लूका 13

मन बदल, ना त मुकी घेन्ता

1तेस टेम हुसुड़े केआं कुछ मेह्‍णु एई कइ यीशु जुए तेन्हि गलीले मेह्‍णु के बारे बोक करण लगे, जेन्हि मारी कइ तेन्के लहु रोमी राज्यपाल पिलातुसे तेन्के भकत जुए मिआई छो थिउ। 2यीशु तेन्हि जे जवाब दी कइ बोलु, “तुस कि समझते ना कि ए गलीले मेह्‍णु होरे मेह्‍णु केआं ज्यादा दुष्ट थिए, जे तेन्हि पुठ ईं बुखता आई? 3अउं तुसी जे बोता कि नेईं, पर अगर तुस अपु अपु मन ना बदलते त तुसी सोबी जुए बि इहांणि भुन्तु। 4या तुस ईं समझते ना कि शीलोह इलाके अन्तर जे अठारा मेह्‍णु तस पेहरा देणे बाड़ी छपिर झड़णे बेलि मरी गे, से कि यरुशलेमे होर मेह्‍णु केआं बि सुआ पापी थिए ना? 5अउं तुसी सम्हाई जे बोता कि ना, पर अगर तुस अपु अपु मन ना बदलते त तुस बि तिहांणि खतम भोई घेन्ते।”

परमेश्वरे धीरे बारे कथा

6तोउं यीशु ई कथा बि शुणाई : “केसे यक जिमदारे दछि बग अन्तर यक अंजीरे बुटा बि थिआ। त यक लिंग से अंजीर टाण जे आ त तेस कुछ ना मेउ। 7त तेन तेस बगे रखवाली करणे बाड़े जे बोलु, ‘हेर, टाई साल केआं अउं एस बुटे फल तोपुण जे एन्ता, पर अपल तकर यक बि फल नेईं मेओ। एस बुटा कटिण दे, किस बेकार एस जिम खराब कता?’ 8त तेन तेस जिमदार जे बोलु, ‘ए मालिका! एस यक साल हउ बिशिण दिए। अउं एसे चोहरो कना खनि कइ खाद त पाणि छता। 9तोउं अगर फल दियेल त ठीक असु, ना त एस काट छते।’”

भक्ति करणे रोज यक जिल्हाणु सुसुर करीण

10कोई यक भक्ति करणे रोज यीशु यक अराधनालय अन्तर शिचालण लगो थिआ। 11तठि यक जिल्हाणु थी जेस अठारा साल केआं यक दुष्ट आत्मा कमजोर करण लगो थी। त से कुबड़ी भोई गो थी। से कीं बि सुसुर ना भोई बटतीथ। 12यीशु तसे धे हेर कइ भिआई त बोलु, “ए जिल्हाणु, तु अपु कमजोरी केआं छूट गई।” 13तिखेईं तेन तस पुठ हतेउ रखु त से झट सुसुर भोई गई त परमेश्वरे महिमा करुण लगी। 14किस कि यीशु से भक्ति करणे रोज सुसुर किओ थी त अराधनालये मुखिया चौड़ा भोई कइ मेह्‍णु जे बोलुण लगा, “छेआ रोज असे, जेन्हि अन्तर कम करुण, त तेन्हि रोज अन्तर एई कइ सुसुर भुण। पर भक्ति करणे रोज ना।” 15ईं शुण कइ प्रभु बोलु, “अरे कपटिया! कि भक्ति करणे रोज तु अपु गौड़े खोल कइ पाणि पिआण जे ना नेन्ता ना? 16त कि ई ठीक नेओथ ना कि ए जिल्हाणु जे अब्राहमे कुई भो, जे शैताने अठारा साल केआं बन्हि रखो थी, भक्ति करणे रोज अस बन्हुण केआं छुड़कियेल?” 17जपल तेन ए बोक बोली त तसे सोब दुश्माण लजेई गे त पूरा हुसुड़ा तसे बोडे बोडे कमी हेर, जेन्हि से तेन्हि दिनि कताथ, तेन्के बेलि खुश भोई गे।

शरहेउ रोए कथा

18तोउं यीशु तेन्हि जे बोलु, “परमेश्वरे राज्य केसे ईं असा त मोउं तसे बराबरी केस जुए करीण? 19से शरहेउए रोए ईं असा, जे केनि मेह्‍णु अपु बग अन्तर बाउ त से बोडी कइ यक बुटा बण गा।#दानियेल 2:31-35,44,45; 4:12,21 त चड़ी चखुरु तसे डाई पुठ गुला बणा।”

टकेणे कथा

20तोउं यीशु बोलु, “परमेश्वरे राज्य केस जुए बराबरी करीण? 21से टकेणे ईं असा। जे केनि जिल्हाणु नी कइ टाई बाटि आटे अन्तर मिआ, त मठे मठे से पूरा आटा टकी गा।”

