मत्ती 26
26
येशुला सेकेन टेः पेःक्योक
(मर्कुस १४:१-२; लुका २२:१-२; युहन्ना ११:४५-५३)
1येशुइ दी थाम्जेर ताम लोप्सीःङ्मीःजीक राःङगीइ योबाक्याला लाःसी, 2“ख्योक्याइ छोर्ती एः, ताःइ ङीःमा ङी तीङ्ला नीस्तार मेःलीङ ओःङ्गुए, ओःले मीःइ पुःला क्रुसला प्याङ्जेला जुम्ङेन एः।”
3ओः तेःकासु छेस्यो पुजाहारीक्या ओःले छेस्यो मीःक्या चोइ पुजाहारी कैयाफाइ क्याःल्खाङला जोम्सी, 4ओःले खुङक्याइ येशुला खाजुम्बाले काःन्डुले जुम्जे ओःले सेचे लाःती टेः पेःसी। 5इःनाङ खुङक्याइ लाःसी, “मेःलीङगीइ तीःजीला दी लेःगा पेःजे मेःयुङे, मीःङे लाःना नी मीःक्याइ कील्ला ठुक्पा लाःङेन एः।”
पेःन्पीःजा चीगकीइ येशुइ गोला सीःम्बु टीःमा तेर्केन माःर्कु टुःल्तेर्क्योक
(मर्कुस १४:३-९; युहन्ना १२:१-८)
6येशु जे नाःजालाःम्ले टाःक्योक सीमोनगीइ खीमला बेथानीयाला एःके। 7येशु तो साःदेरा एःकासुना, पेःन्पीःजा चीगकीइ सीङ्गमरमरकीइ नेःकीला माःङ्बुरा छेन्दी रीःनगीइ सीःम्बु टीःमा तेर्केन माःर्कु ख्योङ्दी येशुसाःला ओःङ्सी, ओःले खुङगीइ येशुइ गोला पुङ्तेर्सी। 8दीखो थोङ्दी योबाक्याला सीःताङ लाःङ्सी, “एःजे माःङ्बु माःर्कु चीले खाती पेःक्योक? 9बरु दीखोला माःङ्बुरा डेबाला चोङ्दी प्राङ्नाक्याला केःतेर्क्योक एःना ओःङ्जे एःके नी।”
10खुङक्याइ एःन्डुबा ताम कोःदी येशुइ खुङक्याला लाःसी, “चीले ख्योक्या दीखोला तुःक्पु तेर्कुबा? दीखोइ ङाःइ लागी याःबु लेगा पेःदी एः। 11चीलेलाःना प्राङ्नाक्या ख्याक्या ङीमु तेन्दुरा ओःङेन एः, इःनाङ ङाः नी ख्याक्या ङीमु तेन्दुरा मेःतेए। 12खुङगीइ दी माःर्कु ङाःइ जुबुला टुःल्दी ङाःला कुङ्जेला तयार जोदी एः। 13तेःन्दामरा ङाः ख्योक्याला लाःके, जाम्बुलीङ काःङ्रा दी याःबु लेःङ्गो काःला काःला टाःम्बा, ओः-ओःला दी पेःन्पीःजाइ पेःक्योक लेःगाइदीङ टेःम्बा ओःङेन एः।”
यहुदाइ येशुला तुःक तेर्चेला ङीःन्क्योक
(मर्कुस १४:१०,११; लुका २२:३-६)
14ओः तीङ्ला मेःराङ चीङ्ङी योबाक्या नाःङ्ला यहुदा इस्करीयोत लाःकेन्दीदी छेस्यो पुजाहारीक्यासाःला काःल्सी, 15ओःले लाःसी, “ङाःइ येशुला जुम्दी ख्याक्याला तेर्सी लाःना ख्याक्याइ ङाःला ची तेर्के?” ओःले खुङक्याइ यहुदाला दी लेःगाइ लागी खाल चीग रा च्यु ङुलगीइ टाङ्गा डेबा#२६:१५ खाल चीग रा च्यु ङुलगीइ टाङ्गा डेबा खाल चीग रा च्यु ङुलगीइ टाङ्गा डेबा लाःक्योकदी मेःन्दा चीग मीःइ दावा ङा लेःगा पेःगासुना ज्योर्केन डेबा चे ओःङ्गुके। तेर्सी। 16ओःमीःजीक तीङ्ला यहुदाइ येशुला जुम्दी ओः खुङक्याला तेर्केन लाःम तागाला स्युःसी।
