प्रेरीत 4
4
पत्रुस ओःले युहन्नाला महासभाइ तोःङ्ला ख्योङ्क्योक
1पत्रुस ओःले युहन्ना मीःक्या ङीमु एःन्डुले ताम लाःतेरा एःकासुना पुजाहारीक्या, कोन्ज्योइ मन्दीर ह्रुङेनक्याइ कप्तान ओःले सदुकीक्या खुङक्यासाःला ओःङ्सी। 2खुङक्याला सीःताङ लाःङ्दी एःके चीलेलाःना ओः प्रेरीतक्याइ येशु सीक्योकलाःम्ले सेन्क्योक च्योःङ्रारा मीःक्याङ सीमीःजीक सेन्गेन एः लाःती मीःक्याला लोप्तेरा एः। 3खुङक्याइ पत्रुस ओःले युहन्नाला जुम्सी। ओः तेःकासु कुःङ्से काःल्सीःङ्क्योक सोङ्गारा खुङक्याला ङार्तो ङामुथुपकीइ लागी च्याःल्गाङ्ला ज्यासी। 4इःनाङ ओः प्रेरीत ङीइ लेःङ्गो कोःगेनक्या माःङ्बुइरा सेमल्हुक लुसी ओःले सेमल्हुक लुगेन ख्य्वापीःजाक्या हजार ङा जे काःल्दी एःके।
5ङार्तो च्योःङ्रा शासकक्या, छेस्यो मीःक्या ओःले छ्येइ ठीमगीइ लोबेनक्या यरुशलेमला जोम्सी। 6ओःला चोइ पुजाहारी हन्नास ओःले कैयाफा, युहन्ना, अलेक्जेन्डर ओःले चोइ पुजाहारीइ फेबेक्याइ राःङ्सा सदस्यक्या एःके। 7खुङक्याइ पत्रुस ओःले युहन्नाला खुङक्याइ तोःङ्ला ख्योङ्सी ओःले टीःसी, “ख्योक्याइ सुइ ल्हेलाःम्ले ओःले सुइ मीःनलाःम्ले दी लेःगा पेःक्योक?”
8चाङ्मा लाइ काःङ्दीमारा पत्रुसकीइ लाःसी, “मीःक्याइ शासकक्या ओःले छेस्यो मीःक्या, 9ख्याक्याइ तीःरीङ ङीःला ङीःइ पेःक्योक याःबु लेःगाइ पेःदी ओःले ङीःइ दीखो स्याःल्ठाकला काःन्डुले टाःच्युबा लाःती ङीःला दीला ख्योङ्क्योक इःङे लाःना, 10ख्याक्या थाम्जेर ओःले इस्राएलगीइ थाम्जेर मीःक्याइ सेदो, ख्याक्याइ क्रुसला प्याङ्क्योक इःनाङ कोन्ज्योइ सीक्योकलाःम्ले सेन्च्युक्योक नासरतकीइ येशु ख्रीष्टकीइ मीःनलाःम्लेरा दीखो मीः टाःदी ख्याक्याइ तोःङ्ला लाःङ्दी एः। 11पेज्याइ दी ताम येशुइ बारेलारा प्रुःक्योक इःङे,
‘काःखो तोःला खीम जोगेन मीःक्याइ लेःगा म्याः लाःती क्युर्ती एःके,
ओःखो तोःरा खीमगीइ चारकीइ मुल तोः काःल्सी।’#भजन ११८:२२
12येशु बाहेक राःङ्सा सुइयाङ मीःक्याला थार्च्युजे मीःखुए। खुङगीइ मीःनगीइ बाहेक जाम्बुलीङला राःङ्सा काःन्दीङ मीःनगीइ उःला थार्च्युमीःखुए।”