संकड़े दुआर

22यीशु ग्रां ग्रां त शेहर शेहर शिचालते शिचालते यरुशलेम शेहर जे घेण लगो थिआ। 23त केनि तेस केआं पुछु, “ए प्रभु, कि बचणे बाड़े घट भुन्ते ना?” त तेन तेन्हि जे बोलु, 24“अउं बोता कि संकड़े दुआरे बइ अन्तर घेणे कोशिश करे। किस कि अउं तुसी जे बोता कि सुआ मेह्‍णु घेणे कोशिश कते, पर से घेई ना बटते।#मत्ती 7:13-14 25अभेईं दुआर खुलु असु।#13:25 दुआ खुलु असु ताकि मेह्‍णु बच सकियेल। पर जपल गीहे मालिक खड़ भोई कइ दुआर खुणुक छता, त तुस बाहर रेही घेन्ते त दुआर घमकाई कइ बोते ‘ए प्रभु, मोउं जे दुआर खोल’ त से जवाब देन्ता ‘मोउं पता नेईं, तुस कोउं भिन्थ। अउं तुसी ना पिछाणता।’ 26तोउं तुस बोलुण लगते, ‘असी तुं सम्हाणि खउ त पिउ, होर तु हें बाजार अन्तर शिचालताथ।’ 27पर से बोता, ‘अउं तुसी जे बोता कि अउं तुसी न पिछाणता। तुस कोठियाणि भिन्थ? ए दुष्ट मेह्‍णुओ! तुस सम्हाई मोउं केआं दूर भो!’ 28-29जपल तुस अपफ परमेश्वरे राज्य केआं बाहर त अब्राहम, इसहाक, याकूब त सोब भविष्य वक्ती त उत्तर त दखण केआं त हर कनारी बइ सुआ मेह्‍णु एई कइ परमेश्वरे राज्य अन्तर बिशो हेरियेल, त तुसी रोलुण शींकुण त मगिर चठ देण एन्ती।#मत्ती 8:11,12; 22:13; 25:30 30त परमेश्वरे राज्य अन्तर घेणे मेह्‍णु बुच तुस हेरते कि कुछ मेह्‍णु, जे अगर असे, से पतूं भोई घेन्ते त होर कुछ मेह्‍णु जे पतूं असे, से अगर भोई घेन्ते।”#13:30 इठि मतलब असु कि “कुछ मेह्‍णु जे कमजोर त अणजाण असे, से बोडा भोई घेन्ते त कुछ मेह्‍णु जे बोडे असे त खास असे, से कमजोर त अणजाण भोई घेन्ते।” #मत्ती 19:30; 20:16; मरकुस 10:31

हेरोदेसे दुश्माणी

31तिखेईंए कुछ फरीसी एई कइ यीशु जे बोलुण लगे, “इठिआ निस कइ घेई गा, किस कि हेरोदेस तोउ मारण चहन्ता।” 32त तेन तेन्हि जे बोलु, “घेई कइ तेस सगाल#13:32 यीशु इठि हेरोदेस जे सुगालि तोउं बोता किस कि सुगालि ईं हेरोदेस बि चलाक त ठग थिआ। जे बोल छड़ कि हेर, अउं आज त शुई दुष्ट आत्मा बाहर किढ़ता, त बीमारी सुसुर कता त टेका रोज अपु कम पूरु कइ छता, 33तोउं बि मोउं आज, शुई त पाशु घेण जरूरी असा,#13:33 यीशु हेरोदेसे राज्ये सीमा छड़ कइ घेण असु, किस कि तस पता थिआ के तस यरुशलेम अन्तर मरुण असु। से हेरोदेस हेर डर कइ नेओथ घेण लगो। किस कि ईं कदी ना भुई सकतु कि कोई भविष्य वक्ता यरुशलेम शेहर केईआं बाहर मरियाल।”#लूका 18:31-33; मत्ती 21:11

यरुशलेम जे रोलुण

34“ए यरुशलेम शेहरे मेह्‍णुओ! ए यरुशलेम शेहरे मेह्‍णुओ! तुस, जे भविष्य वक्ते मार छते, होर जे बि मेईं तुसी केईं लंघा, तेन्हि मरण तकर घोड़िआन्ते। मेईं कत लिंगि चहु कि जीं कुकिड़ अपु कुकिड़ियांचु अपु पंखोड़ी पड्डे किठे कती तिहांणि अउं बि तुसी किठे कर छउं। पर तुसी न मनी। 35त अब तुसे जाणे, त तुं कम जाणे। #लूका 21:20-24 अउं तुसी जे बोता कि जोउं तकर तुस ना बोलियेल कि, ‘जे प्रभु नओं केआं अओ असा, से धन्य असा’#छुआंरी 118:26 तोउं तकर तुस मोउं कदी हेर ना बटते।”

Currently Selected:

लूका 13: pgg

Highlight

Copy