प्रेरीत 2
2
चाङ्मा ला ओःङ्क्योक
1पेन्तीकोस लाःकेन यहुदीक्याइ मेःलीङला येशुला सेमल्हुक लुगेन थाम्जेर मीःक्या ठाउँ चीगलारा रुःप काःल्दी एःके। 2ओः तेःकासुरा एक्कासी नाःम्खालीङलाःम्ले छ्योम्बो ल्हाबा च्योःङ्रा के ओःङ्सी ओःले ओः केइ खुङक्या तेःक्योक खीम काःङ्सी। 3ओःले खुङक्याइ मेःइ लोःमाक्या च्योःङ्रा थोङ्सी ओःले ओः लोःमाक्या बो बोक्याला केःदीमाराङ ओःला एःक्योक थाम्जेरखाला तेःसी। 4खुङक्या थाम्जेर चाङ्मा लाइ काःङ्सी ओःले खुङक्याइ चाङ्मा लालाःम्लेरा ताम लाःकेन ल्हे ज्योर्ती राःङ्सा तामक्यालाःम्ले ताम लाःकाला स्युःसी।
5ओः तेःकासु यरुशलेमला जाम्बुलीङगीइ थाम्जेर ठाउँक्यालाःम्ले ओःङ्क्योक ताःक्पा यहुदीक्या तेःकुके। 6एःन्डुबा केतेङ्क्योक कोःदी ओःला छ्योम्बो मीःइ पोर्चोम रुःप काःल्सी। खुङक्या याःमाछाक काःल्सी चीलेलाःना ओः मीःक्या थाम्जेरकीइ खुङक्याइ राःङ राःङगीइ तामलाःम्ले ताम लाःतेरा एःके। 7खुङक्या माःङ्बुरा याःमाछाक नेती एःन्डु लाःकाला स्युःसी, “ची दी ताम लाःकेन थाम्जेर मीःक्या गालीलीक्या मीःङे ले? 8ओःले काःन्डुले खुङक्या थाम्जेरकीइ उःइ राःङगीइ तामलाःम्ले ताम लाःतेरा एःपा? 9उःक्यादी पार्थीया, मादीया, एलामी, मेसोपोटामीया, यहुदीया, कापाडोकीया, पोन्टस, एशीया, 10फ्रीगीया, पामफीलीया, मीश्र देश, कुरेनीइ सुःरकीइ लीबीया क्षेत्रक्या, रोम क्याःसा, 11क्रेट ओःले अरब देशलाःम्ले ओःङ्क्योक मीःक्या इःङे। (उःक्या काःजेदी यहुदीक्या इःङे ओःले काःजेदी यहुदी धर्म लेःङ्क्योक राःङ्सा क्युःपाइ मीःक्या इःङे।) एःनाङ कोन्ज्योइ पेःक्योक छ्योम्बो छ्योम्बो लेःगाक्याइ बारेला खुङक्याइ उःइ तामक्यालाःम्ले लाःक्योक उःइ कोःसी।”
12खुङक्या थाम्जेर याःमाछाक्का काःल्सी ओःले जोल्सी, ओःले चीगकीइ राःङ्साला एःन्डु लाःती टीःसी, “दीखो लाःक्योक ची इःम्बा?” 13इःनाङ मेःन्दा काःजेइदी खुङक्याला केःमु क्याःप्तेरा लाःसी, “खुङक्या नी अङ्गुरकीइ नीःङ्गार थुङ्दी जीदी एः।”
पत्रुसकीइ लेःङ्गो
14ओःले पत्रुस राःङ्सा मेःन्दा च्युजीक प्रेरीतक्या ङीमु लाःङ्सी ओःले छ्योम्बो के तेङ्दी मीःइ पोर्चोमला लाःसी, “यहुदी रोःक्या ओःले थाम्जेर यरुशलेमला तेःकेन मीःक्या, ङाःइ तामला याःबुले कोःदो, दीला ची काःल्दी एःपा ओःखो ङाः ख्याक्याला लाःके। 15ख्याक्याइ ठीवा चेक्योक च्योःङ्रा दी मीःक्या जीक्योक मीःङे चीलेलाःना ताःसे नी ङामुइ कुः चीग्रा बज्तीदी एः। 16इःनाङ कोन्ज्योइ राःङगीइ लेःङ्गो तेर्केन्दी योएलला एःन्डु लाःती एः,
17‘तीङगीइ ङीःमाक्याला ङाः थाम्जेर मीःक्याला ङाःइ ला तेर्के,
ओःले ख्योक्याइ पुःपोःमोक्याइ अगमवाणी लाःकेन एः,
स्याराक्याइ दर्शनक्या थोङेन एः
ओःले काःपुक्याइ मीलामक्या थोङेन एः।
18इःङे, ङाःइ लाबुक्याखालाङ, ख्य्वापीःजाक्या ओःले पेःन्पीःजाक्या ङीक्कारला,
