanuma nai buli madrai e lima vei ira e lewe lima na udolu, ia ka vica nai su dou a vakasinaita? 10#Maciu 15.34-38Se nai buli madrai e vitu vei ira na lewe va na udolu, ia ka vica na sova dou a vakasinaita? 11E vakaevei ni dou sa sega ni kila rawa ni'u sa sega ni vosataka na madrai, na nodra leveni ga na Farisi kei nai tokani i Setoki ka'u sa kaya mo dou qarauni kemudou mai kina?” 12Era sa qai kila ni sa sega ni vosa ko koya me ra qarauni ira mai na leveni ni madrai, mai na nodra i vakavuvuli ga na Farisi kei nai tokani i Setoki.
Nai Tukutuku e Tusanaka ko Pita me Baleti Jisu
(Marika 8.27-30; Luke 9.18-21)
13A sa tadu ko Jisu ki na yasayasa vaka-Sisaria-Filipai, a sa tarogi ira na nona tisaipeli, ka kaya, “Era sa kaya na tamata se ko cei koi au na Luve ni Tamata?” 14#Maciu 14.1,2; Mari 6.14,15; Luke 9.7,8A ra sa kaya, “Eso, Ko Joni na dauveipapitaisotaki, ia ka so, Ko Ilaijia, ia ka so tale, Ko Jeremaia, se dua tani na parofita.” 15Sa qai kaya vei ira ko koya, “Ia dou sa kaya se ko cei koi au?” 16#Joni 6.68,69Sa qai vosa ko Saimoni Pita, ka kaya, “Oi kemuni na Karisito, na Luve ni Kalou bula.” 17A sa vosa ko Jisu, ka kaya vua, “O sa kalougata, Saimoni Pa-Jona! Ni sa sega ni vakatakila vei iko na lewe kei na dra, na Tamaqu ga sa tiko mai lomalagi. 18Au sa kaya talega vei iko, O iko ko Pita, ia e dela ni vatu oqo ka'u na tara kina na noqu i soqosoqo lotu, ia ena sega ni rawata na matamata-ni-koro ko Etesi. 19#Maciu 18.18; Joni 20.23Au na solia talega vei iko nai dola ni matanitu vakalomalagi, ia na ka kecega ko na vauca e vuravura, ena vauci mai lomalagi, ia na ka kecega ko na sereka e vuravura, ena sereki mai lomalagi.” 20Sa qai vakarota vei ira na nona tisaipeli, me ra kakua ni tukuna vua e dua ni sai Jisu na Karisito ko koya.
Sa Tukuna Tiko ko Jisu Nona Rarawa kei na Nona Mate
(Marika 8.31—9.1; Luke 9.22-27)
21E na gauna ko ya sa vakatekivu kina ko Jisu, me vakatakila kivei ira na nona tisaipeli, ni sa kilikili kaya me lako ki Jerusalemi, ka vosota na ka e vuqa mai vei ira na qase, kei ira na bete levu, kei ira na vunivola, ka me vakamatei, ka me vakaturi cake tale mai e nai katolu ni siga. 22Sa qai kauti koya ko Pita, ka vakatekivu me vunauca, ka kaya, “Me yawa sara mai vei kemuni, na Turaga! Na ka oqo ena sega sara ni yaco vei kemuni.” 23A sa vuki ko koya, ka kaya vei Pita, “Lako tani ki dakuqu, Setani! Ko sa via vakatarabetaki au, ni ko sa sega ni vakananuma na ka ni Kalou, ia na ka ga ni tamata.”
Me Kakua na Muri Lomana
24 #
Maciu 10.38; Luke 14.27 Sa qai kaya vei ira na nona tisaipeli ko Jisu, “Kevaka e dua sa via muri au, me kakua ni muria na lomana, ia me colata na nona kauveilatai, ka muri au. 25#Maciu 10.39; Luke 17.33; Joni 12.25Ia ko koya yadua sa via maroroya na nona bula, ena vakayalia, ia ko koya yadua ena vakayalia na nona bula e na vukuqu, ena maroroya. 26Ia ka cava na kena yaga vua na tamata, kevaka e rawati vuravura taucoko, ka vakayalia na yalona? Se cava ena solia na tamata mei sau ni yalona?
27 #
Maciu 25.31; Same 62.12; Roma 2.6 “Ni na lako mai na Luve ni Tamata e nai ukuuku nei Tamana, kei ira vata kaya na nona agilosi; ena qai sauma ko koya vei ira na tamata yadua me vaka na nodra i valavala. 28Au sa kaya vakaidina vei kemudou, Sa tu eke eso, era na sega dina ni mate, era na raica mada na Luve ni Tamata ni sa lako mai e na nona matanitu.”
Currently Selected:
Maciu 16: FRV21
Highlight
Share
Copy
Want to have your highlights saved across all your devices? Sign up or sign in
