मत्ती 25
25
मेःराङ च्यु कन्या स्यार्माक्याइ पेदाम
1येशुइ ताःरुङ लाःसी, “नाःम्खालीङगीइ क्याःल्खापदी छेमी थेप्ती माःक्पा सेम्बाला फ्रेकाला काःल्क्योक मेःराङ च्यु कन्या स्यार्माक्या ङीमु कार्चे खुउए। 2ओः मेःराङ च्यु नाःङ्ला मेःराङ ङादी नावा साल्बु एःके ओःले मेःराङ ङादी आक्याक्पा एःके। 3ओः आक्याक्पा स्यार्माक्याइ राःङगीइ छेमीक्या खुर्सी, इःनाङ खुङक्या ङीमु जाकेर्ना माःर्कुदी माःखुर। 4इःनाङ नावा साल्बुक्याइ दी राःङगीइ छेमीक्या ङीमु ङीमुरा जाकेर्ना माःर्कुङ खुर्सी। 5माःक्पा सेम्बा ओःङ्जेला कुःल्बु काःल्क्योक सोङ्गारा खुङक्या थाम्जेर ङीच्युइ जीदी ङ्याल्गाला स्युःसी।
6इःनाङ नुःप फेला ‘तादो, माःक्पा सेम्बा दीला एः, खुङला फ्रेकाला स्यो’ लाःतेरा केताङ्क्योक के कोःसी! 7ओःले थाम्जेर कन्या स्यार्माक्या लाःङ्दी राःङ राःङगीइ छेमीक्या तयार जोसी। 8ओःले आक्याक्पा कन्या स्यार्माक्याइदी नावा साल्बुक्याला लाःसी, ‘ख्याक्याइ माःर्कु ङीःलाङ तीबी चीग ना ना, चीलेलाःना ङीःइ छेमी नी सेजेरा छोल्सी।’ 9इःनाङ नावा साल्बुक्याइ एःन्डु लाःती लेःन लोदी लाःसी, ‘ख्याक्यालाङ दाङेन जाकेर्ना माःर्कु ङीः ङीमु म्याः, ख्याक्या छोङ्साला काःल्दी ङ्योःदी खेर्च्यो ना।’
10ओःले खुङक्या माःर्कु ङ्योःगाला डोगासुना माःक्पा सेम्बा लेप्सी, ओःले तयार एःकेनक्या खुङ ङीमु याःर्काइ डेनला नाःङ्ला स्युःसी, ओःले कोः चेसी।
11तीङ्ला ओः राःङ्साक्याङ लेप्सी ओःले लाःकाला स्युःसी, ‘प्रभु, प्रभु, ङीःइ लागी कोः फ्यातेर ना!’ 12इःनाङ माःक्पा सेम्बाइ नाःङ्ले लाःसी, ‘तेःन्दामरा ङाः ख्याक्याला लाःके, ङाः ख्याक्याला ङोःमेसेए।’”
13ओःले येशुइ लाःसी, “ओः सोङ्गारा, च्यागाताःक्पु पेःदी तेः चीलेलाःना मीःइ पुः काँःदी ङीःमाला की काःखो तीःजीला ओःङेन इःम्बा, ओःखो ख्याक्याइयाङ छोर्ती म्याः।”
मेःन्दा सुम लाबुक्याइ पेदाम
(लुका १९:११-२७)
14येशुइ फीर्च्या लाःसी, “नाःम्खालीङगीइ क्याःल्खाप एःन्डुबा इःङे। मेःन्दा चीग मीः राःङ्सा देसला कोर्काला डोजे छोल्दी एःके। ओःखोइ खुङगीइ लाबुक्याला केक्याःप्ती राःङगीइ नोःर क्युः खुङक्याइ जीम्मा तेर्सी। 15ओः मीःइ राःङगीइ लाबुक्याइ ची पेःजे खुउबा लाःती सेउके। ओः सोङ्गारा, खुङगीइ लाबु चीगला हजार ङा टाङ्गा तेर्सी, राःङ्सा मेःराङ चीगला हजार ङी टाङ्गा ओःले राःङ्सा मेःराङ चीगला हजार चीग टाङ्गा तेर्सी। ओःले खुङ राःङ्सा देशला काःल्सी। 16हजार ङा टाङ्गा डेबा ज्योर्केन लाबु काःल्दी ओः डेबाइ छोङ पेःसी ओःले खुङगीइ ओःखोलाःम्ले राःङ्सा हजार ङा टाङ्गा डेबा जोसी। 17ओःन्डुलेरा हजार ङी टाङ्गा ज्योर्केन्दी राःङ्सा हजार ङी टाङ्गा डेबा जोसी। 18इःनाङ हजार चीग टाङ्गा ज्योर्केन्दीइ काःल्दी सा कोसी ओःले राःङगीइ ताःक्पुइ डेबा इप्ती ज्यासी।
