मत्ती 28
28
येशु सीक्योकलाःम्ले सोम्बो लोःक्योक
(मर्कुस १६:१-११; लुका २४:१-१२; युहन्ना २०:१-१८)
1ङाःल सोगेन ङीःमाइ ङार्तो च्योःङ्रा साङीःमाइ ङामु नुःपला मरीयम मग्दलीनी ओःले राःङ्सा मरीयम येशुला ज्याक्योक तुःर्सा तागाला काःल्सी। 2खेप चीगलारा ओःला छ्योम्बो सायु काःल्सी, चीलेलाःना प्रभुइ स्वर्गदुत चीग नाःम्खालीङलाःम्ले माःर्ला ओःङ्सी, ओःले तोः फार्ला रील्दी ओःखाला तेःसी। 3खुङगीइ छेन्दा बीजुली चम्कीइतीक्योक च्योःङ्रा एःके ओःले खुङगीइ केःला खावा च्योःङ्रा कार्मु एःके। 4तुःर्सा ह्रुङेनक्या जीबाइ दार्सी, ओःले खुङक्या सीक्योक मीःक्या च्योःङ्रा काःल्सी।
5इःनाङ स्वर्गदुतकीइ ओः पेःन्पीःजाक्याला लाःसी, “माःजी, ङाःइ छोर्ती एः, ख्याक्या क्रुसला प्याङ्क्योक येशुला छोल्देरा एः। 6खुङ दीला म्याः, चीलेलाःना खुङगीइ लाःक्योक च्योःङ्रा खुङ सीक्योकलाःम्ले सोम्बो लोःदी एः। स्यो, खुङला ज्याक्योक ठाउँ तादो। 7गेबु सुङ ओःले खुङगीइ योबाक्याला लोःप, ‘येशु नी सीक्योकलाःम्ले सोम्बो लोःदी एः, खुङ ख्याक्या भन्दा तोःङ्ला गालीलला डोदेरा एः। ख्याक्याइ खुङला ओःला थोङेन एः।’ ङाःइ ख्याक्याला लाःक्योक ताम टेःम्बा साल्दो।”
8ओः पेःन्पीःजाक्याला जीबाङ लाःङ्सी ओःले केःदाङाङ काःल्सी। खुङक्या गेबु गेबु तुःर्सालाःम्ले थेङ्दी काःल्सी ओःले योबाक्याला लेःङ्गो तेर्चेला छ्योङ्देरा काःल्सी।
9येशुइ खुङक्याला एक्कासी फ्रेसी ओःले लाःसी, “टासीदेले!” ओः तेःकासुरा खुङक्याइ पीमु चुदी खुङगीइ काङ्बा देसी ओःले खुङला फ्या छाल्सी। 10येशुइ खुङक्याला लाःसी, “माःजी, ख्योक्या काःल्दी ङाःइ योबाक्याला गालीलला सुङ लाःतेर। ओःलारा खुङक्याइ ङाःला थोङेन एः।”
थेक्याइ ख्योङ्क्योक लेःङ्गो
11ओः पेःन्पीःजाक्या काःल्सीःङ्मीःजीक तुःर्सा ह्रुङेन थेक्याङ ला लोःदी काःल्सी ओःले तुःर्साला थाम्जेर काःल्क्योक तामक्या छेस्यो पुजाहारीक्याला लाःसी। 12छेस्यो पुजाहारीक्या ओःले छेस्यो मीःक्या जोम्दी टेः पेःसी। खुङक्याइ थेक्याला माःङ्बुरा डेबा तेर्ती लाःसी, 13“ख्योक्याइ लोःप, ‘कुःङ्मु ङीः ङ्याःल्क्योक तीःजीला येशुइ योबाक्या ओःङ्दी खुङगीइ फुम्बु कुदी खेर्तु लोःप।’ 14काःलेङ दी ताम रोमी हाकीमगीइ नाम्ज्योला लेप्तु लाःना, ङीः खुङ ङीमु टीगे ओःले ख्योक्याला थार्च्युगे।” 15ओः तुःर्सा ह्रुङेनक्याइ डेबा लेःङ्सी ओःले छेस्यो पुजाहारीक्याइ लोप्क्योक च्योःङ्रारा लाःसी। ओः सोङ्गारा, तीःङ्साङथुपाङ यहुदीक्याइ कील्ला दी तामरा लाःकुए।
येशुइ तेर्क्योक छ्योम्बो आज्ञा
(मर्कुस १६:१४-१८; लुका २४:३६-४९; युहन्ना २०:१९-२३; प्रेरीत १:६-८)
16मेःन्दा च्युजीग योबाक्या येशुइ खुङक्याला सुङ लाःक्योक गालीलगीइ काःङ्ला काःल्सी। 17खुङक्याइ येशुला थोङ्दी फ्या छाल्सी, इःनाङ काःजेइदी पाःकेन पेःसी। 18ओःले येशु खुङक्याइ सुःरला ओःङ्दी लाःसी, “तादो, नाःम्खालीङ रा जाम्बुलीङलागीइ थाम्जेर आङ्ज्या ङाःला तेर्ती एः। 19ताः ख्योक्या काःल्दी थाम्जेर क्युःपाइ मीःक्याला योबा जोदो। खुङक्याला आबाइ मीःनला, पुःइ मीःनला ओःले चाङ्मा लाइ मीःनला बप्तीस्मा तेर। 20ङाःइ ख्याक्याला आज्ञा तेर्क्योक थाम्जेर ताम ङीःन्जेला खुङक्याला लोप्तो। कोःदो, ङाः जाम्बुलीङ माःसीःङ्थुपरा तेन्दुरा ख्योक्या ङीमु ओःङेन एः।”
Currently Selected:
मत्ती 28: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
