लुका 13
13
स्याबा पेःदी लाःयो पोःर्तो ओःले कोन्ज्योछ्योले लोःदो
1ओः तेःकासु ओःला चीङ मीःक्या एःके ओःले खुङक्याइदी येशुला गालीलीक्याइ बारेला लाःसी, ओः गालीलीक्यादी मन्दीरला एः तेर्तेरा पेःगासुना खुङक्याला पीलातसकीइ सेती खुङक्याइ ठा एः तेर्क्योक पशुक्याइ ठा ङीमु सेतेर्ती एःके। 2येशुइ खुङक्याला लाःसी, “एःन्डुले सेक्योक ओः गालीलगीइ मीःक्या ची थाम्जेर राःङ्सा गालीलगीइ मीःक्या भन्दा माःताक्पा एःके लाःती ख्याक्या ठीवा साल्गुबा? 3ङाः ख्याक्याला लाःके, ओःन्डुबा मीःङे! राःङ राःङगीइ स्याबा पेःदी लाःयो माःपोःर लाःना ख्याक्याङ ओःन्डुलेरा सीःङ्दाक ओःङेन एः। 4ओःले सीलोआमगीइ धरहरा रीःल्दी सेक्योक ओः च्याप्केथाल मीःक्या यरुशलेमगीइ थाम्जेर राःङ्सा मीःक्या भन्दा माःताक्पा एःके लाःती ख्याक्या ठीवा साल्गुबा? 5ओःन्डुबा मीःङे! ङाः ख्याक्याला लाःके, ख्याक्याङ राःङ राःङगीइ स्याबा पेःदी लाःयो माःपोःर लाःना ख्याक्याङ ओःन्डुलेरा सीःङ्दाक ओःङेन एः।”
ब्रुम्दो मेःकोःङेन तोःङ्बो
6ओः तीङ्ला येशुइ खुङक्याला पेदाम चीग लाःसी, “मेःन्दा चीग मीःइ राःङगीइ अङ्गुर सीःङ्ला नेभाराइ तोःङ्बो चीग चुदी एःके। खुङ ओः तोःङ्बोला ब्रुम्दो कोःङ्बा की लाःती तागाला ओःङ्गासुना ब्रुम्दो माःज्योर। 7ओः सोङ्गारा, ओःखोइ ओः सीःङगीइ कोःरालु पेःगेन लाबुला लाःसी, ‘तादो, लोः सुममीःजीक दीखो तोःङ्बोला ब्रुम्दो कोःङ्दुबा ना लाःती तागाला ओःङ्देरा एः, ओःले ङाःइ ब्रुम्दो चीगकाङ ज्योर्ती म्याः। ओःले ताः दीखोला एःन्दाराङ चीले ठाउँ साःच्युगेन्दी? दीखोला तुप्ती क्युर्तेर।’ 8फीर्च्या लाबुइ लाःसी, ‘हजुर, ताःरुङ लोः चीग लाःम तागा। ङाः दीखोइ छुरफारला कोदी छ्या लुतेर्के। 9ओःले ब्रुम्दो कोःङ्सी लाःना याःबुरा काःल्सी, माःकोःङ लाःना तुप्ती क्युर्तेर्का।’”
येशुइ नेःपाला टाःच्युक्योक
10थाङ्मा चीग यहुदीक्याइ ङाःल सोगेन ङीःमाला येशुइ यहुदीक्याइ जोम्साखीमला लोप्तेरा एःके। 11ओःला मेःन्दा चीग लोः च्याप्के मीःजीक हेन्डी क्याःप्ती केपा कुःक्योक पेःन्पीःजा एःके। ओःले ओःखोइ राःङगीइ केपा लाङ्मीःखुके। 12येशुइ ओः पेःन्पीःजाला थोङ्दी तोःङ्ला केक्याःप्ती लाःसी, “ए पेःन्पीःजा, ताः ख्या नाःजालाःम्ले टाःसीःङ्दी एः।” 13खुङगीइ ओः पेःन्पीःजाखाला ङीःक्कार लाःक्पा ज्याःसी ओःले ओः तेःकासुरा खुङगीइ केपा लाङ्सी ओःले कोन्ज्योइ प्रशंसा पेःगाला स्युःसी।