ङाः ओः ङीःमाक्याला ङाःइ ला तेर्के,
ओःले खुङक्याइ अगमवाणी लाःकेन एः।
19ङाः याःरला नाम्सार्गाला याःमाछाककीइ लेःगाक्या तेङे
ओःले माःर्ला जाम्बुलीङला याःमाछाककीइ चुःन्डुलक्या तेःङे।
ठा, मेः ओःले तीःपाइ मुक्पा थोङेन एः।
20प्रभुइ ओः छ्योम्बो ओःले महीमामय ङीःमा ओःङ्जे तोःङ्ला,
ङीःमा नाक्जुक ओःङेन एः
ओःले दागार्मु ठा च्योःङ्रा माःर्मु ओःङेन एः।
21ओःले प्रभुइ मीःन लेःङेनक्यादी सेन्च्युगेन एः।’#योएल २:२८-३२
22इस्राएली रोःक्या, ङाःइ ताम कोःदो। कोन्ज्योइ नासरतकीइ येशुलाःम्ले ख्याक्याइ कील्ला छ्योम्बो छ्योम्बो लेःगाक्या ओःले याःमाछाक्कीइ चुःन्डुलक्या तेङ्तेर्क्योक ख्योक्याला याःबुले टेःम्बा एः। ओः चुःन्डुलक्यालाःम्ले नासरतकीइ येशुला कोन्ज्योइ राःङगीइरा ताङ्क्योक इःङे लाःकेन दास्यी तेर्सी। 23कोन्ज्योइ तोःङ्लारा पेःक्योक तेःदाम ओःले ठीवा चेक्योक अनुसाररा येशु ख्याक्याइ लाःक्पाला लेप्सी। ओःले ख्योक्याइ खुङला माःरीक्पा मीःक्याइ लाःक्पाला तेर्ती खुङला क्रुसला प्याङ्च्युसी।
24इःनाङ कोन्ज्योइ खुङला सीबुलाःम्ले थार्च्युदी एः ओःले सोम्बो जोदी एः, चीलेलाःना सीबुइ खुङला राःङगीइ ल्हेला ज्यामाःखु। 25दाऊद क्याःल्बुइ खुङगीइ बारेला एःन्डु लाःती एःके,
‘ङाःइ प्रभुला तेन्दुरा ङाः ङीमुरा थोङ्सी।
खुङ ङाःइ च्याःबु लाःक्पाछ्योले एः
ओःले ङाःइ ची तामलाङ जीमेःकोए।
26ओः सोङ्गारा, ङाः सेम नाःङ मीःजीकरा केःदाङ काःल्दी एः
ओःले केःदाङगीइ लु लेःङ्दी तेःकुए।
ङाःइ जुबुङ रेःवाला सेन्गुए।
27चीलेलाःना ख्याइ ङाःला तुःर्सालारा मेःपोःर्केन एः।
ख्याइ राःङगीइ चाङ्मा लाबुइ जुबुला तुःर्साला रुःल्जे मेतेर एः।
28ख्याइ ङाःला मीःजीइ लाःम तेङ्दी एः,
ओःले ख्या ङीमु एःकासुना ख्याइ ङाःला केःदाङ जोगेन एः।’#भजन १६:८-११
29ङाःइ आतानोःक्या, उःक्याइ फाफामु क्याःल्बु दाऊदकीइ बारेला ङाः याःबुले लाःखुँ। खुङ सीसी ओःले खुङगीइ रोःला तुःर्साला ज्यासी, ओःले ओः तुःर्सा ताःरुङ उः ङीमुरा एः। 30दाऊद कोन्ज्योइ लेःङ्गो तेर्केन मीः एःक्योक सोङ्गारा खुङगीइ छार्क्युफुर्क्युक्या नाःङ्ले मेःन्दा चीगला कोन्ज्योइ खुङ च्योःङ्रारा क्याःल्बु जोगेन एः लाःकेन ताम खुङला टेःम्बा एःके। कोन्ज्योइ खुङ ङीमु एःन्डुबा ताःम्ज्या पेःदी एःके। 31कोन्ज्योइ तीङ्ला पेःगेन लेःगा दाऊदकीइ तोःङ्मीःजीकरा थोङ्दी एःके। ओः सोङ्गारा, खुङगीइ थार्च्युगेन ख्रीष्ट सीक्योकलाःम्ले सेन्गेन एः लाःती एःन्डु लाःसी,
‘कोन्ज्योइ खुङला तुःर्साला मेःपोःर्केन एः,
ओःले खुङगीइ जुबुङ ओःलारा रुःल्मीच्युगेन एः।’
