लूका 15

गड़ो ढडुड़ु कथा

1सोब पापी#15:1 इठि “पापी” मतलब सद तेन्हि मेह्‍णु जे असा, जेन्हि फरीसी त धर्मशास्त्री पापी समझतेथ। से अपफ परमेश्वर अगर कदी पापी ना मानतेथ। त मामला नेणे बाड़े यीशु बोक शुणुण जे तेस केईं एन्ते रेहन्तेथ।#लूका 5:29,30 2पर फरीसी त धर्मशास्त्री तसे बुराई कर कइ बोलुण लगे, “ए त पापी जुए मीता त तेन्हि जुए खांता पीन्ता।”

3तिखेईं तेन तेन्हि जे कुछ कथाई लाई कइ बोलु, 4“तुसी बुच कि ईं कोउं असा ना, जेसे सौ ढडुड़ असे। त अगर तेन्हि बुचा यक बि ढडुड़ गड़ी घियेल त से नढ़ीनुए ढडुड़ यक जगाई छड़ दी कइ यक तेस जोउं तकर मिलियेल नउ, तोपता नउ? 5त जिखेईं से ढडुड़ मेई घेन्तु त तेस बड़े खुशी जुए से अपु कन्‍हा पुठ कर कइ गी आणता। 6त गी एई कइ अपु भेयाड़ी त मितरी कठे कर कइ बोता, ‘मोउं जुए खुशी मनाए, किस कि में गड़ो ढडुड़ दुबारी मेई गोउ असु।’ 7अउं तुसी जे बोता इहांणि यक मन बदलणे बाड़ा पापी बारे स्वर्ग अन्तर तीं खुशी भुन्ति, जती कि नढ़ीनुए धर्मी मेह्‍णु के बारे ना भुन्ति, जे सोचते कि तेन्हि मन बदलणे कोई जरूरत नेईं।”

गड़ो सिक्के कथा

8“त सोचे कि ईं कोउं जिल्हाणु असी, जेस केईं दस चन्नी सिक्के असे। त अगर तेन्हि बुचा यक सिक्का गड़ घियाल त से की कती? से दीया जाई कइ त गी खुरेए लाई कइ जोउं तकर से ना मेईंयाल तोपती रेहन्ती। 9त जिखेईं से मेई घेन्ता त अपु सेहली त भेयाड़ी कठे कर कइ बोती कि ‘मोउं जुओई खुश भुए, किस कि में गड़ो सिक्का फि मेई गा।’ 10अउं तुसी जे बोता कि इहांणि यक मन बदलणे बाड़ा पापी लिए परमेश्वरे दूत सुआ खुशी मनान्ते।”

उजाड़ु कोईये कथा

11तोउं यीशु बोलु, “केसे मनखे दुई कुआ थिए। 12तेन्हि बुचा मठुड़ तेन अपु बोउ जे बोलु, ‘बोउआ, तुं जायेदाद अन्तर में जे हेस्सा असा, मेन्धे दी छड़’। त तेन अपु जायेदाद बांट छड़। 13कुछ रोजे अन्तर मठुड़ कुआ सोब कुछ बेचबुच कइ दूर देश जे घेई गा। त तेन अपु सम्हाई रुपेई गन्दे गन्दे कमी जुए मुकाई छड़े। 14जपल से सोब कुछ खर्ची गो थिआ, त तेस देश अन्तर सुआ अकाल आ, त से कंगाल भोई गा। 15तोउं त, से तेस देशे यक मेह्‍णु गी कमुण जे गा त तेन से अपु जिम सूर चराण जे लंघा। 16से चहन्ताथ कि जेस अढ़दा सूर खांतेथ तेसे बेलि से अपु पेट भरियेल, किस कि तसे धे कोई कुछ ना देन्ताथ। 17त जिखेईं से अपु होश अन्तर आ त बोता, ‘ओ यारा! में बोउए मजूरी कति सुआ रौठि मेती, होर अउं इठि ढुके मरुण लगो असा। 18अभेईं अउं खड़ी कइ अपु बोउ केईं घेन्ता त बोता कि बोउआ, मेईं परमेश्वरे त तें साम्हणे पाप किओ असा। 19त अब अउं इस लेएक ना रेहा कि तें कुआ केहलेउ। त मोउं अपु यक मजूरे ईं रखीण दिए।’”

20“तिखेईं से खड़ी कइ अपु बोउ केईं जे गा : त से होता दूर ईं थिआ कि तसे बोउए से पिछाण छड़ा त तस पुठ दाह एई गई त दौड़ दी कइ से कियाड़ी जुए शिचाणा त फोकड़िआ। 21कोईये तस जे बोलु, ‘बोउआ, मेईं परमेश्वरे त तें नजर अन्तर पाप किओ असा, होर अब अउं तें कुआ बोलुणे लेएक नेईं रिहो।’ 22पर, बोउए अपु नौखरी जे बोलु, ‘झट खरे ईं झिणे किढ़ कइ एस डबाण दिए, त हतेउ अंगोठि त खुरी जुए बूटे लोवाण दिए। 23होर यक जब्बर ईं बकरा मार कइ बणाण दिए ताकि अस खाई कइ खुशी मनाउं। 24किस कि में ए कुआ जीं कोई मर गो थिआ, से फि जी गो असा, गड़ गो थिआ, फि मेई गो असा।’ त से जाठ लाण लगे।”

25-26“पर तसे जेठा कुआ बग थिआ। जिखेईं से गीहे भेएड़ पुजा त तेनि ढोंस त घीत शुणे त यक नौखर भिआई कइ पुछु, ‘ए कि भुण लगो असु?’ 27तेन तस जे बोलु, ‘तुं भाई अओ असा, त तें बोउए यक जब्बर ईं बकरा कटोओ असा, किस कि से तकड़ा मेआ।’ 28ई बोक शुण कइ तेस लेहेर एई गई त से अन्तर ना घेण चहन्ताथ। पर तसे बोउ बाहर एई कइ तस मनाण लगा। 29त तेन बोउ जे जवाब दिता, ‘हेर! अउं एतु साल केआं तें सेवा करण लगो असा, त मेईं कदी बि तें कम जे मना नेईं किओ। तोउं बि तेईं कदी मेन्धे यक छिएड़ु बि ना दुतु कि अउं अपु मितरी जुए खुशी मनेउ। 30पर जपल तें ए कुआ जेन तें जायेदाद वेश्याई जुए उड़ाई छइ से आ त तेस जे तेईं बकरा कटा।’ 31त तेन तेस जे बोलु, ‘बे कोईया! तु त रोज मोउं जुए असा; जे बि में भिन्थ से सोब तें भिन्थ। 32पर अभेईं असी खुशी मनाण लौती, किस कि तें ए भाई जीं कोई मर गो थिआ फि जी गो असा, गड़ गो थिआ, अभेईं मेई गो असा।’”

Currently Selected:

लूका 15: pgg

Highlight

Copy