यूहन्ना 10

पुहाल त तसे ढडुड़

1तोउं यीशु तेन्हि जे बोलु, “अउं तुसी जे बोता कि जे बि गुआड़ी पाठि बइ #10:1 यहूदी मेह्‍णु पूरे ग्रांए ढडुड़ बकीर यक जगाई रखतेथ। तठि यक दुआर रखतेथ जेठि यक पेहरेदार बिश्ताथ। त जपल चारणे टेम एन्ताथ त पुहाल तठि एई कइ अपु अपु ढडुड़ु के नओं दी कइ बचरान्‍तेथ त चरुण जे नेन्तेथ। अन्तर ना एन्ते, पर बाड़ी पुठ बइ एन्ते, से चोर त डाकु भुन्ते। 2पर सद पुहाल पाठि उघाड़ि कइ अन्तर एन्ता 3तस जे दुआर पुठ पेहरा देण बाड़ा पाठि उघाड़ता। ढडुड़ तसे अवाज पिछाणते त से अपु ढडुड़ नओं दी दी कइ बचरान्‍ता त तेन्हि बाहर किढ़ता। 4त से अपु सम्हाई ढडुड़ बाहर किढ़ कइ तेन्के अगर अगर घेन्ता त ढडुड़ तसे पता पता घेन्ते। किस कि से तसे बचराण पिछाणते। 5से अपिछाणो मेह्‍णु पता ना घेन्ते। पर तस केआं दूर दौड़ते, किस कि तेन्हि तसे बचराण ना भुन्तु पिछाणो।” 6यीशु तेन्हि मेह्‍णु जे ई बोक लाई, पर तेन्हि ई समझ ना आई कि तेन ई बोक किस लाई।

यीशु, खरा पुहाल

7तोउं यीशु दुबारी तेन्हि जे बोलु, “अउं तुसी जे बोता कि गुआड़ी पाठि जेन बइ ढडुड़ अन्तर घेन्ते, बाहर निस्ते, से अउं भो। 8मोउं केआं अगर जे बि पुहाल अओ थिए, से सम्हाई चोर त डाकु थिए। तोउं त में ढडुड़ु तेन्के बचराण ना पिछाणी। 9अउं ईं दुआर असा: अगर कोई मोउं बइ अन्तर एन्ता त से बच घेन्ता त एन्ता घेन्ता रेहन्ता, त तेस अपु दाणा पाणि मेता रेहन्ता। 10चोर कुछ होरे कम जे ना, पर चोरुण जे, मारण जे त बरबाद करण जे एन्ता। अउं तोउं अओ असा कि मेह्‍णु जीवन मेईंयाल, जे जीवन खरा त रज्जि असा।”

11“खरा पुहाला अउंए असा; खरा पुहाल ढडुड़ु जे अपु जान देन्ता 12पर जे मजूर असे त जे ढडुड़ मालिक नेईं, से लाघी हेर कइ दौड़ देन्ते। त लाघ एई कइ कुछ ढडुड़ टान्‍ता त होरे ढडुड़ बिडिड़ घेन्ते। 13किस कि से मजूर असे त दौड़ते। तेन्हि ढडुड़ु के कोई परवाह नेईं।”

14-15 # मत्ती 11:27; लूका 10:22 “खरा पुहाला अउंए असा। जीं अउं अपु बोउ जाणता त बोउ मोउं जाणता, तीं अउं अपु ढडुड़ जाणता त से मोउं जाणते। त अउं तेन्हि जे अपु जान देन्ता। 16में होरे बि ढडुड़ असे#10:16 होरे ढडुड़ मतलब होरे जाति मेह्‍णु, जे यहूदी जाति नेओथ।, जे इस गुआड़ अन्तर नेईं।#यूहन्ना 11:51-52; 12:32; मत्ती 28:19; रोमी 1:16; इफिसुस 3:6 से में बचराण पिछाणते, त मोउं से बि अण्हणे जरूरी असे ताकि यके लछवारा त यके पुहाल भुओल। 17अउं अपु मर्जी जुए अपु जान देन्ता, ताकि अउं दुबारी तस वापिस नी सकुं। तोउं त बोउ मोउं जुओई परेम कता। 18में जान कोई मोउं केआं छुड़कान्ता नओं, पर अउं अपफ देन्ता, किस कि अपु जान देणे त वापिस नेणे हक में असा। में बोउए मेन्धे ई हक दुतो असा।”

19यीशु ईं बोलुणे बझई जुए यहूदी मेह्‍णु बुच फूट भोई गई। 20तेन्हि बुचा सुआ जेईं बोलुण लगे, “एस अन्तर दुष्ट आत्मा असी त ए जगरी गो असा। एसे बोके किस शुणते?” 21पर, होरे बोलु, “ए बोक तेस मेह्‍णु नेईं जेस अन्तर दुष्ट आत्मा असी। दुष्ट आत्मा कि अन्हे टीर सारेर बटती ना?”

