मारकुस 15
15
येसु पिलाटसमि ङारिङ्पि
(मट्टि २७:१-२; ११-२६; लुका २३:१-५)
1नाम्सङ् माक्मि ढ्या याटाङ्पाचि, टुङ्घङ्पाचि, मोसामि यायेॽमा चिन्खुबाचि हाङ् याहुडि टुङ्घङ्पाचि खोम्ठाम् ठालबिहा चोब्न याॽमिचि खानावाँ इसामि हाङ् येसु हिगुचि हाङ् पिलाटसबि टॆटुचि। 2पिलाटसऎ येसु “माल् आना याहुडिचिम् हाङ्ना हॆटा?” कामानुङ् सिमु। येसुऎ खो लोसु, “आनान आक्र काग्ना।” 3ढ्या याटाङ्पाचिऎ येसु डिरिक् खानावाँबि आब्डिक् टिसुचि। 4हाङ् पिलाटसऎ येसु फेरि लोसु, “माल् आना माङ्स कानानॆ? खाङॆ खोचिऎ आना ऎॽवा आब्डिक् टिमॆ पाइमि।” 5टर येसुऎ माङ्स खानावाँ माऎनु। ग खाङुहाङ् पिलाटसन आक्खॆटु।
6टर फाक्मॆ चाडाबि याॽमिचिऎ ङाग्मिम्पा एक्क सॆक्ढिङ्खॆम्पा याॽमि पिलाटसऎ लेहाङ्युक्सु। 7हाङ् आक्रल एक्क बाराब्बा#१५:७ बाराब्बामि आरठा चाइ आपामि पासा ह। बार लोमॆ चाइ पासा हाङ् आब्बा लोमॆ चाइ आपा रेम। लोमॆ याॽमि सङ्क सॆक्ढिङ्खॆम्पा लॆटा। मान्ठाभनॆ आक्कसॆ खिमाटुमॆ लिमार याॽमिचि नुङ् टङ्से याॽमि सेॽमिम्पा लॆटा। 8हाङ् याॽमिचि कारामि हाङ् पिलाटस गर लोसुचि, “याॽलि रक्न आनिङ् सङ्क एक्क सॆक्ढिङ्खॆम्पा याॽमि लेहाङ्पिॽमा।” 9हाङ् पिलाटसऎ आक्खाचि लोसुचि, “मरहाङ्ग माल् याहुडिचिम् हाङ् लेहाङ्मॆ टा?” 10मान्ठाभनॆ ढ्या याटाङ्पाचि येसु नुङ् खोस् खेॽमिम्पासॆ खोबि टॆःॽमिम्पा कामानुङ् पिलाटसऎ वाप्मिम्पा लॆटा।
11टर ढ्या याटाङ्पाचिऎ याॽमिचि चोम्पकुचि हाङ् येसु हॆॽनॆ टर बाराब्बा लॆहाङ्से कामिटुचि। 12फेरि पिलाटसऎ आक्खाचि सिमुचि, “आन्नॆ याहुडिचिम् हाङ् लोमिम्पा याॽमि चाइ कॆ माङ् लॆःॽमॆ टा?” 13खोचिऎ फेरि ढ्या साम्लाबि लोसुचि, “आक्क कुरुसाबि कॆङ्ढाङ्सॆ।” 14टर पिलाटसऎ आक्खाचि सिमुचि, “हॆॽनि, गसॆ माङ् काइसॆ योम्पक् यिःक्डुवॆ?” आक्खाचि याॽलऎ बाङ्स ढ्या साम्लाबि “आक्क कुरुसाबि कॆङ्ढाङ्सॆ” कामानुङ् कासामि। 15पिलाटसऎ याॽमिचि चेन्चामिॽमाम् लागि बाराब्बा लेहाङ्सु। हाङ् येसु कर्रा टिसे कुरुसाबि कॆङाम्नॆ कामानुङ् उम्चि हुक्पि पिट्टुचि।
टिलिङ्गाचिऎ येसु इचामिम्पा
(मट्टि २७:२७-३१; युहान्ना १९:२-३)
