लुका 12
12
खोक्नाकक्याला चेताउनी
(मत्ती १०:२६-२७)
1माःङ्बुरा हजार मीःक्याइ पोर्चोम रुःप काःल्क्योक सोङ्गारा चीगकीइ राःङ्साला नेम्गाला स्युःसी। ओःले तोःङ्ला येशुइ राःङगीइ योबाक्याला लाःसी, “ख्याक्या फारीसीक्याइ खोक्नाक सेमलाःम्ले थारीःङ्बुरा तेः। ओः खोक्नाक सेम लाःक्योकदी खुरा फोर्च्युगेन खमीर च्योःङ्रा इःङे। 2चीलेलाःना उप्ती ज्याक्योक ताम काःजे एःपा, ओः थाम्जेर थोङेन एः ओःले इप्ती ज्याक्योक ताःम काःजे एःपा, ओः थाम्जेर छोर्केन एः। 3ख्याक्याइ नाक्जुकला लाःक्योक ताम ङीःमा कार्पुला कोःगेन एः। सुङ म्याःक्योक कोठाला लाःक्योक ताम खीमगीइ तुःङ्सोखाले छ्योम्बो केइ लाःकेन एः।
सु ङीमु जीबा पेःको
(मत्ती १०:२८-३३; १२:३२)
4ए ङाःइ रोःक्या, ङाः ख्याक्याला लाःके, मीःक्या ङीमु माःजी। खुङक्याइ नी ख्याक्याइ जुबुला चीग्रा सेखुउए, इःनाङ ओः तीङ्ला राःङ्सा चीङ पेःमीःखुए। 5इःनाङ सु ङीमुदी जीबा पेःकोः लाःती ङाः ख्याक्याला लाःके, जुबुला सेमीःजीक ङ्याल्वाला क्युर्खुगेन ल्हे एःक्योक कोन्ज्यो ङीमुरा चीग्रा जीबा पेःकोः। इःङे, खुङ ङीमुरा चीग्रा जीबा पेःदो। 6ची ङाथाल भङ्गेरा ङीथाल ङुलगीइ डेबाला चोङ्गुए, मीःङे ले? ओः भङ्गेरा एःजे खेमु एःनाङ कोन्ज्योइ ओःखोक्या चीगलाङ टेःम्बा मेःचे एः। 7कोन्ज्योइ ख्याक्याइदी नी गोइ टाथुपाङ टाःङ्दी एः। ओः सोङ्गारा, माःजी, ख्याक्या नी माःङ्बुरा भङ्गेरा भन्दाङ माःङ्बु रीःनगीइदी इःङे।
8ङाः ख्याक्याला लाःके, काःखोइ ङाःला मीःइ तोःङ्ला प्रभु लाःती तोःङ्ज्याङ पेःबा, ङाः मीःइ पुःइयाङ कोन्ज्योइ स्वर्गदुतकीइ तोःङ्ला ओःखोला राःङगीइदी इःङे लाःती तोःङ्ज्याङ पेःगे। 9इःनाङ काःखोइ ङाःला मीःइ तोःङ्ला तोःङ्ज्याङ माःबेबा, ङाः मीःइ पुःइयाङ कोन्ज्योइ स्वर्गदुतकीइ तोःङ्ला ओःखोला तोःङ्ज्याङ मेःबे। 10ङाः मीःइ पुःइ वीरुद्धला लाःक्योक ताम क्षमा ओःङेन एः, इःनाङ चाङ्मा लाइ वीरुद्धला लाःक्योक माःरीक्पा तामदी नाःमाङ क्षमा मेःयुङेन एः।
11मीःक्याइ ख्याक्याला जुम्दी यहुदीक्याइ जोम्साखीमगीइ छेस्योक्यासाःला, हाकीमक्यासाःला ओःले अधीकारीक्यासाःला खेर्कासुना ख्याक्याइ काःन्डुले ओःले ची लेःन लोगेन्दी लाःती तुःङाल माःबे, 12चीलेलाःना ओः तेःकासुरा ख्याक्याइ ची लाःकोःन्दी इःम्बा चाङ्मा लाइ ख्याक्याला लोप्केन एः।”
आक्याक्पा छ्युक्पु मीःइ पेदाम
13मीःइ पोर्चोमलाःम्ले मेःन्दा चीग मीःइ येशुला लाःसी, “लोबेन, ङाःइ आताला अंश केःदीतेर लाःतेर ना।” 14येशुइ खुङला लाःसी, “नोः, ङाःला सुइ ख्याक्याइ ठीम पेःगेन्दी ओःले अंश केःगेन्दी जोबा?” 15ओःले येशुइ थाम्जेर मीःइ पोर्चोमला लाःसी, “च्यागाताःक्पु पेःदो! थाम्जेर खालेइ मीफामु पेःजेलाःम्ले थार्ती तेः, चीलेलाःना नोःर क्युःक्या काःजेरा एःनाङ ओःखोइ मीःला याःबु मीःली मेतेरए।”
