मत्ती 27
27
येशुला पीलातससाःला खेर्क्योक
(मर्कुस १५:१; लुका २३:१-२; युहन्ना १८:२८-३२)
1ङामु नुःपलारा थाम्जेर छेस्यो पुजाहारी ओःले छेस्यो मीःक्याइ येशुला सेकेन तेःदाम पेःसी। 2ओःले खुङक्याइ येशुला ताःम्दी रोमी हाकीम पीलातससाःला खेर्सी।
यहुदा सीक्योक
(प्रेरीत १:१८-१९)
3येशुला सेकेन दण्ड काःल्क्योक ताम कोःमीःजीक खुङला जुम्दी तेर्केन युहुदाला पछुतो काःल्सी। ओः सोङ्गारा, खुङगीइ ओः ङुलगीइ खाल चीग रा च्यु टाङ्गा डेबा खेर्ती छेस्यो पुजाहारीक्या ओःले छेस्यो मीःक्याला लोतेर्चेला काःल्सी। 4ओःले खुङगीइ लाःसी, “नाःमाङ माःइबा लेःगा चीगकाङ माःबेक्योक मीःला जुम्दी तेर्ती ङाःइ लाःयो पेःसी।” खुङक्याइ खोला लेःन लोदी लाःसी, “ओःले ङीःला ची मतलब ले? ओःखो नी ख्योइ ताम इःङे।” 5दी ताम कोःदी यहुदाइ ओः डेबा मन्दीर नाःङ्ला क्युर्तेसी ओःले ओःलाःम्ले काःल्दी खो प्याङ्दी सीसी।
6छेस्यो पुजाहारीक्याइदी ओः डेबा तुःदी लाःसी, “दी डेबाला कोन्ज्योइ मन्दीरकीइ ढुकुटीला ज्याजे डीक्पु मीःङे, चीलेलाःना दी डेबा नी मीः सेचेला तेर्क्योक डेबा इःङे।” 7ओः सोङ्गारा, खुङक्याइ टेः पेःसी ओःले ओः डेबाइ वीदेशीक्याइ फुम्बु तीप्चेला सेबीइ नेकी जोगेन मीःइ सीःङ ङ्योःसी। 8ओः सोङ्गारा, तीःङ्साङथुपाङ ओः सीःङला “ठाइ सीःङ” लाःकुए।
9एःन्डुले कोन्ज्योइ लेःङ्गो तेर्केन यर्मीयाइ लाःक्योक ताम पुरा काःल्सी, “इस्राएलगीइ मीःक्याइ खुङगीइ लागी पेःक्योक रीःनदी ङुःलगीइ टाङ्गा खाल चीग रा च्यु एःके। ओःले ओःखो खुङक्याइ लेःङ्सी, 10ओःले प्रभुइ ङाःला लाःक्योक च्योःङ्रारा, खुङक्याइ ओः डेबाइ सेबीइ नेकी जोगेन्दीइ सीःङ ङ्योःसी।”#जकरीया ११:१२-१३
पीलातसकीइ तोःङ्ला येशु
(मर्कुस १५:२-१५; लुका २३:३-५,१३-२५; युहन्ना १८:२९–१९:१६)
11येशु रोमी हाकीमगीइ तोःङ्ला लाःङ्सी, ओःले खुङगीइ येशुला टीःसी, “ची ख्यो यहुदीक्याइ क्याःल्बु इःङे?” येशुइ लेःन लोदी लाःसी, “ओःखो नी ख्या राःङगीइरा लाःतेरा एः।” 12छेस्यो पुजाहारीक्याइ ओःले छेस्यो मीःक्याइ येशुला माःङ्बुरा तामक्याला माःताक्पा च्याःङ्सी, इःनाङ खुङगीइ चीङ लेःन मालो। 13ओः सोङ्गारा, पीलातसकीइ खुङला लाःसी, “खुङक्याइ ख्योला दीजेइ माःताक्पा च्याःङ्क्योक ख्योइ मेःकोःबा?” 14इःनाङ येशुइ चीङ लेःन मालो, ओः सोङ्गारा, हाकीम याःमाछाक नेसी।