16टिलिङ्गाचिऎ येसु रोमिचिऎ न्यायॆ लॆठाम् ठालबि लाखॆटुचि। हाङ् होइढा चोब्न टिलिङ्गाचि सेःरुचि। 17खोचिऎ येसु हारमक्मक् राङ् लॆऎ चे चाङ्मिटुचि हाङ् चिचिङ्मि टोपि मुसुचिहाङ् निङ्टवाबि खाम्टिटुचि। 18हाङ् खोचिऎ येसु ओ, याहुडिचिम् हाङ् आनाम् जायॆ लिर लोमानुङ् स्यामिटुचि। 19हाङ् डिरिक् खेपा खोचिऎ खो निगाल बाफुमि टोम्राङ्ऎ निङ्टँवाँबि रःगुचि, डुःगुचि हाङ् पुम्पुरुॽवा ठःग्मानुङ् स्यामिटुचि। 20आक्खाचिऎ खो सेम्चाउचिहाङ् हारमक्मक् चेः बिन्पिटुचि हाङ् खोम्न चेः चाङ्टिटुचि हाङ् कुरुसाबि कॆङ्सि बाहिरा लाखॆटुचि।
येसु कुरुसाबि
(मट्टि २७:३२-४४; लुका २३:२६-४३; युहान्ना १९:१७-२७)
21लाम्फुबि खॆॽमे पाइटामिर खोचिऎ कुरेनि लोमॆ ठालबि पेन्खुबा सिमोन लाम्फुबि डाब्मे पाइमिम्पा खाङुचि। खो आलेक्जेन्डार नुङ् रुफासमि आप्पा लॆटा। टिलिङ्गाचिऎ खो येसुमि कुरुसा वोमानुङ् खिन्मिटुचि। 22आक्क डॆङ्पि खोचिऎ येसु गलगाठा लोमॆ ठालबि लाखॆटुचि। (गालगाठा लोमिम्पा चाइ टाक्रक् रेम)। 23आक्कुबि टाआमिहाङ् खोचिऎ येसु मुर्रा ठुमिम्पा आङ्गुरमि खॆवा डुङ्मा पिट्टुचि। टर म येसुऎ माडुङु। 24खोचिऎ येसु कुरुसाबि कॆङुचि हाङ् खोम् चे आसाआसाम् निङ्पि सिऎ कामानुङ् चिठ्ठा टिसुचि।
25खोचिऎ येसु कुरुसाबि कॆङ्मार नाम्सऎ नाङ्चि बाजे लिमिम्पा लॆटा। 26खोमि आब्डिक्मि साब्चिराबि गरहाङ् साप्मिम्पा लॆटा “याहुडिम् हाङ्।” 27खोचिऎ येसु कुरुसाबि कॆङ्मार होइढा हिप्पा खुसुबाङ्चि सङ्क येसुमि चुप्ठिङ् नुङ् बॆङ्सिङ् पोट्टा कॆङुचि। 28#१५:२८ निवाँनेन् साब्चिराबि “खो काइसाचिनुङ् ङॆप्सिखारा” कामानुङ् साप्मिम्पा खानावाँ गरहाङ् पुरा लिसा।
29आक्क लाम् लाम्ढुखुबाचिऎ इचासे उम्चि निङ्टवाँ हुम्से येसु लोसुचि, “खाङाम्नॆ, निवाँहाङ्मि खिम् योराङ्खुबा हाङ् सुम्चि डिनाबि हेप्खुबा! 30कुरुसाबाङ् युढिन्टॆ हाङ् टाङ्पा हिङ्पकॆ।” 31आक्रहाङ्न ढ्या याटाङ्पाचि हाङ् मोसामि यायेॽमा चिन्खुबाचिऎ सङ्क उम्चि टाङ्टाङ्पाबि येसु इचासे लोसुचि, “गसॆ होइढा याॽमिचि ग हिङ्पक्हिसुचि, टर खो चाइ माहिङ्पक्मिहिसु। 32ओ इस्राएलिचिम् हाङ् खिरिस्ट, कुरुसाबाङ् युढिन्टॆ, म काङ्कॆ खाङ्कुङ्का हाङ् निवाँयुङ् लॆखाचिम्।” गरहाङ्न खोनुङ् कुरुसाबि कॆङ्मिम्पाचिऎ सङ्क खो इचाउचि।
येसु सिखॆॽमिम्पा
(मट्टि २७:४५-५६; लुका २३:४४-४९; युहान्ना १९:२८-३०)
