प्रेरीत 7
7
स्तीफनसकीइ लेःङ्गो
1चोइ पुजाहारीइ स्तीफनसला टीःसी, “ची दी तामक्या तेःन्दामरा इःङे?”
2स्तीफनसकीइ लेःन लोदी लाःसी, “आतानोःक्या ओःले आबाक्या, ङाःइ लाःक्योक कोःदो! उःइ फाफामु अब्राहाम हारानला डोजेतोःङ्ला मेसोपोटामीया लाःकेन देशला तेःकुके। खुङ ओःला एःकासुनारा खुङला महीमाइ कोन्ज्योइ खुङला दर्शन तेर्सी। 3कोन्ज्योइ अब्राहामला लाःसी, ‘राःङगीइ देश ओःले छ्योरीक्याला पोःर्तो ओःले ङाःइ काःखो देशला तेङ्बा ओःलारा सुङ।’#उत्पत्ती १२:१ 4ओः सोङ्गारा, अब्राहाम राःङगीइ देशले थेङ्दी हारानला काःल्दी तेःसी। खुङगीइ आबा सीमीःजीक कोन्ज्योइ अब्राहामला ताःसे ख्याक्या तेःक्योक दीखो देशला ख्योङ्सी। 5कोन्ज्योइ अब्राहामला दी देशला राःङगीइ काङ्बा ज्यागेन चे सीःङ नी मातेर। इःनाङ कोन्ज्योइ दी देश खुङ ओःले खुङगीइ छार्क्युफुर्क्युक्याला तेर्के लाःती ताःम्ज्या पेःसी। दी ताःम्ज्या पेःगासुना अब्राहामगीइदी पुःपोःमोक्यारा म्याःके। 6कोन्ज्योइ अब्राहामला ताःरुङ लाःसी, ‘ख्योइ छार्क्युफुर्क्युक्या वीदेशला काःल्दी तेःकेन एः। ओःलाइ मीःक्याइ खुङक्याला लाबु जोगेन एः ओःले लोः क्याःसीःथुप माःङ्बुरा तुःक्पु तेर्केन एः। 7इःनाङ खुङक्याला लाबु जोगेन मीःक्याला ङाः दण्ड तेर्के। ओःले ओः तीङ्ला ख्योइ छार्क्युफुर्क्युक्या ओः देशलाःम्ले थेङ्दी ओःङेन एः ओःले दीला ओःङ्दी ङाःला आराधना पेःगेन एः।’#उत्पत्ती १५:१३-१४; प्रस्थान ३:१२
8ओःले कोन्ज्योइ अब्राहामला ताःम्ज्या टेःम्बा साल्जेला खतना पेःगेन आज्ञा तेर्सी। ओःले अब्राहाम इसहाककीइ आबा काःल्सी ओःले इसहाक केमीःजीक ङीःमा तीःन तीङ्ला खुङला खतना पेःसी। ओःन्डुलेरा इसहाककीइ राःङगीइ पुः याकुबला ओःले याकुबकीइ राःङगीइ चीङ्ङीरा पुःक्यालाङ खतना पेःसी। ओः मेःन्दा चीङ्ङीरा उःइ चीङ्ङी कुलक्याइ फाफामुक्या इःङे।
9याकुबकीइ पुः योसेफलादी राःङगीइ आतानोःक्याइ मीसेर पेःउके। ओः सोङ्गारा, खुङक्याइ योसेफला लाबु जोजेला मीश्र देशकीइ मीःक्याला चोङ्तेर्सी। इःनाङ कोन्ज्यो खुङ ङीमु एःके 10ओःले कोन्ज्योइ खुङला थाम्जेर तुःक्पुलाःम्ले थार्च्युसी। मीश्र देशकीइ क्याःल्बु फारोइ सेम क्याःल्च्युजेला कोन्ज्योइ योसेफला नावा साल्बु जोसी। ओःले क्याःल्बुइ खुङला थाम्जेर मीश्र देश ओःले खुङगीइ खीमगीइ हाकीम जोसी।