16ओः तीङ्ला येशुइ खुङक्याला पेदाम चीग लाःसी, “मेःन्दा चीग छ्युक्पु मीःइ सीःङला माःङ्बुरा डु कोःङ्सी। 17खुङगीइ सेम सेमलारा ठीवा साल्सी, ‘दी थाम्जेर डु काःला ज्याजे? ताः ची पेःजे, दी डु ज्यागेन ठाउँरा म्याः? 18ताः ङाः एःन्डु पेःगे, छ्यामे योःङक्या रोम्दी ताःरुङ छ्योम्बो जोगे ओःले ओःलारा ङाःइ थाम्जेर डु ओःले क्युःक्या ज्यागे। 19ओःले ङाः राःङलारा लाःके, “ख्याइ माःङ्बुरा लोःथुप दाङेन पेःदी डु ओःले नोःरक्या जोदी एः। ताः कीपु पेःदी तेः, सोः, थुङ ओःले छ्याम्डाल च्युदी तेः।”’
20फीर्च्या कोन्ज्योइ ओः मीःला लाःसी, ‘ए आक्याक्पा, तीःरीङगीइ कुःङ्मुरा ख्योइ मीःली ख्योलाःम्ले खेर्केन एः ओःले ख्योइ जोज्याक्योक ओः नोःर क्युःक्या सुइ साःगे?’” 21ओःले येशुइ दीखो पेदाम सीःङ्च्युदेरा लाःसी, “कोन्ज्योला सेमल्हुक मीलुगेन्दी ओःले राःङगीइ लागी चीग्रा नोःर जोदी ज्यागेन्दी मीःइ हालत एःन्डुबारा ओःङ्गुए।”
तुःङाल पेःजे मेःयोःङे
(मत्ती ६:२५-३४)
22ओः तीङ्ला येशुइ राःङगीइ योबाक्याला लाःसी, “ओः सोङ्गारा, ङाः ख्याक्याला लाःके, सेन्जेइ लागी साःप्च्या ओःले केःङ्जेइ लागी केःलाइ तुःङाल माःबे। 23चीलेलाःना साःगेन स्याः भन्दा मीःलीरा छ्योम्बो ओःले केःला भन्दा जुबुरा छ्योम्बो इःङे। 24च्याःरोकक्याला तादो! खुङक्याइ सेन मीचुए, डु मीःथुए ओःले योःङला ज्याङ मेःज्याए। ओःन्डु एःनाङ कोन्ज्योइ खुङक्याला साःच्युदीरा एः। ख्याक्या नी ओः च्याःज्युङ्माक्या भन्दा काःजे माःङ्बु रीःनगीइदी एः।
25ख्याक्या नाःङ्ला सुइदी तुःङाल पेःदी राःङगीइ मीःली तीबी चीग रीःङ्बु जोखुउबा? 26ख्याक्या एःजे छ्यामे लेःगाङ पेःमीःखुए लाःना राःङ्सा तामगीइदी तुःङाल चीले पेःउबा? 27रीःइ मेःन्दोक्याला तादो, खुङक्याइ नी लेःगाङ मेःबेए, केःङ्जेला केःलाङ मेःथाए। फीर्च्या ङाः ख्याक्याला लाःके, सोलोमोन क्याःल्बु ङीमु ओःजेइ नोःर क्युःक्या एःकासुनाङ खुङगीइ ओः मेःन्दोक्याइ च्योःङ्रा छेदी म्याःके। 28तीःरीङ एःकेन्दी ओःले ङार्तो काम्मीःजीक मेःला सागेन मेःन्दोला नी कोन्ज्योइ एःन्डुले छेदी एः लाःना ची ताःरुङ खुङगीइ ख्याक्याला केःङेन केःला मेतेर्पा रा? खोइ ख्याक्याइ सेमल्हुक लुक्योक? 29ओः सोङ्गारा, ची साःगा ओःले थुङ्गा लाःती चाल्माःते ओःले तुःङालाङ माःबे। 30कोन्ज्योला ङोःमासेक्योक मीःक्याइ का एःन्डुबा तुःङाल पेःउए। दी थाम्जेर ताम ख्याक्याला कोःउए लाःती आबा कोन्ज्योला टेःम्बा एः। 31बरु कोन्ज्योइ क्याःल्खाप चाल्दो ओःले खुङगीइ दी थाम्जेर स्याःक्या ख्याक्याला पाःतेर्केन एः।”
