प्रेरीत 8
8
1मीःक्याइ स्तीफनसला एःन्डुले तोः क्याःप्ती सेकासुना शाऊलगीइयाङ ङीःन्दी एःके।
शाऊलगीइ कोःम्साइ मीःक्याला तुःक्पु तेर्क्योक
ओः ङीःमामीःजीकरा यरुशलेमगीइ कोःम्साला छ्योम्बो तुःक्पु ओःङ्गाला स्युःसी। प्रेरीतक्या बाहेक प्रभु येशुला सेमल्हुक लुगेनक्या थाम्जेर छ्योङ्दी यहुदीया ओःले सामरीया क्षेत्रक्याला काःल्दी छुरफारला टाःम्सी। 2चीङ ताःक्पा मीःक्याइ स्तीफनसकीइ रोःला तुःर्साला कुम्तेर्सी ओःले खुङगीइ लागी माःङ्बुरा तुःङाल पेःसी।
3इःनाङ शाऊलगीइदी कोःम्साला सीःङ्दा चेचे छोल्देरा एःके। खुङ खीम खीमला स्युःदेरा प्रभुला सेमल्हुक लुगेन ख्य्वापीःजा ओःले पेःन्पीःजाक्याला टीःतेरा खेर्ती चेङाङला लुतेर्कुके।
सामरीया क्षेत्रला याःबु लेःङ्गो टाःम्क्योक
4टाःम्दी काःल्क्योक प्रभुला सेमल्हुक लुगेन मीःक्या थाम्जेरछ्योले काःल्दी प्रभुइ लेःङ्गो प्रचार पेःगाला स्युःसी। 5फीलीपदी सामरीयाइ क्याःसा चीगला काःल्सी ओःले ओःला थार्च्युगेन ख्रीष्टकीइ बारेला लेःङ्गो लाःसी। 6फीलीपकीइ ताम कोःसी ओःले खुङगीइ पेःक्योक याःमाछाककीइ लेःगाक्या थोङ्दी मीःइ पोर्चोमगीइ खुङगीइ तामला सेम तेर्ती कोःसी। 7माःङ्बुरा मीःक्यालाःम्ले हेन्डी चीरे तेङ्देरा थेङ्दी काःल्सी ओःले चा खोङ्क्योक माःङ्बुरा मीःक्या ओःले स्याःल्ठाकक्याङ टाःसी। 8एःन्डुले सामरीयाइ ओः क्याःसाला छ्योम्बो केःदाङ काःल्सी।
9ओः क्याःसाला सीमोन मीःन पेःक्योक मेःन्दा चीग मीः एःके। खुङगीइ तोःङमीःजीकरा ओः क्याःसाला जादु तेःङ्देरा ओःलाइ मीःक्याला याःमाछाक जोदी एःके ओःले राःङलारा ङाःरा इःम्बा चाउके। 10क्याःसाइ छ्योम्बो छ्यामे थाम्जेर मीःक्याइ एःन्डु लाःकुके, “दी मीः ङीमु कोन्ज्योइ छ्योम्बो ल्हे एः।” 11माःङ्बुरा तोःङमीःजीकरा मीःक्याला जादु तेङ्दी याःमाछाक जोक्योक सोङ्गारा थाम्जेरकीइ ओःखोला सेःसा पेःउके। 12इःनाङ फीलीपकीइ कोन्ज्योइ क्याःल्खापकीइ बारेला ओःले येशु ख्रीष्टकीइ बारेला याःबु लेःङ्गो लाःमीःजीक माःङ्बुरा मीःक्याइ फीलीपकीइ तामला सेमल्हुक लुसी, ओःले ख्य्वापीःजा रा पेःन्पीःजाक्या ङीक्कारकीइ बप्तीस्मा लेःङ्सी। 13सीमोनगीइयाङ सेमल्हुक लुसी ओःले बप्तीस्मा लेःङ्सी। ओः तीङ्ला खुङ तेन्दुरा फीलीप ङीमु ङीमुरा डोगाला स्युःसी ओःले फीलीपकीइ पेःक्योक याःमाछाककीइ लेःगाक्या ओःले चुःन्डुलक्या थोङ्दी खुङला याःमाछाक नेकुके।
