Maciu 15
15
Na Nodra i Vakavuvuli na Qase
(Marika 7.1-13)
1Sa qai lako mai vei Jisu ko ira na vunivola kei ira na Farisi mai Jerusalemi, ka kaya, 2“A cava sa talaidredre kina ko ira na nomu tisaipeli ki na nodra i vakavuvuli na qase? Ni ra sa kana ka sa sega mada ni vuluvulu.” 3A sa vosa ko koya, ka kaya vei ira, “A cava dou sa talaidredre talega kina ki na vunau ni Kalou e na nomudou i vakavuvuli? 4#Lako 20.12; 21.17; Vrua 5.16; Vsoro 20.9Ni sa vakarota na Kalou, ka kaya, ‘Vakarokoroko vei rau na tamamu kei na tinamu,’ ia, ‘Ko koya sa vosavakacacataka na tamana se na tinana, me sa vakamatei.’ 5Ia dou sa kaya, O koya yadua ena kaya vei tamana se tinana, ‘Sa vakatabui me nona na Kalou na noqu ka sa yaga vei iko,’ 6me sa qai sega ni vakarokoroko vei tamana se tinana.’ Ia dou sa vakawaletaka na vunau ni Kalou e na nomudou i vakavuvuli. 7A dauveivakaisini koi kemudou! Sa tukuni kemudou vakavinaka eliu ko Aisea, ni sa kaya:
8 #
Aisea 29.13
“ ‘O ira na tamata oqo era sa vakarokorokotaki au e na gusudra,
ia na yalodra sa yawa tani vei au;
9 a sa sega ni yaga na nodra masuti au,
ni ra sa vakatavuvulitaka na vunau ni tamata mei vakavuvuli.’ ”
Na Veika e Vakadukadukalitaka na Tamata
(Marika 7.14-23)
10A sa kacivi ira na lewe vuqa, ka kaya vei ira, “Dou rogoca, ka kila sara: 11a ka sa curu ki na gusuna sa sega ni vakadukadukalitaka na tamata, ia na ka ga sa lako mai na gusuna, sai koya ga sa vakadukadukalitaka na tamata.” 12Sa qai lako mai ko ira na nona tisaipeli, ka kaya vua, “O ni sa kila beka era sa lomaca na Farisi, ni ra sa rogoca na vosa ko ya?” 13A sa vosa ko koya, ka kaya, “A kau vakaaduaga, e sega ni tea ko Tamaqu vakalomalagi, ena cavu laivi. 14#Luke 6.39Dou laivi ira ga; era sa mataboko, a ra sa tuberi ira na mataboko. Ia kevaka e tubera na mataboko na mataboko, erau na sikalutu ruarua ki na keli.” 15Ia sa qai vosa ko Pita, ka kaya vua, “Mo ni tukuna mai vei keitou na vosa vakatautauvata oqo.” 16A sa kaya ko Jisu, “Oi kemudou talega, dou sa sega li ni kila rawa? 17Dou sa sega beka ni kila, na ka kecega sa curu ki na gusu sa lutu ki na kete, a sa biu yani ki nai benubenu? 18#Maciu 12.34Ia na veika sa curu mai na gusu, sa lako dina mai na yalo; a veika ga oqo sa vakadukadukalitaka na tamata. 19Ni sa curu yani mai na yalo na nanuma ca, na daulaba, na dauveibutakoci, na dauveidauci, na daubutako, na veibeitaki vakailasu, na vosa vakacaca. 20A veika ga oqo sa vakadukadukalitaka na tamata. Ia ka sega ni vakadukadukalitaka na tamata ni sa kana ka sega mada ni vuluvulu.”