14ओः पेःन्पीःजाला ङाःल सोगेन ङीःमाला टाःच्युक्योक थोङ्दी जोम्साखीमगीइ छ्योम्बो छेस्यो सीःताङ पेःसी। खुङक्याइ मीःक्याला लाःसी, “लेःगा पेःजेला साताइ ङीःमा टुःक एः। ङाःल सोगेन ङीःमाला चीले टाःजेला ओःङ्गुबा? ची दीखो ङीःमा बाहेक राःङ्सा ङीःमा म्याःपा ले?” 15प्रभुइ खुङला एःन्डुले लेःन लोदी लाःसी, “ए खोक्नाकक्या! ची ङाःल सोगेन ङीःमाला ख्याक्याइ लाङ, पाःलाङ ओःले पुःङ्गुक्याला ताङ्दी छ्यु थुङ्च्युजेला मेःखेर्पा ले? 16दी अब्राहामगीइ पोःमोला शैतानगीइ लोः च्याप्केथुप जीङ्थाकला ज्यादी एःके, ची ङाःल सोगेन ङीःमा लाःती खुङला हेन्डीलाःम्ले ताःम्साङ जोजे मेःयोःङ्बा ले?” 17खुङगीइ एःन्डुबा लेःन कोःदी टाःलाङक्या ङोःछारे काःल्सी। राःङ्सा मीःक्या लाःना खुङगीइ पेःक्योक याःमाछाककीइ लेःगा थोङ्दी केःदाङ काःल्सी।
पाल्गाइ सेनगीइ पेदाम
(मत्ती १३:३१-३३; मर्कुस ४:३०-३२)
18येशुइ ताःरुङ लाःतेरा काःल्सी, “कोन्ज्योइ क्याःल्खाप ची च्योःङ्रा एःपा? ओःखोला ङाः ची ङीमु कार्का? 19ओःखो नी पाल्गाइ सेन चीग च्योःङ्रा इःङे, ओःखो मेःन्दा चीग मीःइ खेर्तीङ राःङगीइ सीःङला ताप्सी। ओःखो छ्योम्बो काःल्दी तोःङ्बो चीग काःल्सी ओःले ओःखोइ याःल्गाक्याला च्याःज्युङ्माक्याइ छाङ जोसी।”
20येशुइ फीर्च्या लाःसी, “कोन्ज्योइ क्याःल्खापला ङाः चीः ङीमु कार्का? 21दीखो नी खमीर लुक्योक खुरा च्योःङ्रा इःङे। पेःन्पीःजा चीगकीइ पाइ सुम चाम्बाला ओः खमीर तीबी चीग सेःउए ओःले थाम्जेर चाम्बा फोर्ती ओःङ्गुए।”
छीमी कोः
(मत्ती ७:१३-१४,२२-२३; ८:११-१२)
22येशु यरुशलेम डोदेरा एःकासुना खुङ क्याःसा ओःले युःल युःलक्याला स्युःदेरा मीःक्याला लोप्तेरा काःल्सी। 23ओः तेःकासु मेःन्दा चीग मीःइ खुङला टीःसी, “प्रभु, ची तीबी चीग मीःक्या चीग्रा थार्केन एःपा?” येशुइ खुङला लाःसी, 24“छ्यामे कोःलाःम्ले स्युःजे छोल्गेन्दी पेःदो, चीलेलाःना ङाः ख्याक्याला लाःके, माःङ्बुरा मीःक्या स्युःजे छोल्गेन एः, फीर्च्या मीःखुगेन एः। 25ओःखो तीःजीला खीमगीइ ताःक्पु लाःङ्दी कोः चेतेर्केन एः ओःले ख्याक्याइदी फीलाःम्ले कोः तुःङ्देरा लाःकेन एः, ‘हजुर, ङीःला कोः फ्यादोना।’ खुङगीइ लाःकेन एः, ‘ख्याक्या सु इःम्बा ओःले काःलाःम्ले ओःङ्क्योक इःम्बा ङाः ङोःमेसेए!’ 26ख्याक्याइ लाःकेन एः, ‘ङीःक्या ख्या ङीमुरा तेःती साःउके ओःले थुङ्गुके ओःले ख्याइ ङीःक्याइ युःल खीमला लोप्कुके।’ 27फीर्च्या खुङगीइ लाःकेन एः, ‘ख्याक्या काःले ओःङ्क्योक ङाः ङोःमेसेए। ए माःरीक्पा लेःगा पेःगेनक्या, दीलाःम्ले सुङ!’ 28ओःले ख्याक्याइ फाफामु अब्राहाम, इसहाक, याकुब ओःले थाम्जेर कोन्ज्योइ लेःङ्गो तेर्केन्दी मीःक्याला कोन्ज्योइ क्याःल्खाप नाःङ्ला थोङ्गासुना ओःले राःङलादी फीला क्युर्तेर्कासुना ख्याक्या सो मुःर्तेरा ङुःगेन एः। 29मीःक्या स्यार, नुःप, च्याःङ ओःले ल्हो छ्योसीःरालाःम्ले ओःङ्दी कोन्ज्योइ क्याःल्खापला डेन साःजेला तेःकेन एः। 30फीर्च्या ताःसे तीङ्ला एःकेनक्या तोःङ्ला ओःङेन एः ओःले ताःसे तोःङ्ला एःकेनक्या तीङ्ला ओःङेन एः।”
येशु यरुशलेमला टेःम्बा साल्दी तुःङाल पेःक्योक
(मत्ती २३:३७-३९)
31ओः तेःकासुरा चीङ फारीसीक्या येशुसाःला ओःङ्दी लाःसी, “दीलाःम्ले थेङ्दी सुङ चीलेलाःना हेरोद क्याःल्बुइ ख्याला सेचेला छोल्देरा एः।” 32येशुइ खुङक्याला लाःसी, “काःल्दी ओः लुःन्डीला लाःतेर, ‘तीःरीङ रा ङार्तो हेन्डी तेङे ओःले मीःक्याला टाःच्युगेन लेःगा पेःगे, ओःले ङीःमा सुमगीइ ङीःमुदी ङाःइ लेःगा सीःङेन एः।’ 33इःङे, तीःरीङ, ङार्तो ओःले नाङ ङाः ङाःइ लाःम डोदीरा तेःकोःउए, चीलेलाःना यरुशलेमबाहेक राःङ्सा ठाउँला कोन्ज्योइ लेःङ्गो तेर्केन मीःला सेकुबा ले?
34यरुशलेमगीइ मीःक्या, ए यरुशलेमगीइ मीःक्या! ख्योक्या कोन्ज्योइ लेःङ्गो तेर्केन्दी मीःक्याला सेकुए ओःले कोन्ज्योइ ताङ्क्योक मीःक्याला तोः क्याःप्कुए। च्याःमु योमाइ राःङगीइ चीःप्रुक्याला उप्क्योक च्योःङ्रा ङाःइ काःजे थाङ्मा ख्योक्याइ पुःपोःमोक्याला रुःप चीःजे छोल्सी, फीर्च्या ख्योक्याइ माःङीःन। 35तादो, कोन्ज्योइ ख्योक्याइ कोःम्सा पोःर्केन एः। ङाः ख्योक्याला लाःके, नाःमथुप ख्योक्याइ ‘प्रभु कोन्ज्योइ मीःनला ओःङेन्दीइ काःजे मोलाम ज्योर्ती एः’#भजन ११८:२६ लाःती मेःलाःप एःपा, ओःथुप ख्योक्याइ ङाःला मेःथोङेन एः।”
Currently Selected:
लुका 13: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
