लुका 11
11
येशुइ लोप्क्योक प्रार्थना
(मत्ती ६:९-१३; ७:७-११)
1थाङ्मा चीग येशु ठाउँ चीगला प्रार्थना पेःदेरा तेःती एःके। प्रार्थना पेःसीःङ्मीःजीक खुङगीइ योबा चीगकीइ लाःसी, “प्रभु, युहन्नाइ राःङगीइ योबाक्याला प्रार्थना पेःजे लोप्क्योक च्योःङ्रा ङीःलाङ प्रार्थना पेःजे लोप्ना।” 2येशुइ खुङक्याला लाःसी, “ख्याक्याइ एःन्डुले प्रार्थना पेःदो,
‘ए आबा कोन्ज्यो,
ख्याइ मीःन चाङ्मा एःच्युक,
ख्याइ क्याःल्खाप ओःङ्ज्युक,
3ङीःमारी टाःङ्मा कोःकेन साःप्च्या ङीःला ङीःमारी टाःङ्मा ना।
4ङीःइ पेःक्योक लाःयोक्या क्षमा पेःतेर,
चीलेलाःना ङीःइ वीरुद्धला लाःयो पेःगेन्दीक्याला ङीःङ क्षमा पेःउए।
ओःले ङीःला लाःयो पेःजेलाःम्ले थार्च्युतेर।’”
5ओःले येशुइ योबाक्याला लाःसी, “लाःकाना, ख्याक्या सुइदीङ मेःन्दा चीग रोः एः। नुःप फेला ओः रोःसाःला काःल्दी लाःकुए, ‘ए रोः, ङाःला सुमथाल खुरा कीम्बा ना ना। 6चीलेलाःना ङाःइ मेःन्दा चीग रोः माःङ्बुरा थारीःङ्बुले ओःङ्दी एः, ओःले ङाः ङीमु खुङला साःजे तेर्चेला चीङ म्याः।’ 7ओः रोःइ नाःङ्लाःम्लेरा लाःसी, ‘ङाःला तुःक्पु मातेर। कोः चेसीःङ्दी एः, ओःले पीःजाक्या ङीमु ङाः तेनला एः। ताःसे ङाः लाःङ्दी ख्याला चीङ तेर्मीःखुँ।’” 8एःजे लाःसीःङ्मीःजीक येशुइ खुङक्याला लाःसी, “ङाः ख्याक्याला लाःके, रोः लाःतीमाराङ खुङगीइ ख्याला चीङ मातेर लाःनाङ ख्याइ लाङ्दीरा तेःसी लाःना खुङ लाःङेन एः ओःले ख्याइ लाङ्क्योक चे थाम्जेर तेर्केन एः।
9ओः सोङ्गारा, ङाः ख्याक्याला लाःके, लाङ्दो ले ज्योर्केन एः, छोल्दो ले फ्रेकेन एः, कोः तुःङ्दो ले ख्याक्याइ लागी कोः फ्यागेन एः। 10चीलेलाःना काःखोइ लाङ्गुबा ओःखोइ ज्योर्कुए, काःखोइ छोल्गुबा ओःखोइ फ्रेकुए ओःले काःखोइ कोः तुःङ्गुबा ओःखोइ लागी कोः फ्याउए। 11ख्याक्या नाःङ्ला सुदी एःन्डुबा आबा एःस्वाँ, ख्याइ पुःइ ङ्याः लाङ्सुना प्रुःल तेर्कुबा, 12ओःले च्याःम्कोःङा लाङ्सुना बीच्छी तेर्कुबा? 13ख्याक्या माःताक्पा एःनाङ राःङगीइ पुःपोःमोला याःबु ताम तेर्चे सेउए लाःना, ताःरुङ ख्याक्या भन्दाङ नाःम्खालीङला एःक्योक आबाइ खुङ ङीमु लाङेनक्याला चाङ्मा ला तेर्कुए।”
येशु ओःले हेन्डीक्याइ क्याःल्बु
(मत्ती १२:२२-३०,४३-४५; मर्कुस ३:२०-२७)