13पत्रुस ओःले युहन्ना माःङ्बु माःटोःक्योक साधारण मीःक्या एःनाङ खुङक्याइ सहास थोङ्दी महासभाइ मीःक्या याःमाछाक काःल्सी। ओःले खुङक्याइ दी मेःन्दा ङी मीःक्या येशु ङीमु एःके लाःकेन ताम छोर्सी। 14इःनाङ ओः टाःक्योक मीःला पत्रुस रा युहन्ना ङीमुरा लाःङ्तेःक्योक थोङ्दी खुङक्याइ चीङ लाःमाःखु। 15ओः सोङ्गारा, खुङक्याइ पत्रुस रा युहन्नाला महासभालाःम्ले फीला सुङ लाःती आज्ञा तेर्सी ओःले खुङक्याइ एःन्डुले टेः पेःगाला स्युःसी, 16“ताः दी मीःक्याला ची पेःगा? यरुशलेमगीइ थाम्जेर मीःक्याइ खुङक्याइ पेःक्योक दी याःमाछाककीइ लेःगा छोर्ती एः। ताः दीखो तामला उःइ मीःङे लाःमीःखुए। 17इःनाङ दी ताम राःङ्सा मीःक्याइ कील्ला टाःम्जे तेर्मीःङे। ओः सोङ्गारा, खुङक्याला फीर्च्या येशुइ मीःनगीइ बारेला सुङ ङीमु चीङ माःलाःप लाःती आज्ञा तेर्का।”
18ओः तीङ्ला खुङक्याइ पत्रुस रा युहन्नाला नाःङ्ला केक्याःप्सी ओःले येशुइ मीःनगीइ बारेला फीर्च्या नाःमाङ सुङ ङीमु चीङ ताम माःलाःप ओःले मालोप लाःती आज्ञा तेर्सी। 19इःनाङ पत्रुस रा युहन्नाइ खुङक्याला लेःन लोदी लाःसी, “कोन्ज्योइ लाःक्योक ताम ङीःन्जे की ख्याक्याइ लाःक्योक ताम ङीःन्जे, कोन्ज्योइ तोःङ्ला काःखोदी डीक्पु एःपा? ख्याक्या राःङ्रा टेः पेःदो। 20चीलेलाःना ङीः नी राःङगीइ थोङ्क्योक ओःले कोःक्योक ताम माःलाःप्पा तेःमीःखुँ।” 21दीखो कोःदी महासभाइ मीःक्याइ खुङक्याला ताःरुङ माःङ्बु धम्की तेर्ती पोःर्तेर्सी। खुङक्याइ पत्रुस रा युहन्नाला सजाय तेर्केन उपाय माःज्योर चीलेलाःना खुङक्याइ पेःक्योक याःमाछाककीइ लेःगा मीःक्याइ थोङ्क्योक सोङ्गारा थाम्जेर मीःक्याइ कोन्ज्योइ प्रशंसा पेःदेरा एःके। 22चीलेलाःना ओःन्डुबा याःमाछाकले टाःगेन मीःदी खाल ङी भन्दाङ माःङ्बु लोःमीःजीक स्याःल्ठाक काःल्दी एःके।
सहास ज्योर्चेला प्रार्थना पेःक्योक
23पत्रुस रा युहन्ना ओःलाःम्ले थेङ्मीःजीक राःङगीइ रोःक्यासाःला लोःदी काःल्सी। खुङक्याइ छेस्यो पुजाहारीक्या ओःले छेस्यो मीःक्याइ लाःक्योक ताम राःङगीइ रोःक्याला लाःसी। 24खुङक्याइ दीखो कोःसी ओःले थाम्जेर डीक्ती कोन्ज्योला प्रार्थना पेःसी, “ए छ्योम्बो ल्हे एःक्योक प्रभु, ख्याइ नाःम्खालीङ, जाम्बुलीङ, चाङ्बु ओःले ओःक्याला एःक्योक थाम्जेर स्याःक्या जोसी। 25ख्याइ चाङ्मा लालाःम्ले ख्याइ लाबु ङीःइ फाफामु दाऊदकीइ खालाःम्ले एःन्डु लाःसी,
‘राःङ्सा क्युःपाक्या चीले सीःताङ पेःबा
ओःले मीःक्याइ चीले लेःगा म्याःक्योक तेःदामक्या जोबा?
