मारकुस 14
14
येसु सेॽमा यक्मिम्पा
(मट्टि २६:१-५; लुका २२:१-२; युहान्ना ११:४५-५३)
1ह हिच्चि डिना डॆङ्पि फाक्मे लोमॆ चाडा नुङ् सिढा माठुमिम्पा चारेपा चामॆ चाडा टामिम्पा लॆटा। ढ्या याटाङ्पाचि हाङ् मोसामि यायेॽमा चिन्खुबाचिऎ येसु मान्टहाङ् खुनिङ्म सेॽमॆ कामानुङ् चोप्मे पाइटुचि। 2टर खोचि गर कासामि, “कानिऎ खो चाडाबि चाइ सेॽमा फॆन्नि, मान्ठाभनॆ याॽमिचिम् लुम्पि ढ्या याटक्माटक् सङ्क लिहि।”
येसु केवा टिबिॽमिम्पा
(मट्टि २६:६-१३; युहान्ना १२:१-८)
3आक्रल येसु बेठानिया लोमॆ गाँवाँबि याॽल साखक्मि टुक्खाऎ लाॽमिम्पा एक्क सिमोन लोमॆ याॽमिमि खिम्पि टाआ। आक्कुबि खो नॆन्से चामा चामॆ सिसार एक्क मेॽनुङ्मा सिङ्गरमरमि#१४:३ ग सिङ्मरमरमि हारपॆक् लोमॆ चाइ आक्रल याॽमिचिऎ मिस्र हाङ्टेम्बाङ् लाःटॆम्पा बिॽमा हाङ् पाहॆँलः काम्नुऎ लुङ्कॽवाबाङ् हारपॆक् मुयुक्सुचि, सिङ्मरमर लोमॆ मन। हारपॆक्बि डिरिक् याङ् सिऎ जाटामासिमि नाम्नुऎ केवा खिम्मानुङ् टाआ। हाङ् खोसॆ आक्क हार्पॆक् पक्मानुङ् आक्खा केवा येसुमि निङ्टवाँबि होटिसु। 4टर आक्कुबि सोरि चुखुबा एक्क हिप्पा याॽमिचि म योम्पक्बाङ् सोम् खेरामि हाङ् टाङ्पाटाङ्पाबि गर कासामि, “गर डिरिक् याङ् सिऎ नाम्नुऎ केवा मान्ठा मरक्न होमिम्पा? 5मान्ठाभनॆ ग सुकग् सिःमि ढॆक्काबाङ्#१४:५ ग लोमिम्पा चाइ एक्क निङ् बराबोरिऎ नाम्याक रेम। सङ्क डिरिक् याङ्पि इन्चामाहाङ् आक्क याङ् माङ्स माआमिहा याॽमिचि हाबिॽमा नुःसा” आक्र कामानुङ् खोचिऎ आक्क मेॽनुङ्मा वोसुचि।
6टर येसुऎ आक्खाचि लोसुचि, “चुमिटाम्नॆ, मान्ठा आन्ना खो नुङ् ङॆनुकानिहा? खोसॆ काम् लागि काम्नुऎ योम्पक्न यिःक्डु। 7मान्ठाभनॆ माङ्स माआमिहा याॽमिचि ग आन्नामि लुम्पि हानाम्स लिढाङ्मि। हाङ् आन्नॆ मिॽमिम्पा बेला खोचि नुःर लेःॽहिकाम्चिनि। टर काग आन्नानुङ् हानाम्स लिढाङ्ङानि। 8खोसॆ माङ् लॆहिसु, मन लॆटु। खोसॆ ग नाम्नुऎ केवा सिःॽमानुङ् का येःॽमाबि लाखॆॽमाबाङ् याॽलन खोसॆ काम् सालुङ् हुम्माम् लागि परक्डु। 9चाइबान कॆ आन्ना लोकानि, बाखाटेम्पि हाबिहाबि नुऎ खानावाँ खेम्मि, आक्खा चोब्न ठालबि ग मेॽनुङ्मा मिॽलामाम् लागि खोसॆ यिक्मिम्पा ग योम्पक् सङ्क खेम्मि।”
