लुका 15
15
तोर्क्योक लुःककीइ पेदाम
(मत्ती १८:१२-१४)
1ङीःमा चीग माःङ्बुरा च्याल्गो तुःगेनक्या ओःले राःङ्सा लाःयो पेःगेनक्या येशुइ लोप्क्योक कोःजेला खुङगीइ सुःरला ओःङ्देरा एःके। 2इःनाङ फारीसी ओःले छ्येइ ठीमगीइ लोबेनक्या एःन्डुले गनगनाइतीगाला स्युःसी, “दीखो मीःइ नी लाःयो पेःगेनक्यालाङ लेःङ्गुए ओःले खुङक्या ङीमुरा तेःती साःउए।” 3ओः सोङ्गारा, येशुइ खुङक्याला दीखो पेदाम चीग लाःसी, 4“ख्याक्या सुइदीङ क्याः चीग लुःकक्या एःस्वाँ, ओःखोइ क्याः चीग लुःकक्यालाःम्ले चीग तोर्सी लाःना खाल सीः रा चीर्कुःथाल लुःकक्याला छोसालारा पोःर्ती ओः तोर्क्योकला माःफ्रेथुप मेःछोल्बा ले? 5ओःले ओः तोर्क्योक लुःकला फ्रेमीःजीक केःदाङ काःल्देरा ओःखोला राःङगीइ सोःबाला खुर्ती खीमला ख्योङ्गुए, 6ओःले राःङगीइ रोःक्याला ओःले टोःङ्रीक्याला केक्याःप्ती एःन्डु लाःकेन एः, ‘स्यो, ङाः ङीमु केःदाङ पेःगा चीलेलाःना ङाःइ तोर्क्योक लुःक फ्रेती एः!’ 7ङाः ख्याक्याला लाःके, मेःन्दा खाल सीः रा चीर्कु स्याबा पेःमेःकोःन ताःक्पा मीःक्याइ लागी भन्दा स्याबा पेःदी लाःयो पोःर्केन्दी मेःन्दा चीगकीइ लागी नाःम्खालीङला माःङ्बु केःदाङ पेःगेन एः।”
तोर्क्योक ङुलगीइ डेबाइ पेदाम
8येशुइ खुङक्याला राःङ्सा पेदाम लाःसी, “च्युथाल ङुलगीइ डेबा एःक्योक पेःन्पीःजाइदी चीग डेबा तोर्सी लाःना छेमी थेप्ती डेबा माःफ्रेथुप खीम फ्यादेरा मेःछोल्बा ले? 9ओःले ओः तोर्क्योक डेबा फ्रेमीःजीक खुङगीइ राःङगीइ रोःक्याला ओःले टोःङ्रीक्याला केक्याःप्ती एःन्डु लाःकुए, ‘ङाःइ तोर्क्योक ङुलगीइ डेबा ङाःइ फ्रेसी! ताः स्यो, उः केःदाङ पेःगा।’ 10ङाः ख्याक्याला लाःके, एःन्डुरा पेःदी स्याबा पेःदी लाःयो पोःर्केन्दी मेःन्दा चीग लाःयो पेःगेन्दीला नाःम्खालीङला कोन्ज्यो राःङगीइ स्वर्गदुतक्याइ तोःङ्ला केःदाङ पेःउए।”
तोर्क्योक पुःइ पेदाम
11येशुइ फीर्च्या राःङ्सा पेदाम लाःसी, “काःखोङ मीःइदी मेःन्दा ङी पुःक्या एःके। 12ङीःमा चीग छीङ्स्यो पुःइ आबाला लाःसी, ‘आःबा, ङाःइ ज्योर्कोःन नोःर क्युःक्याइ बो ङाःला ना।’ ओः सोङ्गारा, आबाइ राःङगीइ नोःर क्युःक्या ङीक्कार पुःक्याला केःतेर्सी।
13चीङ ङीःमा तीङ्ला छीङ्स्यो पुःइ राःङगीइ ज्योर्क्योक थाम्जेर नोःर क्युःक्या खुर्ती थारीःङ्बुइ देशला काःल्सी। ओःला खुङगीइ ओः नोःर क्युःक्या छ्याम्डाल च्युदेरा सीःङ्सी। 14खुङगीइ थाम्जेर नोःर क्युःक्या सीःङ्मीःजीक ओः देशला छ्योम्बो मुःगी क्याःप्सी ओःले खुङ ङीमु साःजेला चीङ म्याःके। 15ओःले खुङ ओः देशकीइ मेःन्दा चीग मीःसाःला लेःगा पेःगाला काःल्सी। ओः मीःइ खुङला फा छोगेन लेःगाला#१५:१५ फा छोगेन लेःगा यहुदी धर्मला फाइ स्या साःजे ओःले फाला देजेङ याःबु मीःङे। यहुदी मीःइ फा छोगेन लेःगा पेःसी लाःनादी ओःखो ङोःछारे ताम इःङे। खुङगीइ सीङला ताङ्सी। 16खुङगीइ फाइ साःप्च्या साःदी एःनाङ राःङगीइ टोःपा काङ्जे छोल्गुके। फीर्च्या खुङला सुइयाङ साःगेन स्याः मातेर।