नाःम्खालीङगीइ नोःर क्युःक्या
(मत्ती ६:१९-२१)
32येशुइ फीर्च्या राःङगीइ योबाक्याला लाःसी, “ए छ्यामे छोबा, माःजी! चीलेलाःना ख्याक्याला आबा कोन्ज्योइ राःङगीइ क्याःल्खापकीइ मीःक्या जोजेला खुङ केःदाङ काःल्दी एः। 33ख्याक्याइ राःङगीइ क्युःक्या चोङ्दी ओःङ्क्योक डेबा प्राङ्नाक्याला तेर। ओःन्डुले राःङगीइ लागी नाःमाङ मेःराःल्गेन्दी काःल्ज्युमक्या जोदो ओःले नाःमाङ मीःसीःङेन नोःर नाःम्खालीङला रुःप चीःदो। ओःला कुमेन मेःयोःङ एः ओःले बुइयाङ मेःसाए। 34चीलेलाःना काःला ख्याक्याइ नोःर एःपा, ख्याक्याइ सेमाङ ओःलारा तेःकुए।”
च्यागाताःक्पु पेःदी तेः
35ओः तीङ्ला येशुइ लाःसी, “मेःबा पेःजेला ख्याक्याइ केपा ताःम्दी तेः ओःले ख्याक्याइ छेमी थेप्ती ज्यो। 36याःर्का क्याःप्साइ डेनलाःम्ले लोःदी ओःङेन ताःक्पुइ लाःम तादी तेःकेन्दी लाबुक्या च्योःङ्रा पेःदी ख्याक्या तेः। ताःक्पु ओःङ्दी कोः तुःङ्लुङम्याःपा खुङक्याइ कोः फ्यातेर्कुए। 37ताःक्पु लोःदी ओःङ्गासुना ङी माःलोबारा तेःक्योक ओः लाबुक्याइ स्याबासी ज्योर्केन एः। तेःन्दामरा ङाः ख्याक्याला लाःके, ओः ताःक्पुइ डोम्बोला च्योःङ्रा डेन जोगेन एः ओःले ओः लाबुक्याला तेःच्युगेन एः ओःले डेन साःच्युगेन एः।
38ओः ताःक्पु नुःप फेला की नुःपला ओःङ्गासुना राःङगीइ लाबुक्याला ङी माःलोःक्योकरा फ्रेसी लाःना खुङगीइ ताःरुङ माःङ्बु स्याबासी तेर्केन एः।
39इःनाङ दीखो टेःम्बा साल्दी ज्यो, कुमेन ओःङेन तीःनाम छोक्र्योक एःना खीमगीइ ताःक्पुइ कुमेनला खीमला स्युःजेरा तेर्चे म्याःके। 40ओः सोङ्गारा, तेन्दुरा च्यागाताःक्पु पेःदी तेः, चीलेलाःना ङाः मीःइ पुः ख्याक्याइ ठीवारा माचेक्योक तीःनामला ओःङेन एः।”
सेम साङा एःक्योक ओःले म्याःक्योक लाबुक्या
(मत्ती २४:४५-५१)
41ओःले पत्रुसकीइ येशुला टीःसी, “प्रभु, ख्याइ दीखो पेदाम ङीःला चीग्रा लाःक्योक इःङे की राःङ्सा थाम्जेरलाङ इःङे?” 42प्रभुइ खुङक्याला लाःसी, “काःखो लाबु सेम साङा ओःले नावा साल्बु एःपा, ओःखोला खोइ ताःक्पुइ खीमगीइ थाम्जेर लेःगाक्याइदी जीम्मा तेर्मीःजीक ओः लाबुइ राःङ्सा लाबुक्याला डीक्पु डीक्पु तीःजीला साःजे थुङ्जे तेर्कुए। 43ओः खीमगीइ तोःप्ता लोःदी ओःङ्गासुना ओः लाबुइ ओःन्डुरा पेःदी लेःगा पेःदी तेःक्योक फ्रेसी लाःना खुङला स्याबासी तेर्केन एः। 44तेःन्दामरा ङाः ख्याक्याला लाःके, तोःप्ताइ ओःखो लाबुला थाम्जेर नोःर क्युःक्या जीम्मा तेर्केन एः। 45इःनाङ ओःखो लाबुइ ‘ङाःइ तोःप्ता कुःल्बु पेःदी ओःङ्गुए’ लाःती राःङ्सा ख्य्वापीःजा ओःले पेःन्पीःजा लाबुक्याला रोप्ती ओःले साःदी थुङ्दी जीसी लाःना, 46ओःखोइ तोःप्तादी खोइ टेःम्बा मासल्क्योक तीःनामला लेप्केन एः ओःले खोला तुप्ती ङीथाल जोगेन एः ओःले खोइ दशादी सेम साङा म्याःक्योक मीःक्याइ च्योःङ्रारा ओःङेन एः।
