लुका 16
16
च्याङ्बु नाइके
1येशुइ राःङगीइ योबाक्याला लाःसी, “मेःन्दा चीग छ्युक्पु मीःइ लेःगा पेःगेनक्याइदी मेःन्दा चीग नाइके एःके। ओः नाइकेइ राःङगीइ ताःक्पुइ नोःर सीःङ्देरा एः लाःती खुङला माःताक्पा च्याःङ्दी एःके। 2खुङगीइ ओः लाबुला केक्याःप्ती टीःसी, ‘ङाःइ ख्योइ बारेला दीखो ची कोःदेरा एःपा? ख्योइ थाम्जेर हीसाब कीताप ङाःला ना। ताःमीःजीक ख्यो ङाःइ नाइके मेःयोःङे।’ 3ओःले ओः नाइकेइ सेम सेमलारा लाःसी, ‘ङाःइ ताःक्पुइ ङाःला लेःगालाःम्ले तेङ्तेर्केन काःल्सी, ताः ङाः ची पेःजे? तोजी कोदी साःगा लाःना ल्हेरा म्याः, लाङ्दी साःगा लाःना ङाःला ङोः छाउए। 4ताः ङाःला दी लेःगालाःम्ले तेःङ्नाङ मीःक्याइ ङाःला काःन्डुले खुङक्याइ खीमला केक्याःप्केन्दी जोकोः लाःती ङाःइ ठीवा चेसीःङ्दी एः।’ 5ओः तीङ्ला खुङगीइ ताःक्पुलाःम्ले पेःलेन खेर्केनक्या थाम्जेरला रेः रेः पेःदेरा केक्याःप्सी। खुङगीइ तोःङ्गीइदीला टीःसी, ‘ङाःइ ताःक्पुइ पेःलेन ख्याला काःजे एःपा?’ 6खुङगीइ लाःसी, ‘हजार सुम लीटर जैतुनगीइ माःर्कु।’ ओःले ओः नाइकेइ खुङला लाःसी, ‘ख्याइ पेःलेन साःक्योक सीउ दीःला खेर्च्यो, ओःले गेबु पेःदी क्याः चेङा लीटर चीग्रा प्रुःदो।’ 7ओःले राःङ्साला टीःसी, ‘ख्याइ काःजे च्याल्कोःन्दी एःपा?’ खुङगीइ लाःसी, ‘हजार चीग काःल्दा न्याः।’ ओः नाइकेइ खुङला लाःसी, ‘ख्याइ सीउ खेर्च्यो, ओःले काःल्दा क्याःकेः न्याः प्रुःदो।’
8दीखो ताम छोर्मीःजीक ओः ताःक्पुइ ओः नाइकेइ च्याङ्बु चाक्योक थोङ्दी खुङला प्रशंसा पेःसी। चीलेलाःना कोन्ज्योला सेमल्हुक मीलुगेन मीःक्याइ राःङगीइ रोःक्या ङीमु पेःगेन व्यवहारला कोन्ज्योला सेमल्हुक#१६:८ दीखो तामलादी एःन्डुलेङ लाःकुए “चीलेलाःना दीखो जाम्बुलीङगीइ मीःक्याइ राःङ्सा मीःक्या ङीमु पेःगेन व्यवहारला ज्योतीइ मीःक्या भन्दा ताःरुङ च्याङ्बु ओःङ्गुए।” लुगेन मीःक्या भन्दा ताःरुङ माःङ्बु च्याङ्बु ओःङ्गुए।
9ङाः ख्याक्याला लाःके, जाम्बुलीङगीइ नोःरकीइ रोःक्या जोदो ओःले ओः नोःरक्या सीःङ्मीःजीक ओः नोःरक्याइ ख्याक्याला नाःमाङ मीःसीःङेन खीमला तोःङ्ज्याङ पेःगेन एः।
10ओःले काःखो मीः छ्यामे तामलाङ थेका म्याःपा, ओःखो छ्योम्बो तामलाङ थेका मेःयोङ्ए, ओःले काःखो मीः छ्यामे तामलाङ थेका म्याःपा, ओःखो मीः छ्योम्बो तामलाङ थेका मेःयोङ्ए। 11ओः सोङ्गारा, ख्याक्या जाम्बुलीङगीइ नोःरला थेका म्याः लाःना, नाःम्खालीङगीइ नोःरकीइ जीम्मा ख्याक्याला सुइ तेर्के रा? 12ओःले ख्याक्या राःङ्साइ नोःरला थेका म्याः लाःना ख्याक्याइ ज्योर्कोःन नोःर ख्याक्याला सुइ तेर्कुबा ले?