11ओः तीङ्ला मीश्र देश ओःले कनान देश काःङ्रा मुःगी क्याःप्सी। ओःखोइ पेःगासुना छ्योम्बो तुःक्पु काःल्सी ओःले उःइ फाफामुक्याइ साःजेला डुक्या चीङ माःज्योर। 12मीश्र देशला डु एः लाःक्योक कोःदी याकुबकीइ राःङगीइ पुःक्याला तोःङ्गीइ खेप खुङक्याला ओःला ताङ्सी। 13खुङक्या तीङ्गीइ खेप डोगासुनादी योसेफकीइ खुङला राःङगीइ आतानोःक्या ङीमु ङोःसेच्युसी ओःले क्याःल्बु फारोइयाङ योसेफकीइ फेबेक्याइ बारेला छोर्सी। 14ओःले योसेफकीइ राःङगीइ आबा याकुबला थाम्जेर फेबेक्या ख्योङ्दी स्यो लाःती लेःङ्गो ताङ्सी। ओःला थाम्जेर मेःन्दा खाल सुम रा चेङा एःके। 15ओःले याकुब मीश्र देशला काःल्सी ओःले ओःलारा सीसी, ओःले उःइ फाफामुक्याङ ओःलारा सीसी। 16खुङक्याइ फुम्बुक्यादी लोदी ख्योङ्दी शकेम लाःकेन ठाउँला एःक्योक तुःर्साला तीःप्सी। ओः तुःर्सादी अब्राहामगीइ हमोरकीइ फेबेक्या ङीमु ङ्योःज्यादी एःके।
17कोन्ज्योइ अब्राहाम ङीमु पेःक्योक ताःम्ज्या पुरा डोगेन तीःजी काःल्सीःङ्दी एःके। ओः तेःकासु उःइ इस्राएली मीःक्या मीश्र देशला बढ्तीदी माःङ्बुरा काःल्सीःङ्दी एःके। 18ओः तीङ्ला योसेफकीइ बारेला ङोःमेसेगेन मेःन्दा चीग सेम्बा क्याःल्बुइ मीश्र देशला क्याःल्खाप पेःगाला स्युःसी। 19खुङगीइ उःइ फाफामुक्याला स्योप क्युःर्काला स्युःसी ओःले खुङक्याला अत्याचार पेःसी। खुङगीइ खुङक्याइ पीःजाक्या सीज्युक लाःती केलुङम्याःपा खीमलाःम्ले पाङ्ला ग्याक पेःदी ज्याच्युउके।
20ओः तीःजीलारा मोशा केसी ओःले खुङ कोन्ज्योइ तोःङ्ला काःजे याःबु पीःजा एःके। खुङगीइ आबा आमाइ खुङला दावा सुमथुप खीमलारा सोसी। 21ओःले खुङला खीमलाःम्ले फीला ज्यामीःजीक फारोइ पोःमोइ खुङला खेर्ती काःल्सी ओःले राःङगीइ पुः च्योःङ्रारा पेःदी सोसी। 22मोशाला मीश्रीक्याइ थाम्जेर नावाक्याइ बारेला लोप्सी ओःले खुङ ताम लाःचेला ओःले लेःगा पेःजेला माःङ्बुरा शक्तीशाली काःल्सी।
23मोशा लोः खाल ङी लेप्मीःजीक खुङ राःङगीइ इस्राएलगीइ मीःक्याला काःल्दी तागेन सेम पेःसी। 24ङीःमा चीग खुङगीइ मेःन्दा चीग मीश्रीइ मेःन्दा चीग इस्राएलीला रोप्तेरा पेःक्योक थोङ्सी। ओः सोङ्गारा, खुङगीइ ओः इस्राएलीला थार्च्युसी ओःले ओः मीश्रीला सेती बदला लेःङ्सी। 25कोन्ज्योइ इस्राएलीक्याला मोशालाःम्लेरा थार्च्युगेन एः लाःती इस्राएलीक्याइ सेज्युक लाःती मोशाइ ठीवा चेती एःके। इःनाङ खुङक्याइ दी ताम मासे।
