लूका 16

चलाक लिखणार

1तोउं यीशु फरीसी त धर्मशास्त्री शुणान्ते शुणान्ते अपु चेली जे बि बोलु, “दूर देशे बिशो केसे यक अमीरे यक लिखणार थिआ। मेह्‍णु तेस पुठ दोष ला कि से लिखणार यकीन लेएक नेईं। से तसे पूरी जायेदाद उड़ाण लगो असा। 2त तेन से भिआ त बोलु, ‘अउं तें बारे ईं की बोके शुणुण लगो असा? अपु लिखणारे हिसाब कताब दिए, किस कि तु अब लिखणार रेही ना सकता।’ 3त लिखणार सोचुण लगा, ‘ओ यार! अब मोउं की करुं, किस कि में मालिक लिखणारे कम मोउं केआं नेण लगो असा? जन त मोउं के खनिन्ता नोउ; त भीक मगणे हेर अउं लजिन्ता?’ 4सोच सोच कइ पता तेन अपफ जे बोलु, ‘अउं समझी गा कि मोउं की करुं, ताकि जपल मोउं केआं लिखणारे नौखरी नी छड़ियेल त मेह्‍णु में मितर बणते त अपु अपु गी भिआन्ते।’ 5तोउं तेन अपु मालिके जत बि कर्जदार थिए, सोब भिआ त पेहला केआं पुछु, ‘तोउ पुठ में मालिके कतु ऋण असु?’ 6तेन बोलु, ‘सौ बाटि तेल’ त तेन तस जे बोलु, ‘अपु बही खाता ने त झटपट पंझा लिख छड़।’ 7तोउं तेन दोके केआं पुछु, ‘तोउ पुठ में मालिक कतु ऋण असु?’ तेन बोलु ‘सौ मण गिहुं’ तोउं तेन तेस जे बोलु, ‘अपु बही खाता नी कइ झट अस्सी मण लिख छड़।’ 8पता तेन अमीरे तेस बेधर्मी लिखणार जे खरु बोलु, किस कि तेन बोडे चलाकी जुए कम किओ थिउ। किस कि इस मतोके मेह्‍णु अपु रीति रिवाज अन्तर परमेश्वरे गभुर केआं ज्यादे चलाक असे।”

9“अउं तुसी जे बोता कि अपु धने बेलि अपफ जे मितर बणाए, ताकि जिखेईं से घेन्ता रेहियाल त से तुसी ना मुकुणे बाड़े धन जगाई जे नेन्ते। 10जे मेह्‍णु धिखुभई अन्तर यकीन लेएक असा, से सुआ अन्तर बि यकीन लेएक असा। होर जे धिखुभई अन्तर बेईमान असा, से सुआ अन्तर बि बेईमान असा। 11त जिखेईं तुस इस मुकणे बाड़े धन अन्तर यकीन लेएक ना निस्ते त तुन्धे तेस धन कोउं देन्ता जे कदी ना मुकता? 12त अगर तुस बेगाने धन अन्तर यकीन लेएक ना निस्ते त जे तुं भो तेस तुन्धे कोउं देन्ता?”

13 # मत्ती 6:24 “कोई नौखर दुई मालिकी के सेवा न कइ सकता, किस कि से यक जेईं नराज त होर जेईं खुश कता। तिहांणि तुस परमेश्वरे त धने दुहि के सेवा न कइ सकते।”

14फरीसी, जे लालची थिए#निसुणे 20:17; विधि 5:21 इ बोक शुण कइ तसे मखोल बणाण लगे। 15त तेन तेन्हि जे बोलु, “तुस त मेह्‍णु के सम्हाणि अपफ जे महान त बोडे धर्मी हरालते, पर परमेश्वर तुं मन जाणता, किस कि जे जे चीज मेह्‍णु अगर तुसी बोडा त धर्मी बणान्ते, से परमेश्वरे अगर रोशुणी असी। 16जे नियम परमेश्वरे मूसे धे दुतो थिआ त जे खबर भविष्य वक्ते अण्हो थी, तसे घोषणा सद यूहन्ने एणे टेम तकर थी। तढ़ेया पता, परमेश्वर जेस राज्ये जुबान दुतो थी, तेस एणे खुश खबरी घोषणा भुओ असी त हर कोई तेस अन्तर बोडे जोश जुए घेण चहन्ते।#मत्ती 11:12,13 17हांलाकि परमेश्वरे राज्य पुजणे बारे खुश खबरी घोषणा भोई त गो असी, तोउं बि अउं चहन्ता कि तुस ई जाणे, अम्बरे त धरती मुक घेण, परमेश्वरे नियमे यक लब्ज मिटुण केआं सुख्तु असु।#मत्ती 5:17-20 18तोउं त, जे कोउं अपु जुएली छड़ दी कइ होरा ब्याह कता, से नाजायज रिश्ता रखता, होर जे कोउं ईं छड़ दुतो जिल्हाणु जुओई ब्याह कता, से बि नाजायज रिश्ता बणान्ता।”#मत्ती 5:32; 1 कुरिन्थ 7:10,11