47राःङगीइ तोःप्ताइ सेम ङोःसेदीङ तयार मेःन्डोगेन्दी ओःले पेःकोःन लेःगा मेःबेगेन लाबुलादी तोःप्ताइ छ्योम्बो तुःक्पु तेर्केन एः।
48फीर्च्या तोःप्ताइ सेम ङोःमासेबा तुःक्पु ज्योर्केन लेःगा पेःगेन लाबुलादी खुङगीइ तीबी तुःक्पु तेर्केन एः। काःखोला माःङ्बु तेर्ती एःपा ओःखोला माःङ्बु लाःङेन एः, ओःन्डुलेरा काःखोला माःङ्बु जीम्मा तेर्ती एःपा ओःखोलाःम्ले ताःरुङ माःङ्बु नेःङेन एः।”
खाम्साङ्बु मीःङे, तुःक्पु
(मत्ती १०:३४-३६)
49येशुइ लाःसी, “ङाः साजाम्बुलीङला मेः पार्चेला ओःङ्क्योक इःङे ओःले तोःङ्मीःजीकरा पार्क्योक एःना नी याःबु ओःङ्जे एःके! 50ङाःइ तुःक्पुइ बप्तीस्मा लेःङ्कोःउए, ओःले ओःखो बप्तीस्मा माःलेङथुप ङाःला खाम्साङ्बु मेःयुङ एः। 51ची ख्याक्याइ ङाः जाम्बुलीङला मीःक्याला डीक्च्युजेला ओःङ्क्योक इःङे लाःती ठीवा साल्गुबा? मीःङे, ङाः नी खुङक्या नाःङ्ला खाफ्याच्युजेलाका ओःङ्क्योक इःङे। 52ताःमीःजीक मेःन्दा ङाइ फेबेला ठुक्पा ओःङेन एः। मेःन्दा सुम मेःन्दा ङीइ वीरुद्धला ओःले मेःन्दा ङी मेःन्दा सुमगीइ वीरुद्धला लाःङेन एः। 53आबाइ पुःला ओःले पुःइ आबाला, आमाइ पोःमोला ओःले पोःमोइ आमाला, ओःन्डुलेरा क्युःमुइ नामाला ओःले नामाइ क्युःमुला वीरोध पेःगेन एः।”
तीःनामगीइ चुःन्डुल
(मत्ती १६:२-३; ५:२५-२६)
54येशुइ मीःइ पोर्चोमला लाःसी, “ख्याक्याइ नुःपछ्योले मुक्पा सोदेरा ओःङ्क्योक थोङ्सी लाःना ख्याक्याइ लाःकुए, ‘ताः नाम क्याःप्कुए’ ओःले ओःन्डुबारा ओःङ्गुए। 55ओःले ल्होलाःम्ले ल्हाबा ओःङ्गासुना ख्याक्याइ लाःकुए, ‘ताः माःङ्बुरा छेपा ओःङ्गुए’ ओःले ओःन्डुबारा ओःङ्गुए। 56ए खोक्नाकक्या! ख्याक्या जाम्बुलीङ ओःले नाम्सार्गाला तदी नाम क्याःप्कुबा की मेःक्याःप्कुबा लाःती ङोःसेखुउए, इःनाङ ताः ओःङेन तीःनामगीइ तामक्याइ चुःन्डुलदी ख्याक्या चीले ङोःमेसेबा? 57काःखो तामदी डीक्पु इःङे लाःती ख्याक्या राःङरा चीले मेसेबा?
58सुइयाङ ख्याक्याला सीःन्दा लुदी ठीम पेःगेनक्यासाःला खेर्चे छोल्सी लाःना लाःमलारा ओःखो ङीमु डीक्तो। मीःङे लाःना ओःखोइ ख्याला ठीम पेःगेनक्यासाःला टीःती खेर्कुए, ओःले ठीम पेःगेन्दीइ ख्याला थेइ लाःक्पाला तेर्कुए, ओःले ओः थेइ ख्याला चेङाङला लुतेर्कुए। 59ङाः ख्याला लाःके, ख्याइ जरीवानाइ थाम्जेर रेःमुक माच्यालथुप ख्याला ओःलारा ज्यागेन एः।”
Currently Selected:
लुका 12: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
