लूका 17

मेह्‍णु पाप कराणे बझह ना बणुण

1यक रोज यीशु अपु चेली जे बोलु, “ई त पक्का असा कि हर कोई पाप अन्तर घेन्ता। पर तेस मेह्‍णु खेया खाट भोई घेन्ति, जेसे बेलिए पाप करी घेन्ते! 2जे एन्हि मठुड़ अन्तरा केसे यक जेईं केआं पाप करणे बझह बणता, तेस जे ईं खरु भुन्तु कि घते पठ तसे कियाड़ी बइ ढनाई कइ से दरेउ अन्तर छइ छाण। 3त इसे बारे ध्यान कते रिहे;#17:3 त अपफ जे सावधान कइ रख ताकि तु अपफ पाप अन्तर ना घियेल त होरी के पाप करणे बझह ना बणियाल। अगर तुं भाई कोई गलती करियेल त तुस तेस समझाण दिए, त अगर पछताल त तस माफ करे।#मत्ती 18:15 4अगर से यक रोज अन्तर सत फेरि गलती कर कइ सत फेरि एई कइ तोउ जे बोलियेल कि, ‘भाई, मोउं केआं गलती भोई गई’, त तुस तस माफ करे।”#2 थेस्सलु 2:7-11

विश्वास बधाण

5तपल प्रतिनिधि प्रभु जे बोलु, “हें विश्वास बधाण दिए।” 6त प्रभु बोलु, “अगर तुसी अन्तर शरहेउ रो जत विश्वास भोल त तुस इस बुटे जे बोते कि जड़ केआं उखिड़ कइ तथ अन्तर बस त से तुं मनी छता।”#मत्ती 17:19-20

यक नौखरे जिम्मेबारी

7“तुसी बुच तेस अमीर मेह्‍णु ईं कोउं असा, जेसे नौखर बग बांता त ढडुड़ चरान्‍ता। त जपल से वापस एईयाल त तस जे बोलियेल, ‘झट एई कइ रौठि खाण जे बिश’? 8कदी ना! बल्कि तुस ईं बोते कि ‘मोउं जे रौठि बणा, त जपल तकर अउं खाउं पिउं नउ में सेवा पाणि कर। तढ़ेया पता तु बि खाण पीण दे’। 9कि से तेस नौखरे एहसान मानता ना कि तेन तिहांणि कम किउ, जीं तेन बोलो थिउ? 10इहांणि तुस बि तेन्हि कमी कइ घियेल जे तुसी जे बोलो थिए त बोले अस नालायकी नौखर असे; जे असी करुण थिउ, असी सद सेईंया किउ।”

दस कोढ़ी ठीक करण

11यक रोज ईं भु कि यीशु सामरिया त गलील राज्ये बीच बइ यरुशलेम जे घेण लगो थिआ। 12केस ग्रां अन्तर घेण वकत तेस दस कोढ़ी मेईंए। 13तेन्हि दूर खड़ भोई कइ जोरी जोरी बोलु, “ए यीशु, ए मालिका, असी पुठ दाह कर!” 14त तेन तेन्के धे हेर कइ बोलु, “घिए त अपफ पुजारे हराले।”#पुजारोठि 14:2-32 त घेन्ते घेन्ते से ठीक भोई गे। 15त तेन्हि बुचा यक ईं हेर कइ कि से ठीक भोई गो असा, जोरी जोरी परमेश्वरे धन्यवाद कते-कुते वापस आ; 16त यीशु खुरी पुठ मुंहे बल झड़ कइ तेसे धन्यवाद करण लगा। से यक सामरी#17:16 लूका 9:52 हेरे। यहूदी मेह्‍णु एन्हि जुठे समझतेथ, किस कि तठि गैर यहूदी मेह्‍णु यहूदी जिल्हाणु जोई ब्याह किओ थिआ। थिआ। 17इस पुठ यीशु बोलु, “कि दसो कोढ़ी ठीक ना भुए ना? त फिर बाकी नोउ कोठि असे? 18कि एस परदेशी छड़ दी कइ कोई होर ना निसा जे परमेश्वरे महिमा कता?” 19तोउं तेन तस जे बोलु, “खड़ भो त घेई गा, मोउं पुठ तें विश्वासे तु ठीक किओ असा।”

