मारकुस 13
13
डॆङ्पिहा डिनामि चिन्ना
(मट्टि २४:१-२४; लुका २१:५-१९)
1येसु निवाँहाङ्मि खिम्बाङ् आम्पक्मॆ पाइटार एक्क टिङ्खुबाऎ खो लोसु, “चिन्खुबो, खाङ्लॆ, ऎॽवा डिडढा डिड्ढा लुङ्कॽवा हाङ् खाङ्चामालुहा खिम्।” 2हाङ् येसुऎ लोसु, “आनॆ इघा डिड्ढा डिड्ढा खिम् खाङ्मॆ पाइकुनॆ हॆॽनॆ? इघा खिम्मि लुङ्कॽवा एक्क लुङ्कॽवा सक्पि होइक लुङ्कॽवा सङ्क युङ्नि। आक्खा चोब्न योराङ्ऎछ।”
3आक्क डॆङ्पि येसु निवाँहाङ्मि खिम्मि मॆआरॆङ् पोट्टाऎ जाइटुन लोमॆ पङ्पङ्माबि खारा हाङ् पेन्ढाङ्पा लॆटा। खुप्निङ्म पाट्रुस, याकुब, युहान्ना हाङ् आन्डेरेयास लोमॆ खोम् टिङ्खुबाचि टाआमिहाङ् सिमुचि, 4“काङ्का लोचिमॆ, इघा खानावाँ हानाम् लिऎ हाङ् आनॆ लोमिम्पा खानावाँ लिमा परक्मार चिन्ना चाइ माङ् लिऎ?” 5येसुऎ आक्खाचि लोसुचि, “नुःर पेनानॆ, आसॆस आन्ना आफोप्सिॽमिर। 6डिरिक् याॽमिचि काम निङ्पि ‘काङान खिरिस्टङा’ कामानुङ् टाःक्मि हाङ् डिरिक् याॽमिचि फोप्सिकुचि। 7आन्नॆ याॽमिचि खिमिम्पा टुमिम्पा खानावाँ खेमुकाम्नि हाङ् याॽमिचिऎ आक्रहा खानावाँ खेम्मिकानि। आक्रल आन्ना आकिसिआनॆ मान्ठाभनॆ आक्खा चोब्न लिमान लॆ, टर बाखाटेम् आक्रलन चाइ लुक्खॆॽनि। 8मान्ठाभनॆ एक्क जाटिबिऎ याॽमिचिऎ हॆॽनिबारेक् याॽमिचि नुङ् हाङ् एक्क हाङ्डाम्ऎ होइक हाङ्डाम् नुङ् खिमाटुमा लाबकु। हाङ् हाबि ग हाबि लुग्डिमा खॆ हाङ् आनिकाला सि। चोब्न इघा खानावाँ ग मेॽनुङ्मामि चाचा टक्मॆ लः लिबक्मिॽमिम्पा डुखा रक्मा टेःॽन रेम।
9“आन्ना चाइ नुःर पेनानॆ, मान्ठाभनॆ याॽमिचिऎ आन्ना लाबुकानि हाङ् न्यायॆ लॆठाम ठालबि लाखॆकानि। हाङ् याहुडिचि खोम्ठाम् खिम्पि रःग्मा टुम्चाकानि। आन्नॆ काङा निवाँयुङ् लॆःॽमिम्पासॆन आन्ना टुङ्घङ्पाचिम् नुङ् हाङ्चिम् ङारिङ्पि न्यायॆमि लागि येॽमा सिकानि। आक्रल आन्नॆ काम् चुमॆक्सङ् पिॽमा लॆ।
10“हाङ् बाखाटेम् लुक्खॆॽमाबाङ् याॽल चोब्न जाटिबिहा याॽमिचि नुऎ खानावाँ खेम्मिॽमान लॆःॽमि। 11खोचिऎ आन्ना न्यायॆमि लागि लाप्खॆमिर माङ् यामुमॆ कामानुङ् याॽलन आकिसिआनॆ। आक्रल उम्चि लुम्पि यामुमा लागि आम्नि याबि माङ् पिः म खानावाँन यामुसानॆ, मान्ठाभनॆ आक्रल आन्ना यामुसानिनि, टर सॆङ्सॆङॆ लावा आन्नाबाङ् यामु।