26ङार्तो च्योःङ्रा खुङगीइ मेःन्दा ङी इस्राएलीक्यारा रोप्लुङ चादेरा पेःक्योक थोङ्सी। खुङक्याला डीक्च्युजे छोल्देरा खुङगीइ एःन्डु लाःसी, ‘ए मीःक्या, ख्योक्या आतानोः एःनाङ चीले एःन्डुले रोप्लुङ चाक्योक?’ 27इःनाङ रोप्तेरा पेःगेन्दीइ मोशाला फुल्तेर्सी ओःले लाःसी, ‘ख्योला सुइ ङीःखाला शासक ओःले ठीम पेःगेन्दी जोदी ताङ्बा? 28दाङ ओः मीश्रीला सेक्योक च्योःङ्रारा ङाःलाङ सेचे छोल्क्योक?’#प्रस्थान २:१४ 29एःन्डुबा ताम कोःमीःजीक मोशा मीश्र देशलाःम्ले छ्योङ्सी ओःले मीद्यान लाःकेन देशला काःल्दी तेःकाला स्युःसी। ओःला खुङगीइदी मेःन्दा ङी पुःक्या काःल्सी।
30लोः खाल ङी तीङ्ला सीनै काःङगीइ सुःरला उजाड ठाउँला बार्ती तेःक्योक पुःङ्माइ मेःला मेःन्दा चीग स्वर्गदुत मोशासाःला थोङ्सी। 31दीखो थोङ्दी मोशा याःमाछाक काःल्सी ओःले याःबुले ताजेला पुःङ्माइ सुःरला डोगासुना प्रभुइ एःन्डु लाःक्योक के कोःसी, 32‘ङाः ख्योइ फाफामु अब्राहाम, इसहाक ओःले याकुबकीइ कोन्ज्यो इःङे।’#प्रस्थान ३:६ दीखो कोःदी मोशा जीबाइ दार्काला स्युःसी ओःले खुङगीइ ताजेला आ क्याःप्चे माःखु। 33प्रभुइ मोशाला लाःसी, ‘ख्योइ लेखाम पीतो चीलेलाःना ख्यो लाःङ्क्योक सा चाङ्मा इःङे। 34मीश्र देशला एःक्योक ङाःइ मीःक्याइ माःङ्बुरा तुःक्पु खुर्क्योक ङाःइ थोङ्दी एः। खुङक्या तुःक्पुइ ङुःक्योक ङाःइ कोःदी एः ओःले खुङक्याला थार्च्युजेला ङाः पाःप्ती ओःङ्क्योक इःङे। ताः सुङ, ङाः ख्योला मीश्र देशला ताङ्तेर्के।’#प्रस्थान ३:५-१०
35मोशा दीखोरा इःङे, खुङला राःङगीइ क्युःपाइ मीःक्याइरा ‘सुइ ख्योला ङीःखाला शासक ओःले ठीम पेःगेन्दी जोबा?’ लाःती इन्कार पेःदी एःके। बार्ती तेःक्योक पुःङ्माला खुङसाःला थोङ्क्योक स्वर्गदुतलाःम्ले कोन्ज्योइ खुङला शासक ओःले थार्च्युगेन्दी जोदी ताङ्सी। 36खुङगीइरा इस्राएलीक्याला मीश्र देशलाःम्ले पाङ्ला तेङ्सी, ओःले मीश्र देसला, माःर्मु चाङ्बुला ओःले उजाड ठाउँक्याला खुङगीइ लोः खाल ङीथुप याःमाछाककीइ लेःगाक्या ओःले चुःन्डुलक्या तेङ्सी। 37ओःखोरा मोशाइ इस्राएलीक्याला एःन्डु लाःती एःके, ‘कोन्ज्योइ ख्योक्याइ लागी ख्योक्या राःङगीइ मीःक्याइ कीललाःम्लेरा ङाः च्योःङ्रा मेःन्दा चीग खुङगीइ लेःङ्गो तेर्केन्दी ताङ्तेर्केन एः।’#व्यवस्था १८:१५ 38इस्राएलीक्या उजाड ठाउँला जोम्गासुना मोशा खुङक्या ङीमु एःके, स्वर्गदुतकीइ खुङ ङीमु सीनै काःङ्ला ताम लाःकुके ओःले खुङगीइरा स्वर्गदुतलाःम्ले कोन्ज्योइ सोम्बो लेःङ्गो उःक्याला तेर्चे ज्योर्सी।
