प्रेरीत 3

मेःन्दा चीग स्याःल्ठाक टाःक्योक

1ङीःमा चीग पत्रुस ओःले युहन्‍ना ङीःमाइ सुम बज्तीगासुना कोन्ज्योइ मन्दीरला काःल्सी। दीखो प्रार्थना पेःगेन तीःजी एःके। 2कोन्ज्योइ मन्दीरकीइ जेबु लाःकेन कोःला मेःन्दा चीग केगासुना मीःजीकरा स्याःल्ठाक एःक्योक मीः तेःकुके। मीःक्याइ खुङला ङीःमारी टाःङ्मा खुर्ती ओःला ख्योङ्तेर्कुके ओःले कोन्ज्योइ मन्दीरला ओःङेन्दी डोगेन्दी पेःगेन मीःक्याला खुङगीइ डेबा लाङ्दी तेःकुके। 3खुङगीइ पत्रुस रा युहन्‍नाला कोन्ज्योइ मन्दीरला डोदेरा पेःक्योक थोङ्दी खुङक्यालाङ डेबा लाङ्सी। 4खुङक्याइ ओःखोला याःबुले तासी ओःले पत्रुसकीइ लाःसी, “ङीःला तादो ले!” 5दीखो कोःदी ओःखोइ चीङ ज्योर्के की लाःती खुङक्याला तासी। 6इःनाङ पत्रुसकीइ लाःसी, “ङाः ङीमु सेर ङुल नी म्याः, इःनाङ ङाः ङीमु ची एःपा, ओःखो ङाः ख्योला तेर्के। नासरतकीइ येशु ख्रीष्टकीइ मीःनला लाःङ्दी सुङ!” 7ओःले खुङगीइ ओः मीःला च्याःबु लाःक्पाला जुम्दी लाङ्सी। ओः तेःकासुरा ओः मीःइ काङ्बा ओःले नाःर्कोक टाःसी। 8ओःले खुङ होप लाःङ्सी ओःले डोगाला स्युःसी। खुङ डोदेरा ओःले फीर्तेरा कोन्ज्योइ प्रशंसा पेःदेरा खुङक्या ङीमुरा कोन्ज्योइ मन्दीरला स्युःसी। 9माःङ्बुरा मीःक्याइ खुङ डोदेरा ओःले कोन्ज्योला प्रशंसा पेःक्योक थोङ्सी। 10कोन्ज्योइ मन्दीरकीइ जेबु कोःला तेःती लाङेन मीः दीखोरा इःङे लाःती खुङक्याइ ओःखोला ङोःसेसी। ओःखोला काःल्क्योक तामगीइ पेःगासुना खुङक्या माःङ्बुरा याःमाछाक काःल्दी एःके।

कोन्ज्योइ मन्दीरला पत्रुसकीइ लेःङ्‍गो

11ओः टाःक्योक मीः पत्रुस रा युहन्‍नाइ लाःक्पाला जुम्दी सोलोमन लाःकेन दलानला काःल्क्योक थोङ्दी थाम्जेर मीःक्या याःमाछाक नेती छ्‍योङ्देरा ओःङ्सी। 12ओः मीःक्याला थोङ्दी पत्रुसकीइ लाःसी, “इस्राएली रोःक्या, ख्याक्या चीले दीखो तामला याःमाछाक नेती ङीःला तादी तेःक्योक? ची ख्याक्याइ दीखो मीःला ङीःइ राःङगीइ ल्हे ओःले भक्‍तीइ डोगेन्दी जोक्योक लाःती ठीवा साल्गुबा? 13उःक्याइ फाफामुक्या अब्राहाम, इसहाक ओःले याकुबकीइ कोन्ज्योइ राःङगीइ लाबु येशुला महीमा तेर्ती एः। इःनाङ ख्याक्याइदी खुङला जुम्दी शासकक्याला तेर्सी ओःले पीलातसकीइ खुङला पोःर्तेर्चे छोल्सुनाङ ख्याक्या माःङीन। 14खुङ नी चाङ्मा ओःले ताःक्पा एःके। इःनाङ ख्याक्याइ खुङगीइ साटोला मेःन्दा चीग मीःक्सेरला पोःर्तेर्चेला लाङ्सी। 15मीःली तेर्केन्दीलादी ख्याक्याइ सेसी। इःनाङ कोन्ज्योइ खुङला सीक्योकलाःम्‍ले सेन्च्युदी एः ओःले दी तामगीइ पाङ्बु ङीः इःङे। 16ख्याक्याइ ङोःसेक्योक दी स्याःल्ठाक मीःइ येशुला सेमल्हुक लुक्योक सोङ्‍गारा खुङ टाःसी। येशुइ मीःनला सेमल्हुक लुक्योक सोङ्‍गारा दी याःबु काःल्क्योक ख्याक्याइ थोङ्देरा एः।

