यूहन्ना 11

लाजारे मरुण

1 # लूका 10:38,39 बैतनिया ग्रां अन्तर लाजार नओएं यक मेह्‍णु थिआ, जे बीमार भोई गा। तसे दुई भेण मार्था त मरियम थी। 2#यूहन्ना 12:3(ए सेईंए मरियम भो, जे पता प्रभु पुठ मुश्कि बाड़ा तेल छइ कइ तसे खुर अपु झशुड़े बइ धूशती। एसे भाई लाजार बीमार थिआ।) 3त लाजारे भेण यीशु जे ई जवाब लंघाउ कि “ए प्रभु, शुणे। तुं ट्यारा मितर लाजार बीमार भोई गो असा।”

4जपल यीशु केईं ई जवाब पुजु त तेन बोलु, “ए बीमारी मरण जे नेईं, बल्कि परमेश्वरे शाने लिए असी, जेसे बेलि परमेश्वरे कुआ जे अउं असा, में शान बधती।”

5यीशु मार्था, मरियम त लाजार ट्यारे थिए। 6पर जपल तेन शुणु कि लाजार बीमार भो असा, त से तठि दुई रोज हउ बिशा। 7तढ़ेया पता तेन अपु चेली जे बोलु, “हंटे! अस दुबारी यहूदिया राज्य जे घेन्ते।” 8त चेली तस जे बोलु, “ए गुरु! होता कुछ रोज पेहले त तठियाणि मेह्‍णु तोउ घोड़िआई कइ मरण चहन्तेथ, त तुस दुबारी ता घेण किस चहन्ते?” 9यीशु तेन्हि जे बोलु, “यक रोज अन्तर कि बाराह घंटे टगड़ियार ना भुन्ति ना? त अगर कोई दिसाई हंटाल त से उछुट ना घेन्ता। किस कि इस धरती टगड़ियारी बेलि तस सुसुर केतु। 10पर अगर कोई राति हंटाल त से उछुट घेन्ता, किस कि तपल टगड़ियार ना भुन्ति।” 11ई बोल कइ पता से तेन्हि जे बोलुण लगा, “हें मितर लाजार उंघो असा, पर असी घेई कइ से खड़ेरण असा।” 12तपल चेली तस जे बोलु, “ए प्रभु, अगर से उंघो असा त ठीक भोई घेन्ता।” 13यीशु त तेन्हि जे लाजारे मरणे बारे बोलो थिउ, पर से समझे कि से उंघो असा। 14त यीशु तेन्हि जे सुसुर बोलु, “लाजार मरी गो असा। 15पर किस कि अउं तठि नेओथ, अब तुस मोउं पुठ विश्वास करियेल। त तुं लिए अउं खुश असा। हंटे! तस केईं घेन्ते।”

16तपल थोमा, जेस जे जूंठ#11:16 मूल भाषा अन्तर “दिदुमुस” असा, जेस मतलब “जूंठ” असु। बि बोतेथ होरे चेली जे बोलु, “चले, अस बि तस जुए मरण जे घेन्ते।” 17त यीशु तठि पूज कइ पता लगा कि लाजार मर कइ कब्र अन्तर छोओ चोउर रोज भोई गो असे।

यीशु, दुबारी जीआणे बाड़ा

18बैतनिया ग्रां यरुशलेम केआं कोई टाई किलोमिटर दूर थिउ। 19त तठिआ सुआ यहूदी मेह्‍णु मार्था त मरियम केईं मीण जे त बर्तण करण जे ओ थिए।

20त जपल मार्था पता लगा कि यीशु पुजी गो असा त से तस जुए मीण जे गई, पर मरियम गी बिशी। 21मार्था यीशु जे बोलु, “ए प्रभु, अगर तुस इठि भुन्तेथ त में भाई कदी ना मरताथ 22त अभेईं बि अउं जाणती कि जे बि तुस परमेश्वर केईआं मगेल, से तुं धे देन्ता।” 23यीशु तस जे बोलु, “तें भाई दुबारी जीन्ता।” 24मार्था तस जे बोलु, “मोउं पता असा कि परमेश्वरे न्याय करणे रोज से दुबारी जीन्ता।” 25यीशु तस जे बोलु, “दुबारी जीआणे बाड़ा त जीवन देण बाड़ा अउंए भो। जे बि मोउं पुठ विश्वास कता, से मर बि घियाल, तोउं बि दुबारी जी घेन्ता। 26त जे जीन्ता असा त मोउं पुठ विश्वास कता, से कदी ना मरता। तु कि इस बोक पुठ विश्वास कती ना?” 27तेन तस जे बोलु, “आं, ए प्रभु अउं विश्वास कइ छो असा कि परमेश्वर केआं जे मसीह धरती पुठ एणे बाड़ा असा, से परमेश्वरे कुआ तुईएं भो।”

यीशु रोलुण

28ईं बोल कइ मार्था घेई कइ अपु भेण मरियम जे मठे बोलु, “गुरुजी पुजी गो असा, त तु भिहो असी।” 29त मरियम ई शुण कइ तपले ईं खड़ भुई त यीशु केईं आई। 30(यीशु अपल तकर ग्रां अन्तर नेओथ पुजो। से तठि थिआ, जेठि मार्था तस मेओ थी।) 31तपल जे यहूदी तसे गी थिए त तेन्हि जोई मीण जे ओ थिए, हेरु कि मरियम अजगता खड़ भुई कइ बाहर नश गई, त तेन्हि समझु कि से कब्र पुठ रोलुण जे गो असी। त से सम्हाई तस पतोती गे।

32तोउं मरियम तठि पुजी जेठि यीशु थिआ, त तस हेर कइ तसे खुर बिन कइ बोती, “ए प्रभु, अगर तु इठि भुन्ताथ त में भाई ना मरताथ।” 33जपल यीशु मरियम त तसे पतोती अओ यहूदी मेह्‍णु रोलते काए त तस बि कष्ट त तीं दुख भुआ 34त बोलु, “तुसी से कोठि छोओ असा?” त तेन्हि बोलु, “ए प्रभु, चले हेरिण दिए।” 35त यीशु रोलुण लगा। 36यहूदी मेह्‍णु ई हेर कइ बोलु, “हेरे, ए तस जोई कतु परेम कता।” 37पर तेन्हि बुचा, केनि केनि बोलु “एन अन्हे सारेरे, त एस मरण केआं बचाई ना बटताथ ना?”

