प्रेरीत 9
9
शाऊल प्रभुला सेमल्हुक लुगेन्दी काःल्क्योक
(प्रेरीत २२:६-१६; २६:१२-१८)
1ओः तीःजी थुपाङ शाऊलगीइ प्रभु येशुइ योबाक्याला सेकेन ङाःङ्रे तेर्तेरा एःके। खुङ चोइ पुजाहारीसाःला काःल्सी 2ओःले प्रभुइ लाःमला सेमल्हुक लुगेन सुङ ख्य्वापीःजाक्या ओःले पेःन्पीःजाक्या फ्रेसी लाःना ताःम्दी यरुशलेमला ख्योङ्जे ज्योर्का लाःती दमस्कस क्याःसाइ जोम्साखीमक्याइ छेस्योक्याइ लागी इःगीक्या प्रुःजे लाङ्सी।
3शाऊल दमस्कस क्याःसाइ सुःरला लेप्कासुना, खेप चीगलारा नाम्सार्गालाःम्ले ज्योती चीग खुङगीइ छुरफार चम्कीइतीसी। 4खुङ साला रीःल्सी ओःले खुङगीइ एःन्डु लाःक्योक के कोःसी, “शाऊल! ए शाऊल! ख्योइ चीले ङाःला सताइतीउबा?”
5खुङगीइ टीःसी, “ए प्रभु, ख्या सु इःङे?” ओः केइ लाःसी, “ख्योइ सताइतीदेरा पेःक्योक ङाः येशु इःङे। 6इःनाङ ताः लाःङ्दी क्याःसाला सुङ ओःले ख्योइ पेःकोःन लेःगा ओःलारा लाःकेन एः।”
7खुङ ङीमु डोगेन मीःक्या तामरा लाःमाःखुबा लाःङ्दी तेःती एःके। खुङक्याइ ओः के नी कोःसी इःनाङ सुलाङ माःथोङ। 8शाऊल सालाःम्ले लाःङ्सी ओःले मी तागासुना खुङगीइ चीङ माःथोङ। ओः सोङ्गारा, खुङक्याइ शाऊलगीइ लाःक्पाला जुम्दी दमस्कसथुप ख्योङ्सी। 9ङीःमा सुमथुप खुङगीइ मी माःथोङ, साःप्च्याङ माःसा ओःले थुङाङ माःथुङ।
10दमस्कसला हननीया लाःकेन मेःन्दा चीग प्रभुइ योबा एःके। खुङला प्रभुइ दर्शन चीग तेर्ती लाःसी, “ए हननीया!” खुङगीइ लाःसी, “हजुर प्रभु?”
11प्रभुइ खुङला लाःसी, “लोःङ ओःले थेका लाःमला सुङ ओःले ओःला यहुदाइ खीमला टार्सस क्याःसाइ शाऊल लाःकेन मीः एःपा लाःती टीःदो, खुङ ओःला प्रार्थना पेःदेरा एः। 12खुङगीइ राःङगीइ मी थोङ्ज्युक लाःती हननीया लाःकेन मीः ओःङ्दी राःङखाला लाःक्पा ज्यादेरा पेःक्योक दर्शन थोङ्दी एः।”
13हननीयाइ लेःन लोदी लाःसी, “प्रभु, ओः मीःइ यरुशलेमला एःक्योक ख्याइ मीःक्याला माःङ्बुरा सताइतीक्योक ताम ङाःइ माःङ्बुरा मीःक्यालाःम्ले कोःदी एः। 14ओःले ख्याइ मीःन लेःङेनक्या थाम्जेरला जुम्ङेन आङ्ज्या खुङगीइ छेस्यो पुजाहारीक्यालाःम्ले ज्योर्ती दीला ओःङ्दी एः।”
15इःनाङ प्रभुइ लाःसी, “ख्यो सुङ, चीलेलाःना ङाःइ खुङला राःङ्सा क्युःपाक्या, क्याःल्बुक्या ओःले इस्राएलगीइ मीःक्याइ कील्ला ङाःइ मीःन फेल्जेला दाम्दी एः। 16ओःले ओःखोइ ङाःइ लागी काःजे तुःक्पु खुर्कोःन एःपा ओःखो ङाः खोला तेङ्तेर्के।”
17प्रभुइ लाःक्योक कोःदी हननीया काःल्दी ओः खीमला स्युःसी ओःले खुङखाला लाःक्पा ज्यादी लाःसी, “ए शाऊल नोः, ख्यो दीला ओःङ्गासुना लाःमला ख्योसाःला थोङ्क्योक प्रभु येशुइ ङाःला ताङ्क्योक इःङे। ख्योइ फीर्च्या थोङ्खुज्युक ओःले चाङ्मा लाइ काःङ्ज्युक लाःती खुङगीइ ङाःला दीला ताङ्क्योक इःङे।”