19माःङ्बुरा लोः तीङ्ला ओः लाबुक्याइ ताःक्पु लोःदी ओःङ्सी ओःले खुङक्या ङीमु राःङगीइ हीसाब लेःङ्सी। 20हजार ङा टाङ्गा डेबा ज्योर्केन्दीइ ओःङ्दी लाःसी, ‘ताःक्पु, ख्याइ ङाःला हजार ङा टाङ्गा तेर्ती एःके, ओःखोलाःम्ले ङाःइ राःङ्सा हजार ङा टाङ्गा कामाइतीदी ख्योङ्दी एः।’ 21ताःक्पुइ लाःसी, ‘याःबु पेःसी, ख्यो याःबु ओःले सेमल्हुक लुजे डीक्पु एः! ख्यो छीमी तामक्यालाङ सेमल्हुक लुजे डीक्पु एःक्योक सोङ्गारा ङाः ख्योला माःङ्बुरा तामक्याइ जीम्मा तेर्के। ख्यो ओःङ्दी ङाः ङीमु केःदाङ पेःदो।’ 22ओः तीङ्ला हजार ङी टाङ्गा डेबा ज्योर्केन्दीइ नाःङ्ला ओःङ्दी लाःसी, ‘ताःक्पु, ख्याइ ङाःला हजार ङी टाङ्गा डेबा तेर्ती एःके। तादो, ङाःइ राःङ्सा हजार ङी टाङ्गा कामाइतीदी ख्योङ्दी एः।’ 23ताःक्पुइ लाःसी, ‘याःबु पेःसी, ख्यो याःबु ओःले सेमल्हुक लुजे डीक्पु एः! ख्योइ छीमी तामक्यालाङ सेमल्हुक लुजे डीक्पु एःक्योक सोङ्गारा ङाः ख्योला माःङ्बुरा तामक्याइ जीम्मा तेर्के। ख्यो ओःङ्दी ङाः ङीमु केःदाङ पेःदो।’
24ओः तीङ्ला हजार चीग टाङ्गा डेबा ज्योर्केन्दीइ ओःङ्दी लाःसी, ‘ताःक्पु, ङाःला टेःम्बा एः ख्याइ सेम सेन्दी एः, ख्याइ राःङगीइ माचुक्योक सीःङले डुक्या तुःदी ख्योङ्गुए ओःले राःङगीइ सेन माताप्क्योक सीःङले डुक्या रुःप चीःदी ख्योङ्गुए। 25ओः सोङ्गारा, ङाःला जीबा लाःङ्सी ओःले काःल्दी ङाःइ नी ख्याइ टाङ्गा डेबा होपला इप्ती ज्यासी। तादो, ख्याइ डेबा दीला एः।’ 26ओःखोइ ताःक्पुइ खोला लाःसी, ‘ए माःरीक्पा ओःले छेर्सी पेःगेन लाबु! माचुक्योक ठाउँला तुप्कुए, ओःले सेन मातापक्योक ठाउँलाःम्ले डु रुःप चीःउए लाःती ख्योइ सेदीरा एःके लाःना, 27ख्योइ ङाःइ डेबा चीले पीःर्नाङला मातेर्क्योक ले? ख्योइ ओःन्डु पेःक्योक एःना ङाः लोःदी ओःङ्गासुना पीःर्नाङ ङीमुरा डेबा ज्योर्चे एःके।’
28ओःले ओः ताःक्पुइ लाःसी, ‘ओः सोङ्गारा, ओः लाबुलाःम्ले ङाःइ डेबा फ्रोदो, ओःले काःखो ङीमु हजार च्यु टाङ्गा एःपा ओःखोला तेर। 29चीलेलाःना काःखोङीःमु एःपा ओःखोला ताःरुङ माःङ्बु तेर्केन एः, ओःले ओःखो ङीमु कोःकेन भन्दाङ माःङ्बु ओःङेन एः। इःनाङ काःखो ङीमु म्याःपा, ओःखो ङीमु एःक्योक तीबी रेःरेङ खुङलाःम्ले फ्रोगेन एः। 30ताः दी लेःगा म्याःक्योक लाबुला फीला नाक्जुकला क्युर्तेर। ओःला खुङ ङुःदेरा सो मुःर्केन एः।’
ठीम पेःगेन ङीःमा
31ङाः मीःइ पुः छ्योम्बो माहीमाला ङाःइ थाम्जेर स्वर्गदुतक्या ङीमु ओःङ्दी ङाःइ महीमाइ छेसाला तेःकेन एः। 32ओः तेःकासु साजाम्बुलीङगीइ थाम्जेर मीःक्या ङाःइ तोःङ्ला जोम्ङेन एः, ओःले कोःरालुइ राःक्या नाःङ्ले लुःकक्याला खाफ्याक्योक च्योःङ्रा ङाः ओः मीःक्यालाङ खाफ्यादी छोबा ङी जोगे। 33ङाः ताःक्पा मीःक्याला ङाःइ च्याःबु लाःक्पाछ्योले ओःले राःङ्सा मीःक्याला ङाःइ योमा लाःक्पाछ्योले ज्यागे। 