Na Nona Vakabauta e Dua na Yalewa ni Kenani
(Marika 7.24-30)
21Sa qai lako tani ko Jisu, ka lako ki na veiyasana i Taia kei Saitoni. 22Ka raica, sa dua na yalewa ni Kenani sa lako mai na yasana ko ya, a sa tagi vua, ka kaya, “Ni lomani au mai, na Turaga, na Luve i Tevita; na luvequ-yalewa sa rarawa vakalevu ni sa curumi koya e dua na tevoro.” 23A sa sega ni kaya vua e dua na vosa ko koya. A ra sa lako mai na nona tisaipeli ka masuti koya, ka kaya, “Vakatalai koya tani, ni sa mai tagi muri keda tikoga.” 24A sa vosa ko koya, ka kaya, “Au sa sega ni talai vei ira na tani, vei ira ga na sipi ni vale i Isireli era yali tu.” 25Sa qai lako mai na yalewa, ka cuva vua, ka kaya, “Kemuni na Turaga, ni vukei au mai.” 26A sa vosa ko koya, ka kaya, “Sa sega ni vinaka me kau na kedra na gone, ka me biu vei ira na koli.” 27A sa kaya na yalewa, “E dina ga, na Turaga, ia ko ira na koli era kania na meme ni kakana sa lutu mai na tepeli ni nodra turaga.” 28Sa qai vosa ko Jisu, ka kaya vua, “Yalewa, sa levu na nomu vakabauta! Me yaco vei iko me vaka na ka ko sa vinakata.” A sa bula na luvena-yalewa e na tiki-ni-siga ko ya.
Sa Vakabulai Ira e Lewe Vuqa ko Jisu
29A sa lako tani mai kea ko Jisu, ka lako voleka ki na wasawasa ko Kalili. A sa cabe ki na ulunivanua, ka tiko sobu kina. 30A ra sa lewe vuqa sara sa lako mai vua, era sa kauta mai na lokiloki, na mataboko, na galu, na gera, ka lewe vuqa tale. A ra sa kotori ira sobu ki na yava i Jisu, a sa vakabulai ira ko koya. 31A ra sa kurabui kina ko ira na lewe vuqa, ni ra sa raica sa vosa rawa na galu, sa bula na gera, sa lako rawa na lokiloki, a sa rai rawa na mataboko. A ra sa vakacaucautaka na Kalou i Isireli.
Sa Vakani Ira na Lewe Va na Udolu ko Jisu
(Marika 8.1-10)
32Sa qai kacivi ira mai na nona tisaipeli ko Jisu, ka kaya, “Au sa lomani ira na lewe vuqa, sa qai bogi tolu era sa tiko ga vei au, a sa sega na ka me ra kania. Ia ka'u sa sega ni via vakatalai ira yani ni ra sa sega ni kana, de ra malumalumu e gaunisala.” 33A sa kaya vua ko ira na nona tisaipeli, “Eda na rawata mai vei na madrai e na vanua lala oqo, me ra mamau kina ko ira na lewe vuqa?” 34A sa kaya vei ira ko Jisu, “E vica nai buli madrai sa tu vei kemudou?” A ra sa kaya, “E vitu, ka so na ika lalai.” 35A sa vosa ko koya vei ira na lewe vuqa me ra tiko sobu e na qele. 36A sa taura ko koya nai buli madrai e vitu kei na ika, a sa vakavinavinaka, a sa dovia, a sa solia vei ira na nona tisaipeli, ia ko ira na tisaipeli era solia vei ira na lewe vuqa. 37A ra sa kana kecega, a ra sa mamau. A ra sa tomika vata na vo ni ka sa dovi, ka sa vitu na sova sa sinai kina. 38Ia ko ira sa kana era sa lewe va na udolu na tagane, ia ko ira na yalewa kei na gone era sa sega ni wili. 39A sa talai ira yani na lewe vuqa ko koya, a sa qai vodoka na waqa, a sa tadu ki na yasayasa vaka-Makitala.
Currently Selected:
Maciu 15: FRV21
Highlight
Share
Copy
Want to have your highlights saved across all your devices? Sign up or sign in