याहुडाऎ येसु लाॽमिॽमा परक्मिम्पा
(मट्टि २६:१४-१६; लुका २२:३-६)
10हाङ् एपङ्हि टिङ्खुबाचिबाङ् याहुडा इस्कारियोटि लोमॆ टिङ्खुबा चाइ येसु लाॽमॆ खानावाँ टङ्सि ढ्या याटाङ्पाचिबि खारा। 11याहुडामि खानावाँ खेमुचिहाङ् ढ्या याटाङ्पाचि एट्टान चेन्चाआमि हाङ् आना याङ् पिक्खाचिम् कामानुङ् लोसुचि। आक्कबाङ् याहुडाऎ येसु लाॽमिॽमॆ लाम् यक्पकु।
येसुमि खोम् टिङ्खुबाचि नुङ् डॆङ्पिऎ भोजा
(मट्टि २६:१७-३०; लुका २२:७-२३; युहान्ना १३:२१-३०)
12सिढा माठुमिम्पा चारेपा चामॆ चाडामि याॽलऎ डिना टामिम्पा लॆटा। म डिना इस्राएलिचिऎ फाक्मॆ चाडामि सामुङ्मि पाठा सङ्टिॽयुक्सुचि। येसुमि टिङ्खुबाचिऎ खो सिमुचि, “काङ्कॆ आनाम् लागि हाबि खॆॽमाहाङ् फाक्मिम्पा चाडामि भोजा टङुचिर मिन्नॆ?”
13हाङ् येसुऎ खोम् हिप्पा टिङ्खुबाचि गर लोमानुङ् पाङ्हाङ्सुचि, “हाटाबि खाराचॆ, आक्कुबि पोरोम्पि योवा खिम्मानुङ् खॆॽमे पाइऎ एक्क याॽमिऎ आन्चिना चुबुक्चि। आन्चिना खोम् डॆङ्डॆङ् खाराचॆ। 14हाम्पिऎ खिम्पि आक्क याॽमि भॆनुक्, आक्क खिम्पिऎ टुङ्घङ्पा गरहाङ् लोसाचॆ, ‘चिन्खुबाऎ काङ्का गरहाङ् लोहाङ्डिङ्का, खोम् टिङ्खुबाचि नुङ् फाक्मिम्पा चाडामि भोजा चाठाम् टाबाङ्चिम् कोठा हाबि चुऎ?’ 15खोसॆ आन्ना सङ्पिटुऎ टालाबि एक्क काम्नुःर चाक्मिम्पा ढ्या कोठा खाङ्मिकानि। आक्कुबिॽन कानिम् लागि भोजामि चोब्न खानावाँ टङाम्नॆ।” 16हाङ् टिङ्खुबाचि आक्कबाङ् खाइटाचि हाङ् हाटाबि टाआचि। खोचिऎ येसुऎ लोमिम्पा रक्मान चुबाचु हाङ् आक्कुबिॽन फाक्मिम्पा चाडामि भोजा टङाचु। 17नाम् किक्खॆमार येसु खोम् एपङ्हि टिङ्खुबाचि नुङ् आक्कुबि टाआ। 18नॆन्से भोजा चामेपाइमार येसुऎ लोसुचि, “चाइबान कॆ आन्ना लोकानि, आन्नामि लुम्पिॽन कानुङ् चाखुबा एक्कसॆ काङा बङ्सिःॽङा।” 19येसुमि गरक्मा खानावाँ खेमुचिहाङ् खोचि डुखा मिनामि हाङ् “माल आक्क काङा हॆ?” कामानुङ् एक्क एक्क लॆःॽमानुङ् चोप्पसॆ सिमुचि।
