यूहन्ना 9

यीशु अन्हा मेह्‍णु सारेरण

1अपु चेली जुए घेन्ते घेन्ते यीशु यक मेह्‍णु का, जे मठड़ियारी केआं अन्हा थिआ। 2त तसे चेले तस केआं पुछु, “ए गुरु, ए केसे पापी के बझई जुए अन्हा जमा? कि अपु पापी के बझई जुए ना अपु ईये बोउए?” 3यीशु तेन्हि जे जवाब दिता कि “ए ना त अपु पापी के बझई जुए होर ना अपु ईये बोउए पापी के बझई जुए अन्हा जमा, पर तोउं जमो असा कि परमेश्वरे शक्ति तसे बझई जोई हेरी घियेल। 4जेन अउं लंघो असा, तसे कम जोउं तकर अउं इस धरती पुठ असा, तपल ईं करुण असु। किस कि अन्हारु भुण लगो असु#9:4 यीशु ई बोलुणे मतलब असु कि इस धरती केआं घेणे टेम एण लगो असा। तपल कुछ कम ना करिन्तु। जपल कोई कम कइ ना सकता। 5जपल तकर अउं इस धरती पुठ असा, अउं इस धरती टगड़ियार भो।”#मत्ती 5:14; यूहन्ना 8:12 6ईं बोल कइ तेन भीं थुकु त जन जुए मिआई कइ तसे टीरी पुठ लाउ। 7त तस जे बोलु, “गा, त शीलोह नओएं पाणि लाबु अन्तर धोई छड़!” (शीलोह मतलब “लंघो” असा)। त तेन तठि घेई कइ अपु टीर धुए त से सारी कइ अपु गी दे वापिस एई गा।

8तपल तसे भेयाड़ त जेन पेहले से भीक मगण काओ थिआ तस हेर कइ बोलुण लगे कि “ए कि सेईंए ना भो ना, जे बिश कइ भीक मगताथ?” 9कुछ मेह्‍णु बोलु, “ए सेईंए भो।” त होरी बोलु, “ना, ए तसे ईं असा।” पर तेन अन्हे बोलु कि “अउं सेईंए भो।” 10त से तस केआं पुछुण लगे, “तें टीर कीं कइ सारीए?” 11तेन बोलु, “यीशु नओएं यक मेह्‍णु जने खा बणाई कइ में टीर पुठ ला त बोलु कि शीलोहे पाणि लाबु अन्तर घेई कइ धूण दे। मेईं घेई कइ धुउ त सारी गा।” 12तेन्हि तस केआं पुछु, “से को गा?” त तेन बोलु, “मोउं नेईं पता।” 13त मेह्‍णु तस अन्हे फरीसी केईं जे घिन गे। 14(जेस रोज यीशु जने खा बणाई कइ तसे टीरी पुठ लओ थिआ, से भक्ति करणे रोज थिआ।)

15त फरीसी तस केईआं पुछु, “तें टीर कीं सारीए?” त तेन तेन्हि जे बोलु, “तेन में टीरी पुठ जन ला, त मेईं से धुए त तिखेईं केआं खड़ केण लगु।” 16तस बोक शुण कइ कुछ फरीसी बोलुण लगे, “ए मेह्‍णु परमेश्वर केआं भोई ना सकता, किस कि ए भक्ति करणे रोजे नियम ना मानता।” पर होरी बोलु, “पापी मेह्‍णु एसे ईं चमत्कारे कम कीं कइ सकते?” त तेन्हि बुच फूट भोई गई। 17त अखिर अन्तर तेन्हि तेस अन्हे केआं पुछु, “जेन तें टीर सारेरे, तसे बारे तु कि बोता?” त तेन बोलु, “से यक भविष्य वक्ता भो।” 18पर यहूदी नेती विश्वास ना भुआ कि जे अभेईं हेरण लगो असा, से सच्चे बि पेहले अन्हा थिआ ना। त तेन्हि तसे ई बोउ भिए 19त तेन्हि केईआं पुछु, “ए कि तुं कुआ भो ना, जेसे बारे तुस बोते कि ए मठड़ियार केआं अन्हा थिआ? त अब ए कीं हेरता?” 20तसे ईये बोउए बोलु, “असी त पता असा कि ए हें कुआ भो त जमणे केआं ईं अन्हा थिआ। 21पर असी ईं पता नेईं कि अभेईं ए कीं हेरता त केन ए ठीक किआ। से अब मोटा भोई गो असा, त तस केआं पुछे। से अपफ बोता।” 22ईं बोक तसे ईये बोउए यहूदी नेती केआं डर कइ बोली, किस कि तेन्हि पेहले ईं मेह्‍णु खबरदार कइ छो थिए कि जे बि तस मसीह बोलाल त से अराधनालय केआं बाहर किढ़िन्ता#9:22 यहूदी मेह्‍णु अराधनालय अन्तर बोक-धोक कतेथ, त यकी होरी जुए मीतेथ। अराधनालय केआं बाहर कढ़णे मतलब कि तेन्हि जुए कोई लेण देण ना कते, बोक विचार बि ना कते।। 23तोउं त तसे ईये बोउए बोलु कि “ए अब मोटा भोई गो असा, एस केआं पुछे।”