33लेन्टाऎ हिपङ्हि बाजेबाङ् सुम्चि बाजेढारि चोब्न ठाल माॽयाक्टऎ डॆगु। 34सुम्चि बाजे फेरा ढ्या साम्लाबि येसु कासा, “इलोइ, इलोइ लामा साबक्ठानि?#खोम्मिम्पासाम् २२:१” ग लोमिम्पा चाइ “ओ काम् निवाँहाङ्, ओ काम् निवाँहाङ्, आनॆ काङा मान्ठा याइमिम्पा?” रेम। 35येसुऎ गरहाङ् याकामिम्पा आक्कुबि येप्ढाङ्खुबा एक्क हिप्पॆ खेमुचिहाङ् कासामि, “खेमाम्नॆ, आक्कसॆ ग एलिया रे सेःॽमे पाइकु।” 36एक्क याॽमि हिरिरि पिन्से खाराहाङ् एक्क टोम्राङ्मि निङ्टवाबि हिक्टिम्पा चेमि पका एट्टान चिक्खॆम्पा आङ्गुरमि खॆवाबि रुमुहाङ् येसुमि याबि टिसे लोसु, “लु खाङुम्यॆ, एलिया टाःहाङ् ग कुरुसाबाङ् युमिकुयॆ रुटा।” 37टर येसुऎ ढ्या साम्लाबि याकामानुङ् सक्मा टेरु।
38आक्रलन निवाँहाङ्मि खिम्पिऎ पार्डा सङ्पिटुबाङ् खुॽमाढारिन नाःग्बकाहाङ् हिच्चि लिसा। 39हाङ् कॆप्पि येप्ढाङ्पा रोमि काप्टानऎ येसुऎ गरहाङ् सक्मा टेॽमिम्पा खाङुहाङ् लोसु, “चाइबान इग याॽमि ग निवाँहाङ्मि पासा लॆटा।” 40आक्खा लिमिम्पा खानावाँ हिप्पा सुम्पा मेॽनुङ्माचिऎ मिउबाङ् खाङ्मे पाइटुचि। आक्खाचि मारियाम मग्डलिनि, मिःछुॽमा याकुब हाङ् योसेफमि आमा मारियाम हाङ् सलोमि लॆटामि। 41खोचिऎ येसु गालिलबि चुमार येसु टिङ्मानुङ् खोम् योम्पक् मुबियुक्सुचि। हाङ् येसु नुङ् यरुसालेम्पि कॆॽमिम्पा होइढा मेॽनुङ्माचि सङ्क चुआमि।
येसुमि सिच्चि येःॽमाबि युङ्मिम्पा
(मट्टि २७:५७-६१; लुका २३:५०-५६; युहान्ना १९:३८-४२)
42म डिना चाइ परक्मॆ डिना लॆटा। म डिना चाइ नाचामॆ डिनामि याॽलऎ डिना लॆटा। हाङ् नाम्स किक्खॆॽमा परक्मिम्पा लॆटा। 43हाङ् आरामाठिया लोमॆ ठालबिऎ एक्क योसेफ लोमॆ याॽमि पिलाटसबि मॆङ्किसिरे खाराहाङ् येसुमि सिच्चि ङागु। खो याहुडि टुङ्घङ्पाचि खोम्ठाम ठालबिऎ एक्क याॽमि लॆटा। हाङ् खोसॆ निवाँहाङ्मि हाङ्डाम्मि लाम्फु खाङ्ढाङ्पा लॆटु।
44येसु सिखारा कामानुङ् खेमुहाङ् पिलाटस आक्खॆटु। खोसॆ काप्टान सेहाङ्सुहाङ् चाइबान येसु सिखॆडॆन हॆटा कामानुङ् सिमु। 45काप्टानऎ येसु चाइबान सिखॆडॆन कामानुङ् लोसु। हाङ् पिलाटसऎ येसुमि सिच्चि योसेफ लाखॆॽमिट्टु। 46योसेफऎ काम्नुऎ सुटिमि चे इन्टॆटु हाङ् येसुमि सिच्चि कुरुसाबाङ् लाढिन्टु। हाङ् खोसॆ लाटॆॽमिम्पा चेऎ काम्नुःर मोमु हाङ् लुङ्कॽवाबि ङाम्भुङ्पा एक्क येःॽमाबि युङु। हाङ् एक्क ढ्या लुङ्कॽवाऎ येःॽमामि या डॆगु। 47मारियाम मग्डलिनि हाङ् योसेफमि आमा मारियामऎ येसु येःॽमाबि युङ्मिम्पा खाङ्मिम्पा लॆटाचु।
Currently Selected:
मारकुस 15: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
