Vakatekivu 19
19
Valavala Ca ni Kai Sotoma
1A sa lewe rua na agilosi erau a lako ki Sotoma e na yakavi, a sa tiko mai na matamata-ni-koro mai Sotoma ko Loti. Ia ni sa raici rau ko Loti, sa tucake ka la'ki tavaki rau; a sa vakacuva na matana vaka ki na qele. 2A sa kaya, “Raica, koi kemudrau na noqu turaga, au masuti kemudrau, mo drau lesu mada ka curuma na noqu vale na nomudrau tamata, ka moce, ka vuya na yavamudrau; ia drau na sou e na mataka, ka lako yani.” A rau a kaya, “E segai; keirau na moce e na saqata ni koro.” 3A sa cikevi rau vakalevu; erau sa qai lesu vua, ka curuma na nona vale; a sa caka magiti vei rau, a sa vavia na madrai sa sega ni vakaleveni, a rau sa kana. 4Ia ni ratou se bera ni davo koto, ko ira na lewe ni koro, io ko ira na kai Sotoma, era sa vakavolivolita na vale, na gone kei na qase, io na tamata kecega mai na veiyasana kecega; 5#Dvei 19.22-24a ra sa kaci vei Loti, ka kaya vua, “Sa evei na tamata erau a lako mai vei iko e na bogi oqo? Mo kauti rau mai ki tautuba, me keimami veikilai kei rau.” 6A sa curu yani ki tuba vei ira ko Loti, ka sogota nai sogo ni katuba mai dakuna, 7a sa kaya, “Au sa kerei kemudou na wekaqu, dou kakua mada ni cakava nai tovo vakasisila. 8Raica, sa le rua na luvequ yalewa erau sa sega ni veiyacovi kei na tagane; me'u kauti rau mada mai vei kemudou, ia dou kitaka vei rau na ka e vinaka vei kemudou. Ia dou kakua ga ni kitaka e dua na ka vei rau na tamata oqo, ni rau sa curu mai me vakarurugi e na noqu vale.” 9Ia era sa kaya, “Toso yani!” Era sa kaya talega, “Sa qai dua na tamata la oqo sa mai tiko vulagi bagi, a sa via lewa! Keimami na qai caka ca vakalevu vei iko ka vakalailai vei rau.” A ra sa qai biliraki Loti vakaca, ka toro ki nai sogo ni katuba me basuraka. 10Ia koi rau na tamata erau sa dodoka yani na ligadrau, ka dreti Loti kivei rau ki loma ni vale, ka sogota na katuba. 11#2Tui 6.18A rau sa yaviti ira na tamata era tiko mai na katuba ni vale me ra mataboko, ko ira na lalai kei ira na lelevu, ka ra sa sega ni raica rawa kina na katuba.
Sa Vakacacani ko Sotoma kei Komora
12A rau sa kaya na tamata vei Loti, “Ko cei tale na nomu sa tiko eke? A vugomu, se luvemu tagane, se luvemu yalewa, se ko ira kecega na nomu e na koro oqo—mo kauti ira tani mai na vanua oqo. 13Ni keirau na vakarusa na koro oqo, ni sa levu na kedrai tukutuku e na mata i Jiova, ka sa talai keirau ko Jiova me keirau vakarusa.” 14A sa lako yani ko Loti ka vosa vei rau na vugona e rau veiwatini kei na luvena yalewa, a sa kaya, “Dou cavu tu, dou lako tani mai na vanua oqo; ni na vakarusa na koro oqo ko Jiova.” Ia e rau sa nanuma ga na vugona ni veiwali tikoga ko koya.