39इःनाङ उःइ फाफामुक्याइ खुङगीइ तामला कोःजेङ माःको ओःले माःङीनाङ। मोशाला पोःर्ती खुङक्या मीश्र देशलारा लोःगेन सेम पेःसी। 40खुङक्याइ हारुनला एःन्डुले लाःसी, ‘ताः ङीःला तोःङ क्याःप्चेला ङीःइ लागी चीङ ल्हाक्या जोना। ङीःला मीश्र देशलाःम्ले खाफ्यादी ख्योङेन दीखो मोशाला ची काःल्बा ङीःइ छोर्ती म्याः।’#प्रस्थान ३२:१
41ओः तीङ्ला खुङक्याइ लाङ्डुककीइ कु चीग जोसी ओःले ओःखोला बली तेर्सी। राःङगीइ लाःक्पाइ जोक्योक कुला केःदाङ काःल्दी डेन साःसी। 42ओः सोङ्गारा, कोन्ज्यो खुङक्यालाःम्ले लोःसी ओःले खुङक्याला नाम्सार्गाइ आमा ङीःमाला, दागार्मुला ओःले कार्माक्याला आराधना पेःज्युक लाःती पोःर्तेर्सी। ओःखोइ बारेला कोन्ज्योइ लेःङ्गो तेर्केन मीःक्याइ खुङक्याइ पेज्याला एःन्डुले प्रुःदी एः,
‘ए इस्राएलगीइ मीःक्या, ची ङाःइ लागी ख्योक्याइ लोः खाल ङीथुप उजाड ठाउँला बलीक्या तेर्पा?
43ख्योक्याइ मोलेख लाःकेन ल्हाइ पाल खुर्ती ख्योङ्सी
ओःले रेफेन लाःकेन कार्मा ल्हाइ कु खुर्ती ख्योङ्सी।
ओःक्या ख्योक्याइरा जोक्योक कुक्या एःके।
ओः सोङ्गारा, ङाः ख्योक्याला दण्ड तेर्चेला बेबीलोन भन्दाङ फार्ला ताङ्तेर्के।’#आमोस ५:२५-२७
44उजाड ठाउँला उःइ फाफामुक्या ङीमु कोन्ज्यो तेःकेन चाङ्मा पाल एःके। मोशाइ ओः चाङ्मा पालदी कोन्ज्योइ खुङला जोदो लाःती तेङ्क्योक च्योःङ्रारा जोदी एःके। 45कोन्ज्योइ दी देशला तेःकेन राःङ्सा क्युःपाइ मीःक्याला त्याःसी ओःले यहोशुइ दी देशला क्याःल्दी ख्योङ्गासुना खुङक्याइ ओः चाङ्मा पाल दी देशला ख्योङ्सी। ओः तीङ्ला ओः पाल क्याःल्बु दाऊदकीइ पालोथुप खुङक्या ङीमुरा एःके। 46क्याःल्बु दाऊद ङीमु कोन्ज्यो केःदाङ काःल्दी एःके ओःले खुङगीइ याकुबकीइ कोन्ज्योइ#७:४६ याकुबकीइ कोन्ज्योइ यहुदीक्याइ खुङक्याइ कोन्ज्योला नाःम नाःम याकुबकीइ कोन्ज्यो लाःतीङ केक्याःप्कुके। याकुबदी खुङक्याइ फाफामु एःके, तीङ्ला खुङलादी इस्राएल लाःती मीःन ज्यासी। लागी तेःकेन ठाउँ चीग जोजेला कोन्ज्योला वासी पेःसी। 47इःनाङ क्याःल्बु सोलोमनगीइ कोन्ज्योइ लागी खीम चीग जोतेर्सी।
48इःनाङ थाम्जेर भन्दा छ्योम्बो कोन्ज्यो नी मीःक्याइ जोक्योक खीमक्याला मेःतेए। कोन्ज्योइ लेःङ्गो तेर्केन मीःइयाङ ओःन्डुरा लाःती एः–
49प्रभुइ लाःसी, ‘नाःम्खालीङ ङाःइ छेसा इःङे,
ओःले जाम्बुलीङ ङाःइ काङ्बा चुसा इःङे।
ख्योक्याइ ङाःइ लागी काःन्डुबा खीम जोगेन्दी?