17ओः तेःकासु खुङ टेःन्सी, ओःले राःङलारा लाःसी, ‘ङाःइ आबाइदी नी लाबुक्याइ डाङेनथुप साःदीङ ल्हाउए, ओःले ङाःदी दीला तोःपा तोदी सीजे छोल्दी एः। 18ताः ङाः आःबासाःला काःल्दी एःन्डु लाःके, “आःबा, ङाःइ नाःम्खालीङगीइ कोन्ज्यो ओःले ख्याइ वीरुद्धला लाःयो पेःदी एः। 19ताः नी ङाःला ख्याइ पुः लाःचेङ मीःडीकए। फीर्च्या ङाःला नीङ च्योःदी मेःन्दा चीग लाबु च्योःङ्रा पेःदी ज्यो।”’ 20ओःले खुङ लाःङ्सी ओःले आबासाःला लोःदी काःल्सी। ओःले पुः थारीःङ्बुले ओःङ्देरा एःकासुनारा आबाइ थोङ्सी, ओःले खुङगीइ सेम नीङ च्योःदी ओःङ्सी ओःले खुङ पुःला फ्रेकाला छ्योङ्देरा काःल्दी पुःला पाःङ्ज्या लुदी डाम्बाला च्य्वाक पेःसी।
21ओःले खुङगीइ पुःइ लाःसी, ‘आःबा, ङाःइ कोन्ज्यो ओःले ख्याइ वीरुद्धला लाःयो पेःदी एः। ताः ङाःला ख्याइ पुः लाःचेङ मीःडीकए।’ 22फीर्च्या आबाइदी राःङगीइ लाबुक्याला केक्याःप्ती लाःसी, ‘गेबु पेःदी थाम्जेर भन्दा याःबु केःला, सीःप्तुर ओःले लेखाम ख्योङ्दी दीखोला केङ्तेर। 23ओःले क्याःबा जोज्याःक्योक लाङ्डुक चीग सेतो, ओःले उः साःदी केःदाङ पेःगा। 24चीलेलाःना दीखो ङाःइ पुः सीदी एःके, ओःले ताःसे सेन्दी एः, तोर्ती एःके, ओःले फ्रेती एः।’ ओःले खुङक्या केःदाङ पेःगाला स्युःसी।
25ओः तेःकासु छेस्यो पुःदी सीःङला एःके। ओःले खुङ खीम सुःरला लेप्कासुना खुङगीइ बाजा तुःङ्दी छ्याम्देरा पेःक्योक कोःसी। 26ओःले मेःन्दा चीग लाबुला केक्याःप्ती, ‘दीला ची काःल्देरा एःपा?’ लाःती टीःसी। 27ओःले ओः लाबुइ लाःसी, ‘ख्याइ छीङ्स्यो नोः चीङ माःकाल्बा याःबुले लोःदी ओःङ्दी एः, ओः सोङ्गारा, ख्याइ आःबाइ क्याःबा लाङ्डुक चीग सेच्युदी डेन्ज्याङ पेःदेरा एः।’ 28दीखो कोःदी ओः आतादी माःङ्बुरा सीःताङ पेःसी ओःले नाःङ्ला डोजेङ माःङीन, ओःले आबा फीला ओःङ्दी खुङला नाःङ्ला डोजेला वासी पेःसी।
29इःनाङ खुङगीइ आबाला एःन्डुले लेःन लोसी, ‘एःजेइ लोःथुप ङाःइ ख्याइ लाबु च्योःङ्रा पेःदी लेःगा पेःदी एः ओःले ख्याइ लाःक्योक थाम्जेर ताम ङीःन्दी एः। फीर्च्या ख्याइ ङाःलादी रोःक्या ङीमु तेःती साःजेला रीःउ चीगकाङ नाःमाङ मातेर।
30इःनाङ ख्याइ नोःर क्युःक्या क्याःलामक्या ङीमु सीःङेन्दी पुः ओःङ्गासुनादी ख्याइ सोदी ज्याक्योक क्याःबा लाङ्डुक खोइ लागी सेसी।’ 31आबाइ खुङला लाःसी, ‘तादो पुः, ख्यो नी नाःमाङ ङाः ङीमुरा एः, ओःले ङाः ङीमु एःक्योक थाम्जेर नोःर क्युःक्या ख्योइदीरा इःङे। 32इःनाङ उःइ डेन पेःदी केःदाङ पेःजे डीक्पु एःके चीलेलाःना दीखो ख्योइ नोः सीदी एःके, फीर्च्या सेन्दी एः, खो तोर्ती एःके, ताः खोला फ्रेती एः।’”
Currently Selected:
लुका 15: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