20येसुऎ आक्खाचि लोसुचि, “हिपङ्हिबि एक्कसॆ आक्र लॆःॽङा, खोसॆ कानुङ्न चारेपा ठालबि सक्मे सिकु। 21मान्ठाभनॆ याॽमिमि पासा ग निवाँनेन् साब्चिराबि साॽमिम्पा रक्न खॆॽमान लॆ, टर याॽमिमि पासा बङ्सिखुबा आक्क ढिक्कारा! आक्क ग जान्मन मालिग काम्नुऎ लिखुबा लॆटा।” 22हाङ् खोचिऎ चामेपाइटामिर येसुऎ चारेपा याङ्से निवाँहाङ् ओहाक् पिट्टु हाङ् योबु हाङ् हाबिसे लोसुचि, “ग लासाम्नॆ, ग काम् सालुङ् यो।” 23हाङ् खोसॆ खरॆ सङ्क याङुहाङ् निवाँहाङ् ओहाक् पिट्टु हाङ् टिङ्खुबाचि पिट्टुचि हाङ् खोचि चोप्पसे मबाङ् डुङुचि। 24हाङ् येसुऎ आक्खाचि लोसुचि, ग काम् हारिमि चुप्लाङ् यो, ग डिरिक् याॽमिचिम् लागि अङ्मि। 25चाइबान कॆ आन्ना लोकानि, “निवाँहाङ्मि हाङ्डाम्पि उम्चङ् गारि माडुङ्ल ढारि कॆ हस आङ्गुरमि खॆवा डुङ्ङानि।” 26आक्क डॆङ्पि एक्क साम् इसामि हाङ् जाइटुन लोमॆ पङ्पङ्मा पोट्टा खारामि।
येसुऎ टिङ्खुबाचि आन्नॆ काङा याइङानि लोमिम्पा
(मट्टि २६:३१-३५; लुका २२:३१-३४; युहान्ना १३:३६-३८)
27हाङ् येसुऎ टिङ्खुबाचि लोसुचि, आन्नॆ चोप्पसॆ काङा याइडाङानि, मान्ठाभनॆ निवाँनेन् साब्चिराबि गरहाङ् साब्डा,
“कॆ कुखुबा चाइ रःग्सिकुङ्
हाङ् चोब्न सामुङ्चि पिल्लिङ्खॆःॽमि।#जाकारिया १३:७
28“टर काङा सिखॆम्पाबाङ् हिङ्पङा हाङ् आन्नाबाङ् याॽल गालिलबि खॆःॽङा।” 29आक्रल पाट्रुसऎ येसु लोसु, “चोप्पासॆ आना याइमि हाङ्सङ्क कॆ चाइ आना याइडानानि।”
30येसुऎ खो लोसु, “चाइबान कॆ आना लोक्ना, आइयुटा हिच्चिखॆपा हेॽवा अःग्माबाङ् याॽलन आनॆ काङा सुम्चि खेपा खो लेनलेङानि कामानुङ् बङ्सिॽङाना।” 31टर पाट्रुसऎ लोसु, “आक्र लॆन लॆःॽङानि, आनानुङ् सिखॆॽमा सिट्टा हाङ्सङ्क कॆ आना बङ्सिॽनानि।” हाङ् चोब्न टिङ्खुबाचि सङ्क आक्रक्न कासामि।
गेटासमनि चोप्लिङ्पि येसुमि पारठाना
(मट्टि २६:३६-४६; लुका २२:३९-४६)