26कोन्ज्यो ओःले खुङगीइ दाम्क्योक थार्च्युगेन ख्रीष्टकीइ वीरुद्धला
जाम्बुलीङगीइ क्याःल्बुक्या ओःले शासकक्या जोम्दी एः।’#भजन २:१-२
27ओःन्डुबारा तामक्या दाङ तीःरीङ दीला यरुशलेमला काःल्दी एः। चीलेलाःना ख्याइ अभीषेक पेःक्योक ख्याइ चाङ्मा लाबु येशुइ वीरुद्धला हेरोद रा पन्तीयस पीलातस ओःले इस्राएलगीइ मीःक्या ओःले राःङ्सा क्युःपाक्या जोम्दी एःके। 28ओःले खुङक्याइ ख्याइ ल्हे ओःले नावाइ तोःङ्लारा ठीवा चेक्योक ताम चीग्रा पेःसी। 29प्रभु, ताः खुङक्याइ तेर्क्योक ङाङ्रेक्याला सेम तेर। ओःले ख्याइ लेःङ्गो माःजीबा पेःदी टाःम्जेला ख्याइ लाबुक्याला ल्हे तेर। 30ख्याइ चाङ्मा लाबु येशुइ मीःनला नेःपा मीःक्याला टाःच्युगेन्दी, याःमाछाककीइ लेःगाक्या पेःगेन्दी ओःले चुःन्डुलक्या तेङेन ल्हे तेर।”
31खुङक्याइ प्रार्थना पेःसीःङ्मीःजी खुङक्या जोम्क्योक ठाउँ योःङ्सी। खुङक्या थाम्जेर चाङ्मा लाइ काःङ्सी ओःले खुङक्याइ कोन्ज्योइ लेःङ्गो माःजीबारा लाःकाला स्युःसी।
थाम्जेर क्युःक्या पीमा
32येशुला सेमल्हुक लुगेनक्याइ सेम ओःले नावा थाम्जेरकीइदी चीग्रा काःल्दी एःके। खुङक्या नाःङ्ला सुइयाङ राःङगीइ नोःर क्युःक्या “दीखो ङाःइदी इःङे” मेःलाःप्के। इःनाङ खुङक्या ङीमु एःक्योक थाम्जेर क्युःक्या पीमा एःके। 33छ्योम्बो ल्हेलाःम्ले ओः प्रेरीतक्याइ प्रभु येशु सीक्योकलाःम्ले सेन्दी एः लाःती पाङ्बु तेर्कुके ओःले खुङक्या थाम्जेरला कोन्ज्योइ छ्योम्बो मोलाम तेर्सी। 34खुङक्या सुलाङ चीङ तामगीइ ताःसुक म्याःके चीलेलाःना काःजे ङीमु सीःङक्या ओःले खीमक्या एःके, खुङक्याइ ओःखो चोङ्दी ज्योर्क्योक डेबा ख्योङ्गुके, 35ओःले प्रेरीतक्याला तेर्कुके। ओःले प्रेरीतक्याइ ओः डेबा काँःदी काँःदीला कोःपा ओःखोला केःतेर्कुके।
36ओःले योसेफ लाःकेन मेःन्दा चीग मीः एःके। खुङ साइप्रसला केक्योक लेबी एःके। खुङला प्रेरीतक्याइ बरनाबास लाःती केक्याःप्कुके (ओःखो लाःक्योकदी सहास तेर्केन मीः)। 37खुङगीइयाङ राःङगीइ सीङ चीग चोङ्दी ज्योर्क्योक डेबा प्रेरीतक्याला तेर्सी।
Currently Selected:
प्रेरीत 4: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
