लूका 14

यीशु यक बीमार मेह्‍णु ठीक करण

1तोउं इ भु कि भक्ति करणे रोज यीशु केसे मुखिया फरीसी गी रौठि खाण जे गा। त कुछ फरीसी मेहमान जे यीशु दुश्माण थिए, तेन्हि तेस पुठ नजर रखो थी। 2तठि यक मेह्‍णु तसे सम्हाणि थिआ, जेस हत-खुर शुणणे बीमारी थी। 3एस पुठ यीशु धर्मशास्त्री त फरीसी जे बोलु, “तुं नियम अन्तर भक्ति करणे रोज केसेरी खरु करुण ठीक भुन्तु कि ना भुन्तु?” 4पर से चुपचाप बिशे। तिखेईं तेन से छुई कइ सुसुर किआ त लंघाई छड़ा। 5होर तेन तेन्हि जे बोलु, “तुं बुच ईं कोउं असा ना अगर भक्ति करणे रोज तसे खेचरा या चूर खोपर अन्तर झाड़ी घेयाल त से तिएसे तस झठ बाहर ना किढ़ता?”#लूका 13:10-17; मत्ती 12:11 6तेन्हि एस पुठ कोई जवाब ना दी बटा।

सेवा पाणि त अपफ घटाणे बारे शिक्षा

7जपल यीशु हेरु कि धामो मेह्‍णु कीं खरी खरी जगाह हेर हेर कइ बिश्ते त तेन तेन्हि जे यक बोक लाई कइ बोलु, 8“जपल कोउं तुसी ब्याहे धाम करियेल त तुस खरी खरी जगाह हेर कइ ना बिश। ई ना भुओल कि तेन तुसी केईआं बि केसे मोटे जे धाम किओ भुओल। 9त जेन तुसी दुहि जे धाम किओ असी, एई कइ तोउ जे बोलियाल, ‘इसे धे जगाह दे’ त तोउं तुसी लजेई कइ सोबी केआं कुस्तुरी जगाह पुठ बिशुण एईयेल। 10पर जपल तुसी धाम भुओल त तुस सोबी केआं कुस्तुरी जगाई बिशे, ताकि जपल से जेन तुसी जे धाम किओ असी, एईयेल त तोउ जे बोलियेल ‘ए मितरा! अगर एई कइ बिश।’ तिखेईं तोउ जुए बिशुणे बाड़ी बुच तें इज्जत बधती। 11किस कि जे कोउं बि अपफ बोडा बणान्ता से मठुड़ करिन्ता, त जे कोउं बि अपफ मठुड़ बणान्ता, से बोडा करिन्ता।”#मत्ती 23:12; लूका 18:14

12तिखेईं तेन अपफ जे धाम करणे बाड़ा जे बि बोलु, “जिखेईं तु दिसाई या ब्यादि धाम दियेल त सद अपु मितरी, भाई, रिश्तेदार या अमीर भेयाड़ जे धाम ना कर। इ ना भुओल कि से बि तोउ धाम कर कइ तें हिसाब कइ छड़ियेल। 13पर तु जपल धाम करियेल त गरीब, अन्हे, लटे त टटे जे धाम कर। 14तोउं तु धन्य भुन्ता, किस कि तेन्हि केईं तोउ तबादला देण जे कुछ नेईं। पर जपल धर्मी#14:14 इठि धर्मी मेह्‍णु से भिन्थ, जेन्हि परमेश्वर तेन्के यीशु मसीह पुठ विश्वास करणे बेलि धर्मी बणाण लगो असा। दुबारी जीन्ते, तपल परमेश्वर तेन्धे तेसे तबादला देन्ता।”

बोडी धामी कथा

15यीशु जुए रौठि खाणे बाड़ी बुचा यक जेईं अपफ जे बोडा धर्मी समझताथ। ईं शुण कइ तेनि यीशु जे बोलु, “सुआ सुखी से धर्मी मेह्‍णु भुन्ता, जे परमेश्वरे राज्य जपल एन्ता, तठि बिश कइ रौठि खांता।” 16त यीशु तस जे बोलु, “केन यक मेह्‍णु यक बोडी धाम दिती त सुआ मेह्‍णु भिए। 17जिखेईं रौठि बणि गई त तेन अपु नौखरे केआं धाम किओ मेह्‍णु जे बोलाउ, ‘एईए, अब रौठि बणि गो असी।’ 18पर से सोब जेईं बहाना बणुण लगे। पेहले मेह्‍णु तस जे बोलु, ‘मेईं यक जिम खरीदो असी, त जरूरी असु कि तेस हेरुं। छने! मोउं माफ कर।’ 19त दोके मेह्‍णु बोलु, ‘होता, मेईं पंज जोड़ा चूर खरीदो असे, त तेन्हि परखुण जे घेण असु। तें छने, मोउं माफ कर।’ 20टेके मेह्‍णु बोलु, ‘मेईं होता अभेईं ब्याह किओ असा, त अउं ना एई सकता।’”