15तेन्दुरा नीस्तार मेःलीङगीइ तीःजीला मीःक्याइ दाम्क्योक मेःराङ चीग कैदीला रोमी हाकीमगीइ पोःर्तेकेन्दी पेःउके। 16ओः तीःजीला थाम्जेरकीइ ङोःसेक्योक बारब्बा मीःन पेःक्योक मेःराङ चीग कैदी चेङाङला एःके। 17ओःले पीलातसकीइ जोम्क्योक मीःक्याला टीःसी, “लो लोःप, ङाः ख्योक्याइ लागी काँःदीला पोःर्तेर्का? बारब्बाला की थार्च्युगेन ख्रीष्ट लाःकेन येशुला?” 18छेस्यो पुजाहारीक्याइ मीसेर पेःदी येशुला खुङसाःला ख्योङ्क्योक इःङे लाःकेन ताम पीलातसकीइ याःबुले छोर्ती एःके।
19पीलातस ठीम पेःसाला तेःतेरा पेःगासुना खुङगीइ पेःमेइ खुङला एःन्डु लाःती लेःङ्गो ताङ्सी, “चीङ माःताःक्पा म्याःक्योक मीःला चीङ माःबे चीलेलाःना तीःरीङ कुःङ्मु ङाःइ खुङगीइ बारेला मीलाम थोङ्दी माःङ्बुरा तुःक्पु ज्योर्ती एः।”
20इःनाङ छेस्यो पुजाहारीक्याइ ओःले छेस्यो मीःक्याइ बारब्बाला पोःर्तेर ओःले येशुला सेचेला लाङ्दो लाःती मीःक्याला क्यासी। 21रोमी हाकीमगीइ फीर्च्या टीःसी, “दी मेःन्दा ङी नाःङ्ला सुलादी ङाः ख्याक्याइ लागी पोःर्तेर्का?” खुङक्याइ लाःसी, “बारब्बालारा पोःर्तेर!”
22ओःले पीलातसकीइ खुङक्याला फीर्च्या टीःसी, “ओःन्डु एःना थार्च्युगेन ख्रीष्ट लाःकेन येशुलादी ङाः ची पेःगा ले?” खुङक्या थाम्जेरकीइ लाःसी, “ओःखोला क्रुसला प्याङ्दो!” 23पीलातसकीइ टीःसी, “चीले, दीखोइ ची माःताक्पा पेःदी एःपा ले?” इःनाङ खुङक्या ताःरुङ केताङ्देरा लाःसी, “ओःखोला क्रुसला प्याङ्दो!”
24पीलातसकीइ ताः राःङगीइ चीङ पेःमीःखुगेन्दी थोङ्सी। ओःले मीःक्याइ खैलाबैला पेःडो लाःकेन जीबाइ खुङगीइ छ्यु लेःङ्सी ओःले पोर्चोमगीइ तोःङ्ला राःङगीइ लाःक्पा ठुदेरा लाःसी, “तादो, दी मीःला सेक्योक माःताक्पादी ङाःला मीःङे, इःनाङ ख्याक्यालारा क्याःप्च्युक।” 25ओःले थाम्जेर मीःक्याइ खुङला लाःसी, “दीखोला सेक्योक माःताक्पा ङीः ओःले ङीःइ छार्क्युफुर्क्युक्याखालारा लेप्च्युक।”
26ओःले पीलातसकीइ बारब्बाला खुङक्याइ लागी पोःर्तेर्सी। येशुलादी खुङगीइ कोर्रा क्याःप्च्युसी ओःले क्रुसला प्याङ्जेला थेक्याइ लाःक्पाला क्याप च्योल्सी।
