प्रेरीत 6
6
रोः पेःगेन मेःन्दा तीःन
1ओः ङीःमाक्याला प्रभु येशुला सेमल्हुक लुगेन मीःक्या पाःदेरा डोगासुना, ग्रीक ताम लाःकेन्दी ओःले हीब्रु ताम लाःकेन यहुदीक्याइ कील्ला ठुक्पा काःल्सी। ङीःमारी टाःङ्मा साःगेन स्याः केःगासुना खुङक्याइ मोःराङ्मुक्याला वास्ता माःबे लाःती ग्रीक ताम लाःकेन यहुदीक्याइ टाः पेःदी एःके। 2ओः सोङ्गारा, चीङ्ङीरा प्रेरीतक्याइ प्रभुला सेमल्हुक लुगेन थाम्जेरला केक्याःप्ती लाःसी, “कोन्ज्योइ वचनला पोःर्ती मीःक्याला साःच्युगेन्दी थुङ्च्युङेन्दी लेःगाला जोल्दी तेःचे उःइ लागी डीक्पु म्याः। 3ओः सोङ्गारा, ङाःइ आतानोःक्या, ख्याक्या नाःङ्ले चाङ्मा लाइ काःङ्क्योक ओःले नावा साल्बु एःक्योक मेःन्दा तीःन ख्य्वापीःजाक्या दाम्दो। ओःले ङीः दीखो लेःगा खुङक्याला तेर्के। 4इःनाङ ङीःक्यादी ङीःइ थाम्जेर तीःजीला प्रार्थना ओःले प्रचार पेःगेन लेःगाला सीःङे।”
5प्रेरीतक्याइ पेःक्योक टेः थाम्जेरला सेम थेसी, ओः सोङ्गारा, खुङक्याइ सेमल्हुक एःक्योक ओःले चाङ्मा लाइ काःङ्क्योक स्तीफनसला दाम्सी ओःले राःङ्साक्यादी फीलीप, प्रखरस, नीकनोर, तीमोन, पर्मीनास ओःले यहुदी धर्म लेःङ्क्योक एन्टीओखीया क्याःसाइ नीकोलाउसलाङ दाम्सी। 6खुङक्याइ दाम्क्योक ओः मेःन्दा तीःन मीःक्याला प्रेरीतक्याइ तोःङ्ला ख्योङ्सी ओःले प्रेरीतक्याइ खुङक्याला प्रार्थना पेःतेर्सी ओःले खुङक्याखाला लाःक्पा ज्यासी।
7एःन्डुले कोन्ज्योइ लेःङ्गो टाःम्देरा काःल्सी। प्रभु येशुइ योबाक्या यरुशलेमला माःङ्बुरा छार्तेरा काःल्सी ओःले माःङ्बुरा पुजाहारीक्याइ प्रभु येशुला सेमल्हुक लुसी।
स्तीफनसला जुम्क्योक
8स्तीफनसकीइदी कोन्ज्योलाःम्ले माःङ्बुरा मोलाम ओःले ल्हे ज्योर्ती एःके। खुङगीइ मीःक्याइ कील्ला याःमाछाककीइ लेःगाक्या पेःदेरा चुःन्डुलक्या तेङ्गुके। 9इःनाङ यहुदीक्याइ जोम्साखीमगीइ स्वतन्त्र लाःकेन दलगीइ मीःक्याइ खुङला टाः पेःउके। खुङक्यादी कुरेनी ओःले अलेक्जेन्ड्री क्याःसाक्या ओःले कीलीकीया रा एशीयाइ इलाकाक्याइ यहुदीक्या एःके। खुङक्या थाम्जेर डीक्ती स्तीफनस ङीमु टाःटे पेःगाला स्युःसी। 10इःनाङ चाङ्मा लाइ स्तीफनसला एःन्डुबा नावा तेर्सी खुङगीइ ताम लाःमीःजीक राःङ्साक्याइ खुङला टाःटेरा पेःमाःखु। 11ओः सोङ्गारा, खुङक्याइ चीङ मीःक्याला वाःम्दी एःन्डु लाःच्युसी, “ङीःइ दी मीःइ मोशा ओःले कोन्ज्योइ वीरुद्धला माःरीक्पा ताम लाःक्योक कोःदी एः।” 12एःन्डुले खुङक्याइ मीःक्याला, छेस्योक्याला ओःले छ्येइ ठीमगीइ लोबेनक्यालाङ क्यासी। खुङक्याइ स्तीफनसला जुम्सी ओःले महासभाइ तोःङ्ला ख्योङ्सी। 13ओः तीङ्ला खुङक्याइ स्तीफनसकीइ बारेला स्योप क्युःर्चेला चीङ मीःक्याला ख्योङ्सी। ओः मीःक्याइ लाःसी, “दीखो मीःइ नी नाःमाङ उःइ चाङ्मा कोन्ज्योइ मन्दीर ओःले मोशाइ तेर्क्योक ठीमगीइ वीरुद्धला ताम लाःकुए। 14दीखो मीःइ नासरतकीइ येशुइ दीखो कोन्ज्योइ मन्दीर रोम्ङेन एः ओःले मोशाइ उःक्याला तेर्क्योक रीमठीमक्याङ चेःतेर्केन एः लाःक्योक ङीःइ कोःसी।” 15ओः तेःकासु महासभाला तेःक्योकक्या थाम्जेरकीइ स्तीफनसला तादीरा तेःसी। खुङगीइ छेन्दादी स्वर्गदुतकीइ छेन्दा च्योःङ्रा थोङ्गुके।
Currently Selected:
प्रेरीत 6: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