परमेश्वरे राज्य एण

मत्ती 24:23-28; 24:37-41

20फि यक रोज, जपल फरीसी यीशु केआं पुछु कि परमेश्वरे राज्य कपल एन्ता, त तेन तेन्हि जे जवाब दिता, “परमेश्वरे राज्य एण नजर ना एन्ता। 21ना त मेह्‍णु ईं ना बोते ना कि ‘हेरे, इठि असा, हेरे ओठि असा।’ ना, परमेश्वरे राज्य तीं ना भुन्ता। इए हेरे, परमेश्वरे राज्य त तुं बुच जाई कपल एई गो असा, पर तुस तस पिछाणते नोउ।”

22तोउं तेन चेली कें धे हेर कइ बोलु, “से रोज बि एन्ता, जपल मनखे कुआ सोबी केआं दूर करिन्ता। तोउं तुस मनखे कोईये रोजी अन्तरा यक रोज बि हेरण चहन्ते, पर तुस ना हेर बटते। 23मेह्‍णु तुसी जे बोते कि ‘हेर, ओठि असा, या हेर, इठि असा!’ पर तुसी तेन्के ना शुणुण होर ना तेन्के पता घेण। 24किस कि जीं अम्बर अन्तर बिजली यक कुणे केआं होर कुणे तकर चमकती तिहांणि मनखे कुआ बि अपु रोज एन्ता त सोब मेह्‍णु हेरते। 25पर पेहले ई जरूरी असु कि से सुआ दुख सीढ़ाल त इस जुगे मेह्‍णु तस ना मानते। 26जीं नूहे#17:26 नूह लेमेके कुआ थिआ, जेस जे परमेश्वरे यक बोडी नाव बणाण जे बोलो थिउ ताकि से, तसे टब्बरा त होरे जानवर बाढ़ केआं बच सकियेल त तेन्हि दिनि पापी जुए खतम ना भोल। शुरुवात 6:13-22 रोज भुओ थिउ, तीं मनखे कोईये एणे रोज बि भुन्तु। 27जेस रोज तकर नूह जहाज अन्तर ना गा, तेस रोज तकर मेह्‍णु खांते पीन्ते, त ब्याह जानि कते रिहे। तोउं, हड़ आउ त से सोब बहाई छड़े। 28त जीं लूते#17:28 लूत अब्राहमे भणेजे थिआ। से सदोम शेहर अन्तर बिश्ताथ जे शेहर परमेश्वरे तेन्के पापे बझई जुए उजाड़ो थिआ। शुरुवात 19:1-9 रोज अन्तर भुओ थी कि मेह्‍णु खांते पीन्तेथ, लेण देण कतेथ, त बुटे बसान्‍तेथ त गी बणान्तेथ; 29पर जिएस लूत सदोम केआं घेई गा, तिएस आग त वारुद अम्बर केआं झड़े त सदोमे सोब कुछ खतम कइ छोउ। 30मनखे कोईये एणे रोज बि इहांणि भुन्तु।”

31“तेस रोज जे लहाड़ पुठ भोल, तसे सामान गी अन्तर भोल त से तेस नेण जे ना अन्तर ना घिए। तिहांणि जे बग अन्तर भोल से पतूं ना आईए।#मत्ती 24:17,18; मरकुस 13:15,16 32लूते जुएली#17:32 सदोम शेहर केआं नशणे टेम जिखेईं लूते जुएली पतूं खिरक कइ हेरु, त से शापी कइ लुणे मुर्ति बण गई। शुरुवात 19:26 याद रखे! 33जे कोई अपु प्राण बचाण चहाल से तेस गवाई छता, त जे कोई अपु प्राण देन्ता से तेस सुसुर रखता।#मत्ती 10:39; 16:25; मरकुस 8:35; लूका 9:24; यूहन्ना 12:25 34अउं तुसी जे बोता, तेस रोज दुई मेह्‍णु यक मन्जे पुठ उंघ भुन्ते, तेन्हि बुचा परमेश्वर अपफ जे यक घिन घेन्ता त यक तठि बिशुण देन्ता। 35दुई जिल्हाणु साते हटाट करण लगो भुओल। पर तेन्हि बुचा परमेश्वर यक घिन घेन्ता त यक बिशुण देन्ता। 36दुई जेईं बग भुओल, त परमेश्वर अपफ जे यक नी छान्‍ता त होरा बिशुण देन्ता।” 37इ शुण कइ तेन्हि तस केआं पुछु, “ए प्रभु, ए कोठि भुन्तु?” तेन तेन्हि जे बोलु, “जेठि मुड़दा भुओल तठि हुडानी किठिन्‍ती।”#17:37 इस कहावते मतलब असु कि “जपल मनखे कुआ एईयाल, से सोबी जेईं सुसुर केता।”

Currently Selected:

लूका 17: pgg

Highlight

Copy