18ओः तेःकासुरा शाऊलगीइ मीलाःम्ले ङ्याःइ पाप्रा च्योःङ्रा ताःप्सी ओःले खुङ फीर्च्या थोङ्खुगेन्दी काःल्सी। खुङ लाःङ्सी ओःले बप्तीस्मा लेःङ्सी, 19ओःले साःप्च्या साःमीःजीक खुङला फीर्च्या ल्हे ओःङ्सी।
शाऊलगीइ दमस्कसला लेःङ्गो टाःम्क्योक
चीङ ङीःमाथुप शाऊल दमस्कसला प्रभु येशुइ योबाक्या ङीमुरा तेःसी। 20ओःले खेप चीगलारा खुङ जोम्साखीमक्याला स्युःदी येशुरा कोन्ज्योइ पुः इःङे लाःती प्रचार पेःगाला स्युःसी। 21खुङगीइ ताम कोःगेनक्या थाम्जेर याःमाछाक्का काःल्देरा लाःसी, “ची यरुशलेमला येशुइ मीःन लेःङेन मीःक्याला सीःङ्दाक थाजे छोल्गेन मीः दीखोरा मीःङे? दीलाङ खुङ येशुइ योबाक्याला जुम्दी छेस्यो पुजाहारीक्यालासाःला खेर्चेला ओःङ्क्योक मीःङे ले?” 22इःनाङ शाऊलगीइ प्रचार ताःरुङ शक्तीशाली काःल्देरा काःल्सी ओःले येशुरा थार्च्युगेन ख्रीष्ट इःङे लाःती दास्यी तेर्क्योक सोङ्गारा दमस्कसला एःक्योक यहुदीक्याइ चीङ लेःनरा लोमाःखु।
23माःङ्बुरा ङीःमा काःल्मीःजीक यहुदीक्या जोम्दी शाऊलला सेकेन टेः पेःसी। 24इःनाङ राःङला सेचे छोल्क्योक ताम शाऊलगीइ छोर्सी। यहुदीक्या खुङला सेचेला कुःङ्मु ङीःमाला दमस्कसकीइ कोःक्याला ज्याःप्ती तेःकुके। 25इःनाङ कुःङ्मु चीग खुङगीइ योबाक्याइ खुङला चेल्बाला लुसी ओःले क्याःसाइ चीःक्पालाःम्ले माःर्ला पाप्तेर्सी।
शाऊल यरुशलेमला लोःक्योक
26शाऊल यरुशलेमला लोःमीःजीक खुङ प्रभु येशुइ योबाक्या ङीमु डीक्चे छोल्सी। इःनाङ थाम्जेर योबाक्या खुङ ङीमु जीसी चीलेलाःना खुङ तेःन्दामरा प्रभुइ योबा इःङे लाःती खुङक्याइ सेमल्हुकरा लुखुदी म्याःके। 27इःनाङ बरनाबासकीइ शाऊलला राःङ ङीमुरा खेर्ती प्रेरीतक्यासाःला खेर्सी। शाऊलगीइ लाःमला प्रभुला थोङ्क्योक ओःले प्रभुइ खुङ ङीमु ताम लाःक्योक ओःले ओः तीङ्ला खुङगीइ दमस्कसला जीबारा माःबेबा येशुइ मीःनला टाःम्क्योक थाम्जेर ताम बरनाबासकीइ खुङक्याला लाःसी। 28ओः सोङ्गारा, शाऊल खुङक्या ङीमुरा तेःसी ओःले यरुशलेम काःङ्रा जीबारा माःबेबा प्रभुइ मीःनला प्रचार पेःदेरा काःल्सी। 29खुङगीइ ग्रीक ताम लाःकेन यहुदीक्या ङीमुङ टाःटे पेःसी, इःनाङ खुङक्याइ खुङला सेचे छोल्सी। 30दीखो छोर्ती प्रभुला सेमल्हुक लुगेनक्याइ शाऊलला कैसरीया क्याःसाला खेर्सी ओःले ओःलाःम्ले टार्सस क्याःसाला ताङ्सी।
31ओः तीङ्ला यहुदीया, गालील ओःले सामरीया क्षेत्रला एःक्योक थाम्जेर कोःम्साक्याला खाम्साङ्बु काःल्सी। प्रभुला सेमल्हुक लुगेनक्याइ चाङ्मा लालाःम्ले ल्हे ज्योर्सी ओःले खुङक्या प्रभुला जीबा पेःदी तेःसी, ओःले कोःम्साला मीःक्या पाःदेरा काःल्सी।