32ओः येशुलारा कोन्ज्योइ सीक्योकलाःम्ले सोम्बो जोदी एः, ओःले उःक्या थाम्जेर ओः तामगीइ पाङ्बु इःङे। 33आबा कोन्ज्योइ येशुला चोला क्यादी खुङला राःङगीइ च्याःबु लाःक्पाछ्योले ज्यासी ओःले ताःम्ज्या पेःक्योक च्योःङ्रारा राःङगीइ आबालाःम्ले चाङ्मा ला ज्योर्सी। ओः चाङ्मा लारा प्रभु येशुइ ङीःक्याला तेर्ती एः, ओःले ओःखोरा ख्याक्याइ ताःसे थोङ्देरा ओःले कोःदेरा एः। 34-35चीलेलाःना दाऊद खुङरा नी नाःम्खालीङला माःकाल। इःनाङ खुङगीइ एःन्डुले लाःसी,
‘प्रभुइ ङाःइ प्रभुला लाःसी,
ङाःइ ख्योइ टाःलाङक्याला ख्योइ काङ्बा वाःला माःख्योङ्थुप,
ख्यो ङाःइ च्याःबु लाःक्पाछ्योले तेः।’#भजन ११०:१
36ओः सोङ्गारा, इस्राएलगीइ थाम्जेर मीःक्याइ दी ताम सेकोःउए ख्याक्याइ क्रुसला प्याङ्क्योक येशु ख्रीष्टला कोन्ज्योइ प्रभु ओःले थार्च्युगेन ख्रीष्ट जोदी एः।”
37पत्रुसकीइ लाःक्योक ताम कोःदी मीःक्याइ सेम सुःक्याःप्सी ओःले खुङक्याइ पत्रुस रा राःङ्सा प्रेरीतक्याला टीःसी, “ए आतानोःक्या, ओःन्डु एःना ङीः ची पेःगा ले?” 38पत्रुसकीइ लाःसी, “ख्याक्या थाम्जेर स्याबा पेःदी लाःयो पोःर्तो ओःले लाःयोलाःम्ले क्षमा ज्योर्चेला येशु ख्रीष्टकीइ मीःनला बप्तीस्मा लेःङ्दो। ओःले कोन्ज्योइ ख्याक्याला चाङ्मा ला तेर्केन एः। 39चीलेलाःना कोन्ज्योइ ताःम्ज्या ख्याक्याइ लागी, ख्याक्याइ पुःपोःमोक्याइ लागी ओःले थारीःङ्बुक्याला तेःकेन थाम्जेरकीइ लागी इःङे। दी ताःम्ज्या उःइ प्रभु कोन्ज्योइ दाम्क्योक थाम्जेर मीःक्याइ लागी इःङे।”
40पत्रुसकीइ खुङक्याला राःङ्सा माःङ्बुरा तामक्या लाःसी ओःले एःन्डु लाःसी, “ताःसेइ माःरीक्पा मीःक्याला ओःङेन दण्डलाःम्ले राःङला सेन्च्युदो।” 41माःङ्बुरा मीःक्याइ पत्रुसकीइ तामला सेमल्हुक लुसी ओःले बप्तीस्मा लेःङ्सी। ओः ङीःमु बप्तीस्मा लेःङेनक्या हजार सुम जे मीःक्या खुङक्याइ छोबाला पाःसी। 42खुङक्या तेन्दुरा प्रेरीतक्या ङीमु लोप्केन्दी, संगती पेःगेन्दी, साःप्च्या साःगेन्दी ओःले प्रार्थना पेःदी तेःकेन्दी पेःउके।
येशु प्रभुला सेमल्हुक लुगेनक्याइ संगती
43प्रेरीतक्याइ माःङ्बुरा याःमाछाककीइ लेःगाक्या ओःले चुःन्डुलक्या तेङ्गुके। ओः सोङ्गारा, थाम्जेर मीःक्याला याःमाछाक नेसी। 44प्रभुला सेमल्हुक लुगेनक्या थाम्जेर तेन्दुरा तेःसा चीगला जोम्गुके ओःले खुङक्याइ क्युःक्या चीगकीइ राःङ्सा ङीमु केःउके। 45खुङक्याइ राःङगीइ नोःर क्युःक्या ओःले नेकी छेगाक्या चोङ्गुके, ओःले काःखोला कोःपा ओःखोला डेबा तेर्कुके। 46ङीःमारी टाःङ्मा खुङक्या कोन्ज्योइ मन्दीरला जोम्गुके ओःले थाम्जेर डीक्तीमारा केःदाङ पेःदेरा ओःले याङ्छाबु पेःदेरा खुङक्याइ खीमक्याला साःप्च्या साःउके 47ओःले तेन्दुरा कोन्ज्योला प्रशंसा पेःउके। राःङ्सा मीःक्याइयाङ खुङक्याला सेम थेकुके। ओःले प्रभुइ ङीःमारी टाःङ्मा थार्क्योक मीःक्या खुङक्याइ छोबाला पाःतेर्कुके।
Currently Selected:
प्रेरीत 2: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
