लुका 14
14
येशुइ नेःपा ख्य्वापीःजाला टाःच्युक्योक
1यहुदीक्याइ ङाःल सोगेन ङीःमा चीग येशु मेःन्दा चीग छेस्यो फारीसीइ खीमला साःप्च्या साःगाला काःल्सी। ओःला एःक्योक मीःक्याइ येशुइ ची पेःउदुबा लाःती याःबुले तादेरा एःके। 2ओःलारा मेःन्दा चीग लाःक्पा काङ्बा टाङ्क्योक मीः येशुइ तोःङ्ला तेःती एःके। 3येशुइ छ्येइ ठीमगीइ लोबेनक्याला ओःले फारीसीक्याला टीःसी, “उःइ ठीम च्योःङ्राले ङाःल सोगेन ङीःमाला नेःपाला टाःच्युजे ओःङ्गुबा ना मेःयोःङ्बा?” 4फीर्च्या खुङक्याइ चीङ माःलाःप। येशुइ ओः नेःपाला देदी टाःच्युसी ओःले खुङला ताङ्तेर्सी। 5ओः तीङ्ला येशुइ खुङक्याला लाःसी, “ख्याक्या काःखोइदी पुःपोःमो की लाङ पाःलाङ ङाःल सोगेन ङीःमाला कुवाला ताःप्सी लाःना, ची ख्याक्याइ ओःखोला गेबु गेबु मेतेङ्बा?” 6फीर्च्याङ खुङक्याइ चीङ लाःमाःखु।
7ओःले डेनला ओःङेन डोम्बोक्याइ छ्योम्बो छ्योम्बो तेःसाक्या दाम्क्योक थोङ्दी येशुइ खुङक्याला पेदाम चीग लाःसी, 8“ख्या याःर्का क्याःप्साइ डेनला डोगासुना छ्योम्बो ठाउँ दाम्दी माःते। ख्या भन्दाङ छ्योम्बो मीःला केक्याःप्क्योक एःस्वाँ। 9खुङ लेप्मीःजीक खुङला ओःले ख्याला केक्याःप्केन मीःइ ओःङ्दी ‘दीखो मीःला तेःचे तेर’ लाःती ख्याला तेःक्योक ठाउँलाःम्ले लाःङ्डो। ओः तेःकासु ख्या ङोःछारे काःल्दी थाम्जेर भन्दा वाःइ ठाउँला तेःकोडो। 10बरु डेनला डोगासुना तीङछ्योले काःल्दी तेः ओःले केक्याःप्केन मीः ओःङ्दी ख्याला ‘ए रोः, याःरला काःल्दी तेः ना’ लाःती छ्योम्बो ठाउँला ज्यासी लाःना, ओः तेःकासु थाम्जेरकीइ तोःङ्ला ख्याइदी छ्योम्बो इज्जत ओःङेन एः। 11चीलेलाःना राःङरा छ्योम्बो ओःङ्जे छोल्गेनक्या थाम्जेर छ्यामे ओःङेन एः, ओःले राःङला छ्यामे लाःकेनक्यादी छ्योम्बो ओःङेन एः।”
12येशुइ खुङला केक्याःप्केन मीःला लाःसी, “ख्याइ एःन्डुले डेन पेःगासुना, राःङगीइ रोःक्याला, राःङगीइ आतानोःक्याला, छ्योरीक्याला ओःले छ्युक्पु टोःङ्रीक्याला चीग्रा केमाःक्याप। चीलेलाःना खुङक्याइयाङ कीम्बा च्याल्जेला ख्याला केक्याःप्ती ख्याइ टीःलेन च्याल्गेन एः। 13बरु ख्याइ डेनक्या जोदी तेर्सुना प्राङ्नाक्याला, चा खोङ्क्योकक्याला, स्याःल्ठाकक्याला ओःले मी मेःथोङेन्दीक्याला केक्योःप। 14ओःले ख्याइ मोलाम ज्योर्केन एः, चीलेलाःना खुङक्याइ ख्याइ टीःलेन लोमीःखुगेन एः। फीर्च्या ताःक्पा मीःक्या सीक्योकलाःम्ले सेन्गासुना कोन्ज्योइरा ख्याक्याला ओःखो लोतेर्केन एः।”
छ्योम्बो डेनगीइ पेदाम
(मत्ती २२:१-१०)
15येशुइ ताम कोःदी खुङ ङीमुरा साःजेला तेःक्योक मेःन्दा चीगकीइ लाःसी, “कोन्ज्योइ क्याःल्खापला डेन साःजे ज्योर्केनक्याइ काःजे मोलाम ज्योर्ती एः।” 16येशुइ खुङला एःन्डुले लेःन लोदी लाःसी, “काःन्दीङ मेःन्दा चीग मीःइ माःङ्बुरा मीःक्याला लागी तेर्सी ओःले छ्योम्बो डेनगीइ तयारी पेःसी। 17डेन साःगेन तीःजी काःल्मीःजीक खुङगीइ मेःन्दा चीग लाबुला ‘साःगेन तीःजी काःल्सी’ लाःती केक्याःप्काला ताङ्सी। 