17ङाःइ आतानोःक्या, ङाःला टेःम्बा एः, ख्याक्या ओःले ख्याक्याइ शासकक्याइ ची पेःदेरा एःके ख्याक्याइ छोर्ती म्याःके। 18इःनाङ थार्च्युगेन ख्रीष्टकीइ तुःक्पु खुर्कोःउए लाःती कोन्ज्योइ तोःङ्मीःजीकरा खुङगीइ लेःङ्‍गो तेर्केन्दी थाम्जेर मीःक्यालाःम्‍ले लाःती एःके ओःले खुङगीइ दी ताम एःन्डुले छाङ्च्युसी। 19ओः सोङ्‍गारा, स्याबा पेःदी लाःयो पोःर्तो ओःले कोन्ज्योछ्‍योले लोःदो, ओःले ख्याक्याइ लाःयो क्षमा ओःङेन एः। 20ओःले ख्याक्याइ प्रभुलाःम्‍ले खाम्साङ्बु ओःले ल्हे ज्योर्केन एः। कोन्ज्योइ ख्याक्याइ लागी तोःङ्मीःजीकरा दाम्क्योक थार्च्युगेन ख्रीष्टला ताङ्तेर्केन एः। 21इःनाङ कोन्ज्योइ लेःङ्‍गो तेर्केन्दी चाङ्मा मीःक्याइ ताःङ्बुमीःजीकरा लाःक्योक च्योःङ्‍रारा कोन्ज्योइ थाम्जेर ताम सेम्बा जोगेन तीःनाम मायोःङ्थुप येशु नाःम्खालीङलारा तेःकेन एः। 22चीलेलाःना मोशाइ एःन्डुले लाःती एःके,

‘प्रभु कोन्ज्योइ ख्याक्याइ लागी ख्याक्याइ क्युःपालाःम्‍लेरा

ङाः च्योःङ्‍रारा मेःन्दा चीग कोन्ज्योइ लेःङ्‍गो तेर्केन्दीला ताङ्तेर्केन एः,

खुङगीइ ख्याक्याला पेःदो लाःक्योक थाम्जेर तामक्या ख्याक्याइ ङीःन्कोःउए।

23खुङगीइ ताम मेःकोःगेन काःन्दीङ मीःदी कोन्ज्योइ मीःक्यालाःम्‍ले खाफ्यागेन एः ओःले सीःङ्दाक थागेन एः।’#व्यवस्था १८:१५,१८-१९

24शमुएल ओःले खुङ भन्दा तीङ्ला ओःङ्क्योक कोन्ज्योइ लेःङ्‍गो तेर्केन्दीक्याइयाङ तीःङ्साङ काःल्देरा एःक्योक तामक्याइ बारेला लाःती एःके। 25कोन्ज्योइ खुङगीइ लेःङ्‍गो तेर्केन्दीक्यालाःम्‍ले तेर्क्योक ताःम्ज्याक्या ख्याक्याइ लागीरा इःङे ओःले कोन्ज्योइ ख्याक्याइ फाफामुक्या ङीमु ताःम्क्योक ताःम्ज्या ख्याक्याइ लागीरा इःङे। कोन्ज्योइ अब्राहामला एःन्डु लाःती ताःम्ज्या ताःम्दी एःके, ‘ख्योइ छार्क्युफुर्क्युक्यालाःम्‍ले ङाः जाम्बुलीङगीइ थाम्जेर मीःक्याला मोलाम तेर्के।’#व्यवस्था २२:१८ 26कोन्ज्योइ राःङगीइ लाबु येशुला दाम्सी ओःले ख्याक्या इस्राएलगीइ मीःक्या थाम्जेरला ख्याक्याइ माःरीक्पा लेःगाक्यालाःम्‍ले लोदी मोलाम तेर्चेला खुङला तोःङ्ला ख्याक्यासाःलारा ताङ्सी।”

Currently Selected:

प्रेरीत 3: SYW

Highlight

Copy