13काःन्दीङ लाबुइदी ङीथाल ताःक्पुक्या ओःङ्मीःखुए, चीलेलाःना खुङगीइ चीगला हेला पेःउए ओःले राःङ्साला च्याःम्बु पेःउए की खुङगीइ चीगकीइ लाःक्योक ङीःन्गुए ओःले राःङ्साइ लाःक्योक मीःङीन एः। ओःन्डुलेरा ख्योक्याइयाङ कोन्ज्यो ओःले नोःर ङीक्कारकीइ लेःगा थाङ्मा चीगलारा पेःमीःखुए।”
येशुइ राःङ्सा तामक्या
(मत्ती ११:१२-१३; ५:३१-३२)
14दी थाम्जेर तामक्या कोःदी फारीसीक्याइ येशुला ङ्याप्च्युक पेःसी। चीलेलाःना खुङक्याला रेःमुकरा सेम थेकुके। 15ओःले येशुइ खुङक्याला लाःसी, “ख्याक्या मीःक्याइ तोःङ्ला ताःक्पा साङ्बु तेङ्जे छोल्गुए, फीर्च्या कोन्ज्योइ ख्याक्याइ सेमगीइ ताम सेउए। चीलेलाःना मीःक्याइ तोःङ्ला काःखो ताम छ्योम्बो एःपा, ओःखो कोन्ज्योइ तोःङ्ला क्युक टोःजे च्योःङ्रा एः।
16बप्तीस्मा तेर्केन्दी युहन्नाइ तीःनामथुप मोशाइ तेर्क्योक ठीम ओःले कोन्ज्योइ लेःङ्गो तेर्केन मीःक्याइ तामक्या ङीःन्कोःउके। ओःमीःजीक कोन्ज्योइ क्याःल्खापकीइ याःबु लेःङ्गो प्रचार पेःदी एः, ओःले थाम्जेर मीःक्या ओः क्याःल्खाप नाःङ्ला जबरजस्ती स्युःजे छोल्गुए। 17नाम्सार्ग ओःले जाम्बुलीङ तोर्ती डोखुउए, फीर्च्या कोन्ज्योइ ठीमगीइ ताम चीगकाङ मेतोरए। 18राःङगीइ पेःमेला पोःर्ती राःङ्सा याःर्का क्याःप्केन ख्य्वापीःजाइ व्यभीचार पेःउए ओःले ख्योबोइ पोःर्क्योक पेःन्पीःजाला याःर्का क्याःप्केन ख्य्वापीःजाइयाङ व्यभीचार पेःउए।”
छ्युक्पु मीः ओःले लाजरस
19येशुइ फीर्च्या लाःसी, “मेःन्दा चीग छ्युक्पु मीः एःके, ओःखोइ माःङ्बु रीःन पेःगेन केःला केःङ्गुके ओःले ङीःमारी टाःङ्मा सीःम्बु सीःम्बु साःप्च्या साःदी तेःकुके। 20फीर्च्या खुङगीइ कोःइ सुःरला लाजरस लाःकेन मीःला ख्योङ्दी ज्यातेर्कुके। खुङगीइ जुबु स्य्वा रा स्य्वाइ काःङ्दी एःके। 21छ्युक्पु मीःइ साःसुना ताःप्क्योक पुःजुपक्या साःजे ज्योर्के की लाःती खुङ तादी तेःकुके। खीक्याङ ओःङ्दी खुङगीइ स्य्वाक्या दातेर्कुके।
22ङीःमा चीग ओः प्राङ्ना लाजरस सीसी, ओःले स्वर्गदुतक्याइ खुङला खेर्ती अब्राहामगीइ सुःरला ज्यातेर्सी ओःले ओः छ्युक्पु मीःङ सीसी ओःले होपला कुङ्सी। 23ओःले ओः छ्युक्पु मीः ङ्याल्वाला काःल्सी ओःले माःङ्बुरा तुःक्पु खुर्तेरा एःके। ओः तेःकासु खुङगीइ याःरला तासी ओःले अब्राहामगीइ सुःरला लाजरसला थोङ्सी। 24खुङगीइ केताङ्दी लाःसी, ‘ए आःबा अब्राहाम, ङाःला नीङ च्योःदो। लाजरसला ताङ्तेर ओःले खुङगीइ थेबु चीग छ्युला बीङ्दी ङाःइ चेला थीक्पाङ चीग छ्यु थीच्युतेर्च्युक, चीलेलाःना ङाः दीखो मेःला माःङ्बुरा तुःक्पु ज्योर्तेरा एः।’ 25फीर्च्या अब्राहामगीइ खुङला लाःसी, ‘पुः, ची ख्याला टेःम्बा म्याःपा? ख्या जाम्बुलीङला एःकासुना कीपुला एःके ओःले लाजरसदी तुःक्पुला एःके, ताःसे खुङ कीपुला एः ओःले ख्यादी तुःक्पुला एः। 26दी थाम्जेर ताम भन्दाङ, काःखोङ दीलाःम्ले ओःला ओःले ओःलाःम्ले दीला ओःङ्जे डोजे माःखुज्युक लाःती ख्या रा ङीःइ कील्ला छ्योम्बो ओःप जोदी एः।’ 27ओः छ्युक्पु मीःइ लाःसी, ‘ओःन्डु एःना ए आःबा, ङाः वासी पेःगे, लाजरसला ङाःइ आःबाइ खीमला ताङ्तेर। 28चीलेलाःना ङाःइदी मेःन्दा ङाः आतानोःक्या एः, ओःले खुङ काःल्दी खुङक्याला चेताउनी तेर्च्युक ओःले खुङक्या दी ङ्याल्वाला माःयोङ्ज्युक।’ 29अब्राहामगीइ लाःसी, ‘खुङक्या ङीमु मोशा ओःले राःङ्सा कोन्ज्योइ लेःङ्गो तेर्केन्दीक्याइ प्रुःक्योक पेज्याक्या एः, ख्याइ आतानोःक्याइ ओःखो पेज्याला ची प्रुःदी एःपा खुङक्याइ ओःखो ङीःन्ज्युक।’ 30छ्युक्पु मीःइ लाःसी, ‘मीःङे आःबा अब्राहाम, ओःजेइ खुङक्याला मेःदाङ एः। इःनाङ सुङ सीक्योक मीः फीर्च्या सेन्दी खुङक्यासाःला काःल्सी लाःना नी खुङक्याइ राःङ राःङगीइ स्याबा पेःदी लाःयो पोःर्चे एःके।’ 31इःनाङ अब्राहामगीइ लेःन लोदी लाःसी, ‘मोशा ओःले कोन्ज्योइ लेःङ्गो तेर्केन्दीक्याइ ताम मेःकोःगेनक्याइ सीक्योक मीःरा सेन्दी डोनाङ खुङक्याइ सेमल्हुक मीलुगेन एः।’”
Currently Selected:
लुका 16: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