18फीर्च्या ओः मीःक्याइ ताःम रेःरे जोदेरा ओःङ्जे माःङीन। चीगकीइ लाःसी, ‘ङाःइ सीःङ ङ्योःदी एः, ङाः ओःला माःकाल्बाइ मेःयोःङ एः। सीःताङ माःबे, ङाः ओःङ्मीःखु।’ 19राःङ्साइ लाःसी, ‘ङाःइ हल ङा लाङ ङ्योःदी एः, ङाः ओःखोक्याला मोदी तकोःउए। ङाःला क्षमा पेःतेर।’ 20ओःले राःङ्सादीइ लाःसी, ‘ङाःइ ताःसेरा याःर्का क्याःप्ती एः, ओः सोङ्गारा, ङाः ओःङ्मीःखु।’ 21ओः लाबु लोःदी ओःङ्दी थाम्जेर ताम ताःक्पुला लाःसी। ओःले ओः ताःक्पु सीःताङ पेःदी राःङगीइ लाबुला लाःसी, ‘क्याःसाक्याइ छ्योम्बो ओःले छ्यामे लाःमक्याला सुङ ओःले प्राङ्नाक्या, नेःपाक्या, स्याःल्ठाकक्या ओःले मी मेःथोङेन्दीक्याला केक्याःप्ती खेर्च्यो।’
22ओःले ओः लाबुइ लाःसी, ‘हजुर, ख्याइ लाःक्योक थाम्जेरला ङाःइ केक्याःप्ती ख्योङ्सी। फीर्च्या ताःरुङ ठाउँ नी मार्थाङ एः।’
23फीर्च्या ताःक्पुइ लाःसी, ‘ख्या मुल लाःमक्याला ओःले युःलगीइ लाःमक्याला काःल्दी मीःक्याला ग्याक कुःदेरा ख्योङ्दी स्यो ओःले ङाःइ खीम मीःक्याइ काःङ्ज्युक। 24चीलेलाःना ङाः ख्याक्याला लाःके, तोःङ्ला ङाःइ केक्याःप्क्योक नाःङ्ला सुइयाङ ङाःइ डेनगीइ प्व्राः ताजे मेःज्योर्केन एः।’”
योबाइ पेःकोन तुःक्पु
(मत्ती १०:३७-३८)
25थाङ्मा चीग मीःक्याइ छ्योम्बो पोर्चोम येशु ङीमु डोदेरा एःके। येशुइ खुङक्याला लोःदी लाःसी, 26“ङाःइ तीङ्ला ओःङ्जे छोल्गेन्दीइ राःङगीइ आबा आमा, खुङगीइ पेःमे, पुःपोःमोक्या, आतानोःक्या, आजीनोःमोक्या ओःले राःङला भन्दाङ माःङ्बु ङाःला च्याःम्बु मेःबेए लाःना ओःखो ङाःइ योबा ओःङ मीःखुए। 27ओःले राःङगीइ क्रुस खुर्ती#१४:२७ क्रुस खुर्ती क्रुस खुर्चे लाःक्योकदी येशुइ लागी तुःक्पु खुर्चे ओःले सीकोःनाङ सीजे तयार डोगेन्दी इःङे। ङाःला मेःब्य्राङेनक्यादी ङाःइ योबा ओःङ मीःखुए।
28सुइयाङ धरहरा जोजे छोल्गुए लाःना ओःखो जोसीःङ्जे तोःङ्लारा काःजे रेःमुक कोःउबा लाःती हीसाब पेःउबा की मेःबेबा? 29ओःन्डु माःबे लाःना, खुङगीइ धरहराइ चार लुदीमाराङ जोसीःङ्माःखु लाःना मीःक्याइ खुङला ङ्याप्च्युक पेःदी एःन्डु लाःकेन एः, 30‘दीखो मीःइ जोजेला छुजे नी छुसी, फीर्च्या सीःङ्च्युजे माःखु।’ 31काःखोङ क्याःल्बुइ राःङ्सा क्याःल्बु ङीमु माक क्याःप्चेला डोगासुना राःङ ङीमु एःक्योक हजार च्यु थेक्याइ राःङ्सा क्याःल्बु ङीमु एःक्योक हजार ङीःस्यु थेक्याला क्याःल्खुँ की मीःखुँ लाःती तोःङ्लारा ठीवा चेकोःउए। 32क्याःल्मीःखुएः लाःना ओः राःङ्सा क्याःल्बु थारीःङ्बुले ओःङ्देरा एःकासुनारा खुङगीइ राःङगीइ लेःङ्गो तेर्केनक्याला डीक्चेला ताङ्गुए। 33ओःन्डुलेरा ख्याक्या नाःङ्ला सुइ ङाःइ लागी थाम्जेर मेःपोःर्पा, खुङ ङाःइ योबा ओःङ मीःखुए।
प्व्राः म्याःक्योक छा
(मत्ती ५:१३; मर्कुस ९:५०)
34छा याःबु इःङे, फीर्च्या छाइ प्व्राः तोर्सी लाःना ओःखोला फीर्च्या चीइ छालोक जोगेन्दी? 35ओःखो नाः सीःङला नाः छ्याइ उरुङला लेःगा ओःङ्गुबा। मीःक्याइ ओःखोला क्युर्तेर्कुए। काःखोक्याइदी कोःगेन नाम्ज्यो एःपा, ओःखोक्याइ कोःज्युक।”
Currently Selected:
लुका 14: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