14सामरीया क्याःसाइ मीःक्याइ कोन्ज्योइ वचन ज्योर्सी लाःक्योक कोःदी यरुशलेमला एःकेन प्रेरीतक्याइ पत्रुस ओःले युहन्नाला खुङक्यासाःला ताङ्सी। 15खुङक्या सामरीया क्याःसाला लेप्मीःजीक खुङक्याइ प्रभुला सेमल्हुक लुगेन मीःक्याइ चाङ्मा ला ज्योर्च्युक लाःती प्रार्थना पेःसी। 16चीलेलाःना ओः तीःजी थुप खुङक्या सुखालाङ चाङ्मा ला ओःङ्दी म्याःके। खुङक्याइ प्रभु येशुइ मीःनला बप्तीस्मा चीग्रा ज्योर्ती एःके। 17पत्रुस ओःले युहन्नाइ राःङगीइ लाःक्पा प्रभुला सेमल्हुक लुगेन ओः मीःक्याखाला ज्यासी ओःले खुङक्याइ चाङ्मा ला ज्योर्सी।
18प्रेरीतक्याइ खुङक्याखाला लाःक्पा ज्यातेर्सुना चाङ्मा ला ज्योर्क्योक सीमोनगीइ थोङ्सी। ओः सोङ्गारा, खुङगीइ प्रेरीतक्याला डेबा ख्योङ्दी तेर्चे छोल्देरा 19एःन्डु लाःसी, “मीःक्याखाला लाःक्पा ज्यासुना चाङ्मा ला ज्योर्केन ल्हे ङाःलाङ ना।” 20इःनाङ पत्रुसकीइ लाःसी, “ख्योइ डेबा ख्यो ङीमुरा ङ्याल्वाला लेप्च्युक चीलेलाःना ख्योइ कोन्ज्योइ वरदानलाङ डेबाइ ङ्योःजे खुउए लाःती ठीवा चेसी! 21दी लेःगाला ख्योइदी चीङ बो म्याः चीलेलाःना ख्योइ सेम कोन्ज्योइ तोःङ्ला डीक्पु मीःन्दु। 22ओः सोङ्गारा, ख्योइ सेमगीइ एःन्डुबा माःरीक्पा ठीवाक्याइ लागी स्याबा पेःदो ओःले ख्योइ सेमगीइ एःन्डुबा ठीवाला क्षमा पेःतेर लाःती प्रभुला प्रार्थना पेःदो। 23चीलेलाःना ख्योइ सेम मीसेर दु ओःले ख्योला माःरीक्पा ठीवाइ ताःम्दी ज्याक्योक ङाःइ थोङ्सी।” 24ओःले सीमोनगीइ पत्रुस ओःले युहन्नाला लाःसी, “ख्याक्याइ लाःक्योक दी थाम्जेर ताम ङाःखाला माःयोःङ्ज्युक लाःती ख्याक्याइरा प्रभुला प्रार्थना पेःतेर ना।”
25खुङक्याइ पाङ्बु ओःले प्रभुइ वचन लाःसीःङ्मीःजीक खुङक्या यरुशलेमला लोःसी। लोःदी ओःङ्गासुना लाःमला खुङक्याइ सामरीयाइ माःङ्बुरा युःलक्याला याःबु लेःङ्गो लाःतेरा ओःङ्सी।
फीलीप ओःले इथीयोपीयाइ मीः
26प्रभुइ मेःन्दा चीग स्वर्गदुतकीइ फीलीपला लाःसी, “लोःङ ओःले ल्होछ्योले काःल्दी यरुशलेमलाःम्ले गाजाछ्योले डोगेन लाःमगीइ उजाड ठाउँला सुङ।” 27ओः सोङ्गारा, फीलीप लाःङ्सी ओःले काःल्सी। ओःले इथीयोपीया देशकीइ क्याःल्मु कन्दाकीइ#८:२७ कन्दाकीइ इथीयोपीया देशकीइ क्याःल्मुलादी कन्दाकी लाःती केक्याःप्कुके। नोःर क्युःक्या तागेन मेःन्दा चीग नपुंसक ओः लाःम पेःदेरा डोदेरा एःके। खुङ यरुशलेमला काःल्दी कोन्ज्योला आराधना पेःदी लोःदेरा एःके, 28ओःले खुङ राःङगीइ रथला तेःती कोन्ज्योइ लेःङ्गो तेर्केन मीः यशैयाइ प्रुःक्योक छ्येइ पेज्या टोःदेरा एःके।