32आक्क डॆङ्पि येसु हाङ् खोम् टिङ्खुबाचि गेटसमनिबि खारामि। हाङ् येसुऎ खोम् टिङ्खुबाचि लोसुचि, “काङॆ पारठाना लॆःॽलढारि आन्ना गुबिॽन पेयाकानॆ।” 33खोसॆ पाट्रुस, याकुब हाङ् युहान्ना चाइ खोनुङ् सोरि चिखॆटुचि। हाङ् येसु निवाँबि एट्टान डुखाऎ चाइखॆपक्कु। 34हाङ् खोसॆ आक्खाचि लोसुचि, “लुङ्मान पक्बम्पार काम् निवाँ टुःग्डा। आन्ना गुबिन नुःर पेनानॆ।” 35हाङ् खो चाइ मिःक्म मॆअङ् खाइमानुङ् “नुक् हाङ्ग टाङ्पाबि टामा परक्मिम्पा डुखा ऎटार” कामानुङ् पारठाना लॆपका। 36खो गर कासा, “आपो, आपो, आनॆ चोब्न योम्पक् लॆहिकुना। ग डुखामि खरॆ काबाङ् लाराङ्पिॽङॆ। हाङ्स काङाम् निवाँर हॆॽनॆ टर आनाम् निवाँर लिर।”
37हाङ् येसु टिङ्खुबाचि चुःक्मिहा ठालबि ऎम्पक्मार, आक्खाचि इम्टिखॆम्पा खाङ्टकुचि हाङ् पाट्रुस लोसु, “ओ सिमोन, माल आना इम्टिखॆडानॆ? एच्छक् सङ्क नुःर पेन्हिनानॆ? 38टामा परक्मिम्पा डुखामि लःबि हिङ्वाबि ऎसिट्टियॆ कामानुङ् नुःर पेन्मानुङ् पारठाना लॆटानॆ। चाइबान लावा ग परक्डा टर सालुङ्ऎ चाइ हेसुनि।”
39येसु फेरि सङ्क खाइटा हाङ् याॽलऎ रक्न पारठाना लॆटा। 40हाङ् येसु फेरि सङ्क खोचिबि ऎन्टामार इम्टिखॆम्पा भॆट्टकुचि। उम्चि मिक् इम्मॆ माःप्फॆम्पा लॆटा हाङ् येसु माङ् लोमॆ कामानुङ् माङ्स मालोहिसुचि।
41येसु सुम्चि खॆपा खोचि चुक्मिहा ठालबि ऎन्टाआ हाङ् लोसुचि, “माल् आन्ना हस इम्चासे नाचामे पाइकानिहा? ह इम्चामे बेला लुक्खारा। याॽमिमि पासा हिङ्वा याॽमिचिम् हुक्पि सिॽमे लः साप्खॆटु। 42पगानॆ, खारियॆ! काङा बङ्सिखुबा याॽमि टाखॆडा।”
येसु लाॽमिम्पा
(मट्टि २६:४७-५६; लुका २२:४७-५३; युहान्ना १८:३-१२)
43येसुऎ खानावाँ इभॆॽमा रक्न हिपङ्हि टिङ्खुबाचिबिऎ एक्क याहुडा लोमॆ टिङ्खुबा आक्कुबि खाङ्मुसा। खोनुङ् टोम्राङ् हाङ् फेया खिन्मिम्पा होइढा ओइर याॽमिचि सङ्क चुआमि। खोचि ढ्या याटाङ्पाचि, मोसामि यायेॽमा चिन्खुबाचि हाङ् पासिङ्चिऎ पाङ्हाङ्पा लॆटुचि। 44बङ्सिखुबा याहुडाऎ येसु लाप्खुबाचि गरक्मा चिन्ना पिॽमिम्पा लॆटुचि, “हाम्पॆ चाइ कॆ चुप्पा लॆःॽमानुङ् स्यामिकुङ् आक्कन येसु यो, आक्क लाबाम्नॆ हाङ् नुःर खाङ्मानुङ् लाखॆटाम्नॆ।” 45हाङ् याहुडा येसुबि मरक्लन खाराहाङ् “चिन्खुबो” लोमानुङ् चुप्पा लॆसॆ स्यामिटु। 46हाङ् खोचिऎ येसु लाबुचि। 47टर आक्कुबि येप्ढाङ्पा एक्कसॆ सुबिःक्ट फेया बिःक्पकु हाङ् चोब्बाङ् ढ्या याटाङ्पामि योम्पक् मुबिखुबा याॽमि बगु हाङ् उम् नाबाक्न चॆॽलाङ्पिट्टु।