24तोउं तेन्हि तस अन्हे जे दुबारी भिआई कइ बोलु, “परमेश्वरे सोह कर त सच्चु बोल। किस कि असी पता असा कि जेन मेह्‍णु तु ठीक किआ, से त यक पापी असा।” 25तेन बोलु, “मोउं पता नेईं कि से पापी असा कि नेईं, पर यक बोक मोउं पता असी कि पेहले अउं अन्हा थिआ त अभेईं हेरण लगो असा।” 26तेन्हि तस जे दुबारी बोलु, “तेन तोउ जोई की किउ? तें टीर कीं कइ सरेरे?” 27तेन अन्हे तेन्हि जे बोलु, “मेईं पेहले ईं तुसी जे बताई छओ असु, पर तुस में ना शुणे; त अब दुबारी किस शुणुण चहन्ते? तुस बि तसे चेले बणुण चहन्ते ना?” 28तोउं तेन्हि तस जे ग्या दी कइ बोलु, “तु तसे चेला भो, अस त मूसे चेले भीन्‍थ। 29असी पता असा कि परमेश्वर मूसा जुए बोक की, पर अस ना जाणते कि एस मेह्‍णु जुए कोउं बोक कता त ए कोठियाणि भो।” 30त तेन तेन्हि जे बोलु, “ए त गजब भोई गा कि तुसी पता नेईं से कोठियाणि भो, तोउं बि तेन अउं सरेरा। 31असी पता असा कि परमेश्वर पापी मेह्‍णु इच्छा पूरी ना कता। पर अगर कोई परमेश्वरे भक्त असा, तसे इच्छाई के मुताविक जीन्ता त परमेश्वर तसे शुणता। 32धरती शुरुवात केआं ईं कदी नेईं भुओ कि केनि अन्हा जमो मेह्‍णु सरेरा। 33अगर से परमेश्वर केआं ना भुन्ताथ त कुछ बि कइ ना सकताथ।” 34तेन्हि तस जे लेहरी कइ बोलु, “तु त कत पाप अन्तर जमो असा त असी की शिचालता?” त तेन्हि से अराधनालय केआं बखरा छड़ा।

मने अन्हे

35यीशु पता लगा कि यहूदी नेते से अन्हा अराधनालय केआं बखरा कइ छड़ा त जपल से तस जोई मिआ त बोलु, “तु कि मनखे कुआ पुठ विश्वास कता ना?” 36त तेन तस जे बोलु, “ए प्रभु, से कोउं भो? अउं बि तस पुठ विश्वास करण चहन्ता।” 37यीशु तस जे बोलु, “तेईं से काओ असा। जे तोउ जुए बोक करण लगो असा, सेईंए भो।” 38तेन बोलु, “ए प्रभु, अउं विश्वास कता।” त तसे खुरी पुठ उटेऊ बिश गा। 39त यीशु बोलु, “अउं इस धरती पंची करण जे अओ असा,#यशायाह 6:9; मत्ती 13:14-15; मरकुस 4:12; लूका 8:10 ताकि जे अन्हे असे, से सारे भोई घियेल, त जे सारे असे, से अन्हा भोई घियेल।”#9:39 यीशु मतलब ई असा कि तस एणे बेलि जेन्हि परमेश्वरे इच्छाई पता नेईं, तेन्हि पता लगाल, त जे सोचते कि “असी परमेश्वरे इच्छाई पता असा”, तेन्हि पता ना लगता। 40त जे फरीसी तस जुए थिए ई शुण कइ तस जे बोलु, “अस बि कि अन्हे असे ना?” 41यीशु तेन्हि जे बोलु, “अगर तुस अन्हे भुन्तेथ त तुसी पुठ कोई दोष ना एन्ताथ। पर किस कि तुस अन्हे भोई कइ बि बोते ‘अस सारे असे’ त तुस झूठ बोते। तोउं त, तुसी पुठ दोष लगोरा रेहन्ता।”

Currently Selected:

यूहन्ना 9: pgg

Highlight

Copy