14येशुइ मेःन्दा चीग ताम लाःमीःखुन मीःलाःम्ले हेन्डी तेङ्देरा एःके। हेन्डी थेङ्मीःजीक ओः मीः ताम लाःकाला स्युःसी, ओःले दीखो थोङ्दी पोर्चोमला एःक्योक मीःक्या याःमाछाक्का काःल्सी। 15इःनाङ मेःन्दा काःजेइ लाःसी, “दीखोइ नी हेन्डीइ क्याःल्बु बालजीबुलगीइ#११:१५ बालजीबुल बालजीबुल लाःक्योकदी शैतानगीइ राःङ्सा मीःन इःङे। ल्हेलाःम्ले हेन्डी तेङ्गुए।” 16काःजेइदी खुङला परीक्षा लेःङ्जे छोल्देरा लाःसी, “दीखो लेःगा कोन्ज्योइ ल्हेलाःम्ले पेःक्योक इःङे लाःना ङीःक्याला नाःम्खालीङलाःम्ले चुःन्डुल चीग तेङ्दो।” 17इःनाङ खुङक्याइ ताम छोर्ती येशुइ खुङक्याला लाःसी, “काःन्दीङ देश नाःङ्ला खुङक्या राःङ राःङरा ठुक्पा स्योर्सी लाःना ओःखो राःङ्रा सीःङ्दा चेती डोउए। राःङ नाङ्लारा ठुक्पा स्योर्केन खीममाङ सीःङ्दा चेती डोउए। 18ओःन्डुलेरा शैतानगीइ क्याःल्खापाङ खुङक्या राःङ राःङरा ठुक्पा स्योर्सी लाःना ओःखोइ क्याःल्खाप काःन्डुले तेःखुँरा? चीलेलाःना ख्याक्याइ ङाःला हेन्डीइ क्याःल्बु बालजीबुलगीइ ल्हेलाःम्ले ङाःइ हेन्डी तेङ्गुए लाःती लाःकुए। 19ङाःइ बालजीबुलगीइ ल्हेलाःम्ले हेन्डीक्या तेङ्गुए लाःना ख्याक्याइ योबाक्याइदी सुइ ल्हेलाःम्ले तेङ्गुबा ले? ख्याक्याइ राःङगीइ योबाक्याइ पेःक्योक लेःगाइरा ख्याक्याइ लाःक्योक तामक्या डीक्पु मीःङे लाःती तेङ्तेर्केन एः। 20इःनाङ ङाःइ कोन्ज्योइ ल्हेलाःम्ले हेन्डी तेङ्गुए लाःना कोन्ज्योइ क्याःल्खाप ख्याक्याइ कील्ला ओःङ्सीःङ्दी एः। 21टीः जेक्र्योक क्याःबा मीःइ खुङगीइ राःङगीइ खीम ह्रुङ्सी लाःना थाम्जेर क्युःक्या सुरक्षीत ओःङ्गुए। 22इःनाङ खुङ भन्दा क्याःबा मीः ओःङ्सी लाःना खुङला क्याःल्गुए ओःले खुङगीइ राःङ्साला क्याःल्जेला खुक्र्योक थाम्जेर टीःक्या फ्रोउए ओःले ओः क्याःल्गेन क्याःबा मीःइ थाम्जेर क्युःक्या फ्रोदी खेर्ती राःङगीइ रोःक्या ङीमु केःउए। 23काःखोदी ङाःइ लाःक्योक मीःङीन्बा, ओःखोदी ङाःइ टाःलाङ इःङे। ओःले काःखोइ ङाः ङीमु लेःगा मेःबेबा, ओःखोइ ङाःइ वीरुद्धला लेःगा पेःउए।