15Ia ni sa kida na mataka, erau a qai vakusarawataki Loti na agilosi, ka kaya, “Mo cavu tu, mo kauta na watimu, kei rau na luvemu yalewa erau tiko eke, de ko rusa e nai valavala ca ni koro.” 16#2Pita 2.7Ia ni sa vakaberabera ko koya, erau a taura na ligana na tamata, kei na liga i watina, kei na ligadrau na luvena yalewa, ka ni sa lomani koya na Kalou, ka rau a kauta yani, ka laiva e nai bili ni koro. 17Ia ni rau sa kauti iratou ki nai bili, sa qai kaya e dua vei rau, “Dro mo bula. Kakua ni rai ki muri se vakacegu e na dua na tikina e na buca. Dro sara ki na ulunivanua, de ko rusa.” 18A sa kaya vei rau ko Loti, “Me kakua mada, noqu Turaga; 19raica, sa kune loloma e matamuni na nomuni tamata, ko sa vakalevuya talega na nomuni loloma, ko ni sa cakava vei au ni kemuni sa vakabulai au; ia e dredre ni ka'u sa dro ki na ulunivanua, de yacovi au na ca, ka'u na mate kina. 20Raica, na koro ko ya sa bau voleka me'u sa dro kina, ia sa lailai wale. Me'u dro mada kina — e sega beka li na ka lailai wale? — ia ka'u na qai bula!” 21A sa kaya vua, “Sa vinaka, ka'u na vakarorogo talega vei iko e na ka oqo, ni'u na sega ni vakarusa na koro oqo ko sa tukuna. 22Mo kusarawa, mo dro kina, ni sa sega e dua na ka ka'u na cakava rawa me yacova ni ko sa yaco kina.” O koya sa vakayacani kina na koro ko ya ko Soa.#19.22 A kenai balebale E lailai
Vakarusai ko Sotoma kei Komora
23Sa cadra na mata-ni-siga ki vuravura ni sa yaco ki Soa ko Loti. 24#Maciu 10.15; 11.23,24; Luke 10.12; 17.29; 2Pita 2.6; Juta 1.7Sa qai vakatauca ko Jiova na sulifure kei na bukawaqa mai vei Jiova mai lomalagi, ki na dela i Sotoma kei Komora; 25a sa vukica na veikoro ko ya, kei na buca taucoko, kei ira kecega na lewe ni veikoro, kei na ka sa tubu mai na qele. 26#Luke 17.32Ia na watina ni sa muria tiko sa rai ki muri, a sa yaco me duru masima.
27A sa sou e na mataka ko Eparaama, ka lako ki na yasana ka tu kina ko koya e na mata i Jiova; 28a sa rai yani vaka ki Sotoma kei Komora, kei na vanua taucoko mai na buca, ka dikeva, ka raica, sa lako cake na kubou ni vanua ko ya me vaka na kubou ni lovo.
29A sa yaco, ni sa vakarusa na veikoro mai na buca na Kalou, sa nanumi Eparaama na Kalou, ka vakatalai Loti tani mai na veivakarusai, ni sa vakarusa na veikoro ka tiko kina ko Loti.
Tekitekivu ni Luvei Moapi kei na Luvei Amoni
30A sa lako cake mai Soa ko Loti, ka la'ki tiko mai na ulunivanua, kei rau vata kaya na luvena yalewa ruarua; ni sa rere ni tiko mai Soa. A sa tiko e na dua na qara-vatu, ko koya kei rau na luvena yalewa. 31A sa kaya na ulumatua vua ka gone, “Ko tamadaru sa qase mai, a sa sega na tagane e na vanua oqo me mai veiyacovi kei kedaru, me vaka nai valavala ni veivanua kecega. 32Daru ia mada, daru vagunuva na tamadaru e na waini, me daru moce vata kaya, me daru vakaivakawa vua na tamadaru.” 33A rau a vagunuva na tamadrau e na waini e na bogi ko ya. A sa curu ki loma na ulumatua, ka la'ki moce vata kaya na tamana; ia sa sega ni kila ko koya na nona la'ki koto se na nona tucake. 34Ia e na mataka, sa kaya na ulumatua vua sa gone, “Raica, ka'u a moce vata kei tamaqu e na bogi e na noa. Daru vagunuva e na waini e na bogi talega oqo; ia mo qai curu ki loma ko iko ka moce vata kaya, me daru vakaivakawa vua na tamadaru.” 35A rau a vagunuva na tamadrau e na waini e na bogi talega ko ya; a sa ia ko koya ka gone, ka la'ki moce vata kaya; a sa sega ni kila ko tamana na nona la'ki davo se na nona tucake. 36A rau sa bukete ruarua na goneyalewa i Loti vua na tamadrau. 37A sa sucu vua e dua na luvena tagane ko koya na ulumatua, a sa vakayacani koya ko Moapi; ko koya na tamadra na luve i Moapi era bula e na gauna oqo. 38Ia ko koya ka gone, sa vakasucu talega ka tagane, a sa vakayacani koya ko Peniame; ko koya na tamadra na luve i Amoni era bula e na gauna oqo.
Currently Selected:
Vakatekivu 19: FRV21
Highlight
Share
Copy
Want to have your highlights saved across all your devices? Sign up or sign in
