Vakatekivu 18
18
Sa Yalataki na Sucu i Aisake
1A sa rairai vua ko Jiova e na kau eso mai Mamire. A sa tiko ko koya e na katuba ni valelaca ni sa katakata na siga. 2#Ipe 13.2A sa ta cake ka vakararai voli, ka raica, sa tu voleka vua e lewe tolu na tamata. Ia ni sa raici iratou, sa cici yani e na katuba ni valelaca me la'ki tavaki iratou, ka sa cuva vaka ki na qele, 3a sa kaya, “Kemuni na noqu Turaga, kevaka ka'u sa kune loloma e matamuni, mo ni kakua mada ni lako tani vua na nomuni tamata. 4Me kau mada mai e dua na wai lailai, mo dou vuya mada na yavamudou, ka vakacegu e na rugurugua ni vunikau. 5Ia ka'u na kauta vakalailai mai eso na madrai, ka mo dou vakaukauwataki mada kina, ni se bera ni dou qai lako tale yani—me vaka ni dou sa lako mai kivei au na nomudou tamata.” A ratou a kaya, “Mo kitaka mada me vaka ko sa kaya.” 6A sa lako vakatotolo ki loma ni valelaca kivei Sera ko Eparaama, ka sa kaya, “Mo kusarawa, mo vakarautaka e tolu nai vakarau valawa vinaka sara, mo natuka, ka vavia eso na keke.” 7A sa cici ko Eparaama ki na qele ni bulumakau ka kauta mai e dua na luve ni bulumakau sa malumu na lewena ka vinaka, ka solia vua e dua na cauravou, ka sa kusarawa ko koya e na kena vakarautaki. 8A sa kauta na bata kei na wai-ni-sucu kei na luve ni bulumakau sa vakabuta oti, a sa tauca vei iratou; ka sa tu voleka vei iratou ko koya e ruku ni kau ni ratou sa kana tiko.
9A ratou a kaya vua, “Sa evei ko Sera na watimu?” A sa kaya ko koya, “Raica, sa tiko o koya e loma ni valelaca.” 10#Roma 9.9A sa kaya ko koya, “Au na lesu vakaidina mai vei iko me vaka na kena gauna; ka raica, ena dua na luvena tagane ko Sera na watimu.” A sa rogoca oqo ko Sera e na katuba ni valelaca mai dakuna. 11A rau sa qase ruarua ko Eparaama kei Sera, ni sa vuqa na nodrau yabaki; ka sa mudu vei Sera nai valavala vakayalewa. 12#1Pita 3.6A sa dredre lo ko Sera, ka kaya, “Ni'u sa qase mai, ka ni sa qase talega na noqu turaga, au na marautaka li na tiko vata?” 13A sa kaya vei Eparaama ko Jiova, “A cava sa dredre kina ko Sera, ka vaka, ‘Au na vakasucu vakaidina beka koi au, ni'u sa qase mai?’ 14#Luke 1.37E dua beka na ka sa dredre vei Jiova? Au na lesu mai vei iko e na gauna sa lokuci, me vaka na kena gauna, ia ena qai dua na luvena tagane ko Sera.” 15Ia sa cakitaka ko Sera, ka kaya, “Au a sega ni dredre”; ni sa rere ko koya. A sa kaya ko koya, “Io, ko a dredre dina.”
Vakamamasu ko Eparaama me Baleti Sotoma
16A ratou sa qai cavu tu mai kea na tamata, ka gole vaka ki Sotoma; a sa lako vata kei iratou ko Eparaama me la'ki veitalaci. 17A sa kaya ko Jiova, “Me'u na vunia li vei Eparaama na ka ka'u na cakava, 18ni na yaco vakaidina ko Eparaama me matanitu levu ka kaukauwa, ka na kalougata talega e na vukuna na veimatanitu kecega e vuravura? 19E segai, ni'u sa digitaki koya, ni na vakaroti ira na luvena kei na nona vuvale era na muri koya mera na vakabauta talega na sala i Jiova, me ra kitaka na ka dodonu ka ia na lewa dodonu; me vakayacora kina vei Eparaama ko Jiova na veika ka vosa kina vua.” 20Sa kaya talega ko Jiova, “Ni sa ka levu nai tukutuku kei Sotoma kei Komora, a sa ka tani sara na nodrau i valavala ca! 21Au na lako sobu mada, ka raica se ra sa cakava me vaka sara na kenai tukutuku, sa yacovi au. Ia kevaka e segai, ka'u na qai kila.”
22Ia koi rau na tamata, erau a gole tani mai kea, ka lako vaka ki Sotoma, ia ko Eparaama, sa tu ga e na mata i Jiova. 23A sa toro voleka vua ko Eparaama, ka kaya, “Ko ni na vakarusa vata beka na yalododonu kei nai valavala ca? 24De sa lewe limasagavulu na yalododonu e loma ni koro ko ya; ko ni na vakarusa beka, ka sega ni vosota na koro ko ya e na vukudra na lewe limasagavulu era na kune kina? 25Me yawa mada vei kemuni mo cakacaka vakakoya, ka me vakamatea vata na yalododonu kei nai valavala ca, ka me sa tautauvata na yalododonu kei nai valavala ca! Me yawa mada vei kemuni! Ena sega li ni caka dodonu Ko Koya sa lewai vuravura kecega?” 26A sa kaya ko Jiova, “Kevaka ka'u sa kunea mai Sotoma e lewe limasagavulu na tamata yalododonu e loma ni koro, au na qai vosota na koro taucoko e na vukudra.” 27A sa vosa ko Eparaama, ka kaya, “Raica, ka'u sa doudou mada ni vosa vei kemuni na Turaga, koi au na kuvu ni soso kei na dravusa. 28De sa na lewe vasagavulu ka lima ga na yalododonu? Ko na vakarusa beka na koro taucoko ni sa yali e lewe lima?” A sa kaya ko koya, “Kevaka ka'u sa kunea kina e lewe vasagavulu ka lima, ka'u na sega ni vakarusa.” 29A sa vosa tale vua ko koya, ka kaya, “De sa kune kina e lewe vasagavulu.” A sa kaya ko koya, “Au na sega ni kitaka e na vukudra na lewe vasagavulu.” 30A sa kaya ko koya, “Mo ni kakua mada ni cudru kemuni na Turaga, ka me'u vosa mada. De sa kune kina e lewe tolusagavulu.” A sa kaya ko koya, “Au na sega ni kitaka, kevaka ka'u sa kunea kina e lewe tolusagavulu.” 31A sa kaya ko koya, “Raica, ka'u sa doudou mada ni vosa vei kemuni na Turaga. De sa kune kina e lewe ruasagavulu.” A sa kaya ko koya, “Au na sega ni vakarusa e na vukudra na lewe ruasagavulu.” 32A sa kaya ko koya, “Mo ni kakua mada ni cudru kemuni na Turaga, ka me'u vosa tale vakadua ga. De sa kune kina e lewe tini.” A sa kaya ko koya, “Au na sega ni vakarusa e na vukudra na lewe tini.” 33A sa lako yani ko Jiova, ni rau sa veivosaki oti kei Eparaama; a sa lesu tale ki na nona tikina ko Eparaama.
Currently Selected:
Vakatekivu 18: FRV21
Highlight
Share
Copy
Want to have your highlights saved across all your devices? Sign up or sign in