12“एक्क नुसाऎ होइक उम् बुबुनुसा सेॽमिकु। आक्रहाङ्न आपाऎ टाङ्पाम् पासा हाङ् पासॆ चाइ खोम् आपाआमाचि आब्डिक् टिकुचि हाङ् सेॽमिकुचि। 13हाङ् काङाबि निवाँयुङ् लॆःॽमिम्पासॆ आन्ना चोप्पसॆ सिच्चाक्मि। टर डॆङ्पिढारि निवाँयुङ् लॆखुबाचि चाइ हिङ्पॽमि।
किॽमालुऎ लःमि खानावाँ
(मट्टि २४:१५-२८; लुका २१:२०-२४)
14“ऎलिमालॆऎ ठालबि आन्नॆ नासॆलॆखुबा चिःक्सिमा लुऎ खानावाँ खाङ्टकाम्नि। (गसॆ लोमा यकुवॆ खानावाँ पाढालॆखुबॆ वाबुर)। आक्रल याहुडियाबि चुखुबाचि पङ्पङ्मा पोट्टा खुरॆॽमिर।#डानियाल ९:२७; ११:३१; १२:११ 15खिम्मि सङ्पिटु चुखुबा याॽमि माङ्माङ् लासि ऎयुर हाङ्खिम् हङ्सिॽयु आभॆन्ल। 16हाङ् रोपाबारिबि चुखुबा याॽमि उम् चाङ्माहा चे लासि ऎऎन्पक्ल। 17आक्रल बक्खिरिॽमा हाङ् मिःछुॽमा चाचा चुखुबा मेॽनुङ्माचिम् चाइ एट्टान डुखा लि! 18गरक्मा खानावाँ चुङ्पि आसिॽल कामानुङ् निवाँहाङ् नुङ् पारठाना लॆटानॆ। 19मान्ठाभनॆ आक्रक्मा डुखा ग निवाँहाङ्ऎ लॆःॽमिम्पा सिरिस्टिमि सुरुबाङ् हढारि मालिटि हाङ् डॆङ्पि सङ्क लिनि। 20निवाँहाङ्ऎ आक्खा डुखामि डिना मिःक्म मामुम्पा हाङ् माचेनुग आसास आहिङ्चाखुबा लॆटामि। टर खोसॆ सॆःक्मिम्पा याॽमिचिम् लागि खोसॆ आक्खा डिना चेन्डु।
21“आक्रल आन्ना खिरिस्ट ग गुबि चु हाङ् आक्कुबि चु कामानुङ् लोसानि हाङ्ग निवाँयुङ् आलॆटाम्नॆ। 22मान्ठाभनॆ हुन्नहा खिरिस्टचि हाङ् हुन्नहा निवाँहाङ्मि खानावाँ लोखुबाचि आम्पक्मि। हाङ् डिड्ढा डिड्ढा चिन्ना नुङ् आक्खॆॽमा योम्पक् खाङ्कुचि हाङ् हेर निवाँहाङ्ऎ सॆःक्मिम्पाचि सङ्क फोप्सिकुचि। 23मसॆ आन्ना चाइ नुःर पेनानॆ। खाङाम्नॆ, कॆ आन्ना इघा खानावाँ याॽलन लोडानि।”
येसु फेरि टाऎ खानावाँ
(मट्टि २३:२९-३१; लुका २१:२५-२८)