29चाङ्मा लाइ फीलीपला लाःसी, “ओः रथकीइ सुःरला सुङ ओःले ओःखोइ सुःरले ङीमु ङीमुरा सुङ।” 30फीलीप छ्योङ्दी ओः रथकीइ सुःरला लेप्सी ओःले ओः मीःइ कोन्ज्योइ लेःङ्गो तेर्केन मीः यशैयाइ प्रुःक्योक छ्येइ पेज्यालाःम्ले टोःदेरा पेःक्योक कोःसी। फीलीपकीइ खुङला टीःसी, “ख्याइ टोःदेरा पेःक्योक ओः तामक्या सेउबा?” 31ओः मीःइ लाःसी, “काःन्दीङ मीःइ लोप्मातेरथुप ङाःइ काःन्डुले सेगे ले?” ओःले खुङगीइ फीलीपलाङ खुङ ङीमुरा रथला जादी तेःचेला केक्याःप्सी। 32खुङगीइ टोःदेरा पेःक्योक छेइ ताम दीखो एःके,
“खुङ सेचेला खेर्क्योक लुःक च्योःङ्रा एःके,
पाःल तुप्कासुना खाजुम तेःकेन रीःउ च्योःङ्रारा
खुङगीइ खालाःम्ले चीङ ताम माःलाःप।
33खुङला एःजेथुप नेम्दी एःके,
खुङगीइ याःबुले ठीमाङ माःज्योर।
सुइ खुङगीइ छार्क्युफुर्क्युक्याइ बारेला लाःखुडो?
चीलेलाःना खुङगीइ मीःली जाम्बुलीङलाःम्ले खेर्सी।”#यशैया ५३:७-८
34ओः नपुंसककीइ फीलीपला टीःसी, “ङाःला लोःप ले, दी ताम कोन्ज्योइ लेःङ्गो तेर्केन मीःइ सुइ बारेला लाःक्योक इःङे? राःङगीइ बारेलारा की राःङ्साइ बारेला?” 35ओःले फीलीपकीइ छेइ ओः बोलाःम्लेरा छुदी खुङला येशुइ बारेला याःबु लेःङ्गो लाःसी।
36खुङक्या डोदेरा एःकासुना चीङ छ्यु एःक्योक ठाउँला लेप्सी, ओःले ओः नपुंसककीइ फीलीपला लाःसी, “दीला छ्यु दु! ताः ङाःला बप्तीस्मा लेःङ्जेला चीइ काडो ले?” 37[फीलीपकीइ लाःसी, “ख्याइ येशुला सेम मीःजीकरा सेमल्हुक लुउए लाःना ख्योइ बप्तीस्मा लेःङखुउए।” खुङगीइ लाःसी, “इःङे, येशु ख्रीष्ट कोन्ज्योइ पुः इःङे लाःती ङाः सेमल्हुक लुगे।”]#८:३७ काःजे ग्रीक तामगीइ तोःङ्गीइ छ्येइ पेज्याक्याला दीखो पद ३७ म्याः। 38खुङगीइ रथ रोक्तीच्युसी ओःले खुङक्या ङीक्कार पाःप्ती छ्यु नाःङ्ला काःल्सी ओःले फीलीपकीइ खुङला बप्तीस्मा तेर्सी। 39खुङक्या छ्युलाःम्ले पाङ्ला थेङ्मीःजीक प्रभुइ लाइ फीलीपला जुम्दी खेर्सी। ओःले ओः नपुंसककीइ फीलीपला फीर्च्या माःथोङ इःनाङ खुङ केःदाङ काःल्देरा राःङगीइ लाःम काःल्सी।
40फीलीपकीइ राःङला अश्दोद क्याःसाला ज्योर्सी। खुङ कैसरीया क्याःसाला मालेपथुप क्याःसा क्याःसाला याःबु लेःङ्गो लाःतेरा काःल्सी।
Currently Selected:
प्रेरीत 8: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