48येसुऎ खो लाप्खुबा याॽमिचि लोसुचि, “माल् काङा लुप्चाङा हॆ हाङ् आन्ना फेया नुङ् टोम्राङ् खिन्मानुङ् काङा लाप्सि टाडानिहा? 49काङॆ डिनाहु निवाँहाङ्मि खिम्पि चिन्मार आन्नाम् लुम्पिॽन चुइङ्, आक्रल मालाप्ङानि टा! टर निवाँनेन् साब्चिराबि साप्मिम्पा खानावाँ मान्ट हाङ्स लिर।” 50आक्रलन चोब्न टिङ्खुबाचिऎ येसु याइडाउचि हाङ् पिल्लिङ्खारामि।
51हाङ् सुटिमि एक्क टेःॽन चे चाङ्मिम्पा एक्क वेन्चा याॽमिऎ येसु टिङु। हाङ् याॽमिचिऎ आक्क सङ्क लाप्टिटुचि। 52टर आक्कसॆ उम् चेन याइडाउ हाङ् चे मॆड्डिङ् पिल्लाह्रा।
याहुडि टुङ्घङ्पाचि खोम्ठिखॆॽमिम्पा
(मट्टि २६:५७-६८; युहान्ना १८:१३-१४)
53खोचिऎ येसु चोब्बाङ् ढ्या याटाङ्पामि खिम्पि लाखॆटुचि। आक्कुबि ढ्या याटाङ्पाचि, मोसामि यायेॽमा चिन्खुबाचि हाङ् होइढा टुङ्घङ्पाचि खोम्टि खारामि। 54पाट्रुसऎ चाइ येसु मॆअङ्बाङ्न टिङ्खॆटुहाङ् चोब्बाङ् ढ्या याटाङ्पामि खिम्मि पालुम्पि निवाँहाङ्मि खिम् हुङ्खुबाचिनुङ् मिः हुङ्चाबक्का।
55हाङ् चोब्बाङ् ढ्या याटाङ्पाचि हाङ् याहुडि टुङ्घङ्पाचि खोम्ठाम् ठालबिहा चोप्पसॆ येसु सेॽमान लॆ कामानुङ् चुमॆक्सङ् यक्पकुचि, टर खोचिऎ येसुबि माङ्स काइसॆ माभॆट्टकुचि। 56मान्ठाभनॆ येसु काइर लॆःॽमाम् लागि डिरिक् याॽमिचिऎ हुन्नहा चुमॆक्सङ् इसुचि, टर उम्चि लुम्पिॽन खानावाँ मॆटङ। 57हाङ् ऎॽवा याॽमिचि चाइ पगामिहाङ् गर कामानुङ् येसुमि लागि हुन्नऎ चुमॆक्सङ् पिट्टुचि, 58“गसॆ गरक्मा यामुमिम्पा काङ्कॆ खेमुङ्का, ‘याॽमिमि हुगॆ हेॽमिम्पा ग निवाँहाङ्मि खिम् कॆ योराङ्कुङ् हाङ् हुगॆ मामुम्मिपा होइक निवाँहाङ्मि खिम् कॆ सुम्चि डिनाबि हेबुकुङ्’।” 59हाङ्स उम्चि खानावाँ मॆटङ।
60हाङ् चोब्बाङ् ढ्या याटाङ्पा चोब्नमि लुम्पि येप्पकाहाङ् येसु लोसु, “खोचिऎ आना आब्डिक् टिमिम्पा खानावाँबि आनाम् माङ्स खानावाँ माऎ?” 61टर येसु यङ् उग्मानुङ् माङ्स मॆका। हाङ् फेरि सङ्क चोब्बाङ् ढ्या याटाङ्पाऎ सिमु, “माल् आना आसिका नुङ्मामि पासा खिरिस्ट ना हॆटा?” 