24काःन्दीङ मीःलाम्ले हेन्डी थेङ्मीःजीक ओः हेन्डी ङाःल सोदी तेःचेला काम्बु साक्या छोल्देरा डोउए ओःले काःलाङ मेःज्योर एः। ओःले ओःखोइ लाःकुए, ‘ङाः तोःङ्ला तेःक्योक मीः नाःङ्लारा लोःदी डोगे।’ 25ओःला लेप्कासुना ओःखोइ तोःङ्गीइ मीःला याःबुले फ्यादी ओःले छेदी ज्याक्योक खीम च्योःङ्रा फ्रेकुए। 26दीखो थोङ्दी ओःखोइ राःङ्सा तीःनथाल राःङ भन्दाङ माःङ्बु माःरीक्पा हेन्डीक्याला केक्याःप्ती ख्योङ्गुए ओःले ओः थाम्जेर हेन्डीक्या ओः मीः नाःङ्ला स्युःदी ओःला तेःकुए। ओःले ओः मीः तोःङ्ला भन्दा तीङ्ला ताःरुङ माःइबा ओःङ्गुए।”
तेःन्दामरा केःदाङ एःक्योक मीःक्या
27येशुइ ताम लाःसुना लाःसुनारा मीःक्याइ पोर्चोमलाःम्ले मेःन्दा चीग पेःन्पीःजाइ केताङ्दी लाःसी, “ख्याला केगेन्दी ओःले ओःमा थुङ्च्युगेन्दी आमाइ काःजे मोलाम ज्योर्ती एः।” 28दीखो कोःदी येशुइ लाःसी, “बरु काःखोइ कोन्ज्योइ ताम कोःउबा ओःले ङीःन्गुबा, ओःखोक्याइ का मोलाम ज्योर्ती एः।”
मीःक्याइ कोन्ज्योलाःम्ले याःमाछाककीइ चुःन्डुल लाङ्क्योक
(मत्ती १२:३८-४२)
29मीःक्याइ पोर्चोम छ्योम्बो काःल्देरा पेःसुना येशुइ लाःसी, “तीःङ्साङगीइ मीःक्या काःजे माःरीक्पा एः। खुङक्याइ याःमाछाककीइ चुःन्डुल ताजे छोल्गुए, इःनाङ कोन्ज्योइ लेःङ्गो तेर्केन्दी योनाला तेर्क्योक चुःन्डुल बाहेक दी मीःक्याइ राःङ्सा काःखोङ चुःन्डुल मेःज्योर्केन एः। 30चीलेलाःना काःन्डुले योना नीनवे क्याःसाइ मीःक्याइ लागी चुःन्डुल एःके, ओःन्डुलेरा ङाः मीःइ पुःङ तीःङ्साङगीइ मीःइ लागी चुःन्डुल इःङे। 31ठीम पेःगेन ङीःमाला शेबाइ क्याःल्मु लाःङ्दीमाराङ तीःङ्साङगीइ मीःक्याला माःताक्पा लाःकेन एः, चीलेलाःना सोलोमोन क्याःल्बुइ नावाइ ताम कोःजेला खुङ माःङ्बुरा थारीःङ्बुले ओःङ्दी एःके। इःनाङ कोःदो, सोलोमोन भन्दाङ छ्योम्बो मेःन्दा चीग दीला एः। 32ठीम पेःगेन ङीःमाला नीनवे क्याःसाइ मीःक्या लाःङ्दी तीःङ्साङगीइ मीःक्याला माःताक्पा च्याःङेन एः चीलेलाःना योनाइ कोन्ज्योइ ताम लाःकासुना खुङक्याइ राःङ राःङगीइ स्याबा पेःदी लाःयो पोःर्सी। ओःले तादो, योना भन्दाङ छ्योम्बो मेःन्दा चीग दीला एः।
मीःलीइ साङ्बु
(मत्ती ५:१५; ६:२२-२३)