थेक्याइ येशुला ङ्याप्च्युक पेःक्योक
(मर्कुस १५:१६-२०; युहन्ना १९:२-३)
27ओः तीङ्ला पीलातसकीइ थेक्याइ येशुला क्याःल्खाङ नाःङ्ला खेर्सी ओःले राःङ्सा थेक्याला केक्याःप्सी। 28खुङक्याइ येशुइ केःला पीतेर्सी ओःले क्याःल्बुइ केःङेन च्योःङ्रा माःर्मु केःला केङ्तेर्सी। 29खुङक्याइ छेर्माङगीइ मुकुट जोदी खुङगीइ गोला केङ्तेर्सी, ओःले खुङगीइ च्याःबु लाःक्पाला पेःर्का चीग तेर्सी, ओःले खुङगीइ तोःङ्ला पीमु चुदी ङ्याप्च्युक पेःदेरा लाःसी, “यहुदीक्याइ क्याःल्बुइदी जय काःल्ज्युक!” 30ओः तीङ्ला खुङक्याइ येशुला छेल्दोर क्याःप्सी, ओःले ओः पेःर्का लेःङ्दी खुङगीइ गोला रोप्सी। 31खुङक्याइ येशुला एःन्डुले ङ्याप्च्युक पेःसीङमीःजीक माःर्मु केःला पीती खुङगीइ राःङगीइ केःला केःङ्तेर्सी। ओः तीङ्ला खुङक्याइ येशुला क्रुसला प्याङ्गाला खेर्सी।
येशुला क्रुसला प्याङ्क्योक
(मर्कुस १५:२१-३२; लुका २३:२६-४३; युहन्ना १९:१७-२७)
32खुङक्या लाःमला डोगासुना डोगासुनारा सीमोन मीःन पेःक्योक मेःराङ चीग कुरेनी देशकीइ मीःला फ्रेसी। थेक्याइ सीमोनला जबरजस्ती येशुइ क्रुस खुर्च्युसी। 33ओःले खुङक्या गलगथा लाःकेन ठाउँला लेप्सी। गलगथा लाःक्योकदी रीःसीलगीइ ठाउँ इःङे। 34ओःला लेःप्ती खुङक्याइ येशुला खेन्दी मेन सेक्योक अङ्गुरकीइ नीःङ्गार तेर्सी। इःनाङ येशुइ प्व्राः तामीःजीक खुङगीइ थुङ्जे माःङीन।
35ओः तीङ्ला खुङक्याइ येशुला काँटी तीःप्सी ओःले क्रुसला प्याङ्सी। ओःले खुङक्याइ येशुइ केःलाइ काःखो बो काँःदीइ ज्योर्केन्दी लाःती बो जोजेला चीट्ठा लुसी। 36ओः तीङ्ला खुङक्याइ येशुला ह्रुङ्दी तेःसी। 37खुङला माःताक्पा च्याःङ्क्योक ताम खुङगीइ गोइ थोला क्रुसला एःन्डुले प्रुःदी एःके, “दीखो यहुदीक्याइ क्याःल्बु येशु इःङे।” 38खुङक्याइ येशु ङीमुरा मेःराङ ङी च्याःक्पाक्यालाङ चीगला खुङगीइ च्याःबुछ्योले ओःले राःङ्सादीला योमाछ्योले क्रुसला प्याङ्सी।
39ओः लाःम पेःदेरा डोगेन मीःक्याइ गो योङ्देरा येशुला ङ्याप्च्युक पेःदेरा 40एःन्डु लाःसी, “कोन्ज्योइ मन्दीर रोम्दी फीर्च्या ङीःमा सुमलारा जोगे लाःकेन मीः ख्यारा मीःङे? ख्यो कोन्ज्योइ पुः इःङे लाःना राःङलारा सेन्च्युदो ओःले क्रुसले माःर्ला पाःप्ती स्यो!”