ङाःला ङाःल सोजेला ठाउँ काःला एःपा?
50ची दी थाम्जेर क्युःक्या ङाःइरा जोक्योक मीःङे ले?’#यशैया ६६:१-२
51ख्याक्याइ सेम राःङ्सा क्युःपाइ मीःक्याइ च्योःङ्रारा ताःम्बु काःल्दी एः ओःले ख्याक्या कोन्ज्योइ लेःङ्गो कोःजे सेम मेःथेए। ख्याक्याइ फाफामुक्याइ च्योःङ्रारा ख्याक्याइयाङ चाङ्मा लाला इन्कार पेःसी। 52ची ख्याक्याइ फाफामुक्याइ सताइमातीक्योक काःन्दीङ कोन्ज्योइ लेःङ्गो तेर्केन्दी मीः एःके ले? कोन्ज्योइ ताःक्पा लाबु ओःङ्देरा एः लाःती लेःङ्गो लाःकेन खुङगीइ मीःक्यालाङ खुङक्याइ सेसी। ओःले ताः ख्याक्याइदी ओः ओःङ्क्योक ताःक्पा लाबुला तुःक तेर्सी ओःले खुङला सेसी। 53ख्याक्याइ स्वर्गदुतक्यालाःम्ले कोन्ज्योइ ठीमक्या नी ज्योर्सी इःनाङ ओः ठीमक्या ख्याक्याइ माःङीन।”
स्तीफनसला तोःइ क्याःप्ती सेक्योक
54स्तीफनसकीइ ताम कोःदी महासभाला एःक्योक मीःक्या सीःताङगीइ मार्थुम खील्सी ओःले सीःताङगीइ सो मुःर्काला स्युःसी। 55इःनाङ स्तीफनस चाङ्मा लाइ काःङ्दी नाःम्खालीङछ्योले तासी। खुङगीइ कोन्ज्योइ महीमा थोङ्सी ओःले येशुला कोन्ज्योइ च्याःबुछ्योले लाःङ्दी तेःक्योक थोङ्सी। 56ओःले खुङगीइ लाःसी, “तादो, ङाःइ नाःम्खालीङ फ्याक्योक ओःले मीःइ पुःला कोन्ज्योइ च्याःबुछ्योले लाःङ्दी तेःक्योक थोङ्देरा एः।” 57इःनाङ महासभाइ मीःक्याइ केताङ्देरा राःङ राःङगीइ नाम्ज्यो लाःक्पाइ कासी ओःले थाम्जेर खुङखाला खेप चीगलारा थाप टाःप्सी। 58खुङक्याइ स्तीफनसला क्याःसालाःम्ले टीःतेरा फीला तेङ्सी ओःले खुङला तोः क्याःप्सी। पाङ्बुक्याइ राःङ राःङगीइ फोँस्योकक्या पीती शाऊल लाःकेन स्याराला जुम्जे तेर्सी। 59खुङक्याइ स्तीफनसला तोः क्याःप्तेरा पेःगासुना खुङगीइ प्रभुला प्रार्थना पेःदेरा लाःसी, “ए प्रभु येशु, ङाःइ ला लेःङ्दो।” 60ओः तीङ्ला खुङगीइ पीमु चुदी छ्योम्बो के तेङ्दी लाःसी, “ए प्रभु, दी लाःयो खुङक्याला माःक्याःप्च्युक!” एःजे लाःतीङ खुङ सीसी।
Currently Selected:
प्रेरीत 7: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