अमीर मेह्‍णु त कंगाल लाजार

19तोउं यीशु यक कथा शुणाई, “यक अमीर मेह्‍णु थिआ, जे खरे खरे झिणे डब कइ, होर रोज सुख शान्ति जुए खाई पी अपु जिन्‍दगी गुजारताथ। 20तठि लाजार नओएं यक कंगाल बि भुन्ताथ, जेसे जिसम पुठ सुआ घा थिए। कुछ मेह्‍णु तस तेस अमीरे दुआ पुठ छड़ दी छतेथ। 21त से चहन्ताथ कि अमीर मेह्‍णु जुठी रौठि बइ अपु पेट भरुण। से अत कमजोर थिआ कि कुतर बि एई कइ तेसे घा चाटतेथ। 22तोउं ईं भु कि से कंगाल मरी गा त स्वर्गेदूती से टाइ कइ अब्राहमे#16:22 अब्राहम तिरहे कुआ थिआ जे परमेश्वर ऊर नोउएं शेहर केआं भिओ थिआ त जेस केईआं इस्राएल जाति आई। अभेईं अब्राहम स्वर्ग अन्तर परमेश्वरे राज्य अन्तर असा। भेएड़ पुजाई छड़ा। पता से अमीर बि मरा त से पथि छड़ा। 23तोउं पाताल केआं तेन अपु रोलाटे टीरी बइ हेरु त दूर अब्राहमे कल्हाई लाजार बिशो का। 24तोउं तेन हक दी कइ बोलु, ‘ओ बोउआ अब्राहमा! मोउं पुठ दाह कर। त छने लाजार लंघाई छड़ कि से अपु अंगुलु पाणि बइ सेल कइ में जिभुड़ ठनेरियाल, किस कि अउं इस नर्क अन्तर तड़फण लगो असा।’ 25पर अब्राहमे बोलु, ‘ओ कोईया! याद कर कि तु अपु जिन्‍दगी अन्तर खरी चीजे घिन गो असा, तिहांणि लाजारे बुरी चीजे। पर अभेईं से इठि शान्ति जुए बिशो असा त तु तड़फण लगो असा। 26इ सोब बोक छड़ दे, किस कि तें त हें बुच यक मोटी ढांक असी कि जे इठिआ पार तें भेएड़ घेण चहन्ता, से ना घेई सकता। ना कोई अठिआ हें भेएड़ एई सकता।’ 27त तेन बोलु, ‘त ए बोउआ! अउं तें छनेअरे कता कि तु तस में बोउए गी लंघा, 28किस कि में पंज भाई असे; से तेन्के सम्हाणि इन्हि बोकी उगाह दियेल। ईं ना भुओल कि से बि इस नर्क अन्तर एईयेल।’ 29अब्राहमे तस जे बोलु, ‘तेन्हि केईं त मूसे त होरे भविष्य वक्ती के कताब असी। तेन्हि तेन्के शुणुण दिए।’ 30त तेन बोलु, ‘ना बोउआ अब्राहमा! अगर कोई मरो तेन्हि बिचा तेन्के भेएड़ घियाल त से अपु मन बदलते त अपु पापे कम छड़ देन्ते।’ 31त तेन तस जे बोलु, ‘जिखेईं से मूसे त होरे भविष्य वक्ती के ना शुणते त मरो तेन्हि बिचा अगर कोई बि घियाल त से तेन्के बि ना शुणते।’”

Currently Selected:

लूका 16: pgg

Highlight

Copy