पत्रुसकीइ एनीयास रा डोरकासला टाःच्युक्योक
32पत्रुस छुरफार थाम्जेरछ्योले काःल्सी, ओःले खेप चीग खुङ प्रभुला सेमल्हुक लुगेन लुड्डाइ मीःक्यासाःला काःल्सी। 33ओःला पत्रुसकीइ एनीयास लाःकेन मीःला फ्रेसी। खुङ चा खोङेन नाःजाइ पेःगासुना लोः केःथुप तेनलाःम्ले लाःङ्खुदी म्याःके। 34पत्रुसकीइ खुङला लाःसी, “एनीयास, येशु ख्रीष्टकीइ ख्योला टाःच्युउए। लाःङ्दी राःङगीइ तेन तोःदो।” एनीयास ओः तेःकासुरा लाःङ्सी ओःले डोखुगेन्दी काःल्सी। 35खुङ एःन्डुले टाःक्योक थोङ्दी लुड्डा ओःले शारोनला तेःकेन थाम्जेर मीःक्याइ प्रभुला सेमल्हुक लुसी।
36योप्पा क्याःसाला तबीता लाःकेन मेःन्दा चीग प्रभुला सेमल्हुक लुगेन नोःमो एःके। (ग्रीक तामला खुङला डोरकास लाःकुके, ओःखो लाःक्योकदी योमा खेस्या इःङे।) खुङ तेन्दुरा राःङ्साइ याःथाक पेःउके ओःले प्राङ्नाक्याला रोः पेःउके। 37पत्रुस लुड्डाला एःकासुना ओः नोःमो नेःपा काःल्दी सीसी ओःले खुङगीइ फुम्बुला मीःक्याइ ठुदी#९:३७ फुम्बुला मीःक्याइ ठुदी यहुदीक्याइ रीमठीमलादी मीः सीमीःजीक ओःखोइ फुम्बुला तुःर्साला तीःप्चेतोःङ्ला ठुउए। खीमगीइ तेङ्खाला कोठा चीगला ज्यासी। 38लुड्डालाःम्ले योप्पा माःङ्बुरा थारीःङ्बु म्याःके, ओः सोङ्गारा, पत्रुस लुड्डाला एः लाःकेन ताम प्रभुला सेमल्हुक लुगेनक्याइ छोर्काराङ खुङक्याइ मेःन्दा ङी मीःक्याला पत्रुससाःला एःन्डुबा वासी पेःगाला ताङ्सी, “कुःल्बु माःबेबा ङीःसाःला ओःङ्तेर!” 39ओः सोङ्गारा, पत्रुस लाःङ्दी खुङक्यासाःला काःल्सी। ओःला लेप्कासुना मीःक्याइ खुङला खीमगीइ तेङ्खाला खेर्सी। थाम्जेर मोःराङ्मुक्यादी पत्रुसकीइ छुरफारला तेःती ङुःदेरा तबीता सोम्बो एःकासुना जोक्योक केःला तेङ्सी।
40पत्रुसकीइ खुङक्या थाम्जेरला कोठालाःम्ले पाङ्ला तेङ्सी, ओःले खुङ पीमु चुसी ओःले प्रार्थना पेःसी। ओःले सीक्योक पेःन्पीःजाछ्योले लोःदी लाःसी, “ए तबीता, लोःङ!” खुङगीइ मी तासी ओःले पत्रुसला थोङ्दी लाःङ्दी तेःसी। 41पत्रुसकीइ खुङगीइ लाःक्पा जुम्दी लाङ्सी। ओःले खुङगीइ प्रभुला सेमल्हुक लुगेनक्या ओःले मोःराङ्मुक्याला केक्याःप्ती खुङक्याला सोम्बो तबीता तेर्सी।
42दी ताम योप्पा क्याःसा काःङ्रा फेल्सी ओःले माःङ्बुरा मीःक्याइ प्रभुला सेमल्हुक लुसी। 43ओः तीङ्ला पत्रुस माःङ्बुरा ङीःमाथुप कोबाइ लेःगा पेःगेन सीमोन ङीमु योप्पाला तेःसी।
Currently Selected:
प्रेरीत 9: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