यीशु लाजार दुबारी जीआण

38यीशु सुआ दुख जुए कब्रे भेएड़ आ। से यक कुड#11:38 यहूदी मेह्‍णु मरो मेह्‍णु कब्र देण जे बोडी बोडी कुड कोरतेथ। तठि लाश जुए मसाला लाई कइ कपड़े अन्तर लिपेटतेथ त तठि छतेथ। जपल से लाश शड़ कइ खतम भोई घेन्तीथ त तसे बचो हलोटे बेहढ़ी कइ यक कुण रखतेथ। त होरी लाश तठि अन्तर छतेथ। थी त तस मुंह पुठ बोडा पठि दुतो थिउ। 39त यीशु बोलु, “पठि उघाड़िण दिए!” त मार्था तस जे बोलु, “ए प्रभु, एस केईआं त अब मुश्क एण लग गो भोल, किस कि एस मरो चोउर रोज पूरे भोई गो असे।” 40यीशु तस जे बोलु, “ए मार्था, ए मार्था! मेईं तोउ जे बोलु नउ ना कि अगर तु विश्वास कती त परमेश्वरे ताकत हेरती।”

41तोउं तेन्हि से पठि उघाड़ छड़ा। त यीशु खड़िया हेर कइ बोलु, “बोउआ, अउं तुं धन्यवाद कता कि तुसी में दुआ शुणो असी। 42मोउं पेहले ईं पता थिआ कि तु हमेशा में दुआ शुणता। पर अउं ए तोउं बोलुण लगो असा कि जे मेह्‍णु इठि असे, से विश्वास करेल कि तुसी अउं लंघो असा।” 43ईं बोल कइ तेन जोरी जुए हक दिती, “लाजारा! बाहर आई।” 44त लाजार जी कइ तठिआ बाहर निस गा। तसे हथ खुर टलि बइ बन्हो थिए त तसे मुंह बि टलि जुए घटो थिउ। यीशु तेन्हि जे बोलु, “अस खोलीण दिए त घेण दिए!”

यीशु मरण जे यहूदी नेती के मेझर

45तपल जे मेह्‍णु मरियम केईं ओ थिए, तेन्हि बुचा सुआ जेईं यीशु ई कम हेर कइ तस पुठ विश्वास किआ। 46पर तेन्हि बुचा कुछ मेह्‍णु फरीसी केईं घेई कइ इस घटनाई बारे तेन्हि बोलु।

47त मुख्य पुजारा त फरीसी, यहूदी मेह्‍णु के टजोट भिआई कइ ब्योरा किआ त बोलु, “ए मेह्‍णु त सुआ चमत्कारे कम करण लगो असा। असी की करुण? 48अगर तस इरुह घेण देन्ते त सम्हाई मेह्‍णु ‘मसीह’ समझ कइ तस पुठ विश्वास कते। त रोमी सेना एई कइ हें देहेर त असी सम्हाई मुकाई छती।”

49तोउं तपले बोडा पुजारा काइफे तेन्हि जे बोलु, “तुसी कुछ पता नेईं। 50तुसी कि ए ठीक ना लगतु ना कि हें सम्हाई मेह्‍णु मरणे बदले यके मेह्‍णु मरे, हाँ?” 51(ई बोक तेन अपफ नेईं बोलु, पर तेस साले बोडा पुजारा भुणे खातिर तेन भविष्य वाणि की कि यीशु ना सद यहूदी मेह्‍णु जे मरता। 52पर, पूरे धरती अन्तर जे सम्हाई परमेश्वरे गभुर असे, तेन्हि जे बि मरता ताकि से सम्हाई यक भोई गो लौते।#यूहन्ना 6:37,40; 10:16)

53त तिखेईं केईआं खड़ यहूदी नेते तस मरणे मेझर करण लगे। 54तोउं त, तढ़ेया पता यीशु खुल कइ ना हंटा; पर से तठिआ घेई कइ अरुणि धारे भेएड़, इफ्राईम नओएं यक ग्रां जे गा त अपु चेली जुए तठि बिशुण लगा।

55तपल यहूदी मेह्‍णु के बचणे त्योहार नीड़ा एई गो थिआ त इएर-ओवर केआं सुआ मेह्‍णु यरुशलेम जे गे, ताकि बचणे त्योहार मनाण जे अपु रीति रिवाज जुए अपफ शुचा करे। 56-57पर मुख्य पुजारे त फरीसी, मेह्‍णु जे निआंग दुतो थी “अगर तुसी बुछ केसे बि पता लगाल कि यीशु कोठि असा, त असी जे जवाब दिए, ताकि अस तेस टाइ बटुं।” त जपल मेह्‍णु देहेर पुजे त तठि यीशु तोपते तोपते अपफ बुच बोलुण लगे, “तुस की सोचते, से त्योहार जे एन्ता नउ ना?”

Currently Selected:

यूहन्ना 11: pgg

Highlight

Copy