यहूदी नेते यीशु खिलाफ भुण

22तढ़ेया पता यरुशलेम अन्तर हन्नुकाह#10:22 ई.पू 168 - 167 अन्तर अंतियाख एपिफानुस त सीरियाई मेह्‍णु यरुशलेमे खिलाफ लड़ाई कर कइ जीत गे त तेन्हि यरुशलेम देहेर अन्तर अपु मुख्य देवता जयूस नओं पुठ यक सूरे भकत दिती त से देहेर जुठा किआ। टाई साल पता, यहूदा मक्काबिस नोउएं यक यहूदी नेता देहेर पुठ दुबारी कब्जा कर कइ से दुबारी शुचा किआ त परमेश्वर नओं पुठ खोल छड़ा। तस याद कर कइ हर साल यहूदी मेह्‍णु हन्नुकाह त्योहार मनान्ते। नओएं यक त्योहार आ। तपल हियुंते मेहना लगो थिआ। 23त यीशु देहेर अन्तर सुलैमाने मण्डप अन्तर हंटण लगो थिआ। 24तपल यहूदी नेती एई कइ यीशु बटेरा त पुछु, “तु कपल तकर असी इस उलझन अन्तर रखता? अगर तु मसीह असा, त असी जे खुल कइ बोलीण दे।” 25यीशु तेन्हि जे जवाब दिता, “मेईं तुसी जे बोलु, पर तुसी में बोक ना मनी। अब जे जे कम अउं अपु बोउए हक जुए कता, सेईंए में उगाह असे। 26पर तुस तोउं विश्वास ना कते, किस कि तुस में ढडुड़ ना भो। 27में ढडुड़ में बचराण शुणते त अउं तेन्हि जाणता। से में पतोती एन्ते। 28त अउं तेन्हि अमर जीवन देन्ता। से कदी ना मरते त में हतेउ केआं ना छुड़ुकते। 29में बोउ, जेन से मेन्धे दुतो असे, सोबी केआं ताकतवर असा। त कोई बि तेन्हि बोउए हतेउ केआं छुड़कइ ना बटता। 30अउं त बोउ यक असा।”

31ई शुण कइ यहूदी मेह्‍णु तस मारण जे घोड़ टाण लगे। 32त यीशु तेन्हि जे बोलु, “मेईं अपु बोउए कनारा सुआ चमत्कारे कम कर कइ हरालो असे। त तुस तेन्हि कमी बुचा केस कमे लिए मोउं घोड़िआई दी कइ मारण चहन्ते?” 33यहूदी मेह्‍णु तस जे बोलु, “चमत्कारे कमे लिए अस तोउ ना मारते, पर परमेश्वरे बुराई करणे बझई जुए। तु मनख भोई कइ बि अपफ परमेश्वरे बराबरी कता, तोउं त तोउ मारते।” 34यीशु तेन्हि जे बोलु, “तुं धरमे कताब अन्तर कि ईं नेईं लिखो ना,

‘मेईं बोलु कि तुस में पीढ़ी भो।’#छुआंरी 82:6”

35-36“अगर परमेश्वरे तेन्हि जे ‘अपु पीढ़ी’ बोलु, जेन्के बुच तसे वचन पुजी गो असे, त तुस मोउं जे कीं परमेश्वरे बुराई कता बोते जपल मेईं बोलु कि ‘अउं परमेश्वरे कुआ भो’? अखिरकार परमपिता परमेश्वरे अउं शुचेर कइ इस धरती पुठ जे लंघो असा। (धरमे कताबे बोक की कदी बदलिन्‍ती ना?) 37अगर अउं अपु बोउए कम ना कता त बेशक मोउं पुठ विश्वास ना करे। 38पर अगर अउं तसे कम कता, त मोउं पुठ ना, कम से कम तेसे कमी पुठ त विश्वास करे जे अउं कता, ताकि तुसी पता लगाल कि अउं बोउ अन्तर त बोउ में अन्तर असा।” 39तोउं यहूदी मेह्‍णु दुबारी तस टाणे कोशिश की, पर से तेन्के हतेउ केआं छुड़क गा।

40 # यूहन्ना 1:28 तोउं यीशु यरदन दरेउ पार, तेस जगाई जे घेई गा जेठि यूहन्ना पेहले मेह्‍णु पाणि अन्तर चुसताथ त तठि बिशा। 41त सुआ मेह्‍णु तस केईं एन्तेथ त अपफ बुच बोतेथ कि “यूहन्ने कोई चमत्कारे कम ना किए पर एसे बारे तेन जे बि बोलो थिउ; से सम्हाई सच्चु थिउ”। 42तठि सुआ मेह्‍णु यीशु पुठ विश्वास किआ।

Currently Selected:

यूहन्ना 10: pgg

Highlight

Copy