तीङ्गीइ डेन
(मर्कुस १४:१२-२६; लुका २२:७-२३; युहन्ना १३:२१-३०; १ कोरीन्थी ११:२३-२५)
17खमीर मालुक्योक खुरा साःगेन नीस्तार मेःलीङगीइ तोःङ्गीइ ङीःमाला योबाक्या येशुसाःला ओःङ्दी टीःसी, “ख्याइ लागी नीस्तार मेःलीङगीइ साःप्च्या ङीः काःला जोगा?” 18खुङगीइ लाःसी, “क्याःसाला मेःराङ चीग मीःसाःला सुङ, ओःले खुङला लोःप, ‘लोबेनगीइ एःन्डु लाःती एः– ङाःइ तीःजी ओःङ्दी एः। ङाः राःङगीइ योबाक्या ङीमु ख्याइ खीमला नीस्तार मेःलीङगीइ डेन साःगे।’” 19योबाक्या काःल्दी येशुइ लाःक्योक च्योःङ्रा पेःसी ओःले खुङक्याइ नीस्तार मेःलीङगीइ डेन तयार जोसी।
20कुःङ्मु काःल्मीःजीक येशु मेःराङ चीङ्ङीरा योबाक्या ङीमु साःजेला तेःसी। 21साःदेरा एःकासुना येशुइ लाःसी, “तेःन्दामरा ङाः ख्योक्याला लाःके, ख्योक्या नाःङ्ला मेःराङ चीगकीइ ङाःला जुम्दी टाःलाङक्याइ लाःक्पाला तेर्केन एः।” 22दी ताम कोःदी योबाक्याला माःङ्बुरा तुःक्पु नेसी ओःले थाम्जेरकीइ खुङला मेःन्दा रेःरे पेःदी टीःगाला स्युःसी, “प्रभु, ची ओःखो ङाः इःङे?” 23येशुइ खुङक्याला लाःसी, “ताःसे मेःन्ज्याला ङाः ङीमुरा खुरा पागेन्दीइ ङाःला जुम्दी तेर्केन एः। 24छ्येइ पेज्याला प्रुःक्योक च्योःङ्रा ङाः मीःइ पुः नी सीराकोःउए। इःनाङ ङाः मीःइ पुःला जुम्दी तेर्केन मीःला काःन्डुबा जीबा लाःङ्जे च्योःङ्रा एः। ओःखो नी बरु केरामाकेक्योक एःना याःबु ओःङ्जे एःके।” 25खुङला जुम्दी तेर्केन यहुदाइयाङ टीःसी, “ए लोबेन, ची ओःखो ङाः इःङे?” येशुइ खुङला लाःसी, “ख्यो राःङगीइरा लाःसी।”
26खुङक्याइ डेन साःदेरा पेःगासुना येशुइ खुरा चीग लेःङ्सी ओःले कोन्ज्योला थुजीछे तेर्मीःजीक खुङगीइ खुरा च्यासी ओःले योबाक्याला तेर्सी ओःले लाःसी, “दीखो लेःङ्दी सोः, दीखो ङाःइ जुबु इःङे।”
27ओः तीङ्ला मेःन्ज्याङ लेःङ्सी ओःले कोन्ज्योला थुजीछे तेर्ती योबाक्याला तेर्तेरा लाःसी, “दीखो ख्योक्या थाम्जेरकीइ थुङ्दो। 28दीखो ङाःइ ठा इःङे, दीखोइ कोन्ज्यो ङीमु पेःक्योक ताःम्ज्याला ताःम्गुए। दी ठा माःङ्बुरा मीःक्याइ लाःयो क्षमा काःल्ज्युक लाःती स्याःल्गेन एः। 29ङाः ख्योक्याला लाःके, ङाःइ आबाइ क्याःल्खापला ख्योक्या ङीमु सेम्बा नीःङ्गार माःथुङथुप ङाः फीर्च्या दी नीःङ्गार मीःथुङेन एः।”