41ओःन्डुलेरा छेस्यो पुजाहारीक्या, छ्येइ ठीमगीइ लोबेनक्या ओःले छेस्यो मीःक्याइयाङ येशुला ङ्याप्च्युक पेःसी। 42खुङक्याइ लाःसी, “खोइ राःङ्साला नी सेन्च्युसी, इःनाङ राःङलारादी सेन्च्युमाःखु! दीखो इस्राएलगीइ क्याःल्बु मीःङे ले? खुङ ताःसेरा क्रुसलाःम्ले पाःप्ती ओःङ्ज्युक, ओःले उः खुङला सेमल्हुक लुगा। 43दीखोइ कोन्ज्योला सेमल्हुक लुउए। ओःले कोन्ज्योला सेम थेसी लाःना खुङगीइ दीखोला ताःसेरा थार्च्युज्युक, चीलेलाःना दीखोइ राःङला कोन्ज्योइ पुः इःङे लाःकुके।”
44येशु ङीमुरा क्रुसला प्याङ्क्योक मेःन्दा ङी च्याःक्पाक्याइयाङ खुङला एःन्डुलेरा ङ्याप्च्युक पेःसी।
येशु सीक्योक
(मर्कुस १५:३३-४१; लुका २३:४४-४९; युहन्ना १९:२८-३०)
45ङीःमा फेमीःजीक घण्ट सुमथुप देशकाःङरा नाक्जुक काःल्सी। 46सुम बज्तीसुना येशुइ छ्योम्बो के तेङ्दी लाःसी, “इलोइ, इलोइ, लामा सबखथनी?”#२७:४६ येशुइ दी ताम भजन २२:१ लाःम्ले अरामाइक तामलाःम्ले लाःक्योक इःङे। दीखो लाःक्योकदी, “ङाःइ कोन्ज्यो, ए ङाःइ कोन्ज्यो, ङाःला चीले त्यग्तीक्योक?” 47ओःला लाःङ्दी तेःक्योक मीःक्या नाःङ्ला चीङ मीःक्याइ येशु एःन्डुले केताङ्क्योक कोःसी ओःले एःन्डु लाःसी, “कोःदो ले, दीखोइ नी कोन्ज्योइ लेःङ्गो तेर्केन्दी एलीयाला का केक्याःप्कुदु।”
48ओःले खेप चीगलारा खुङक्या नाःङ्ले मेःराङ चीग छ्योङ्देरा काःल्दी रुवा लेःङ्दी कीर्पु अङ्गुरकीइ नीःङ्गार पासी ओःले मीमाइ च्योदोकला ज्यादी येशुला थुङ्जे तेर्सी। 49इःनाङ राःङ्साक्याइ लाःसी, “कुःदो, कुःदो, दीखोला थार्च्युजेला एलीया ओःङ्गुदुबा की तागा!” 50ओः तीङ्ला फीर्च्या येशुइ छ्योम्बो के तेङ्सी ओःले खुङगीइ उ काःल्सी।
51ओः तेःकासुरा कोन्ज्योइ मन्दीर नाःङ्ला प्याङ्क्योक पर्दा#२७:५१ पर्दा दी पर्दा चाङ्मा ठाउँ ओःले माःङ्बुरा चाङ्मा ठाउँगीइ कील्ला एःके, ओःला चोइ पुजाहारी चीग्रा लोःला खेप चीग डोजे ज्योर्कुके। कोन्ज्योइ दी पर्दा राल्तेर्ती ताः चोइ पुजाहारी चीग्रा मीःङे इःनाङ थाम्जेर मीःक्या ओःला डोजे खुउए लाःती तेर्तेर्क्योक इःङे। थोमीःजीक चावाथुप कील्ला राःल्दी बो ङी काःल्सी। सायु काःल्सी ओःले च्यार्का तोःक्या केःसी। 52तुःर्साक्याइ कोः फ्यासी ओःले सीक्योक कोन्ज्योइ मीःक्या मीःलीला सोम्बो काःल्दी लाःङ्सी। 53येशु सीक्योकलाःम्ले सोम्बो लोःमीःजीक खुङक्या तुःर्सालाःम्ले पाङ्ला थेङ्दी चाङ्मा क्याःसा यरुशलेमला काःल्सी ओःले माःङ्बुरा मीःक्यासाःला थोङ्सी।
54सायु काःल्क्योक ओःले ओःला काःल्योक थाम्जेर तामक्या थोङ्दी येशुला ह्रङ्दी तेःक्योक थेक्या ओःले खुङक्याइ कप्तान माःङ्बुरा जीसी। ओःले खुङक्याइ लाःसी, “तेःन्दामरा दीखो नी कोन्ज्योइ पुः इःङेन दुबा!”