24“टर आक्खा डुखामि डिना लुक्खॆहाङ् नाम् माॽयाक्ट लि हाङ् पाप्पाला ङिमा याइकु। 25साङ्कॆम्माचि नाम्फलिॽवाबाङ् हेड्ढिन्मि हाङ् नाम्फलिॽवाबिहा चॆक्मावा यङ्पकु।#१३:२५ ग नाम्फलिॽवाबिऎ चॆक्मावा लोमॆ चाइ आक्कुबि चुहा चोब्न ठःक हाङ् साइटानमि चॆक्मावा सङ्क लि। मान्ठाभनॆ आक्रक्बेलाऎ याॽमिचिऎ चोब्न नाम्फलिॽवाबिहा साङ्कॆमाचि साइटानमि चॆक्मावाबि चु कामानुङ् निवाँयुङ् लॆःयुङ्सुचि। 26आक्रल डॆङ्पि याॽमिचिऎ याॽमिमि पासा ढ्या चॆक्मावनुङ् हाङ् निङ्लावा नुङ् खिन्डुमाबि टामे पाइमिम्पा खाङ्टकुचि। 27हाङ् खोसॆ निवाँखाटॆखुबाचि पाङ्हाङ्कुचि हाङ् खोसॆ खोबि सॆक्मिम्पा चोब्न याॽमिचि बाखाटेम् नुङ् नाम्फलिॽवामि चोब्न पोट्टाबाङ् खोमुकुचिमि।”
28हाङ् येसुऎ लोसुचि, “छाराक्फुमि बोटाबाङ् ग खानावाँ चिनानॆ। आक्कमि हाँगा नॆक्कॆ लि हाङ् बॆॽलुवाँ बॆॽपकुहाङ् ह ओम्मक् ओम्मक् लिबक् कामानुङ् वाप्टकाम्नि। 29गरहाङ्न कॆ लोमिम्पा इघा खानावाँ लिमिम्पा खाङ्टकाम्नि हाङ् खो मुबिॽन चु कामानुङ् वाप्हिकाम्नि। 30कॆ चाइबान लोकानि, इघा खानावाँ#१३:३० इघा खानावाँ लोमॆ चाइ १३:४ बि सङ्क चु, म रक्न यारुसालेमबिऎ निवाँहाङ्मि खिम् योरॆॽमॆ खानावाँ रेम। मालिबा आच्चेलाहा याॽमिचि सिखॆॽमिनि। 31पारु हाङ् बाखाटेम् लुक्खॆ टर कॆ यामुमिम्पा खानावाँ हानाम्स लुक्खॆॽनि।
नुःर पेन्मॆ खानावाँ
(मट्टि २४:३६-४४; लुका १२:३८,४०)
32“टर आक्क हाम्पॆ डिना हाङ् हानाम्ल लिऎ कामानुङ् आसॆस लेसुचिनि। पारुबिहा निवाँखाटॆखुबाचिऎ हाङ् पासाऎ सङ्क लेङानि, म ग निवाँहाङ् आपाऎ टेःॽन लेकु। 33मसॆ चेन्टुबाङ् लिमानुङ् नुःर पेनानॆ मान्ठाभनॆ आक्क लः हानाम् टाऎ कामानुङ् आन्नॆ लेसाम्निनि।
34“आक्क ग योम्पक् मुखुबाचि एक्क एक्क योम्पक् टिडामानुङ् एक्क चाइ नुःर खिम् हुङो कामानुङ् टुङ्घङ्पा चाइ बाहिरा खाइहाङ्पा रक्मा रेम। 35मसॆ आन्ना नुःर पेनानॆ मान्ठाभनॆ टुङ्घङ्पा नाम्किॽखॆॽर, युटा, सेन्टाराम्पा, नाम्समाक्नि हानाम् टाऎ कामानुङ् लेसाम्निनि। 36खो टाटिखॆॽमार आन्ना इम्टिखॆॽमिम्पा आचुप्मिर। 37कॆ आन्ना माङ् लोडानि, म खानावाँ चोब्न याॽमिचि लोकुङ्चि, नुःर पेनानॆ।”
Currently Selected:
मारकुस 13: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