30ओःले खुङक्याइ भजनगीइ लु चीग#२६:३० भजनगीइ लु चीग यहुदीक्याइ मेःलीङगीइ साःप्च्या साःसीःङ्मीःजीक, भजन ११५ मीःजीक ११८ ला प्रुःक्योक लुक्यालाःम्ले लु लेःङ्गुके। लेःङ्सी ओःले खुङक्या जैतुन काःङला काःल्सी।
पत्रुसकीइ येशुला इन्कार पेःउए लाःती येशुइ लाःक्योक
(मर्कुस १४:२७-३१; लुका २२:३१-३४; युहन्ना १३:३६-३८)
31ओःले येशुइ योबाक्याला लाःसी, “तीःरीङ कुःङ्मु ख्योक्या थाम्जेरकीइ ङाःला पोःर्ती छ्योङेन एः, चीलेलाःना छ्येइ पेज्याला एःन्डुबा प्रुःदी एः,
‘ङाः कोःरालुला सेकेन एः,
ओःले लुःकक्या पाःरास्यारा ओःङेन एः।’#जकरीया १३:७
32इःनाङ सीक्योकलाःम्ले सोम्बो लोःमीःजीक ङाः ख्याक्या भन्दा तोःङ्ला गालीलला डोगेन एः।” 33पत्रुसकीइ खुङला लाःसी, “थाम्जेरकीइ पोःर्ती छ्योङ्नाङ ङाःदी ख्याला नाःमाङ मेःपोर्केन एः।” 34येशुइ खुङला लासी, “तेःन्दामरा ङाः ख्योला लाःके, तीःरीङ कुङ्मु च्याःबु प्रेःचे तोःङ्ला ख्योइ ङाःला ङोःमेसेए लाःती थाङ्मा सुम लाःकेन एः।” 35पत्रुसकीइ खुङला लाःसी, “ङाः ख्या ङीमुरा सीकोःनाङ ङाः ख्याला नाःमाङ ओःन्डु मेःलाःप।” ओःले राःङ्सा थाम्जेर योबाक्याइयाङ ओःन्डुरा लाःसी।
गेतसमनीला येशुइ रेःम्क्योक
(मर्कुस १४:३२-४२; लुका २२:३९-४६)
36ओः तीङ्ला येशु गेतसमनी लाःकेन ठाउँला योबाक्या ङीमु काःल्सी, ओःले खुङक्याला लाःसी, “ख्योक्या दीलारा तेः, ङाःदी तीबी चीग फार्ला काःल्दी रेःम्ङे।” 37ओःले खुङगीइ राःङ ङीमु पत्रुस रा जब्दीयाइ पुः ङीला खेर्सी। खुङगीइ सेम तुःङालगीइ माःङ्बुरा छाबाछुबे काःल्सी। 38ओःले येशुइ खुङक्याला लाःसी, “ङाःइ सेम तुःङालगीइ छाबाछुबे काःल्दी नीङरा केःटोरारा काःल्दी एः। ख्योक्या दीलारा ङीचु माःलोबा तेः।”
39ओःले खुङदी तीबी चीग फार्ला काःल्दी साला खाप्लु क्याःप्ती एःन्डु लाःतेरा रेःम्गाला स्युःसी, “ए ङाःइ आबा, ओःङ्खुउए लाःना दी तुःक्पुइ मेःन्ज्या ङाःलाःम्ले तेङ्तेर। इःनाङ ङाःइ सेम थेक्योक मीःङे, इःनाङ ख्याइ सेम थेक्योक ताम काःल्ज्युक।”