33छेमी थेप्ती सुइयाङ पतीइ मीउपए ओःले इप्तीङ मेःज्याए। बरु नाःङ्ला ओःङेन मीःक्याला साङ्बु काःल्ज्युक लाःती थोम्बो साला ज्यातेर्कुए। 34ख्याक्याइ जुबुइ छेमीदी ख्याक्याइ मी इःङे। मी याःबु एः लाःना थाम्जेर जुबु साङ्बु ओःङ्गुए, इःनाङ ख्याक्याइ मी माःइबा एः लाःना ख्याक्याइ जुबुङ नाक्जुक ओःङ्गुए। 35ओः सोङ्गारा, च्यागाताःक्पु पेःदो, ख्याक्या ङीमु एःक्योक साङ्बु नाक्जुक माःकाल्ज्युक। 36ख्याक्याइ सेम साङ्बुइ काःङ्दी एः लाःना ओःले नाक्जुक म्याः लाःना छेमीइ साङ्बु तेर्क्योक च्योःङ्रा ख्याक्याइ सेम साङ्बु ओःङेन एः।”
फारीसीक्या ओःले छ्येइ ठीमगीइ लोबेनक्याला येशुइ माःताक्पा च्याःङ्क्योक
(मत्ती २३:१-३६; मर्कुस १२:३८-४०)
37येशुइ दीखो ताम लाःसीःङ्मीःजीक मेःन्दा चीग फारीसीइ खुङला खुङगीइ खीमला साःप्च्या साःजेला केक्याःप्सी। येशु ओः फारीसीइ खीमला काःल्सी ओःले साःप्च्या साःजेला तेःसी। 38इःनाङ येशुइ लाःक्पा माःठुबारा साःक्योक थोङ्दी ओः फारीसी याःमाछाक काःल्सी। 39ओःले प्रभुइ खुङला लाःसी, “ख्या फारीसीक्या तेःर्मा रा मेःन्ज्याइ फीछ्योले नी ताःर्ती चाङ्गुए, इःनाङ ख्याक्याइ नाःङ्लादी फाङ्क्योक ओःले माःरीक्पाइ काःङ्क्योक एः। 40ए आक्याक्पाक्या! ची फीइ जुबु जोगेन कोन्ज्योइ नाःङ्गीइ सेमाङ जोक्योक मीःङे ले? 41इःनाङ मेःन्ज्या ओःले तेःर्माला एःक्योक स्याःक्या प्राङ्नाला तेर ओःले ख्याक्याइ फी ओःले नाःङ थाम्जेर चाङ्मा ओःङेन एः।
42ख्या फारीसीक्याला काःन्डुबा तुःक्पु ओःङेन एः! पुदीना, आरुद ओःले राःङ्सा जडीबुटीक्याइ दशांसा तेर्कुए, इःनाङ ठीम पेःगेन ताम ओःले कोन्ज्योला च्याःम्बु पेःगेन तामलादी वास्तारा मेःबेए। ओः राःङ्सा तामक्याइ वास्ता ङीमु ङीमुरा ख्याक्याइ ठीम ओःले च्याःम्बु पेःगेन पेःदो।
43ख्या फारीसीक्याला काःन्डुबा तुःक्पु ओःङेन एः! चीलेलाःना ख्याक्या यहुदीक्याइ जोम्साखीमक्याला छ्योम्बो छ्योम्बो आसनला तेःचे छोल्गुए ओःले छोङ्साक्याला राःङ्साक्याइ फ्या छाल्क्योक सेम थेकुए। 44ख्याक्याला काःन्डुबा तुःक्पु ओःङेन एः! चीलेलाःना ख्याक्या नी मेःथोङेन तुःर्साक्या#११:४४ मेःथोङेन तुःर्साक्या ओः तीःनामलादी यहुदीक्याइ तुःर्साक्यालादी सुइयाङ मानेम्ज्युक लाःती चीन्ह ज्याउके, चीलेलाःना सुइयाङ ओः तुःर्साला नेम्सी लाःना खुङक्या असुद्ध डोउके। च्योःङ्रा एः। ओःन्डुबा मेःथोङेन तुःर्साखाले नी मीःक्या टेःम्बारा मासाल्बा डोउए।”