21“तेन नौखर एई कइ अपु मालिक जे सोब बोके शुणाई छइ। त तेन मालिके लेहरी कइ अपु नौखर जे बोलु, ‘झट शेहरे बाजार गा त जतु बि कंगाल, अन्हे, लटे, टटे असे सोब इए घिन आई।’ 22तेन नौखरे दुबारी एई कइ बोलु, ‘ए मालिका, जीं तुसी बोलो थी, मेईं तिहांणि किउ। पर हउ बि जगाह बचो असी।’ 23त मालिके नौखर जे बोलु, ‘सम्हाई बत त बग बघुईं गा त मेह्‍णु जब्बरदस्ती घिन आई ताकि में गी भरी घियेल। 24किस कि अउं तोउ जे बोता कि धामो मेह्‍णु बुचा कोई बि में रौठि ना चखता।’”#लूका 4:16-30

यीशु चेला बणणे मुल

25जिखेईं बोडा हुसुड़ा यीशु जुए घेण लगो थिआ त तेन पतूं हेर कइ तेन्हि जे बोलु, 26“कोई बि जे में चेला बणुण जे एईयेल त अपु ईया बोउ, धाणि, जुएली, गभुर, भाई भेण, आं, अपु जिन्‍दगी बि तेस अगर मोउं केआं सुआ ट्यारे भुओल त से में चेला ना बण सकता। 27होर जे कोउं अपु क्रूस ढीड़ कइ मरुण तकर में पता न एईयाल, से में चेला ना बण सकता।”#मत्ती 10:37,38; 16:24; मरकुस 8:34; लूका 9:23

28तोउं तेन तेन्हि जे हउ बि बोलु कि “तुसी बुच ईं कोउं असा, जे यक गी बणाण चहन्ता त पेहले बिश कइ जोड़ा-जामा ना कता कि गी बणाण जे तस केईं रज्जि रुपेई असे कि नेईं? 29ईं ना भुओल कि से खाई दी कइ गी पूरु बणाई ना बटियेल। त सम्हाई मेह्‍णु तस हेर कइ ईं बोते बोते मखोल बणाण लगियेल कि, 30‘ए मेह्‍णु गी त बणाण लग गो थिआ, पर पूरु ना बणाई बटु’। 31कोई बि राजा होरे राजे जुए लड़ाई करण जे घेण केआं पेहले बिश कइ सोच विचार कता। त से हेरता कि जे बिह हजार सपाही घिन कइ में खिलाफ एन्ता, अउं कि दस हजार सपाही नी कइ तस हराई सकता ना? 32ना त से तेस केआं दूर बिशोरे राजदूत लंघाई कइ तेस जुओई समझौता करण चहन्ता। 33अउं ए सोब तोउं बोलुण लगो असा, ताकि तुसी बुचा जे बि में चेला बणुण चहन्ता तस पता लगियेल कि जोउं तकर से अपु सोब कुछ ना छड़ियाल, तोउं तकर से में चेला ना बण सकता।”

बजन स्वादे लुण

34“लुण त खरु असु, पर अगर लुणे#14:34 जे चेले, अखिरि वकत तकर यीशु पता ना घेन्ते, तस बोक ना मानते, से इस बजन स्वादे लुणे ईं बेकार भोई गो असे। स्वाद खतम भोई घेईयाल त केस चीजे बइ से दुबारी लुणकी बणतु? से केसे चीजी बेलि बि लुणकी ना भुन्तु। 35ना त से जिमि, होर ना खादी कम एन्तु।#14:35 जन अन्तर पोटासियम क्लोराईड धातु बणाण जे लुण कम एन्तु, जेसे बेलि जिमि अन्तर सुआ अनाज भुन्तु। एसे हियुंत खाद सुसुर रखुंण जे बि इस्तेमाल कते। तस त मेह्‍णु बाहर फटाई छते।”#मत्ती 5:13 तोउं तेन जोर जुओई बोलु, “अगर तुस में बोक ध्यान जोई शुणियेल त तुस समझ घेन्ते।”

Currently Selected:

लूका 14: pgg

Highlight

Copy