40येशु लोःदी ओःङ्गासुना ओः मेःन्दा सुम योबाक्या ङीचु लोःदी तेःक्योक फ्रेसी। खुङगीइ पत्रुसला लाःसी, “ची ख्योक्या घण्टा चीगकाङ ङाः ङीमु ङीचु माःलोबा तेःमाःखुबा? 41च्यागाताःक्पु पेःदी तेः ओःले परीक्षाला मालेप्च्युक लाःती प्रार्थना पेःदो। ख्योक्याइ याःबु पेःजे नी सेम थेती एः, इःनाङ ख्योक्याइ जुबु कम्जोर एः।”
42येशु फीर्च्या काःल्सी ओःले प्रार्थना पेःसी, “ए ङाःइ आबा, दीखो तुःक्पुइ मेःन्ज्याला ङाःइ माःथुङ्बा मेःयुङे लाःना, ख्याइ सेमरा पुरा काःल्जुक।” 43ओःले खुङ फीर्च्या योबाक्यासाःला लोःदी ओःङ्गासुना खुङक्या फीर्च्या ङीचु लोःदी तेःक्योकरा फ्रेसी, चीलेलाःना खुङक्या माःङ्बुरा ङाःल छेती एःके।
44फीर्च्या येशुइ खुङक्याला ओःजेबारा पोःर्ती काःल्सी ओःले फीर्च्या तोःङ्ला च्योःङ्रा रेःम्सी। 45ओः तीङ्ला खुङ योबाक्यासाःला ओःङ्दी लाःसी, “ख्योक्या ताःरुङ ङ्याःल्दीरा ओःले ङाःल सोदेरा एःपा? तादो, तीःजी ओःङ्सीःङ्दी एः, ओःले मीःइ पुःला लाःयो पेःगेनक्याइ लाःक्पाला तेर्केन एः। 46ताः लोःङ, ओःले डोगा। तादो, ङाःला जुम्दी तेर्केन मीः ओःङ्देरा एः।”
येशुला जुम्क्योक
(मर्कुस १४:४३-५०; लुका २२:४७-५३; युहन्ना १८:३-१२)
47येशु ताम लाःतेरा एःकासुना चीङ्ङी योबाक्या नाःङ्ले यहुदा लाःकेन मेःन्दा चीग योबादी पोर्चोम चीग मीःक्या ङीमु ओःला ओःङ्सी। खुङक्याइ तरवारक्या ओःले पेःर्काक्या खुर्ती एःके, ओःले खुङक्याला छेस्यो पुजाहारीक्या ओःले छेस्यो मीःक्याइ ताङ्दी एःके। 48येशुला तुःक तेर्केन यहुदाइ ओः मीःक्यला एःन्डु लाःती एःके, “काःखोला ङाःइ च्य्वाक पेःबा ओःखोरा येशु इःङे, ओःखोलारा जुम्दो।” 49ओःले खेप चीगलारा यहुदा येशुसाःला ओःङ्सी ओःले “टासीदेले, लोबेन” लाःती खुङगीइ डाम्बाला च्य्वाक पेःसी। 50येशुइ ओःखोला लाःसी, “रोः, ख्याइ ची पेःगाला ओःङ्क्योक इःम्बा, ओःखो पेःदीहाल्तीदो।” ओःले खुङक्याइ येशुला जुम्सी।
51दीखो थोङ्दी येशुइ मेःराङ चीग योबाइ तरवार तेङ्सी ओःले चोइ पुजाहारीइ लाबुला क्याःप्ती खुङगीइ नाम्ज्यो तुप्ती चेतेर्सी। 52येशुइ खुङला लाःसी, “ख्योइ तरवार स्युपला लुदो, चीलेलाःना तरवार क्याःप्केनक्या थाम्जेर तरवारकीइ सीःङ्दाक थागेन एः। 53ची ख्योला टेःम्बा म्याःपा, ङाःइ लाःङ्क्योक एःना ङाःइ आबाइ खेप चीगलारा पल्टल चीङ्ङी भन्दाङ माःङ्बु स्वर्गदुतक्या ताङ्तेर्चे म्याःके ले? 54इःनाङ ङाःइ एःन्डुले लाङ्सी लाःना नी छ्येइ पेज्याला एःन्डुबा ओःङ्रा कोःउए लाःती प्रुःक्योक ताम काःन्डुले छाङेन्दी ले?”