34ओःले ङाः क्याःल्बुइ ङाःइ च्याःबु लाःक्पाछ्ले एःक्योक मीःक्याला लाःकेन एः, ‘ख्योक्या ङाःइ आबाइ मोलाम तेर्क्योक मीःक्या इःङे! स्यो, जाम्बुलीङ जोगासुनामीःजीक ख्योक्याइ लागी तयार जोक्योक क्याःल्खापला स्युःदो। 35ङाः तोःपा तोदी एःके, ओःले ख्योक्याइ ङाःला साःजे तेर्सी। ङाःला कोम्जे लाःङ्दी एःके, ओःले ख्योक्याइ थुङ्जे तेर्सी। ङाःला सुइयाङ ङोःमेसे एःके, इःनाङ ख्योक्याइ ङाःला तेःचे तेर्सी। 36ङाः चीःनाङ्मु एःके, ओःले ख्योक्याइ ङाःला केःला केङ्तेर्सी। ङाः नेःपा एःके, ओःले ख्योक्याइ ङाःला याःबुले तासी। ङाः चेङाङला एःके, ओःले ख्योक्या ङाःला फ्रेकाला ओःङ्सी।’
37ओःले ताःक्पा मीःक्याइ ङाःला लेःन लोदी लाःकेन एः, ‘ए प्रभु, ङीःक्याइ ख्याला नाःम तोःपा तोक्योक थोङ्बारा, ओःले ख्याला साःजे तेर्पा? ङीःक्याइ ख्याला नाःम कोम्जे लाःङ्क्योक थोङ्बा, ओःले थुङ्जे तेर्पा? 38ख्याला सुइयाङ ङोःमेसेगासुना ङीःक्याइ ख्याला नाःम थोङ्बा, ओःले ख्याला तेःचे तेर्पा? ओःले ङीःक्याइ ख्याला नाःम चीःनाङ्मु थोङ्बारा, ओःले ख्याला केःला केःङ्तेर्पा? 39नाःम ङीःइ ख्याला नेःपा थोङ्बारा, ख्याला तागाला ओःङ्बा? ओःले ङीःइ ख्याला चेङाङला थोङ्बारा, ङीःइ ख्याला फ्रेकाला ओःङ्बा?’ 40ओःले ङाः क्याःल्बुइ खुङक्याला लाःकेन एः, ‘तेःन्दामरा ङाः ख्योक्याला लाःके, ख्योक्याइ ङाःइ दी छीमी नोःक्या नाःङ्ला थाम्जेर भन्दा छीमी मेःराङ चीगला ची काःजे पेःबा, ओःखो ख्योक्याइ ङाःलारा पेःसी।’
41ओः तीङ्ला ङाः ङाःइ योमा लाःक्पाछ्योले एःकेन मीःक्याला लाःकेन एः, ‘ए कोन्ज्योइ खाम्सी सुःक्योक मीःक्या, ङाःलाःम्ले थारीङ्बु सुङ! शैतान ओःले खोइ दुतक्याइ तयार जोदी ज्याक्योक नाःमाङ मीसीगेन मेःला सुङ। 42ङाःला तोःपा तोदी एःके, इःनाङ ख्योक्याइ ङाःला साःजे मातेर। ङाःला कोम्जे लाःङ्दी एःके, इःनाङ ङाःला ख्योक्याइ थुङ्जे मातेर। 43ङाःला सुइयाङ ङोःमेसे एःके, इःनाङ ख्योक्याइ ङाःला तेःचे मातेर। ङाः चीःनाङ्मुरा एःके, इःनाङ ख्योक्याइ ङाःला केःला केःङ्जे मातेर। ङाः नेःपा एःके ओःले चेङाङला एःके, इःनाङ ख्योक्याइ ङाःला फ्रेकाला माःयुङ।’
44ओःले खुङक्याइयाङ ङाःला एःन्डु लाःकेन एः, ‘प्रभु, नाःम ङीःइ ख्याला तोःपा तोक्योक, कोम्जे लाःङ्क्योक, सुइयाङ ङोःमासेक्योक, चीःनाङ्मु एःक्योक, नेःपा काःल्क्योक की चेङाङला एःक्योक थोङ्बारा, ओःले ङीःइ ख्याइ मेःबा माःबेबा?’ 45ओःले ङाः क्याःल्बुइ खुङक्याला लाःकेन एः, ‘तेःन्दामरा ङाः ख्योक्याला लाःके, ङाःइ दी छीमी नोःक्या नाःङ्ला थाम्जेर भन्दा छीमी मेःन्दा चीगला ख्योक्याइ रोः माःबेबा, ओःखो ख्योक्याइ ङाःला रोः माःबे।’ 46ओःले खुङक्यादी तेन्दुइ लागी दण्ड ज्योर्केन एः, इःनाङ ताःक्पा मीःक्याइदी नाःमाङ मीसीगेन मीःली ज्योर्केन एः।”
Currently Selected:
मत्ती 25: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