62हाङ् येसुऎ लोसु, “एम काङान टा, हाङ् इॽया आन्नॆ याॽमिमि पासा चोब्बाङ् चॆकुवॆ निवाँहाङ्मि चुप्ठिङ् पोट्टा पेन्मिम्पा हाङ् नाम्फॽलिॽवामि खिन्दुमानुङ् टामिम्पा खाङ्ङानि।” 63ग खेमुहाङ् चोब्बाङ् ढ्या याटाङ्पाऎ उम् चे नाग्मानुङ् लोसु, “ह कानि होइक माङ् चुमॆक्सङ् पाब्किहा? 64गसॆ निवाँहाङ्मि नाबुक् वॆम्पिम्पा ग खेम्इटाम्नि। लु इसाम्नॆ, आन्ना माङ् मिङ्कानिहा?” हाङ् चोप्पसॆ गग सेॽमान लॆ कासामि। 65हाङ् ऎॽवाचिऎ चाइ खो डुःगुचि हाङ् खोम् मिक् डॆक्पिटुचि हाङ् रःग्से लोसुचि, “आना निवाँहाङ्बाङ् यामुसॆ, लु इसॆ आना आसॆ रगॆ?” हाङ् खो हुङ्खुबाचिऎ खो लाबुचि हाङ् रःगुचि।
पाट्रुसऎ येसु लेङानि लोमिम्पा
(मट्टि २६:६९-७५; लुका २२:५६-६२; युहान्ना १८:१५-१८)
66पाट्रुस मिम्मु पालुम्पि पेन्ढाङ्पा लॆटा। आक्रल चोब्बाङ् ढ्या याटाङ्पामि योम्पक् मुबिखुबा एक्क मेॽनुङ्मा आक्कुबि टाआहाङ् खो खाङ्टकु। 67खोसॆ पाट्रुसऎ मिः हुङ्चाढाङ्पा खाङुहाङ् नुःर खाङ्मानुङ् लोसु, “आना सङ्क नासाराटमि येसु नुङ्न चुआना।”
68टर पाट्रुसऎ आना माल् काग्नॆ, “कॆ आनाम् खानावाँ लेङानि हाङ् वासुवाप्ङानि” कामानुङ् आनॆ लोमिम्पा याॽमि हॆॽङानॆ कासा। आक्क डॆङ्पि खो पालुम्बाङ् आम्पक्से टागार पोट्टा खाइटा। मरक्लन हॆॽवा अःगा।
69आक्क मेॽनुङ्माऎ पाटुस खाङ्टकुहाङ् फेरि आक्कुबि येप्ढाङ्खुबाचिनुङ् लोसु, “ग खोचिबाङ्ऎ ऎक्क ङिक।”
70टर पाट्रुसऎ फेरि सङ्क हॆॽङानॆ कासा। ऎच्छहाङ् आक्कुबि येप्खुबाचिबि एक्कसॆ पाट्रुस लोसु, “चाइबान आना खोचिबाङ्ऎ एक्क याॽमिना, मान्ठाभनॆ आना सङ्क गालिलिन।”
71टर फेरि सङ्क पाट्रुसऎ किरे डेन्से लोसु, “काङॆ ढाटु बङ्चाम्पा हाङ्ग निवाँहाङ्मि डान्डा काबि सिॽल, चाइबान कॆ आन्नॆ इमिम्पा आक्क याॽमि लेङानि।”
72पाट्रुसऎ आक्र लोमा अक्सि होइखेपा सङ्क हॆॽवा अःगा हाङ् हिच्चि खेपा हॆॽवा अःग्मा याॽल आनॆ काङा सुम्चि खेपा लेनलेनानि कामानुङ् बङ्सिङाना कामानुङ् येसुऎ लोमिम्पा खानावाँ पाट्रुसऎ मिट्टकु हाङ् चाइर हाबा।
Currently Selected:
मारकुस 14: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