55ओः तीङ्ला येशुइ खुङला जुम्जेला ओःङेनक्याला लाःसी, “ची ङाः च्याःक्पा इःङेरा ख्योक्याइ ङाःला जुम्जेला तरवारक्या ओःले पेःर्काक्या खुर्ती ओःङ्क्योक? ङाःइ ङीःमारी टाःङ्मा कोन्ज्योइ मन्दीरला लोप्कुके, इःनाङ ख्योक्याइ ङाःला जुम्जे माःछोल। 56इःनाङ कोन्ज्योइ लेःङ्गो तेर्केनक्याइ छेला प्रुःक्योक ताम पुरा काःल्ज्युक लाःतीरा दी थाम्जेर काःल्योक इःङे।”
ओः तेःकासुरा योबाक्या थाम्जेरकीइ येशुला पोःर्ती छ्योङ्सी।
महासभाइ तोःङ्ला येशु
(मर्कुस १४:५३-६५; लुका २२:५४-५५,६३-७१; युहन्ना १८:१३-१४,१९-२४)
57येशुला जुम्ङेनक्याइ खुङला चोइ पुजाहारी कैयाफाइ खीमला खेर्सी। छ्येइ ठीमगीइ लोबेनक्या ओःले राःङ्सा छेस्यो मीःक्या ओःला जोम्दी एःके। 58पत्रुसदी थारीङ्बुलेरा येशुला ब्य्राङ्देरा चोइ पुजाहारीइ खीमगीइ इल्दोक नाःङ्ला स्युःसी, ओःले येशुला ची पेःउदुबा लाःती ताजेला खीम ह्रुङेनक्या ङीमु तेःसी। 59छेस्यो पुजाहारीक्या ओःले थाम्जेर महासभाइ मीःक्याइ येशुला सेचेला खुङला स्योप क्युःर्ती माःताक्पा च्याःङ्जे छोल्सी।#२६:५९ मोशाइ तेर्क्योक छ्येइ ठीमला काःन्दीङ मीःला माःताक्पा च्याःङ्दी सेचे तोःङ्ला, मेःन्दा ङी मीःक्या लाःङ्दी ओः मीःइ ओः ताम पेःक्योक थोङ्क्योक की कोःक्योक इःङे लाःती पाङ्बु तेर्कोःउके। इःनाङ मेःन्दा चीग पाङ्बुइ चीग्रा मेःयोङ्के। 60माःङ्बुरा मीःक्या ओःङ्दी येशुइ वीरुद्धला माःताक्पा च्याःङ्सी, इःनाङ खुङक्याइ लाःक्योक तामक्याइ दास्यी चीगकाङ माःफ्रे। थाम्जेर भन्दा तीङ्ला मेःराङ ङी तोःङ्ला ओःङ्सी, 61ओःले लाःसी, “दी मीःइ ‘ङाः कोन्ज्योइ मन्दीर रोम्दी ङीःमा सुमला दीखोला जोखु’ लाःती लाःसी।”
62ओःले चोइ पुजाहारी लाःङ्सी ओःले येशुला टीःसी, “ची दी मीःक्याइ ख्योइ वीरुद्धला च्याःङ्क्योक माःताक्पाइ बारेला लाःचेला ख्यो ङीमु चीङ लेःन म्याःपा?” 63इःनाङ येशु खाजुमरा तेःसी ओःले खुङगीइ चीङ लेःन मालो। फीर्च्या चोइ पुजाहारीइ खुङला टीःसी, “सोम्बो कोन्ज्योइ मीःनला ना लुदी लोःप, ची ख्यो तेःन्दामरा कोन्ज्योइ पुः थार्च्युगेन ख्रीष्ट इःङे?” 64येशुइ खुङला लाःसी, “ख्या राःङगीइरा ओःन्डु लाःतेरा एः। इःनाङ ङाः ख्याला लाःके, गेबुरा ख्याइ ङाः मीःइ पुःला छ्योम्बो ल्हे एःक्योक कोन्ज्योइ च्याःबु लाःक्पाछ्योले तेःक्योक ओःले नाःम्खालीङलाःम्ले मुक्पाला ओःङ्देरा पेःक्योक थोङेन एः।”