55माःङ्बुरा पेःन्पीःजाक्याङ थारीःङ्बुलेरा लाःङ्दी तादी तेःती एःके। खुङक्याइ येशुला गालीलमीःजीक#२७:५५ गालीलमीःजीक गालीलदी येशुइ प्रचार पेःजे छुगेन छेत्र इःङे। ब्य्राङ्देरा ओःङ्दी ओःले रोः पेःदी एःके। 56खुङक्या नाःङ्ला मरीयम मग्दलीनी, याकुब ओःले योसेफकीइ आमा मरीयम, ओःले जब्दीयाइ पेःमे एःके।
येशुला तुःर्साला ज्याक्योक
(मर्कुस १५:४२-४७; लुका २३:५०-५६; युहन्ना १९:३८-४२)
57कुःङ्मु काःल्मीःजीक योसेफ मीःन पेःक्योक मेःराङ चीग अरीमाथीया क्याःसाइ छ्युक्पु मीः ओःला ओःङ्सी। खुङाङ येशुइ योबारा एःके। 58खुङ पीलातससाःला काःल्सी ओःले येशुइ फुम्बु लाःङ्सी, ओःले पीलातसकीइयाङ येशुइ फुम्बु खेर्चे तेर्सी। 59योसेफकीइ येशुइ फुम्बुला याःबु मलमलगीइ केःलाइ तुम्सी। 60ओःले ओः फुम्बुला च्यार्का तोः तुप्ती राःङगीइ लागी जोक्योक सेम्बा तुःर्साला ज्यासी, ओःले छ्योम्बो तोः चीगकीइ तुःर्साइ कोः कादी खुङ ओःलाःम्ले काःल्सी। 61मरीयम मग्दलीनी ओःले याकुब रा योसेफकीइ आमा मरीयम तुःर्साइ तोःङ्लारा तेःती एःके।
थेक्याइ येशुइ तुःर्सा ह्रुङ्क्योक
62ङार्तो च्योःङ्रा ङाःल सोगेन ङीःमाला छेस्यो पुजाहारीक्या ओःले फारीसीक्या पीलातससाःला काःल्सी 63ओःले लाःसी, “हजुर, ङीःइ टेःम्बा साल्दी ज्यादी एः, ओः स्योप क्युःर्केनदीइ सोम्बो एःकासुना ‘ङाः सीक्योककीइ ङीःमा सुमला फीर्च्या सोम्बो लोःगे’ लाःतेरा डोउके। 64ओः सोङ्गारा, ङीःमा सुमथुप ओः तुःर्सा याःबु पेःदी ह्रुङ्च्युदो। मीःङे लाःना खुङगीइ योबाक्या ओःङ्दी खुङगीइ फुम्बु कुदी खेर्ती ‘खुङ नी सीक्योकलाःम्ले सोम्बो लोःदी एः’ लाःती मीःक्याला स्योप क्युःर्टो ओःले तीङ्ला स्योप क्युःर्क्योक दी ताम तोःङ्गीइ भन्दा#२७:६४ तोःङ्गीइ भन्दा येशुरा मसीह इःङे लाःकेन तामदी तोःङगीइ खेप स्योप क्युःर्क्योक ताम लाःती खुङक्याइ ठीवा चेती एःके। ताःरुङ माःइबा ओःङेन एः।” 65पीलातसकीइ खुङक्याला लाःसी, “थेक्या खेर्ती सुङ ओःले ख्याक्याइ खुबाथुप याःबु पेःदी तुःर्सा ह्रुङ्च्युदो।” 66ओःले खुङक्या काःल्दी तुःर्साइ कोः उप्केन तोःला पार क्याःप्सी#२७:६६ पार क्याःप्सी खुङक्याइ ओः कोःइ तोःला थाक्पाइ ताःम्गुके ओःले सेबीइ थेल्गुके ओःले रोमीइ पार क्याःप्कुके, ओःले ओःखोला सुइयाङ देसी लाःना खुङक्याइ छोर्कुके। ओःले मीःक्याइ ओःखोला माःफ्याज्युक लाःती थेक्याला ह्रुङ्च्युसी।
Currently Selected:
मत्ती 27: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