45मेःन्दा चीग छ्येइ ठीमगीइ लोबेनगीइ येशुला लाःसी, “लोबेन, एःन्डु लाःती नी ख्याइ ङीःक्याइदीङ ङोलाकाःङ्स्यार पेःदेरा एः।” 46येशुइ लेःन लोदी लाःसी, “ख्या छ्येइ ठीमगीइ लोबेनक्यालाङ काःन्डुबा तुःक्पु ओःङेन एः! चीलेलाःना ख्याक्याइ रीमठीमगीइ चेन्दी खुर्पु मीःक्याला काल्गुए, फीर्च्या ख्याक्या राःङदी थेबु चीगकीइयाङ ओः खुर्पु मेःदेए।
47ख्याक्याला काःन्डुबा तुःक्पु ओःङेन एः! चीलेलाःना ख्याक्याइ राःङगीइ फाफामुक्याइ सेक्योक कोन्ज्योइ लेःङ्गो तेर्केन्दी मीःक्याइ लागी याःबु याःबु तुःर्साक्या जोउए। 48एःन्डुले ख्याक्याइ राःङगीइ फाफामुक्याइ पेःक्योक लेःगा ख्याक्याइ थोङ्दी एः ओःले ङीःन्दी एः, चीलेलाःना खुङक्याइ सेक्योक कोन्ज्योइ लेःङ्गो तेर्केन्दी मीःक्याइ तुःर्सा ख्याक्याइ जोदी एः। 49ओः सोङ्गारा, कोन्ज्योइ नावाइयाङ तोःङमीःजीकरा लाःती एः, ‘ङाः खुङक्यासाःला ङाःइ लेःङ्गो तेर्केन्दी मीःक्या ओःले प्रेरीतक्या ताङ्तेर्के। फीर्च्या खुङक्याइ काःजेला सेकेन एः ओःले काःजेला तुःक्पु तेर्केन एः।’ 50ओः सोङ्गारा, जाम्बुलीङ जोसुना मीःजीक ताःसेथुप कोन्ज्योइ लेःङ्गो तेर्केन्दी मीःक्याला सेकेन्दीक्याइ ज्योर्कोःन दण्ड ताःसेइ मीःक्याइ ज्योर्केन एः। 51इःङे, ङाः ख्याक्याला लाःके, हाबीलला#११:५१ हाबील कोन्ज्योइ वचनला हाबीलदी थाम्जेर भन्दा तोःङ्ला सेक्योक मीः इःङे। सेमीःजीक मन्दीर ओःले वेदीइ कील्ला सेक्योक जकरीयाथुपकीइ#११:५१ जकरीया ओःले कोन्ज्योइ वचनला थाम्जेर भन्दा तीङ्ला सेक्योक मीःदी जकरीया इःङे। कोन्ज्योइ लेःङ्गो तेर्केन्दी मीःक्याइ ठाइ दण्ड ताःसेइ मीःक्याइ ज्योर्केन एः।
52ख्या छ्येइ ठीमगीइ लोबेनक्याला काःन्डुबा तुःक्पु ओःङेन एः! चीलेलाःना ख्याक्या ङीमु नावा ज्योर्केन दीमीक नी एः, इःनाङ ख्याक्या राःङाङ नाःङ्ला माःस्यु ओःले राःङ्साक्यालाङ स्युःजे मातेर।”
53येशु ओःलाःम्ले काःल्मीःजीक छ्येइ ठीमगीइ लोबेनक्याइ ओःले फारीसीक्याइ खुङला माःङ्बुरा टाः पेःगाला स्युःसी ओःले खुङ ङीमु माःङ्बुरा तामक्या टीःगाला स्युःसी। 54खुङगीइ लेःन लोगासुना काःलाङ चीङ गल्ती फ्रेके की लाःती खुङक्याइ खुङला जुम्ङेन लाःम पेःसी।
Currently Selected:
लुका 11: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