65दी ताम कोःदी चोइ पुजाहारी सीःताङ पेःसी ओःले राःङगीइ केःला राल्सी ओःले लाःसी, “दीखोइ नी कोन्ज्योला नीन्दा पेःसी। ताः उःला राःङ्सा दास्यी ची कोःपा ले? तादो, ख्याक्या दीखोइ कोन्ज्योला पेःक्योक नीन्दा ख्याक्याइ कोःसी। 66लो लोःप, ख्याक्याइदी ची ठीवा चेपाले?” ओःले खुङक्या थाम्जेरकीइ लाःसी, “दीखो मीः माःताक्पा इःङे, खुङला सेराकोः।” 67ओःले खुङक्याइ येशुइ तोःङ्बाला छेल्दोर क्याःप्सी, रोप्सी ओःले मेःन्दा काःजेइदी खुङला प्याःर्तुङ तेर्तेरा 68एःन्डु लाःसी, “लो ङीःला लोःप ले, ख्यो थार्च्युगेन ख्रीष्ट इःङे लाःना, ख्योला सुइ रोप्पा?”
पत्रुसकीइ येशुला ङोःमेसेए लाःक्योक
(मर्कुस १४:६६-७२; लुका २२:५६-६२; युहन्ना १८:१५-१८,२५-२७)
69ओः तेःकासुथुप पत्रुस फीला इल्दोकलारा तेःती एःके। मेःराङ चीग पेःन्पीःजा लाबु ओःङ्दी खुङला टीःसी, “ख्याङ नी गालीलगीइ येशु ङीमुरा एःके नी, मीःङे रा?” 70इःनाङ पत्रुसकीइ थाम्जेरकीइ तोःङ्ला इन्कार पेःदेरा लाःसी, “ख्याइ ची लाःतेरा एःपा, दी ताम ङाः मेसेए।” 71ओःले खुङ इल्दोकीइ कोःछ्योले काःल्सी। कोःइ सुःर्ला राःङ्सा लाबु पेःन्पीःजाइ ओःला एःक्योक मीःक्याला लाःसी, “दी मीःङ नी नासरतकीइ येशु ङीमुरा एःके नी।”
72फीर्च्या पत्रुसकीइ ना लुदी लाःसी, “ङाः नी ओः मीःला ङोःरामेसेए!”
73इःक्पु चीग तीङ्ला ओःलाइ मीःक्याइ पत्रुससाःला ओःङ्दी लाःसी, “तेःन्दामरा ख्याङ खुङ ङीमुरा एःके, चीलेलाःना ख्याइ ताम लाःक्योक थोङ्सुनारा छोर्कुए नी।” 74ओःले फीर्च्याङ पत्रुसकीइ ना लुदी लाःसी, “ङाःइ स्योप क्युःर्तु लाःना कोन्ज्योइ ङाःला दण्ड तेर्च्युक। ङाः नी ओः मीःला ङोःरामेसेए!”
ओःन्डु लाःलुङम्याःपा च्याःबु प्रेःसी। 75ओःले “च्याःबु प्रेःचे तोःङ्ला ङाःला थाङ्मा सुम ख्योइ ङोःरामेसेए” लाःती येशुइ लाःक्योक ताम पत्रुसकीइ टेःम्बा साल्सी। ओःले खुङ फीला काःल्दी क्वाँ क्वाँ ङुःगाला स्युःसी।
Currently Selected:
मत्ती 26: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
